| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
සෙදමොචිකගාථා
Sedamocikagāthā
(1) අවිප්‌පවාසපඤ්‌හාවණ්‌ණනා
(1) Avippavāsapañhāvaṇṇanā
479. සෙදමොචිකගාථාසූති අධිප්‌පායත්‌ථස්‌ස ගම්‌භීරත්‌තා තං චින්‌තෙන්‌තානං විනයධරානං කායෙ සෙදං මොචෙතීති සෙදමොචිකා, සායෙව ගාථා සෙදමොචිකගාථා, තාසු. ‘‘අකප්‌පියසම්‌භොගො න ලබ්‌භතී’’ති ඉමිනා කප්‌පියසම්‌භොගො ලබ්‌භතීති දස්‌සෙති. කප්‌පියසම්‌භොගං දස්‌සෙතුං ‘‘නහාපනභොජනාදී’’ති වුත්‌තං. අනාපත්‌තීති මාතුභික්‌ඛුනියා අනාපත්‌ති. එසා පඤ්‌හාති එත්‌ථ පඤ්‌හසද්‌දො සභාවතිලිඞ්‌ගොති සද්‌දසත්‌ථෙසු (සද්‌දනීතිධාතුමාලායං 16 හකාරන්‌තධාතු; අභිධානප්‌පදීපිකායං 115 ගාථායං) වුත්‌තො, ඉධ ඉත්‌ථිලිඞ්‌ගවසෙන වුත්‌තො. ‘‘පණ්‌ඩිතෙහී’’ති ඉමිනා කුසලස්‌ස කාරණං දස්‌සෙති, පණ්‌ඩිතත්‌තා කුසලොති අධිප්‌පායො. අස්‌සාති පඤ්‌හාය. එතන්‌ති විස්‌සජ්‌ජනං. අස්‌සාති ගාථාය.
479.Sedamocikagāthāsūti adhippāyatthassa gambhīrattā taṃ cintentānaṃ vinayadharānaṃ kāye sedaṃ mocetīti sedamocikā, sāyeva gāthā sedamocikagāthā, tāsu. ‘‘Akappiyasambhogo na labbhatī’’ti iminā kappiyasambhogo labbhatīti dasseti. Kappiyasambhogaṃ dassetuṃ ‘‘nahāpanabhojanādī’’ti vuttaṃ. Anāpattīti mātubhikkhuniyā anāpatti. Esā pañhāti ettha pañhasaddo sabhāvatiliṅgoti saddasatthesu (saddanītidhātumālāyaṃ 16 hakārantadhātu; abhidhānappadīpikāyaṃ 115 gāthāyaṃ) vutto, idha itthiliṅgavasena vutto. ‘‘Paṇḍitehī’’ti iminā kusalassa kāraṇaṃ dasseti, paṇḍitattā kusaloti adhippāyo. Assāti pañhāya. Etanti vissajjanaṃ. Assāti gāthāya.
එකාදස විවජ්‌ජියාති අවිභත්‌තිකනිද්‌දෙසො, එකාදස විවජ්‌ජියෙති අත්‌ථො. තෙන වුත්‌තං ‘‘යෙ’’තිආදි. තෙපීති පිසද්‌දො ගාථායං ලුත්‌තනිද්‌දිට්‌ඨගම්‍යමානභාවං දස්‌සෙති.
Ekādasa vivajjiyāti avibhattikaniddeso, ekādasa vivajjiyeti attho. Tena vuttaṃ ‘‘ye’’tiādi. Tepīti pisaddo gāthāyaṃ luttaniddiṭṭhagamyamānabhāvaṃ dasseti.
අයන්‌ති න්‌හාපිතපුබ්‌බකො භික්‌ඛු. නිම්‌මිතබුද්‌ධන්‌ති බුද්‌ධෙන නිම්‌මිතං බුද්‌ධරූපං.
Ayanti nhāpitapubbako bhikkhu. Nimmitabuddhanti buddhena nimmitaṃ buddharūpaṃ.
විවජ්‌ජියාති එත්‌ථ යකාරො ත්‌වාපච්‌චයස්‌ස කාරියොති ආහ ‘‘විවජ්‌ජෙත්‌වා’’ති. අසීසකං යං තං කබන්‌ධං අත්‌ථීති යොජනා. අසීසකත්‌තා කෙන සරීරෙන ජීවිතං බන්‌ධතීති කබන්‌ධො. යස්‌සාති කබන්‌ධස්‌ස.
Vivajjiyāti ettha yakāro tvāpaccayassa kāriyoti āha ‘‘vivajjetvā’’ti. Asīsakaṃ yaṃ taṃ kabandhaṃ atthīti yojanā. Asīsakattā kena sarīrena jīvitaṃ bandhatīti kabandho. Yassāti kabandhassa.
හීති සච්‌චං. තෙති අභබ්‌බපුග්‌ගලා.
Hīti saccaṃ. Teti abhabbapuggalā.
වාචාති එත්‌ථ යකාරලොපොති ආහ ‘‘වාචායා’’ති. ඉති මෙති එවං මම. එවං වදමානෙ මම වචනන්‌ති යොජනා. අථවා ඉතිමෙති එවං ඉමෙ, එවං වදමානෙ ඉමෙ ජනාති යොජනා. සද්‌දම්‌පීති ඉමිනා ගිරසද්‌දො සද්‌දපරියායොති දස්‌සෙති. හීති සච්‌චං. තුණ්‌හීභූතස්‌ස නිසින්‌නස්‌ස තස්‌ස භික්‌ඛුනොති යොජනා. යදි මනොද්‌වාරෙ ආපත්‌ති නාම නත්‌ථි, එවං සති කස්‌මා ආපජ්‌ජෙය්‍ය වාචසිකන්‌ති වුත්‌තන්‌ති ආහ ‘‘යස්‌මා පනා’’තිආදි. තෙනාති තස්‌මා. අස්‌සාති භික්‌ඛුස්‌ස.
Vācāti ettha yakāralopoti āha ‘‘vācāyā’’ti. Iti meti evaṃ mama. Evaṃ vadamāne mama vacananti yojanā. Athavā itimeti evaṃ ime, evaṃ vadamāne ime janāti yojanā. Saddampīti iminā girasaddo saddapariyāyoti dasseti. Hīti saccaṃ. Tuṇhībhūtassa nisinnassa tassa bhikkhunoti yojanā. Yadi manodvāre āpatti nāma natthi, evaṃ sati kasmā āpajjeyya vācasikanti vuttanti āha ‘‘yasmā panā’’tiādi. Tenāti tasmā. Assāti bhikkhussa.
සාති භික්‌ඛුනී, ආපජ්‌ජතීති සම්‌බන්‌ධො. වුත්‌තප්‌පකාරන්‌ති ‘‘ගාමන්‌තරපරියාපන්‌න’’න්‌ති වුත්‌තප්‌පකාරං.
Sāti bhikkhunī, āpajjatīti sambandho. Vuttappakāranti ‘‘gāmantarapariyāpanna’’nti vuttappakāraṃ.
තාසූති ද්‌වීසු භික්‌ඛුනීසු.
Tāsūti dvīsu bhikkhunīsu.
චතුරො ජනාති එත්‌ථ චතුන්‌නං ජනානං සරූපං දස්‌සෙන්‌තො ආහ ‘‘ආචරියො ච තයො ච අන්‌තෙවාසිකා’’ති . සාහත්‌ථිකාති සහත්‌ථා අවහරිතා. ආණත්‌තියාපීති ආණත්‌තෙන අවහරිතාපි. ඉතරෙසන්‌ති අන්‌තෙවාසිකානං, එකෙකො මාසකොති සම්‌බන්‌ධො. එත්‌ථාති පරිවාරෙ සෙදමොචිකගාථායං.
Caturo janāti ettha catunnaṃ janānaṃ sarūpaṃ dassento āha ‘‘ācariyo ca tayo ca antevāsikā’’ti . Sāhatthikāti sahatthā avaharitā. Āṇattiyāpīti āṇattena avaharitāpi. Itaresanti antevāsikānaṃ, ekeko māsakoti sambandho. Etthāti parivāre sedamocikagāthāyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. අවිප්‌පවාසපඤ්‌හා • 1. Avippavāsapañhā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / (1) අවිප්‌පවාසපඤ්‌හාවණ්‌ණනා • (1) Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අවිප්‌පවාසාදිපඤ්‌හවණ්‌ණනා • Avippavāsādipañhavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අවිප්‌පවාසපඤ්‌හාවණ්‌ණනා • Avippavāsapañhāvaṇṇanā
