| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༧༤. ཨཝིཔྤཝཱསསཱིམཱནུཛཱནནཱ
74. Avippavāsasīmānujānanā
༡༤༣. ཏེན ཁོ པན སམཡེན ཨཱཡསྨཱ མཧཱཀསྶཔོ ཨནྡྷཀཝིནྡཱ རཱཛགཧཾ ཨུཔོསཐཾ ཨཱགཙྪནྟོ ཨནྟརཱམགྒེ ནདིཾ ཏརནྟོ མནཾ ཝཱུལ༹ྷོ ཨཧོསི, ཙཱིཝརཱནིསྶ 1 ཨལླཱནི། བྷིཀྑཱུ ཨཱཡསྨནྟཾ མཧཱཀསྶཔཾ ཨེཏདཝོཙུཾ – ‘‘ཀིསྶ ཏེ, ཨཱཝུསོ, ཙཱིཝརཱནི ཨལླཱནཱི’’ཏི? ‘‘ཨིདྷཱཧཾ, ཨཱཝུསོ, ཨནྡྷཀཝིནྡཱ རཱཛགཧཾ ཨུཔོསཐཾ ཨཱགཙྪནྟོ ཨནྟརཱམགྒེ ནདིཾ ཏརནྟོ མནམྷི ཝཱུལ༹ྷོ། ཏེན མེ ཙཱིཝརཱནི ཨལླཱནཱི’’ཏི། བྷགཝཏོ ཨེཏམཏྠཾ ཨཱརོཙེསུཾ། ཡཱ སཱ, བྷིཀྑཝེ, སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣཏུ། ཨེཝཉྩ པན, བྷིཀྑཝེ, སམྨནྣིཏབྦཱ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
143. Tena kho pana samayena āyasmā mahākassapo andhakavindā rājagahaṃ uposathaṃ āgacchanto antarāmagge nadiṃ taranto manaṃ vūḷho ahosi, cīvarānissa 2 allāni. Bhikkhū āyasmantaṃ mahākassapaṃ etadavocuṃ – ‘‘kissa te, āvuso, cīvarāni allānī’’ti? ‘‘Idhāhaṃ, āvuso, andhakavindā rājagahaṃ uposathaṃ āgacchanto antarāmagge nadiṃ taranto manamhi vūḷho. Tena me cīvarāni allānī’’ti. Bhagavato etamatthaṃ ārocesuṃ. Yā sā, bhikkhave, saṅghena sīmā sammatā samānasaṃvāsā ekuposathā, saṅgho taṃ sīmaṃ ticīvarena avippavāsaṃ sammannatu. Evañca pana, bhikkhave, sammannitabbā. Byattena bhikkhunā paṭibalena saṅgho ñāpetabbo –
‘‘སུཎཱཏུ མེ, བྷནྟེ, སངྒྷོ། ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ, ཡདི སངྒྷསྶ པཏྟཀལླཾ སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣེཡྻ། ཨེསཱ ཉཏྟི།
‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā, yadi saṅghassa pattakallaṃ saṅgho taṃ sīmaṃ ticīvarena avippavāsaṃ sammanneyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣཏི། ཡསྶཱཡསྨཏོ ཁམཏི ཨེཏིསྶཱ སཱིམཱཡ ཏིཙཱིཝརེན ཨཝིཔྤཝཱསཱཡ 3 སམྨུཏི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ། སམྨཏཱ སཱ སཱིམཱ སངྒྷེན ཏིཙཱིཝརེན ཨཝིཔྤཝཱསཱ 4། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā, saṅgho taṃ sīmaṃ ticīvarena avippavāsaṃ sammannati. Yassāyasmato khamati etissā sīmāya ticīvarena avippavāsāya 5 sammuti, so tuṇhassa; yassa nakkhamati, so bhāseyya. Sammatā sā sīmā saṅghena ticīvarena avippavāsā 6. Khamati saṅghassa, tasmā tuṇhī, evametaṃ dhārayāmī’’ti.
ཏེན ཁོ པན སམཡེན བྷིཀྑཱུ བྷགཝཏཱ ཏིཙཱིཝརེན ཨཝིཔྤཝཱསསམྨུཏི ཨནུཉྙཱཏཱཏི ཨནྟརགྷརེ ཙཱིཝརཱནི ནིཀྑིཔནྟི། ཏཱནི ཙཱིཝརཱནི ནསྶནྟིཔི ཌཡ྄ཧནྟིཔི ཨུནྡཱུརེཧིཔི ཁཛྫནྟི། བྷིཀྑཱུ དུཙྩོལཱ༹ ཧོནྟི ལཱུཁཙཱིཝརཱ། བྷིཀྑཱུ ཨེཝམཱཧཾསུ – ‘‘ཀིསྶ ཏུམྷེ, ཨཱཝུསོ, དུཙྩོལཱ༹ ལཱུཁཙཱིཝརཱ’’ཏི? ‘‘ཨིདྷ མཡཾ, ཨཱཝུསོ, བྷགཝཏཱ ཏིཙཱིཝརེན ཨཝིཔྤཝཱསསམྨུཏི ཨནུཉྙཱཏཱཏི ཨནྟརགྷརེ ཙཱིཝརཱནི ནིཀྑིཔིམྷཱ ། ཏཱནི ཙཱིཝརཱནི ནཊྛཱནིཔི དཌྜྷཱནིཔི, ཨུནྡཱུརེཧིཔི ཁཱཡིཏཱནི, ཏེན མཡཾ དུཙྩོལཱ༹ ལཱུཁཙཱིཝརཱ’’ཏི། བྷགཝཏོ ཨེཏམཏྠཾ ཨཱརོཙེསུཾ། ཡཱ སཱ, བྷིཀྑཝེ, སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣཏུ, ཋཔེཏྭཱ གཱམཉྩ གཱམཱུཔཙཱརཉྩ། ཨེཝཉྩ པན, བྷིཀྑཝེ, སམྨནྣིཏབྦཱ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Tena kho pana samayena bhikkhū bhagavatā ticīvarena avippavāsasammuti anuññātāti antaraghare cīvarāni nikkhipanti. Tāni cīvarāni nassantipi ḍayhantipi undūrehipi khajjanti. Bhikkhū duccoḷā honti lūkhacīvarā. Bhikkhū evamāhaṃsu – ‘‘kissa tumhe, āvuso, duccoḷā lūkhacīvarā’’ti? ‘‘Idha mayaṃ, āvuso, bhagavatā ticīvarena avippavāsasammuti anuññātāti antaraghare cīvarāni nikkhipimhā . Tāni cīvarāni naṭṭhānipi daḍḍhānipi, undūrehipi khāyitāni, tena mayaṃ duccoḷā lūkhacīvarā’’ti. Bhagavato etamatthaṃ ārocesuṃ. Yā sā, bhikkhave, saṅghena sīmā sammatā samānasaṃvāsā ekuposathā, saṅgho taṃ sīmaṃ ticīvarena avippavāsaṃ sammannatu, ṭhapetvā gāmañca gāmūpacārañca. Evañca pana, bhikkhave, sammannitabbā. Byattena bhikkhunā paṭibalena saṅgho ñāpetabbo –
༡༤༤. ‘‘སུཎཱཏུ མེ, བྷནྟེ, སངྒྷོ། ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ ཡདི སངྒྷསྶ པཏྟཀལླཾ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣེཡྻ, ཋཔེཏྭཱ གཱམཉྩ གཱམཱུཔཙཱརཉྩ། ཨེསཱ ཉཏྟི།
144. ‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā yadi saṅghassa pattakallaṃ, saṅgho taṃ sīmaṃ ticīvarena avippavāsaṃ sammanneyya, ṭhapetvā gāmañca gāmūpacārañca. Esā ñatti.
‘‘སུཎཱཏུ མེ, བྷནྟེ, སངྒྷོ། ཡཱ སཱ སངྒྷེན སཱིམཱ སམྨཏཱ སམཱནསཾཝཱསཱ ཨེཀུཔོསཐཱ, སངྒྷོ ཏཾ སཱིམཾ ཏིཙཱིཝརེན ཨཝིཔྤཝཱསཾ སམྨནྣཏི, ཋཔེཏྭཱ གཱམཉྩ གཱམཱུཔཙཱརཉྩ། ཡསྶཱཡསྨཏོ ཁམཏི ཨེཏིསྶཱ སཱིམཱཡ ཏིཙཱིཝརེན ཨཝིཔྤཝཱསཱཡ 7 སམྨུཏི, ཋཔེཏྭཱ གཱམཉྩ གཱམཱུཔཙཱརཉྩ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ། སམྨཏཱ སཱ སཱིམཱ སངྒྷེན ཏིཙཱིཝརེན ཨཝིཔྤཝཱསཱ 8, ཋཔེཏྭཱ གཱམཉྩ གཱམཱུཔཙཱརཉྩ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Suṇātu me, bhante, saṅgho. Yā sā saṅghena sīmā sammatā samānasaṃvāsā ekuposathā, saṅgho taṃ sīmaṃ ticīvarena avippavāsaṃ sammannati, ṭhapetvā gāmañca gāmūpacārañca. Yassāyasmato khamati etissā sīmāya ticīvarena avippavāsāya 9 sammuti, ṭhapetvā gāmañca gāmūpacārañca, so tuṇhassa; yassa nakkhamati, so bhāseyya. Sammatā sā sīmā saṅghena ticīvarena avippavāsā 10, ṭhapetvā gāmañca gāmūpacārañca. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཨཝིཔྤཝཱསསཱིམཱནུཛཱནནཀཐཱ • Avippavāsasīmānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཝིཔྤཝཱསསཱིམཱནུཛཱནནཀཐཱཝཎྞནཱ • Avippavāsasīmānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཝིཔྤཝཱསསཱིམཱནུཛཱནནཀཐཱཝཎྞནཱ • Avippavāsasīmānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཝིཔྤཝཱསསཱིམཱནུཛཱནནཀཐཱཝཎྞནཱ • Avippavāsasīmānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༧༤. ཨཝིཔྤཝཱསསཱིམཱནུཛཱནནཀཐཱ • 74. Avippavāsasīmānujānanakathā
