| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
авиббаваасасиймаануж̇аананагат̇аа
Avippavāsasīmānujānanakathā
143. анд̇хагавинд̣̇аад̇и рааж̇аг̇ахад̇о г̇аавуд̇ад̇д̇аяз анд̇хагавинд̣̇ам̣ наама, д̇ам̣ убаниссааяа т̇зро васад̇и; д̇ад̇о рааж̇аг̇ахам̣ убосат̇ам̣ ааг̇ажчанд̇о. рааж̇аг̇ахан̃хи баригкибид̇ваа адтаараса махаавихаараа саб̣б̣з згасиймаа, д̇хаммасзнаабад̇инаа нзсам̣ сиймаа б̣ад̣̇д̇хаа, д̇асмаа взл̣уванз сан̇гхасса саамаг̇г̇ийд̣̇аанад̇т̇ам̣ ааг̇ажчанд̇од̇и ад̇т̇о. над̣̇им̣ д̇аранд̇од̇и сиббинияам̣ наама над̣̇им̣ ад̇иггаманд̇о. манам̣ вул̣хо ахосийд̇и ийсагам̣ аббад̇д̇авул̣хабхааво ахоси. саа гира над̣̇ий г̇иж̇жхагуудад̇о од̇арид̇ваа жан̣д̣зна сод̇зна вахад̇и. д̇ад̇т̇а взг̇зна ааг̇ажчанд̇ам̣ уд̣̇агам̣ аманасигаронд̇о т̇зро манам̣ вул̣хо ахоси, на бана вул̣хо, уд̣̇агаб̣бхаахад̇аанисса жийвараани аллаани ж̇аад̇аани.
143.Andhakavindāti rājagahato gāvutattaye andhakavindaṃ nāma, taṃ upanissāya thero vasati; tato rājagahaṃ uposathaṃ āgacchanto. Rājagahañhi parikkhipitvā aṭṭhārasa mahāvihārā sabbe ekasīmā, dhammasenāpatinā nesaṃ sīmā baddhā, tasmā veḷuvane saṅghassa sāmaggīdānatthaṃ āgacchantoti attho. Nadiṃ tarantoti sippiniyaṃ nāma nadiṃ atikkamanto. Manaṃ vuḷho ahosīti īsakaṃ appattavuḷhabhāvo ahosi. Sā kira nadī gijjhakūṭato otaritvā caṇḍena sotena vahati. Tattha vegena āgacchantaṃ udakaṃ amanasikaronto thero manaṃ vuḷho ahosi, na pana vuḷho, udakabbhāhatānissa cīvarāni allāni jātāni.
144. саммад̇аа саа сиймаа сан̇гхзна д̇ижийварзна авиббаваасаа табзд̇ваа г̇ааман̃жа г̇аамуубажааран̃жаад̇и имиссаа гаммаваажааяа уббаннагаалад̇о бадтааяа бхигкуунам̣ буримагаммаваажаа на ваддад̇и. аяамзва хи т̇аавараа ход̇и. бхигкунийнам̣ бана аяам̣ на ваддад̇и, буримааязва ваддад̇и. гасмаа? бхигкунисан̇гхо хи анд̇ог̇аамз васад̇и. яад̣̇и звам̣ сияаа, со зд̇ааяа гаммаваажааяа д̇ижийварабарихаарам̣ на лабхзяяа, ад̇т̇и жасса барихааро, д̇асмаа буримааязва ваддад̇и. бхигкунисан̇гхасса хи д̣̇взби сиймааяо лаб̣бханд̇и. д̇ад̇т̇а бхигкуунам̣ сиймам̣ аж̇жход̇т̇арид̇вааби д̇ассаа анд̇оби бхигкунийнам̣ сиймам̣ самманнид̇ум̣ ваддад̇и. бхигкуунамби бхигкунисиймааяа зсзва наяо. на хи д̇з ан̃н̃аман̃н̃асса гаммз г̇ан̣абуурагаа хонд̇и, на гаммаваажам̣ ваг̇г̇ам̣ гаронд̇и. зд̇т̇а жа ниг̇аманаг̇араанамби г̇аамзнзва сан̇г̇ахо взд̣̇ид̇аб̣б̣о.
144.Sammatā sā sīmā saṅghena ticīvarena avippavāsā ṭhapetvā gāmañca gāmūpacārañcāti imissā kammavācāya uppannakālato paṭṭhāya bhikkhūnaṃ purimakammavācā na vaṭṭati. Ayameva hi thāvarā hoti. Bhikkhunīnaṃ pana ayaṃ na vaṭṭati, purimāyeva vaṭṭati. Kasmā? Bhikkhunisaṅgho hi antogāme vasati. Yadi evaṃ siyā, so etāya kammavācāya ticīvaraparihāraṃ na labheyya, atthi cassa parihāro, tasmā purimāyeva vaṭṭati. Bhikkhunisaṅghassa hi dvepi sīmāyo labbhanti. Tattha bhikkhūnaṃ sīmaṃ ajjhottharitvāpi tassā antopi bhikkhunīnaṃ sīmaṃ sammannituṃ vaṭṭati. Bhikkhūnampi bhikkhunisīmāya eseva nayo. Na hi te aññamaññassa kamme gaṇapūrakā honti, na kammavācaṃ vaggaṃ karonti. Ettha ca nigamanagarānampi gāmeneva saṅgaho veditabbo.
г̇аамуубажаарод̇и баригкид̇д̇асса баригкзбо, абаригкид̇д̇асса баригкзбогаасо. д̇зсу ад̇хидтид̇ад̇зжийвариго бхигку барихаарам̣ на лабхад̇и. ид̇и бхигкуунам̣ авиббаваасасиймаа г̇ааман̃жа г̇аамуубажааран̃жа на од̇т̇арад̇и, самаанасам̣ваасагасиймаава од̇т̇арад̇и. самаанасам̣ваасагасиймаа жзд̇т̇а ад̇д̇ано д̇хаммад̇ааяа г̇ажчад̇и. авиббаваасасиймаа бана яад̇т̇а самаанасам̣ваасагасиймаа, д̇ад̇т̇зва г̇ажчад̇и. на хи д̇ассаа висум̣ нимид̇д̇агид̇д̇анам̣ ад̇т̇и, д̇ад̇т̇а сажз авиббаваасааяа саммуд̇игаалз г̇аамо ад̇т̇и, д̇ам̣ саа на од̇т̇арад̇и. сажз бана саммад̇ааяа сиймааяа бажчаа г̇аамо нивисад̇и, соби сиймаасан̇кяамзва г̇ажчад̇и. яат̇аа жа бажчаа нивидто, звам̣ батамам̣ нивидтасса бажчаа вад̣дхид̇аббад̣̇зсоби сиймаасан̇кяамзва г̇ажчад̇и. сажзби сиймаасаммуд̇игаалз г̇зхаани гад̇аани, бависиссаамаад̇и аалаяоби ад̇т̇и, мануссаа бана аббавидтаа, бораан̣агаг̇аамам̣ ваа саг̇зхамзва чад̣д̣зд̇ваа ан̃н̃ад̇т̇а г̇ад̇аа, аг̇аамоязва зса, сиймаа од̇т̇арад̇и . сажз бана згамби гулам̣ бавидтам̣ ваа ааг̇ад̇ам̣ ваа ад̇т̇и, г̇аамоязва сиймаа на од̇т̇арад̇и.
Gāmūpacāroti parikkhittassa parikkhepo, aparikkhittassa parikkhepokāso. Tesu adhiṭṭhitatecīvariko bhikkhu parihāraṃ na labhati. Iti bhikkhūnaṃ avippavāsasīmā gāmañca gāmūpacārañca na ottharati, samānasaṃvāsakasīmāva ottharati. Samānasaṃvāsakasīmā cettha attano dhammatāya gacchati. Avippavāsasīmā pana yattha samānasaṃvāsakasīmā, tattheva gacchati. Na hi tassā visuṃ nimittakittanaṃ atthi, tattha sace avippavāsāya sammutikāle gāmo atthi, taṃ sā na ottharati. Sace pana sammatāya sīmāya pacchā gāmo nivisati, sopi sīmāsaṅkhyameva gacchati. Yathā ca pacchā niviṭṭho, evaṃ paṭhamaṃ niviṭṭhassa pacchā vaḍḍhitappadesopi sīmāsaṅkhyameva gacchati. Sacepi sīmāsammutikāle gehāni katāni, pavisissāmāti ālayopi atthi, manussā pana appaviṭṭhā, porāṇakagāmaṃ vā sagehameva chaḍḍetvā aññattha gatā, agāmoyeva esa, sīmā ottharati . Sace pana ekampi kulaṃ paviṭṭhaṃ vā āgataṃ vā atthi, gāmoyeva sīmā na ottharati.
зван̃жа бана бхигкавз д̇ижийварзна авиббаваасо самууханд̇аб̣б̣од̇и зд̇т̇а самуухананд̇зна бхигкунаа вад̇д̇ам̣ ж̇аанид̇аб̣б̣ам̣. д̇ад̇рид̣̇ам̣ вад̇д̇ам̣ – кан̣д̣асиймааяа тад̇ваа авиббаваасасиймаа на самууханд̇аб̣б̣аа, д̇ат̇аа авиббаваасасиймааяа тад̇ваа кан̣д̣асиймааби. кан̣д̣асиймааяам̣ бана тид̇зна кан̣д̣асиймаава самууханид̇аб̣б̣аа, д̇ат̇аа ид̇арааяа тид̇зна ид̇араа. сиймам̣ наама д̣̇вийхи гааран̣зхи самуухананд̇и багад̇ияаа куд̣̇д̣̇агам̣ буна ааваасавад̣дханад̇т̇ааяа махад̇им̣ ваа гаад̇ум̣; багад̇ияаа махад̇им̣ буна ан̃н̃зсам̣ вихаарогаасад̣̇аанад̇т̇ааяа куд̣̇д̣̇агам̣ ваа гаад̇ум̣. д̇ад̇т̇а сажз кан̣д̣асийман̃жа авиббаваасасийман̃жа ж̇аананд̇и, самууханид̇ун̃жзва б̣анд̇хид̇ун̃жа сагкиссанд̇и. кан̣д̣асиймам̣ бана ж̇аананд̇аа авиббаваасам̣ аж̇аананд̇ааби самууханид̇ун̃жзва б̣анд̇хид̇ун̃жа сагкиссанд̇и. кан̣д̣асиймам̣ аж̇аананд̇аа авиббаваасам̣язва ж̇аананд̇аа жзд̇ияан̇г̇ан̣аб̣од̇хияан̇г̇ан̣аубосат̇ааг̇аараад̣̇ийсу нираасан̇гадтаанзсу тад̇ваа аббзва наама самууханид̇ум̣ сагкиссанд̇и, бадиб̣анд̇хид̇ум̣ бана на сагкиссанд̇зва. сажз б̣анд̇хзяяум̣, сиймаасамбхзд̣̇ам̣ гад̇ваа вихаарам̣ авихаарам̣ гарзяяум̣, д̇асмаа на самууханид̇аб̣б̣аа. яз бана убхоби на ж̇аананд̇и, д̇знзва самууханид̇ум̣ на б̣анд̇хид̇ум̣ сагкиссанд̇и. аяан̃хи сиймаа наама гаммаваажааяа ваа асиймаа ход̇и саасананд̇арад̇хаанзна ваа, на жа саггаа сиймам̣ аж̇аананд̇зхи гаммаваажаа гаад̇ум̣, д̇асмаа на самууханид̇аб̣б̣аа. саад̇хугам̣ бана н̃ад̇вааязва самууханид̇аб̣б̣аа жа б̣анд̇хид̇аб̣б̣аа жаад̇и.
Evañca pana bhikkhave ticīvarena avippavāso samūhantabboti ettha samūhanantena bhikkhunā vattaṃ jānitabbaṃ. Tatridaṃ vattaṃ – khaṇḍasīmāya ṭhatvā avippavāsasīmā na samūhantabbā, tathā avippavāsasīmāya ṭhatvā khaṇḍasīmāpi. Khaṇḍasīmāyaṃ pana ṭhitena khaṇḍasīmāva samūhanitabbā, tathā itarāya ṭhitena itarā. Sīmaṃ nāma dvīhi kāraṇehi samūhananti pakatiyā khuddakaṃ puna āvāsavaḍḍhanatthāya mahatiṃ vā kātuṃ; pakatiyā mahatiṃ puna aññesaṃ vihārokāsadānatthāya khuddakaṃ vā kātuṃ. Tattha sace khaṇḍasīmañca avippavāsasīmañca jānanti, samūhanituñceva bandhituñca sakkhissanti. Khaṇḍasīmaṃ pana jānantā avippavāsaṃ ajānantāpi samūhanituñceva bandhituñca sakkhissanti. Khaṇḍasīmaṃ ajānantā avippavāsaṃyeva jānantā cetiyaṅgaṇabodhiyaṅgaṇauposathāgārādīsu nirāsaṅkaṭṭhānesu ṭhatvā appeva nāma samūhanituṃ sakkhissanti, paṭibandhituṃ pana na sakkhissanteva. Sace bandheyyuṃ, sīmāsambhedaṃ katvā vihāraṃ avihāraṃ kareyyuṃ, tasmā na samūhanitabbā. Ye pana ubhopi na jānanti, teneva samūhanituṃ na bandhituṃ sakkhissanti. Ayañhi sīmā nāma kammavācāya vā asīmā hoti sāsanantaradhānena vā, na ca sakkā sīmaṃ ajānantehi kammavācā kātuṃ, tasmā na samūhanitabbā. Sādhukaṃ pana ñatvāyeva samūhanitabbā ca bandhitabbā cāti.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 74. авиббаваасасиймаануж̇аананаа • 74. Avippavāsasīmānujānanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / авиббаваасасиймаануж̇аананагат̇ааван̣н̣анаа • Avippavāsasīmānujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / авиббаваасасиймаануж̇аананагат̇ааван̣н̣анаа • Avippavāsasīmānujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / авиббаваасасиймаануж̇аананагат̇ааван̣н̣анаа • Avippavāsasīmānujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 74. авиббаваасасиймаануж̇аананагат̇аа • 74. Avippavāsasīmānujānanakathā
