| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
অৰিপ্পৰাসসীমানুজাননকথাৰণ্ণনা
Avippavāsasīmānujānanakathāvaṇṇanā
১৪৪. অস্সাতি ভিক্খুনিসঙ্ঘস্স। দ্ৰেপি সীমাযোতি পঠমং ৰুত্তা অৰিপ্পৰাসসীমা সমানসংৰাসকসীমা চ। ন কম্মৰাচং ৰগ্গং করোন্তীতি কম্মৰাচং ন ভিন্দন্তি, কম্মং ন কোপেন্তীতি অধিপ্পাযো। এত্থাতি ‘‘ঠপেত্ৰা গামঞ্চ গামূপচারঞ্চা’’তি এত্থ। গামঞ্চ গামূপচারঞ্চ ন ওত্থরতীতি ‘‘ঠপেত্ৰা গামঞ্চ গামূপচারঞ্চা’’তি ৰুত্তত্তা। সীমাসঙ্খ্যমেৰ গচ্ছতীতি অৰিপ্পৰাসসীমাসঙ্খং গচ্ছতি। একম্পি কুলং পৰিট্ঠং ৰাতি অভিনৰকতগেহেসু সব্বপঠমং একম্পি কুলং পৰিট্ঠং অত্থি। অগতং ৰাতি পোরাণকগামে অঞ্ঞেসু গেহানি ছড্ডেত্ৰা গতেসু একম্পি কুলং অগতং অত্থি।
144.Assāti bhikkhunisaṅghassa. Dvepi sīmāyoti paṭhamaṃ vuttā avippavāsasīmā samānasaṃvāsakasīmā ca. Na kammavācaṃ vaggaṃ karontīti kammavācaṃ na bhindanti, kammaṃ na kopentīti adhippāyo. Etthāti ‘‘ṭhapetvā gāmañca gāmūpacārañcā’’ti ettha. Gāmañca gāmūpacārañca na ottharatīti ‘‘ṭhapetvā gāmañca gāmūpacārañcā’’ti vuttattā. Sīmāsaṅkhyameva gacchatīti avippavāsasīmāsaṅkhaṃ gacchati. Ekampi kulaṃ paviṭṭhaṃ vāti abhinavakatagehesu sabbapaṭhamaṃ ekampi kulaṃ paviṭṭhaṃ atthi. Agataṃ vāti porāṇakagāme aññesu gehāni chaḍḍetvā gatesu ekampi kulaṃ agataṃ atthi.
অৰিপ্পৰাসসীমা ন সমূহন্তব্বাতি মহাসীমং সন্ধায ৰদতি। নিরাসঙ্কট্ঠানেসু ঠত্ৰাতি চেতিযঙ্গণাদীনং খণ্ডসীমায অনোকাসত্তা ৰুত্তং। খণ্ডসীমঞ্হি বন্ধন্তা তাদিসং ঠানং পহায অঞ্ঞস্মিং ৰিৰিত্তে ওকাসে বন্ধন্তি । অপ্পেৰ নাম সমূহনিতুং সক্খিস্সন্তীতি অৰিপ্পৰাসসীমংযেৰ সমূহনিতুং সক্খিস্সন্তি, ন খণ্ডসীমং। পটিবন্ধিতুং পন ন সক্খিস্সন্তেৰাতি খণ্ডসীমায অঞ্ঞাতত্তা ন সক্খিস্সন্তি। ন সমূহনিতব্বাতি খণ্ডসীমং অজানন্তেহি ন সমূহনিতব্বা। উপোসথস্স ৰিসুং গহিতত্তা অৰসেসকম্মৰসেন সমানসংৰাসতা ৰেদিতব্বা।
Avippavāsasīmā na samūhantabbāti mahāsīmaṃ sandhāya vadati. Nirāsaṅkaṭṭhānesu ṭhatvāti cetiyaṅgaṇādīnaṃ khaṇḍasīmāya anokāsattā vuttaṃ. Khaṇḍasīmañhi bandhantā tādisaṃ ṭhānaṃ pahāya aññasmiṃ vivitte okāse bandhanti . Appeva nāma samūhanituṃ sakkhissantīti avippavāsasīmaṃyeva samūhanituṃ sakkhissanti, na khaṇḍasīmaṃ. Paṭibandhituṃ pana na sakkhissantevāti khaṇḍasīmāya aññātattā na sakkhissanti. Na samūhanitabbāti khaṇḍasīmaṃ ajānantehi na samūhanitabbā. Uposathassa visuṃ gahitattā avasesakammavasena samānasaṃvāsatā veditabbā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৭৪. অৰিপ্পৰাসসীমানুজাননা • 74. Avippavāsasīmānujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অৰিপ্পৰাসসীমানুজাননকথা • Avippavāsasīmānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অৰিপ্পৰাসসীমানুজাননকথাৰণ্ণনা • Avippavāsasīmānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অৰিপ্পৰাসসীমানুজাননকথাৰণ্ণনা • Avippavāsasīmānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭৪. অৰিপ্পৰাসসীমানুজাননকথা • 74. Avippavāsasīmānujānanakathā
