| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
авиббаваасасиймаануж̇аананагат̇ааван̣н̣анаа
Avippavāsasīmānujānanakathāvaṇṇanā
143. адтаарасаад̇и анд̇хагавинд̣̇авихаарамби убаад̣̇ааяа вужжад̇и. нзсам̣ сиймаад̇и д̇зсу махаавихаарзсу. ‘‘мана’’нд̇и имасса виваран̣ам̣ ийсаганд̇и, ийсагам̣ вул̣ход̇и ад̇т̇о. имамзвад̇т̇ам̣ д̣̇ассзд̇ум̣ ‘‘аббад̇д̇авул̣хабхааво ахосий’’д̇и вуд̇д̇ам̣. аманасигаронд̇од̇и ид̣̇д̇хияаа анад̇иггамасса гааран̣ам̣ вуд̇д̇ам̣.
143.Aṭṭhārasāti andhakavindavihārampi upādāya vuccati. Nesaṃ sīmāti tesu mahāvihāresu. ‘‘Mana’’nti imassa vivaraṇaṃ īsakanti, īsakaṃ vuḷhoti attho. Imamevatthaṃ dassetuṃ ‘‘appattavuḷhabhāvo ahosī’’ti vuttaṃ. Amanasikarontoti iddhiyā anatikkamassa kāraṇaṃ vuttaṃ.
144. сод̇и бхигкунисан̇гхо. д̣̇взбийд̇и д̣̇вз самаанасам̣ваасаавиббаваасааяо. авиббаваасасиймаад̇и махаасиймам̣ санд̇хааяа вад̣̇ад̇и. д̇ад̇т̇зва язбхуяязна авиббаваасаад̇и.
144.Soti bhikkhunisaṅgho. Dvepīti dve samānasaṃvāsaavippavāsāyo. Avippavāsasīmāti mahāsīmaṃ sandhāya vadati. Tattheva yebhuyyena avippavāsāti.
‘‘авиббаваасам̣ аж̇аананд̇аабий’’д̇и ид̣̇ам̣ махаасиймааяа виж̇ж̇амаанаавиж̇ж̇амаанад̇д̇ам̣, д̇ассаа б̣аахирабарижчзд̣̇ан̃жа аж̇аананд̇аанам̣ васзна вуд̇д̇ам̣. звам̣ аж̇аананд̇зхиби анд̇осиймааяа тад̇ваа гаммаваажааяа гад̇ааяа саа сиймаа самуухад̇аава ход̇ийд̇и ааха ‘‘самууханид̇ун̃жзва б̣анд̇хид̇ун̃жа сагкиссанд̇ий’’д̇и. нираасан̇гадтаанзд̇и кан̣д̣асиймаарахид̇адтаанз. ид̣̇ан̃жа махаасиймааяа виж̇ж̇амаанааяаби гаммагаран̣асукад̇т̇ам̣ кан̣д̣асиймаа ижчид̇аад̇и д̇ам̣ жзд̇ияан̇г̇ан̣аад̣̇иб̣ахусаннибаад̇адтаанз на б̣анд̇хад̇ийд̇и вуд̇д̇ам̣. д̇ад̇т̇ааби саа б̣ад̣̇д̇хаа суб̣ад̣̇д̇хаа зва махаасиймаа вияа. ‘‘бадиб̣анд̇хид̇ум̣ бана на сагкиссанд̇зваа’’д̇и ид̣̇ам̣ кан̣д̣асиймааяа асамуухад̇ад̇д̇аа, д̇ассаа авиж̇ж̇амаанад̇д̇асса аж̇аананад̇о жа махаасиймааб̣анд̇ханам̣ санд̇хааяа вуд̇д̇ам̣. кан̣д̣асиймам̣ бана нираасан̇гадтаанз б̣анд̇хид̇ум̣ сагкиссанд̇зва. сиймаасамбхзд̣̇ам̣ гад̇ваад̇и кан̣д̣асиймааяа виж̇ж̇амаанабагкз сиймааяа сиймам̣ аж̇жход̇т̇аран̣асамбхзд̣̇ам̣ гад̇ваа авиж̇ж̇амаанабагкзби самбхзд̣̇асан̇гааяа анивад̇д̇анзна самбхзд̣̇асан̇гам̣ гад̇ваа. авихаарам̣ гарзяяунд̇и сан̇гхагаммаанаарахам̣ гарзяяум̣. буб̣б̣з хи жзд̇ияан̇г̇ан̣аад̣̇инираасан̇гадтаанз гаммам̣ гаад̇ум̣ саггаа, ид̣̇аани д̇амби винаасид̇анд̇и ад̇хиббааяо. на самууханид̇аб̣б̣аад̇и кан̣д̣асиймам̣ аж̇аананд̇зхи на самууханид̇аб̣б̣аа. убхоби на ж̇аананд̇ийд̇и убхиннам̣ бад̣̇зсанияамам̣ ваа д̇аасам̣ д̣̇виннамби ваа ан̃н̃ад̇арааяа ваа виж̇ж̇амаанад̇ам̣ ваа авиж̇ж̇амаанад̇ам̣ ваа на ж̇аананд̇и, саб̣б̣ад̇т̇а сан̇гаа зва ход̇и. ‘‘нзва самууханид̇ум̣, на б̣анд̇хид̇ум̣ сагкиссанд̇ий’’д̇и ид̣̇ам̣ нираасан̇гадтаанз тад̇ваа самууханид̇ум̣ саггонд̇оби махаасиймам̣ бадиб̣анд̇хид̇ум̣ на саггонд̇ийд̇и имамад̇т̇ам̣ санд̇хааяа вуд̇д̇ам̣. ‘‘на жа саггаа…бз… гаммаваажам̣ гаад̇у’’нд̇и ид̣̇ам̣ сиймааб̣анд̇ханагаммаваажам̣ санд̇хааяа вуд̇д̇ам̣. д̇асмаад̇и яасмаа б̣анд̇хид̇ум̣ на саггаа, д̇асмаа на самууханид̇аб̣б̣аад̇и ад̇т̇о.
‘‘Avippavāsaṃ ajānantāpī’’ti idaṃ mahāsīmāya vijjamānāvijjamānattaṃ, tassā bāhiraparicchedañca ajānantānaṃ vasena vuttaṃ. Evaṃ ajānantehipi antosīmāya ṭhatvā kammavācāya katāya sā sīmā samūhatāva hotīti āha ‘‘samūhanituñceva bandhituñca sakkhissantī’’ti. Nirāsaṅkaṭṭhāneti khaṇḍasīmārahitaṭṭhāne. Idañca mahāsīmāya vijjamānāyapi kammakaraṇasukhatthaṃ khaṇḍasīmā icchitāti taṃ cetiyaṅgaṇādibahusannipātaṭṭhāne na bandhatīti vuttaṃ. Tatthāpi sā baddhā subaddhā eva mahāsīmā viya. ‘‘Paṭibandhituṃ pana na sakkhissantevā’’ti idaṃ khaṇḍasīmāya asamūhatattā, tassā avijjamānattassa ajānanato ca mahāsīmābandhanaṃ sandhāya vuttaṃ. Khaṇḍasīmaṃ pana nirāsaṅkaṭṭhāne bandhituṃ sakkhissanteva. Sīmāsambhedaṃ katvāti khaṇḍasīmāya vijjamānapakkhe sīmāya sīmaṃ ajjhottharaṇasambhedaṃ katvā avijjamānapakkhepi sambhedasaṅkāya anivattanena sambhedasaṅkaṃ katvā. Avihāraṃ kareyyunti saṅghakammānārahaṃ kareyyuṃ. Pubbe hi cetiyaṅgaṇādinirāsaṅkaṭṭhāne kammaṃ kātuṃ sakkā, idāni tampi vināsitanti adhippāyo. Na samūhanitabbāti khaṇḍasīmaṃ ajānantehi na samūhanitabbā. Ubhopi na jānantīti ubhinnaṃ padesaniyamaṃ vā tāsaṃ dvinnampi vā aññatarāya vā vijjamānataṃ vā avijjamānataṃ vā na jānanti, sabbattha saṅkā eva hoti. ‘‘Neva samūhanituṃ, na bandhituṃ sakkhissantī’’ti idaṃ nirāsaṅkaṭṭhāne ṭhatvā samūhanituṃ sakkontopi mahāsīmaṃ paṭibandhituṃ na sakkontīti imamatthaṃ sandhāya vuttaṃ. ‘‘Na ca sakkā…pe… kammavācaṃ kātu’’nti idaṃ sīmābandhanakammavācaṃ sandhāya vuttaṃ. Tasmāti yasmā bandhituṃ na sakkā, tasmā na samūhanitabbāti attho.
гзжи бана ‘‘ийд̣̇исзсу вихаарзсу чабан̃жамад̇д̇з бхигкуу г̇ахзд̇ваа вихаарагодид̇о бадтааяа вихаарабаригкзбасса анд̇о жа б̣ахи жа саманд̇аа лзд̣д̣убаад̇з саб̣б̣ад̇т̇а ман̃жаббамаан̣з огаасз ниранд̇арам̣ тад̇ваа батамам̣ авиббаваасасиймам̣, д̇ад̇о самаанасам̣ваасагасийман̃жа самуухананавасзна сиймааяа самуг̇гхаад̇з гад̇з д̇асмим̣ вихаарз кан̣д̣асиймааяа, махаасиймааяаби ваа виж̇ж̇амаанад̇д̇з сад̇и авассам̣ згасмим̣ ман̃жадтаанз д̇аасам̣ маж̇жхаг̇ад̇аа д̇з бхигкуу д̇аа самууханзяяум̣, д̇ад̇о г̇аамасиймаа зва авасиссзяяа. на хзд̇т̇а сиймааяа, д̇аббарижчзд̣̇асса ваа ж̇аананам̣ ан̇г̇ам̣. сиймааяа бана анд̇отаанам̣, ‘‘самууханиссаамаа’’д̇и гаммаваажааяа гаран̣ан̃жзд̇т̇а ан̇г̇ам̣. адтагат̇ааяам̣ ‘кан̣д̣асиймам̣ бана ж̇аананд̇аа авиббаваасам̣ аж̇аананд̇ааби самууханид̇ун̃жзва б̣анд̇хид̇ун̃жа сагкиссанд̇ий’д̇и звам̣ махаасиймааяа барижчзд̣̇асса аж̇аананзби самууханасса вуд̇д̇ад̇д̇аа. г̇аамасиймааяа зва жа авасидтааяа д̇ад̇т̇а яат̇ааружи д̣̇увид̇хамби сиймам̣ б̣анд̇хид̇ун̃жзва убасамбад̣̇аад̣̇игаммам̣ гаад̇ун̃жа ваддад̇ий’’д̇и вад̣̇анд̇и, д̇ам̣ яуд̇д̇ам̣ вияа д̣̇иссад̇и. виймам̣сид̇ваа г̇ахзд̇аб̣б̣ам̣.
Keci pana ‘‘īdisesu vihāresu chapañcamatte bhikkhū gahetvā vihārakoṭito paṭṭhāya vihāraparikkhepassa anto ca bahi ca samantā leḍḍupāte sabbattha mañcappamāṇe okāse nirantaraṃ ṭhatvā paṭhamaṃ avippavāsasīmaṃ, tato samānasaṃvāsakasīmañca samūhananavasena sīmāya samugghāte kate tasmiṃ vihāre khaṇḍasīmāya, mahāsīmāyapi vā vijjamānatte sati avassaṃ ekasmiṃ mañcaṭṭhāne tāsaṃ majjhagatā te bhikkhū tā samūhaneyyuṃ, tato gāmasīmā eva avasisseyya. Na hettha sīmāya, tapparicchedassa vā jānanaṃ aṅgaṃ. Sīmāya pana antoṭhānaṃ, ‘‘samūhanissāmā’’ti kammavācāya karaṇañcettha aṅgaṃ. Aṭṭhakathāyaṃ ‘khaṇḍasīmaṃ pana jānantā avippavāsaṃ ajānantāpi samūhanituñceva bandhituñca sakkhissantī’ti evaṃ mahāsīmāya paricchedassa ajānanepi samūhanassa vuttattā. Gāmasīmāya eva ca avasiṭṭhāya tattha yathāruci duvidhampi sīmaṃ bandhituñceva upasampadādikammaṃ kātuñca vaṭṭatī’’ti vadanti, taṃ yuttaṃ viya dissati. Vīmaṃsitvā gahetabbaṃ.
авиббаваасасиймаануж̇аананагат̇ааван̣н̣анаа нидтид̇аа.
Avippavāsasīmānujānanakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 74. авиббаваасасиймаануж̇аананаа • 74. Avippavāsasīmānujānanā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / авиббаваасасиймаануж̇аананагат̇аа • Avippavāsasīmānujānanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / авиббаваасасиймаануж̇аананагат̇ааван̣н̣анаа • Avippavāsasīmānujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / авиббаваасасиймаануж̇аананагат̇ааван̣н̣анаа • Avippavāsasīmānujānanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 74. авиббаваасасиймаануж̇аананагат̇аа • 74. Avippavāsasīmānujānanakathā
