| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
அவிஸ்ஸஜ்ஜியவத்து²கதா²
Avissajjiyavatthukathā
321. ஏதானீதி க³ருப⁴ண்டா³னி. தத்தா²தி ராஸிவஸேன பஞ்சஸு ஸரூபவஸேன பஞ்சவீஸதியா க³ருப⁴ண்டே³ஸு. ஆக³ந்த்வா, ஆபு⁴ஸோ வா ரமந்தி எத்தா²தி ஆராமோ. தேஸங்யேவாதி புப்பா²ராமப²லாராமானமேவ. ‘‘ட²பிதோகாஸோ’’தி இமினா வத்து²ஸத்³த³ஸ்ஸ பூ⁴மிபே⁴த³த்த²ங் த³ஸ்ஸேதி. வஸதி ஆராமோ பதிட்ட²ஹதி எத்தா²தி ஆராமவத்து². தேஸு வாதி எத்த² வாஸத்³தே³ன நவபூ⁴மிபா⁴க³தோ அஞ்ஞஸ்ஸ போராணபூ⁴மிபா⁴க³ஸ்ஸபி ஆராமவத்து²பா⁴வங் விகப்பேதி. விஸேஸேன சதுஇரியாபதே² ஹரதி பவத்தேதி எத்தா²தி விஹாரோ. தஸ்ஸாதி விஹாரஸ்ஸ. சதுன்னங் மஞ்சானந்தி நித்³தா⁴ரணத்தே² ஸாமிவசனங். அஞ்ஞதரோ மஞ்சோ நாமாதி யோஜனா. ஏஸேவ நயோ ஸேஸேஸுபி. ‘‘லோஹேன கதா கும்பீ⁴’’தி இமினா லோஹகும்பீ⁴தி எத்த² மஜ்ஜே²லோபஸமாஸங் த³ஸ்ஸேதி. லோஹமயா கும்பீ⁴ லோஹகும்பீ⁴தி வசனத்தோ²பி யுஜ்ஜதேவ. ‘‘ஏஸேவ நயோ’’தி இமினா லோஹேன கதங் பா⁴ணகங், லோஹேன கதோ வாரகோ, லோஹேன கதங் கடாஹந்தி அத்த²ங் அதிதி³ஸதி. எத்தா²தி பா⁴ணகவாரககடாஹேஸு. அரஞ்ஜரோதி அதிமஹந்தத்தா அரங் கி²ப்பங் ஜரதி வினாஸேதீதி அரஞ்ஜரோ. அத² வா ஜலங் க³ண்ஹிதுங் அலந்தி அரஞ்ஜரோ லகாரானங் ரகாரே கத்வா.
321.Etānīti garubhaṇḍāni. Tatthāti rāsivasena pañcasu sarūpavasena pañcavīsatiyā garubhaṇḍesu. Āgantvā, ābhuso vā ramanti etthāti ārāmo. Tesaṃyevāti pupphārāmaphalārāmānameva. ‘‘Ṭhapitokāso’’ti iminā vatthusaddassa bhūmibhedatthaṃ dasseti. Vasati ārāmo patiṭṭhahati etthāti ārāmavatthu. Tesu vāti ettha vāsaddena navabhūmibhāgato aññassa porāṇabhūmibhāgassapi ārāmavatthubhāvaṃ vikappeti. Visesena catuiriyāpathe harati pavatteti etthāti vihāro. Tassāti vihārassa. Catunnaṃ mañcānanti niddhāraṇatthe sāmivacanaṃ. Aññataro mañco nāmāti yojanā. Eseva nayo sesesupi. ‘‘Lohena katā kumbhī’’ti iminā lohakumbhīti ettha majjhelopasamāsaṃ dasseti. Lohamayā kumbhī lohakumbhīti vacanatthopi yujjateva. ‘‘Eseva nayo’’ti iminā lohena kataṃ bhāṇakaṃ, lohena kato vārako, lohena kataṃ kaṭāhanti atthaṃ atidisati. Etthāti bhāṇakavārakakaṭāhesu. Arañjaroti atimahantattā araṃ khippaṃ jarati vināsetīti arañjaro. Atha vā jalaṃ gaṇhituṃ alanti arañjaro lakārānaṃ rakāre katvā.
கா³தா²வஸேன நிக³மனங் த³ஸ்ஸெந்தோ ஆஹ ‘‘ஏவ’’ந்திஆதி³. தத்த² ஏவங் பகாஸயீதி ஸம்ப³ந்தோ⁴. த்³வே க³ருப⁴ண்டா³னி த்³விஸங்க³ஹானி ஹொந்தி, ததியங் க³ருப⁴ண்ட³ங் சதுஸங்க³ஹங் ஹோதி, சதுத்த²ங் க³ருப⁴ண்ட³ங் நவகொட்டா²ஸங் ஹோதி, பஞ்சமங் க³ருப⁴ண்ட³ங் அட்ட²பே⁴த³னங் ஹோதி, இதி இமினா பகாரேன பஞ்சனிம்மலலோசனோ நாதோ² பஞ்சஹி ராஸீஹி பஞ்சவீஸவித⁴ங் க³ருப⁴ண்ட³ங் பகாஸயீதி யோஜனா.
Gāthāvasena nigamanaṃ dassento āha ‘‘eva’’ntiādi. Tattha evaṃ pakāsayīti sambandho. Dve garubhaṇḍāni dvisaṅgahāni honti, tatiyaṃ garubhaṇḍaṃ catusaṅgahaṃ hoti, catutthaṃ garubhaṇḍaṃ navakoṭṭhāsaṃ hoti, pañcamaṃ garubhaṇḍaṃ aṭṭhabhedanaṃ hoti, iti iminā pakārena pañcanimmalalocano nātho pañcahi rāsīhi pañcavīsavidhaṃ garubhaṇḍaṃ pakāsayīti yojanā.
தத்ராதி க³ருப⁴ண்டே³. ஹீதி வித்தா²ரோ. ஸப்³ப³ம்பி இத³ங் க³ருப⁴ண்ட³ங் அவிஸ்ஸஜ்ஜியந்தி வுத்தந்தி யோஜனா. இதா⁴தி இமஸ்மிங் வத்து²ஸ்மிங். பரிவாரே பன ஆக³தந்தி ஸம்ப³ந்தோ⁴.
Tatrāti garubhaṇḍe. Hīti vitthāro. Sabbampi idaṃ garubhaṇḍaṃ avissajjiyanti vuttanti yojanā. Idhāti imasmiṃ vatthusmiṃ. Parivāre pana āgatanti sambandho.
பஞ்ச ராஸயோ மஹேஸினா வுத்தாதி யோஜனா. எத்தா²தி பரிவாரே.
Pañca rāsayo mahesinā vuttāti yojanā. Etthāti parivāre.
தத்ராதி ‘‘பரிவத்தனவஸேனா’’தி வசனே. இத³ங் க³ருப⁴ண்ட³ங் உபனேதுந்தி ஸம்ப³ந்தோ⁴. நிச்சங் திட்ட²ந்தீதி தா²வரா, டா²தா⁴து வரபச்சயோ, டா²காரஸ்ஸ தா²காரோ. இமினா ஆராமஆராமவத்து²விஹாரவிஹாரவத்தூ²னி க³ஹேதப்³பா³னி. அவிஸ்ஸஜ்ஜியஅவேப⁴ங்கீ³யத்தா க³ரு அலஹுகங் ப⁴ண்ட³ங் க³ருப⁴ண்ட³ங். இமினா மஞ்சாதீ³னி ஏகவீஸதி க³ருப⁴ண்டா³னி க³ஹேதப்³பா³னி. தா²வரேதி ஆதா⁴ரே பு⁴ம்மங், பரியாபன்னந்தி ஸம்ப³ந்தோ⁴. அத² வா நித்³தா⁴ரணே பு⁴ம்மங், தா²வரேஸூதி ஹி அத்தோ², கெ²த்தந்திஆதீ³ஸு ஸம்ப³ந்தி⁴தப்³ப³ங். கி²பதி புப்³ப³ண்ணபீ³ஜமெத்தா²தி கெ²த்தங். வஸதி அபரண்ணபீ³ஜங் பதிட்டா²தி எத்தா²தி வத்து², தலே பூ⁴மிபா⁴கே³ ஏகதோ வா த்³வீஹி வா தீஹி வா டா²னேஹி ஆவரணங் கரீயதி எத்தா²தி தளாகோ, ஸரோ. கஸ்ஸகானங் மதேன கத்தப்³பா³தி மாதிகா. ஆராமேன பரிவத்தேதுந்தி ஸம்ப³ந்தோ⁴. கானி பரிவத்தேதுந்தி ஆஹ ‘‘இமானி சத்தாரிபீ’’தி. பிஸத்³தோ³ அவயவஸம்பிண்ட³னோ.
Tatrāti ‘‘parivattanavasenā’’ti vacane. Idaṃ garubhaṇḍaṃ upanetunti sambandho. Niccaṃ tiṭṭhantīti thāvarā, ṭhādhātu varapaccayo, ṭhākārassa thākāro. Iminā ārāmaārāmavatthuvihāravihāravatthūni gahetabbāni. Avissajjiyaavebhaṅgīyattā garu alahukaṃ bhaṇḍaṃ garubhaṇḍaṃ. Iminā mañcādīni ekavīsati garubhaṇḍāni gahetabbāni. Thāvareti ādhāre bhummaṃ, pariyāpannanti sambandho. Atha vā niddhāraṇe bhummaṃ, thāvaresūti hi attho, khettantiādīsu sambandhitabbaṃ. Khipati pubbaṇṇabījametthāti khettaṃ. Vasati aparaṇṇabījaṃ patiṭṭhāti etthāti vatthu, tale bhūmibhāge ekato vā dvīhi vā tīhi vā ṭhānehi āvaraṇaṃ karīyati etthāti taḷāko, saro. Kassakānaṃ matena kattabbāti mātikā. Ārāmena parivattetunti sambandho. Kāni parivattetunti āha ‘‘imāni cattāripī’’ti. Pisaddo avayavasampiṇḍano.
தத்ராதி ‘‘பரிவத்தேதுங் வட்டதீ’’தி வசனே. தூ³ரேதி ஸங்கா⁴ராமதோ தூ³ரட்டா²னே. யம்பீதி நாளிகேரப²லம்பி. ஹரந்தீதி ஸங்க⁴ஸ்ஸ ஹரந்தி. அஞ்ஞேஸந்தி ஸங்க⁴தோ அஞ்ஞேஸங் மனுஸ்ஸானந்தி ஸம்ப³ந்தோ⁴. தேதி மனுஸ்ஸா. ஸங்கே⁴ன ஸம்படிச்சி²தப்³போ³தி ஸம்ப³ந்தோ⁴. ருச்சதீதி ஸங்க⁴ஸ்ஸாராமேன மனுஸ்ஸானமாராமங், மனுஸ்ஸானமாராமேன வா ஸங்க⁴ஸ்ஸாராமங் பரிவத்தேதுங் ருசீயதி இச்சீ²யதி. பி⁴க்கூ²னங் ஆராமோதி ஸம்ப³ந்தோ⁴. அயந்தி மனுஸ்ஸானமாராமோ. கு²த்³த³கோதி ஸங்கா⁴ராமதோ கு²த்³த³கோ. ஆயந்தி அயதி ஆயஸாமிகோ த⁴னேன வட்³டி⁴ங் க³ச்ச²தி அனேனாதி ஆயோ, தங். ஸமகமேவாதி ஸமப்பமாணமேவ, ஆயங் ஸசே தே³தீதி ஸம்ப³ந்தோ⁴. பமாணத்தே² கபச்சயோ. மனுஸ்ஸானங் ருக்கா²தி ஸம்ப³ந்தோ⁴. அதிரேகங் ஸங்க⁴ஸ்ஸ தே³மாதி ஸம்ப³ந்தோ⁴. ஜானாபெத்வாதி ‘‘ஸங்கே⁴ தி³ன்னங் மஹப்ப²ல’’ந்தி (ம॰ நி॰ 3.376) ஸங்க⁴ஸ்ஸ தி³ன்னதா³னஸ்ஸ ஆனிஸங்ஸங் மனுஸ்ஸானங் ஜானாபெத்வா. ப²லதா⁴ரினோ ஹொந்தி நனூதி யோஜனா. ஏவந்திஆதி³ நிக³மனங். ஏதேனேவ நயேனாதி யேன நயேன ஆராமோ ஆராமேன பரிவத்தேதப்³போ³, ஏதேனேவ நயேன. மஹந்தேன வா கு²த்³த³கேன வா ஆராமவத்து²னா சாதி யோஜனா. ஆராம ஆராமவத்து²விஹாரவிஹாரவத்தூ²னி பரிவத்தேதப்³பா³னீதி ஸம்ப³ந்தோ⁴.
Tatrāti ‘‘parivattetuṃ vaṭṭatī’’ti vacane. Dūreti saṅghārāmato dūraṭṭhāne. Yampīti nāḷikeraphalampi. Harantīti saṅghassa haranti. Aññesanti saṅghato aññesaṃ manussānanti sambandho. Teti manussā. Saṅghena sampaṭicchitabboti sambandho. Ruccatīti saṅghassārāmena manussānamārāmaṃ, manussānamārāmena vā saṅghassārāmaṃ parivattetuṃ rucīyati icchīyati. Bhikkhūnaṃ ārāmoti sambandho. Ayanti manussānamārāmo. Khuddakoti saṅghārāmato khuddako. Āyanti ayati āyasāmiko dhanena vaḍḍhiṃ gacchati anenāti āyo, taṃ. Samakamevāti samappamāṇameva, āyaṃ sace detīti sambandho. Pamāṇatthe kapaccayo. Manussānaṃ rukkhāti sambandho. Atirekaṃ saṅghassa demāti sambandho. Jānāpetvāti ‘‘saṅghe dinnaṃ mahapphala’’nti (ma. ni. 3.376) saṅghassa dinnadānassa ānisaṃsaṃ manussānaṃ jānāpetvā. Phaladhārino honti nanūti yojanā. Evantiādi nigamanaṃ. Eteneva nayenāti yena nayena ārāmo ārāmena parivattetabbo, eteneva nayena. Mahantena vā khuddakena vā ārāmavatthunā cāti yojanā. Ārāma ārāmavatthuvihāravihāravatthūni parivattetabbānīti sambandho.
உபோ⁴பீதி கே³ஹபாஸாத³வஸேன உபோ⁴பி. தத்தா²தி கே³ஹே. இத³ங் பனாதி பாஸாத³ஸங்கா²தங் கே³ஹங், மனுஸ்ஸானங் கே³ஹந்தி ஸம்ப³ந்தோ⁴. மஹக்³கே⁴ன வா அப்பக்³கே⁴ன வா விஹாரவத்து²னா சாதி யோஜனா. விஹாரவிஹாரவத்து²ஆராமஆராமவத்தூ²னி பரிவத்தேதப்³பா³னீதி ஸம்ப³ந்தோ⁴. ஏவந்திஆதி³ நிக³மனங்.
Ubhopīti gehapāsādavasena ubhopi. Tatthāti gehe. Idaṃ panāti pāsādasaṅkhātaṃ gehaṃ, manussānaṃ gehanti sambandho. Mahagghena vā appagghena vā vihāravatthunā cāti yojanā. Vihāravihāravatthuārāmaārāmavatthūni parivattetabbānīti sambandho. Evantiādi nigamanaṃ.
க³ருப⁴ண்டே³ன க³ருப⁴ண்ட³பரிவத்தனே ஏவங் வினிச்ச²யோ வேதி³தப்³போ³தி யோஜனா. பங்ஸ்வாகா³ரகேஸூதி பங்ஸுகீளனத்தா²ய கதேஸு அகா³ரகேஸு. கப்பியமஞ்சாதி ஸங்க⁴க³ணபுக்³க³லானங் கப்பியா ஸுவண்ணரஜதாதீ³ஹி அகதா மஞ்சா. விஹாரஸ்ஸ பன ஸுவண்ணரஜதமயாதி³காபி கப்பியா மஞ்சா தா³தப்³பா³தி ஸம்ப³ந்தோ⁴. ப³ஹிஸீமாயாதி உபசாரஸீமதோ ப³ஹி. தத்தா²தி ஸங்க⁴த்தே²ரஸ்ஸ வஸனட்டா²னே. தத்தா²தி தஸ்ஸ பி⁴க்கு²னோ வஸனட்டா²னே. ‘‘மஹக்³கே⁴னா’’தி வுத்தவசனங் நியமெந்தோ ஆஹ ‘‘ஸதக்³க⁴னகேன வா ஸஹஸ்ஸக்³க⁴னகேன வா’’தி. மஞ்சஸதந்தி மஞ்சப³ஹுங். ஏதேஸுபீதி பீட²பி⁴ஸிபி³ப்³போ³ஹனேஸுபி. தத்தா²தி பீட²பி⁴ஸிபி³ப்³போ³ஹனேஸு. கப்பியங் பீடா²தீ³தி ஸம்ப³ந்தோ⁴. அகப்பியங் வா மஹக்³க⁴ங் கப்பியங் வாதி கப்பியேன வா மஹக்³க⁴கப்பியேன வா பரிவத்தெத்வாதி ஸம்ப³ந்தோ⁴. ‘‘வுத்தவத்தூ²னீ’’தி பத³ங் ‘‘பரிவத்தெத்வா’’தி பதே³ அவுத்தகம்மங், ‘‘க³ஹேதப்³பா³னீ’’தி பதே³ வுத்தகம்மங், புப்³பா³பராபெக்க²பத³ங்.
Garubhaṇḍena garubhaṇḍaparivattane evaṃ vinicchayo veditabboti yojanā. Paṃsvāgārakesūti paṃsukīḷanatthāya katesu agārakesu. Kappiyamañcāti saṅghagaṇapuggalānaṃ kappiyā suvaṇṇarajatādīhi akatā mañcā. Vihārassa pana suvaṇṇarajatamayādikāpi kappiyā mañcā dātabbāti sambandho. Bahisīmāyāti upacārasīmato bahi. Tatthāti saṅghattherassa vasanaṭṭhāne. Tatthāti tassa bhikkhuno vasanaṭṭhāne. ‘‘Mahagghenā’’ti vuttavacanaṃ niyamento āha ‘‘satagghanakena vā sahassagghanakena vā’’ti. Mañcasatanti mañcabahuṃ. Etesupīti pīṭhabhisibibbohanesupi. Tatthāti pīṭhabhisibibbohanesu. Kappiyaṃ pīṭhādīti sambandho. Akappiyaṃ vā mahagghaṃ kappiyaṃ vāti kappiyena vā mahagghakappiyena vā parivattetvāti sambandho. ‘‘Vuttavatthūnī’’ti padaṃ ‘‘parivattetvā’’ti pade avuttakammaṃ, ‘‘gahetabbānī’’ti pade vuttakammaṃ, pubbāparāpekkhapadaṃ.
பஸதமத்தஉத³கக³ண்ஹகானிபீதி எத்த² பஸதோ நாம குஞ்சிதபாணி. ஸீஹளதீ³பேதி ஸீஹங் லாதி க³ண்ஹாதீதி ஸீஹளோ லகாரஸ்ஸ ளகாரங் கத்வா, ஸீஹபா³ஹுனாமகோ ராஜா, தஸ்ஸ புத்தத்தா விஜயகுமாரோபி ஸீஹளோ நாம, தேன ஆதி³ம்ஹி நிவாஸபா⁴வேன க³ஹிதத்தா தீ³போ ஸீஹளதீ³போ நாம, தஸ்மிங். பாத³ங் க³ண்ஹாதீதி பாத³க³ண்ஹனோ, ஸோயேவ பாத³க³ண்ஹனகோ. பாதோ³ நாமாதி ‘‘பாத³க³ண்ஹனகோ’’தி எத்த² பாதோ³ நாம. யோ லோஹவாரகோ மக³த⁴னாளியா பஞ்சனாளிமத்தங் க³ண்ஹாதி, ஸோ லோஹவாரகோ பாதோ³ நாமாதி யோஜனா. இமினா பமாணஸ்ஸ நாமங் பமாணவந்தே உபசாரதோ வோஹாரனயங் த³ஸ்ஸேதி. ததோதி பஞ்சனாளிமத்தக³ண்ஹனகவாரகதோ. இமானீதி லோஹகும்பீ⁴ஆதீ³னி.
Pasatamattaudakagaṇhakānipīti ettha pasato nāma kuñcitapāṇi. Sīhaḷadīpeti sīhaṃ lāti gaṇhātīti sīhaḷo lakārassa ḷakāraṃ katvā, sīhabāhunāmako rājā, tassa puttattā vijayakumāropi sīhaḷo nāma, tena ādimhi nivāsabhāvena gahitattā dīpo sīhaḷadīpo nāma, tasmiṃ. Pādaṃ gaṇhātīti pādagaṇhano, soyeva pādagaṇhanako. Pādo nāmāti ‘‘pādagaṇhanako’’ti ettha pādo nāma. Yo lohavārako magadhanāḷiyā pañcanāḷimattaṃ gaṇhāti, so lohavārako pādo nāmāti yojanā. Iminā pamāṇassa nāmaṃ pamāṇavante upacārato vohāranayaṃ dasseti. Tatoti pañcanāḷimattagaṇhanakavārakato. Imānīti lohakumbhīādīni.
பி⁴ங்கா³ர …பே॰… கடச்சு²ஆதீ³னீதி பி⁴ங்கா³ரோ ச படிக்³க³ஹோ ச உளுங்கோ ச த³ப்³பி³ ச கடச்சு² ச பாதி ச தட்டகோ ச ஸரகோ ச ஸமுக்³கோ³ ச அங்கா³ரகபல்லோ ச தூ⁴மகடச்சு² ச பி⁴ங்கா³ர…பே॰… தூ⁴மகடச்சு²யோ, தா ஆதி³ யேஸங் தானீதி பி⁴ங்கா³ர…பே॰… கடச்சு²ஆதீ³னி. ஆதி³ஸத்³தே³ன அஞ்ஞானி உபகரணானி க³ஹேதப்³பா³னி. பா⁴ஜனீயானீதி பா⁴ஜேதப்³பா³னி. கங்ஸலோஹாதீ³திஆதி³ஸத்³தே³ன வட்டலோஹங் ஸங்க³ண்ஹாதி. வட்டலோஹங் நாம பீதலோஹங். ஹீதி ஸச்சங், யஸ்மா வா. பாரிஹாரியந்தி ஸங்கி⁴கபரிபோ⁴க³ங் பரிஹரித்வா அபனெத்வா புக்³க³லிகபரிபோ⁴கே³ன பரிபு⁴ஞ்ஜனங், ‘‘அத்தஸந்தக’’ந்தி வா பரிக்³க³ஹேன ஹரித்வா பு⁴ஞ்ஜனங் ந வட்டதி. கி³ஹிவிகடனீஹாரேனேவாதி ‘‘கி³ஹிவிகட’’ந்தி அபி⁴னீஹாரேனேவ.
Bhiṅgāra…pe… kaṭacchuādīnīti bhiṅgāro ca paṭiggaho ca uḷuṅko ca dabbi ca kaṭacchu ca pāti ca taṭṭako ca sarako ca samuggo ca aṅgārakapallo ca dhūmakaṭacchu ca bhiṅgāra…pe… dhūmakaṭacchuyo, tā ādi yesaṃ tānīti bhiṅgāra…pe… kaṭacchuādīni. Ādisaddena aññāni upakaraṇāni gahetabbāni. Bhājanīyānīti bhājetabbāni. Kaṃsalohādītiādisaddena vaṭṭalohaṃ saṅgaṇhāti. Vaṭṭalohaṃ nāma pītalohaṃ. Hīti saccaṃ, yasmā vā. Pārihāriyanti saṅghikaparibhogaṃ pariharitvā apanetvā puggalikaparibhogena paribhuñjanaṃ, ‘‘attasantaka’’nti vā pariggahena haritvā bhuñjanaṃ na vaṭṭati. Gihivikaṭanīhārenevāti ‘‘gihivikaṭa’’nti abhinīhāreneva.
அஞ்ஞஸ்மிம்பி கப்பியலோஹப⁴ண்டே³ பரியாபன்னா அஞ்ஜனீதி யோஜனா. அத² வா கப்பியலோஹப⁴ண்டே³தி நித்³தா⁴ரணே பு⁴ம்மங், ‘‘அஞ்ஜனீ’’திஆதி³னா ஸம்ப³ந்தி⁴தப்³ப³ங். ஸூசீதி சீவராதி³ஸிப்³ப³னகா ஸூசி. பண்ணஸூசீதி பண்ணே லிக²னா ஸூசி. அஞ்ஞம்பீதி அஞ்ஜனிஆதி³தோ அஞ்ஞம்பி. தூ⁴மனெத்தஞ்ச பா²லஞ்ச தீ³பருக்கோ² ச தீ³பகபல்லகோ ச ஓலம்ப³கதீ³போ ச தூ⁴மனெத்த…பே॰… ஓலம்ப³கதீ³பா. இத்தி²புரிஸதிரச்சா²னக³தஸங்கா²தானி ரூபானி ஏதேஸு அத்தீ²தி இத்தி²புரிஸதிரச்சா²னக³தரூபகானி. தூ⁴மனெத்த…பே॰… ஓலம்ப³கதீ³பா ச தே இத்தி²புரிஸதிரச்சா²னக³தரூபகானி சேதி தூ⁴மனெத்த…பே॰… ரூபகானி, விஸேஸனபரனிபாதோ. தானி வா அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி லோஹப⁴ண்டா³னீதி ஸம்ப³ந்தோ⁴. லோஹகி²லகந்தி லோஹமயங் ஆணிங். பரிஹரித்வாதி ‘‘அத்தனோ ஸந்தக’’ந்தி பரிக்³க³ஹேன ஹரித்வா, ஸங்கி⁴கபரிபோ⁴க³கி³ஹிவிகடானி வா அபனெத்வா. கீ²ரபாஸாணமயானீதி கீ²ரவண்ணேன பாஸாணேன கதானி.
Aññasmimpi kappiyalohabhaṇḍe pariyāpannā añjanīti yojanā. Atha vā kappiyalohabhaṇḍeti niddhāraṇe bhummaṃ, ‘‘añjanī’’tiādinā sambandhitabbaṃ. Sūcīti cīvarādisibbanakā sūci. Paṇṇasūcīti paṇṇe likhanā sūci. Aññampīti añjaniādito aññampi. Dhūmanettañca phālañca dīparukkho ca dīpakapallako ca olambakadīpo ca dhūmanetta…pe… olambakadīpā. Itthipurisatiracchānagatasaṅkhātāni rūpāni etesu atthīti itthipurisatiracchānagatarūpakāni. Dhūmanetta…pe… olambakadīpā ca te itthipurisatiracchānagatarūpakāni ceti dhūmanetta…pe… rūpakāni, visesanaparanipāto. Tāni vā aññāni vā bhitticchadanakavāṭādīsu upanetabbāni lohabhaṇḍānīti sambandho. Lohakhilakanti lohamayaṃ āṇiṃ. Pariharitvāti ‘‘attano santaka’’nti pariggahena haritvā, saṅghikaparibhogagihivikaṭāni vā apanetvā. Khīrapāsāṇamayānīti khīravaṇṇena pāsāṇena katāni.
ஸுவண்ணஞ்ச ரஜதஞ்ச ஹாரகூடஞ்ச ஜாதிப²லிகஞ்ச ஸுவண்ண…பே॰… ஜாதிப²லிகானி, தேஹி கதானி பா⁴ஜனானி ஸுவண்ண…பே॰… பா⁴ஜனானி. ஸப்³ப³ந்தி ஸுவண்ணரஜதாதி³ஸப்³ப³ங். வட்டதீதி ஸங்க⁴க³ணபுக்³க³லானங் வட்டதி.
Suvaṇṇañca rajatañca hārakūṭañca jātiphalikañca suvaṇṇa…pe… jātiphalikāni, tehi katāni bhājanāni suvaṇṇa…pe… bhājanāni. Sabbanti suvaṇṇarajatādisabbaṃ. Vaṭṭatīti saṅghagaṇapuggalānaṃ vaṭṭati.
வாஸிஆதீ³ஸு ஏவங் வினிச்ச²யோ வேதி³தப்³போ³தி யோஜனா, நித்³தா⁴ரணே வா பு⁴ம்மங். யாய வாஸியா ந ஸக்காதி ஸம்ப³ந்தோ⁴. ததோதி வாஸிதோ. மஹத்தரீஸத்³தோ³ மஹந்தபரியாயோ அனிப்ப²ன்னபாடிபதி³கோ. மஹத்தரீ வாஸீதி ஸம்ப³ந்தோ⁴. வேஜ்ஜானந்தி பி⁴ஸக்கானங். ஸிராவேத⁴னப²ரஸுபீதி பிஸத்³தே³ன ததோ மஹந்தங் பன பகே³வாதி த³ஸ்ஸேதி. யா பன குடா²ரீ ஆவுத⁴ஸங்கே²பேன கதாதி ஸம்ப³ந்தோ⁴. அத² வா ஆவுத⁴ஸங்கே²பேன கதா யா பன குடா²ரீ அத்தீ²தி யோஜனா. அனாமாஸாதி அனாமஸிதப்³பா³, அனாமாஸாரஹாதி அத்தோ². சதுரங்கு³லமத்தோபீதி பிஸத்³தோ³ ததோ அதி⁴கோ பன பகே³வாதி த³ஸ்ஸேதி. நிக²ணித்வா கா²த³தீதி நிகா²த³னங். சதுரஸ்ஸங் முக²மேதஸ்ஸாதி சதுரஸ்ஸமுக²ங். தோ³ணிஸதி³ஸங் முக²மேதஸ்ஸாதி தோ³ணிமுக²ங். ஸம்முஞ்சனித³ண்ட³வேத⁴னம்பி நிகா²த³னங் த³ண்ட³ப³த்³த⁴ங் ஹோதி சேதி யோஜனா. த³ண்டே³ன ப³ந்தி⁴தப்³ப³ந்தி த³ண்ட³ப³த்³த⁴ங், த³ண்ட³ங் ப³த்³த⁴மேதஸ்ஸாதி வா த³ண்ட³ப³த்³த⁴ங். ‘‘அத³ண்ட³க’’ந்தி வத்வா தஸ்ஸேவத்த²ங் த³ஸ்ஸேதுங் வுத்தங் ‘‘ப²லமத்தமேவா’’தி. நத்தி² த³ண்ட³மேதஸ்ஸாதி அத³ண்ட³கங். யந்தி நிகா²த³னங். பரிஹரிதுந்தி புக்³க³லிகபா⁴வேன பரிக்³க³ஹெத்வா ஹரிதுங், ஸங்கி⁴கபா⁴வங் அபனேதுங் வா. ஸிக²ரம்பி நிகா²த³னேனேவ ஸங்க³ஹிதங் லக்க²ணஹாரனயேன ஸமானகிச்சபா⁴வதோ. ஸிக²ரந்தி யேன பரிப்³ப⁴மித்வா சி²ந்த³ந்தி, யேஹி மனுஸ்ஸேஹி தி³ன்னானீதி ஸம்ப³ந்தோ⁴. தேதி மனுஸ்ஸா, வத³ந்தீதி ஸம்ப³ந்தோ⁴. நோதி அம்ஹாகங். பாகதிகேதி பகதியா டி²தே, யதா² பட²மங் டி²தா ஹொந்தி, ததா² கரிஸ்ஸாமாதி அத்தோ². ஸசே ஆஹரந்தீதி ஸசே ஆயாசனங் அகத்வா ஹரந்தி. அனாஹரந்தாபீதி புன அனாஹரந்தாபி.
Vāsiādīsu evaṃ vinicchayo veditabboti yojanā, niddhāraṇe vā bhummaṃ. Yāya vāsiyā na sakkāti sambandho. Tatoti vāsito. Mahattarīsaddo mahantapariyāyo anipphannapāṭipadiko. Mahattarī vāsīti sambandho. Vejjānanti bhisakkānaṃ. Sirāvedhanapharasupīti pisaddena tato mahantaṃ pana pagevāti dasseti. Yā pana kuṭhārī āvudhasaṅkhepena katāti sambandho. Atha vā āvudhasaṅkhepena katā yā pana kuṭhārī atthīti yojanā. Anāmāsāti anāmasitabbā, anāmāsārahāti attho. Caturaṅgulamattopīti pisaddo tato adhiko pana pagevāti dasseti. Nikhaṇitvā khādatīti nikhādanaṃ. Caturassaṃ mukhametassāti caturassamukhaṃ. Doṇisadisaṃ mukhametassāti doṇimukhaṃ. Sammuñcanidaṇḍavedhanampi nikhādanaṃ daṇḍabaddhaṃ hoti ceti yojanā. Daṇḍena bandhitabbanti daṇḍabaddhaṃ, daṇḍaṃ baddhametassāti vā daṇḍabaddhaṃ. ‘‘Adaṇḍaka’’nti vatvā tassevatthaṃ dassetuṃ vuttaṃ ‘‘phalamattamevā’’ti. Natthi daṇḍametassāti adaṇḍakaṃ. Yanti nikhādanaṃ. Pariharitunti puggalikabhāvena pariggahetvā harituṃ, saṅghikabhāvaṃ apanetuṃ vā. Sikharampi nikhādaneneva saṅgahitaṃ lakkhaṇahāranayena samānakiccabhāvato. Sikharanti yena paribbhamitvā chindanti, yehi manussehi dinnānīti sambandho. Teti manussā, vadantīti sambandho. Noti amhākaṃ. Pākatiketi pakatiyā ṭhite, yathā paṭhamaṃ ṭhitā honti, tathā karissāmāti attho. Sace āharantīti sace āyācanaṃ akatvā haranti. Anāharantāpīti puna anāharantāpi.
கம்மாரோ ச தட்டகாரோ ச சுந்த³காரோ ச நளகாரோ ச மணிகாரோ ச பத்தப³ந்த⁴கோ ச கம்மார…பே॰… பத்தப³ந்த⁴கா, தேஸங். அதி⁴கரணீ ச முட்டி²கோ ச ஸண்டா³ஸோ ச துலா ச அதி⁴கரணி…பே॰… துலா. ஸங்கே⁴ தி³ன்னகாலதோதி ஸங்க⁴ஸ்ஸ தி³ன்னகாலதோ. திபுங் சி²ந்த³தி அனேனாதி திபுச்சே²த³னங், தமேவ ஸத்த²கங் திபுச்சே²த³னஸத்த²கங். மஹாகத்தரிஞ்ச மஹாஸண்டா³ஸஞ்ச மஹாபிப்பி²லிகஞ்ச ட²பெத்வாதி யோஜனா. கஸ்மா ட²பிதானீதி ஆஹ ‘‘மஹாகத்தரிஆதீ³னி க³ருப⁴ண்டா³னீ’’தி. தத்த² யஸ்மா மஹாகத்தரிஆதீ³னி க³ருப⁴ண்டா³னி, தஸ்மா ‘‘ட²பெத்வா மஹாகத்தரி’’ந்தி ஆதி³ மயா வுத்தந்தி யோஜனா.
Kammāro ca taṭṭakāro ca cundakāro ca naḷakāro ca maṇikāro ca pattabandhako ca kammāra…pe… pattabandhakā, tesaṃ. Adhikaraṇī ca muṭṭhiko ca saṇḍāso ca tulā ca adhikaraṇi…pe… tulā. Saṅghe dinnakālatoti saṅghassa dinnakālato. Tipuṃ chindati anenāti tipucchedanaṃ, tameva satthakaṃ tipucchedanasatthakaṃ. Mahākattariñca mahāsaṇḍāsañca mahāpipphilikañca ṭhapetvāti yojanā. Kasmā ṭhapitānīti āha ‘‘mahākattariādīni garubhaṇḍānī’’ti. Tattha yasmā mahākattariādīni garubhaṇḍāni, tasmā ‘‘ṭhapetvā mahākattari’’nti ādi mayā vuttanti yojanā.
வல்லிஆதீ³ஸு ஏவங் வினிச்ச²யோ வேதி³தப்³போ³தி யோஜனா. வெத்தவல்லிஆதி³காதி வெத்தஸங்கா²தவல்லிஆதி³கா. அட்³ட⁴ப³ஹுப்பமாணாதி எத்த² –
Valliādīsu evaṃ vinicchayo veditabboti yojanā. Vettavalliādikāti vettasaṅkhātavalliādikā. Aḍḍhabahuppamāṇāti ettha –
‘‘ப்³யாமோ ஸஹகரா பா³ஹு, த்³வேபஸ்ஸத்³வயவித்த²தா’’தி. –
‘‘Byāmo sahakarā bāhu, dvepassadvayavitthatā’’ti. –
அபி⁴தா⁴னே (அபி⁴தா⁴னப்பதீ³பிகாயங் 269 கா³தா²யங்) வுத்தத்தா பா³ஹு நாம இத⁴ ப்³யாமோவ அதி⁴ப்பேதோ. தஸ்மா த்³வீஸு பஸ்ஸேஸு வித்த²தானங் ப்³யாமஸங்கா²தானங் ஸஹகரானங் த்³வின்னங் பா³ஹூனங் அட்³டோ⁴தி அட்³ட⁴பா³ஹு, தஸ்ஸ பமாணமேதஸ்ஸாதி அட்³ட⁴பா³ஹுப்பமாணாதி வசனத்தோ² காதப்³போ³, தீ³க⁴தோ த்³விஹத்தா² வல்லீதி வுத்தங் ஹோதி. தத்த²ஜாதகாதி திஸ்ஸங் ஸங்க⁴ஸ்ஸ பூ⁴மியங் ஜாதகா. ரக்கி²தகோ³பிதாதி ஸங்கே⁴ன ஸயங் ரக்கி²தா, பரேஹி கோ³பிதா. இமினா அரக்கி²தஅகோ³பிதா க³ருப⁴ண்ட³ங் ந ஹோதீதி த³ஸ்ஸேதி. ஸாதி வல்லி. அதிரேகா ஹோதீதி ஸம்ப³ந்தோ⁴. உபனேதுந்தி தங் வல்லிங் உபனேதுங். ஸுத்தஞ்ச மகசிவாகஞ்ச நாளிகேரஹீரஞ்ச சம்மஞ்ச ஸுத்த…பே॰… சம்மானி, தேஹி கதா ஸுத்த…பே॰… சம்மமயா. ரஜ்ஜுகா வா யொத்தானி வா க³ருப⁴ண்ட³ங் ஹோதீதி ஸம்ப³ந்தோ⁴. ஏகவட்டா வா த்³விவட்டா வாதி எத்த² வாஸத்³தே³ன திவட்டாதி³ங் ஸங்க³ண்ஹாதி. அவட்டெத்வா தி³ன்னங் ஸுத்தஞ்ச அவட்டெத்வா தி³ன்னா மகசிவாகனாளிகேரஹீரா சாதி யோஜனா.
Abhidhāne (abhidhānappadīpikāyaṃ 269 gāthāyaṃ) vuttattā bāhu nāma idha byāmova adhippeto. Tasmā dvīsu passesu vitthatānaṃ byāmasaṅkhātānaṃ sahakarānaṃ dvinnaṃ bāhūnaṃ aḍḍhoti aḍḍhabāhu, tassa pamāṇametassāti aḍḍhabāhuppamāṇāti vacanattho kātabbo, dīghato dvihatthā vallīti vuttaṃ hoti. Tatthajātakāti tissaṃ saṅghassa bhūmiyaṃ jātakā. Rakkhitagopitāti saṅghena sayaṃ rakkhitā, parehi gopitā. Iminā arakkhitaagopitā garubhaṇḍaṃ na hotīti dasseti. Sāti valli. Atirekā hotīti sambandho. Upanetunti taṃ valliṃ upanetuṃ. Suttañca makacivākañca nāḷikerahīrañca cammañca sutta…pe… cammāni, tehi katā sutta…pe… cammamayā. Rajjukā vā yottāni vā garubhaṇḍaṃ hotīti sambandho. Ekavaṭṭā vā dvivaṭṭā vāti ettha vāsaddena tivaṭṭādiṃ saṅgaṇhāti. Avaṭṭetvā dinnaṃ suttañca avaṭṭetvā dinnā makacivākanāḷikerahīrā cāti yojanā.
யோ கோசி வேளூதி ஸம்ப³ந்தோ⁴. ஸோபீதி வேளுபி வட்டதீதி ஸம்ப³ந்தோ⁴. பிஸத்³தே³ன வல்லிங் அபெக்க²தி. இத³மெத்தா²தி இத³ங் ஸப்³ப³ங் எத்த² வேளும்ஹி, வேளூஸு வா இத³ந்தி ஸம்ப³ந்தோ⁴. ஸமகங் வாதி க³ஹிதவேளுனா ஸமப்பமாணங் வா. அதிரேகங் வாதி ததோ அதிரேகங் வா. தங்அக்³க⁴னகந்தி தஸ்ஸ வேளுனோ அக்³க⁴னாரஹங். பா²திகம்மந்தி வட்³டி⁴கம்மங். தத்தே²வாதி க³ண்ஹனட்டா²னேவ. க³மனகாலேதி க³ண்ஹனட்டா²னதோ அஞ்ஞத்த² க³மனகாலே. ‘‘பஹிணித்வா தா³தப்³போ³’’தி இமினா ஸயங் வா ஆக³ந்த்வா தா³தப்³போ³தி அத்தோ²பி லக்க²ணஹாரனயேன க³ஹேதப்³போ³ ஸமானகிச்சத்தா.
Yo koci veḷūti sambandho. Sopīti veḷupi vaṭṭatīti sambandho. Pisaddena valliṃ apekkhati. Idametthāti idaṃ sabbaṃ ettha veḷumhi, veḷūsu vā idanti sambandho. Samakaṃ vāti gahitaveḷunā samappamāṇaṃ vā. Atirekaṃ vāti tato atirekaṃ vā. Taṃagghanakanti tassa veḷuno agghanārahaṃ. Phātikammanti vaḍḍhikammaṃ. Tatthevāti gaṇhanaṭṭhāneva. Gamanakāleti gaṇhanaṭṭhānato aññattha gamanakāle. ‘‘Pahiṇitvā dātabbo’’ti iminā sayaṃ vā āgantvā dātabboti atthopi lakkhaṇahāranayena gahetabbo samānakiccattā.
முஞ்ஜபப்³ப³ஜஸத்³தே³ன முஞ்ஜபப்³ப³ஜதிணானங் பாளியங் விஸுங் க³ஹிதத்தா திணஸத்³தே³ன தானி ட²பெத்வா பாரிஸேஸஞாயேன அவஸேஸதிணமேவ க³ஹேதப்³ப³ந்தி த³ஸ்ஸெந்தோ ஆஹ ‘‘முஞ்ஜங் பப்³ப³ஜஞ்ச ட²பெத்வா’’திஆதி³. ஸமானப²லத்தா லக்க²ணஹாரனயேன பண்ணம்பி திணேனேவ ஸங்க³ஹிதந்தி த³ஸ்ஸெந்தோ ஆஹ ‘‘யத்தா²’’திஆதி³. தத்த² யத்தா²தி யஸ்மிங் டா²னே, இதீதி ஏவங். திணஞ்ச க³ருப⁴ண்ட³ங் ஹோதீதி ஸம்ப³ந்தோ⁴. தத்த²ஜாதகங் வாதி தஸ்மிங் ஸங்கா⁴ராமே ஜாதகங் வா. ப³ஹாராமேதி ஸங்கா⁴ராமதோ ப³ஹி. தம்பீதி திணம்பி. பிஸத்³தே³ன வல்லிவேளூ அபெக்க²தி. அட்ட²ங்கு³லப்பமாணோபீதி தீ³க⁴தோ அட்ட²ங்கு³லபமாணோபி . ரித்தபொத்த²கோதி அலிகி²தத்தா துச்சோ² மகசிவத்தா²தி³கோபி பண்ணமயோபி பொத்த²கோ. இத³ஞ்ச பண்ணபஸங்கே³ன வுத்தங்.
Muñjapabbajasaddena muñjapabbajatiṇānaṃ pāḷiyaṃ visuṃ gahitattā tiṇasaddena tāni ṭhapetvā pārisesañāyena avasesatiṇameva gahetabbanti dassento āha ‘‘muñjaṃ pabbajañca ṭhapetvā’’tiādi. Samānaphalattā lakkhaṇahāranayena paṇṇampi tiṇeneva saṅgahitanti dassento āha ‘‘yatthā’’tiādi. Tattha yatthāti yasmiṃ ṭhāne, itīti evaṃ. Tiṇañca garubhaṇḍaṃ hotīti sambandho. Tatthajātakaṃ vāti tasmiṃ saṅghārāme jātakaṃ vā. Bahārāmeti saṅghārāmato bahi. Tampīti tiṇampi. Pisaddena valliveḷū apekkhati. Aṭṭhaṅgulappamāṇopīti dīghato aṭṭhaṅgulapamāṇopi . Rittapotthakoti alikhitattā tuccho makacivatthādikopi paṇṇamayopi potthako. Idañca paṇṇapasaṅgena vuttaṃ.
பஞ்சவண்ணா வாதி நீலபீதலோஹிதோதா³தமஞ்ஜிட்ட²வஸேன பஞ்சவண்ணனா வா. தம்பீதி மத்திகம்பி. பிஸத்³தே³ன வல்லிவேளுதிணானி அபெக்க²தி.
Pañcavaṇṇā vāti nīlapītalohitodātamañjiṭṭhavasena pañcavaṇṇanā vā. Tampīti mattikampi. Pisaddena valliveḷutiṇāni apekkhati.
தா³ருப⁴ண்டே³ ஏவங் வினிச்ச²யோ வேதி³தப்³போ³தி யோஜனா. ரக்கி²தகோ³பிதோ யோ கோசி தா³ருப⁴ண்ட³கோ அத்தீ²தி யோஜனா. மஹாஅட்ட²கதா²யங் பன வுத்தோதி ஸம்ப³ந்தோ⁴.
Dārubhaṇḍe evaṃ vinicchayo veditabboti yojanā. Rakkhitagopito yo koci dārubhaṇḍako atthīti yojanā. Mahāaṭṭhakathāyaṃ pana vuttoti sambandho.
தத்ராதி மஹாஅட்ட²கதா²யங், ‘‘தேன கோ² பன ஸமயேனா’’தி பாளியங் வா. இமேஸூதி ஆஸந்தி³காதீ³ஸு. எத்தா²தி பீடே²ஸு, பலாலபீடே²னாதி ஸம்ப³ந்தோ⁴. ப்³யக்³க⁴சம்மஓனத்³த⁴ந்தி ப்³யக்³க⁴சம்மேன அவனத்³த⁴ங். வாளரூபபரிக்கி²த்தந்தி வாளரூபேஹி பரிவாரிதங். ரதனபரிஸிப்³பி³தந்தி ரதனஸுத்தேன ஸமந்ததோ ஸிப்³பி³தங்.
Tatrāti mahāaṭṭhakathāyaṃ, ‘‘tena kho pana samayenā’’ti pāḷiyaṃ vā. Imesūti āsandikādīsu. Etthāti pīṭhesu, palālapīṭhenāti sambandho. Byagghacammaonaddhanti byagghacammena avanaddhaṃ. Vāḷarūpaparikkhittanti vāḷarūpehi parivāritaṃ. Ratanaparisibbitanti ratanasuttena samantato sibbitaṃ.
ஏதேஸுபீதி வங்கப²லகாதீ³ஸுபி. ‘‘ஸங்க²தா²லகங் பன பா⁴ஜனீய’’ந்தி பாட²ஸ்ஸானந்தரங் ‘‘ததா²’’தி பாடோ² அத்தி², ஸோ எத்த² ந யுஜ்ஜதி, பரதோ பன ‘‘யேன கேனசி கதங் க³ருப⁴ண்ட³மேவா’’தி பாட²ஸ்ஸானந்தரங் யுஜ்ஜதி. தத்த² ஹி யதா² யேன கேனசி கதங் க³ருப⁴ண்ட³மேவ ஹோதி, ததா² த²ம்ப⁴துலாஸோபானப²லகாதீ³ஸு தா³ருமயங் வா பாஸாணமயங் வா யங்கிஞ்சி கே³ஹஸம்பா⁴ரரூபங் க³ருப⁴ண்ட³மேவாதி அத்தோ².
Etesupīti vaṅkaphalakādīsupi. ‘‘Saṅkhathālakaṃ pana bhājanīya’’nti pāṭhassānantaraṃ ‘‘tathā’’ti pāṭho atthi, so ettha na yujjati, parato pana ‘‘yena kenaci kataṃ garubhaṇḍamevā’’ti pāṭhassānantaraṃ yujjati. Tattha hi yathā yena kenaci kataṃ garubhaṇḍameva hoti, tathā thambhatulāsopānaphalakādīsu dārumayaṃ vā pāsāṇamayaṃ vā yaṃkiñci gehasambhārarūpaṃ garubhaṇḍamevāti attho.
ஸப்³ப³ந்தி ஸகலங் உத³கதும்ப³பாத³கத²லிகமண்ட³லங். ஏதேஸுபீதி ஆதா⁴ரகாதீ³ஸுபி. ததா² த²ம்ப⁴தலாதி எத்த² ததா²ஸத்³தே³ன ‘க³ருப⁴ண்ட³மேவா’’தி பத³ங் அதிதி³ஸதி. ஸங்கே⁴ தி³ன்னந்தி ஸங்க⁴ஸ்ஸ தி³ன்னங். பூ⁴மத்த²ரணந்தி பூ⁴மியங் அத்த²ரிதப்³ப³ங். தம்பீதி ஏளகசம்மம்பி.
Sabbanti sakalaṃ udakatumbapādakathalikamaṇḍalaṃ. Etesupīti ādhārakādīsupi. Tathā thambhatalāti ettha tathāsaddena ‘garubhaṇḍamevā’’ti padaṃ atidisati. Saṅghe dinnanti saṅghassa dinnaṃ. Bhūmattharaṇanti bhūmiyaṃ attharitabbaṃ. Tampīti eḷakacammampi.
உது³க்க²லங் க³ருப⁴ண்ட³மேவாதி ஸம்ப³ந்தோ⁴. ஏஸேவ நயோ முஸலந்திஆதீ³ஸுபி. ஏதேஸூதி மஞ்சபாதா³தீ³ஸு. அனுஞ்ஞாதவாஸியாதி பா⁴ஜனத்தா²ய அனுஞ்ஞாதவாஸியா. த⁴மகரணோதி எத்த² ‘‘ஸங்க²ங் த⁴மதி, ஸங்க²த⁴மகோ’’திஆதீ³ஸு விய நிஸ்ஸங்யோக³பாடோ²யேவ யுஜ்ஜதி. தஸ்மா த⁴மதி வாதேன பவத்ததீதி த⁴மோ, வாதஹேதுகோ ஸத்³தோ³, த⁴மங் கரோதீதி த⁴மகரணோதி வசனத்தோ² காதப்³போ³. ஸப்³ப³மேதந்தி அனுஞ்ஞாதவாஸித³ண்டா³தி³கங் ஏதங் ஸப்³ப³ங். ததோதி அனுஞ்ஞாதவாஸித³ண்டா³தி³கதோ, மஹந்ததரங் வாஸித³ண்டா³தி³கங் க³ருப⁴ண்ட³ந்தி யோஜனா.
Udukkhalaṃ garubhaṇḍamevāti sambandho. Eseva nayo musalantiādīsupi. Etesūti mañcapādādīsu. Anuññātavāsiyāti bhājanatthāya anuññātavāsiyā. Dhamakaraṇoti ettha ‘‘saṅkhaṃ dhamati, saṅkhadhamako’’tiādīsu viya nissaṃyogapāṭhoyeva yujjati. Tasmā dhamati vātena pavattatīti dhamo, vātahetuko saddo, dhamaṃ karotīti dhamakaraṇoti vacanattho kātabbo. Sabbametanti anuññātavāsidaṇḍādikaṃ etaṃ sabbaṃ. Tatoti anuññātavāsidaṇḍādikato, mahantataraṃ vāsidaṇḍādikaṃ garubhaṇḍanti yojanā.
யதா²ஜாதமேவாதி யதா²பவத்தமேவ. தேஹீதி ஹத்தி²த³ந்தாதீ³ஹி, ‘‘கத’’இதி பதே³ன ஸம்ப³ந்தி⁴தப்³ப³ங். தச்சி²தனிட்டி²தோபீதி தச்சி²தகம்மேன நிட்டி²தோபி.
Yathājātamevāti yathāpavattameva. Tehīti hatthidantādīhi, ‘‘kata’’iti padena sambandhitabbaṃ. Tacchitaniṭṭhitopīti tacchitakammena niṭṭhitopi.
மத்திகாப⁴ண்டே³ ஏவங் வினிச்ச²யோ வேதி³தப்³போ³தி யோஜனா, உபபோ⁴கோ³ ச பரிபோ⁴கோ³ ச உபபோ⁴க³பரிபோ⁴க³ங், ஸமாஹாரத்³வந்தோ³. இத³ங் பத³ங் ‘‘க⁴டபிதா⁴னாதி³குலாலபா⁴ஜன’’ந்தி பதே³னேவ ஸம்ப³ந்தி⁴தப்³ப³ங். து²பிகாதீதி எத்த² இதிஸத்³தோ³ இமஸத்³த³த்தோ². இத³ங் ஸப்³ப³ங் ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ந்தி யோஜனா. ‘‘அனதிரித்தபமாணோ’’தி விஸேஸனபத³ங் ‘‘க⁴டகோ’’தி விஸெஸ்யபதே³னேவ ஸம்ப³ந்தி⁴தப்³ப³ங். எத்தா²தி மத்திகாப⁴ண்டே³, ஆதா⁴ரே வா நித்³தா⁴ரணே வா த்த² பச்சயோ. மத்திகாப⁴ண்டே³ குண்டி³கா பா⁴ஜனீயகொட்டா²ஸங் ப⁴ஜதி, ஏவங் லோஹப⁴ண்டே³பீதி யோஜனா. எத்தா²தி க³ருப⁴ண்ட³வினிச்ச²யே.
Mattikābhaṇḍe evaṃ vinicchayo veditabboti yojanā, upabhogo ca paribhogo ca upabhogaparibhogaṃ, samāhāradvando. Idaṃ padaṃ ‘‘ghaṭapidhānādikulālabhājana’’nti padeneva sambandhitabbaṃ. Thupikātīti ettha itisaddo imasaddattho. Idaṃ sabbaṃ saṅghassa dinnakālato paṭṭhāya garubhaṇḍanti yojanā. ‘‘Anatirittapamāṇo’’ti visesanapadaṃ ‘‘ghaṭako’’ti visesyapadeneva sambandhitabbaṃ. Etthāti mattikābhaṇḍe, ādhāre vā niddhāraṇe vā ttha paccayo. Mattikābhaṇḍe kuṇḍikā bhājanīyakoṭṭhāsaṃ bhajati, evaṃ lohabhaṇḍepīti yojanā. Etthāti garubhaṇḍavinicchaye.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / அவிஸ்ஸஜ்ஜியவத்து² • Avissajjiyavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அவிஸ்ஸஜ்ஜியவத்து²கதா² • Avissajjiyavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அவிஸ்ஸஜ்ஜியவத்து²கதா²வண்ணனா • Avissajjiyavatthukathāvaṇṇanā
