| Library / Tipiṭaka / д̇ибидага • Tipiṭaka / жуул̣аваг̇г̇а-адтагат̇аа • Cūḷavagga-aṭṭhakathā |
ависсаж̇ж̇ияавад̇т̇угат̇аа
Avissajjiyavatthukathā
321. бан̃жимаанийд̇и раасивасзна бан̃жа, саруубавасзна банзд̇аани б̣ахууни хонд̇и. д̇ад̇т̇а аараамо наама бубпаараамо ваа палаараамо ваа. аараамавад̇т̇у наама д̇зсам̣язва аараамаанам̣ ад̇т̇ааяа барижчинд̣̇ид̇ваа табид̇огаасо; д̇зсу ваа аараамзсу винадтзсу д̇зсам̣ бораан̣агабхуумибхааг̇о. вихааро наама яам̣гин̃жи баасаад̣̇аад̣̇исзнаасанам̣. вихааравад̇т̇у наама д̇асса бад̇идтааногаасо. ман̃жо наама – масаараго, б̣унд̣̇игааб̣ад̣̇д̇хо, гул̣ийрабаад̣̇аго аахажжабаад̣̇агод̇и имзсам̣ буб̣б̣з вуд̇д̇аанам̣ жад̇уннам̣ ман̃жаанам̣ ан̃н̃ад̇аро . бийтам̣ наама масаарагаад̣̇ийнам̣язва жад̇уннам̣ бийтаанам̣ ан̃н̃ад̇арам̣. бхиси наама ун̣н̣абхисиаад̣̇ийнам̣ бан̃жаннам̣ ан̃н̃ад̇араа. б̣имб̣оханам̣ наама вуд̇д̇аббагаараанам̣ б̣имб̣оханаанам̣ ан̃н̃ад̇арам̣. лохагумбхий наама гаал̣алохзна ваа д̇амб̣алохзна ваа язна гзнажи лохзна гад̇аа гумбхий. лохабхаан̣агаад̣̇ийсуби зсзва наяо. зд̇т̇а бана бхаан̣аганд̇и аран̃ж̇аро вужжад̇и. ваарагод̇и гхадо. гадаахам̣ гадаахамзва. ваасиаад̣̇ийсу валлиаад̣̇ийсу жа д̣̇увин̃н̃зяяам̣ наама над̇т̇и. звам̣ –
321.Pañcimānīti rāsivasena pañca, sarūpavasena panetāni bahūni honti. Tattha ārāmo nāma pupphārāmo vā phalārāmo vā. Ārāmavatthu nāma tesaṃyeva ārāmānaṃ atthāya paricchinditvā ṭhapitokāso; tesu vā ārāmesu vinaṭṭhesu tesaṃ porāṇakabhūmibhāgo. Vihāro nāma yaṃkiñci pāsādādisenāsanaṃ. Vihāravatthu nāma tassa patiṭṭhānokāso. Mañco nāma – masārako, bundikābaddho, kuḷīrapādako āhaccapādakoti imesaṃ pubbe vuttānaṃ catunnaṃ mañcānaṃ aññataro . Pīṭhaṃ nāma masārakādīnaṃyeva catunnaṃ pīṭhānaṃ aññataraṃ. Bhisi nāma uṇṇabhisiādīnaṃ pañcannaṃ aññatarā. Bimbohanaṃ nāma vuttappakārānaṃ bimbohanānaṃ aññataraṃ. Lohakumbhī nāma kāḷalohena vā tambalohena vā yena kenaci lohena katā kumbhī. Lohabhāṇakādīsupi eseva nayo. Ettha pana bhāṇakanti arañjaro vuccati. Vārakoti ghaṭo. Kaṭāhaṃ kaṭāhameva. Vāsiādīsu valliādīsu ca duviññeyyaṃ nāma natthi. Evaṃ –
д̣̇висан̇г̇ахаани д̣̇вз хонд̇и, д̇ад̇ияам̣ жад̇усан̇г̇ахам̣;
Dvisaṅgahāni dve honti, tatiyaṃ catusaṅgahaṃ;
жад̇уд̇т̇ам̣ навагодтаасам̣, бан̃жамам̣ адтабхзд̣̇анам̣.
Catutthaṃ navakoṭṭhāsaṃ, pañcamaṃ aṭṭhabhedanaṃ.
ид̇и бан̃жахи раасийхи, бан̃жаниммалаложано;
Iti pañcahi rāsīhi, pañcanimmalalocano;
бан̃жавийсавид̇хам̣ наат̇о, г̇арубхан̣д̣ам̣ багаасаяи.
Pañcavīsavidhaṃ nātho, garubhaṇḍaṃ pakāsayi.
д̇ад̇рааяам̣ винижчаяагат̇аа – ид̣̇ан̃хи саб̣б̣амби г̇арубхан̣д̣ам̣ ид̇ха ависсаж̇ж̇ияам̣, гийдааг̇иривад̇т̇усмим̣ ‘‘авзбхан̇г̇ияа’’нд̇и вуд̇д̇ам̣. бариваарз бана –
Tatrāyaṃ vinicchayakathā – idañhi sabbampi garubhaṇḍaṃ idha avissajjiyaṃ, kīṭāgirivatthusmiṃ ‘‘avebhaṅgiya’’nti vuttaṃ. Parivāre pana –
‘‘ависсаж̇ж̇ияам̣ авзбхан̇г̇ияам̣, бан̃жа вуд̇д̇аа махзсинаа;
‘‘Avissajjiyaṃ avebhaṅgiyaṃ, pañca vuttā mahesinā;
виссаж̇ж̇знд̇асса барибхун̃ж̇анд̇асса анаабад̇д̇и,
Vissajjentassa paribhuñjantassa anāpatti,
бан̃хаа мзсаа гусалзхи жинд̇ид̇аа’’д̇и. (бари. 479) –
Pañhā mesā kusalehi cintitā’’ti. (pari. 479) –
ааг̇ад̇ам̣. д̇асмаа муулажчзж̇ж̇авасзна ависсаж̇ж̇ияам̣ авзбхан̇г̇ияан̃жа баривад̇д̇анавасзна бана виссаж̇ж̇знд̇асса барибхун̃ж̇анд̇асса жа анаабад̇д̇ийд̇и звамзд̇т̇а ад̇хиббааяо взд̣̇ид̇аб̣б̣о.
Āgataṃ. Tasmā mūlacchejjavasena avissajjiyaṃ avebhaṅgiyañca parivattanavasena pana vissajjentassa paribhuñjantassa ca anāpattīti evamettha adhippāyo veditabbo.
д̇ад̇рааяам̣ анубуб̣б̣игат̇аа – ид̣̇ам̣ д̇аава бан̃жавид̇хамби жийварабин̣д̣абаад̇абхзсаж̇ж̇ад̇т̇ааяа убанзд̇ум̣ на ваддад̇и. т̇ааварзна жа т̇ааварам̣ г̇арубхан̣д̣зна жа г̇арубхан̣д̣ам̣ баривад̇д̇зд̇ум̣ ваддад̇и. т̇ааварз бана кзд̇д̇ам̣ вад̇т̇у д̇ал̣аагам̣ маад̇игаад̇и зваруубам̣ бхигкусан̇гхасса вижаарзд̇ум̣ ваа самбадижчид̇ум̣ ваа ад̇хиваасзд̇ум̣ ваа на ваддад̇и, габбияагаарагзхзва вижаарид̇ад̇о габбияабхан̣д̣ам̣ ваддад̇и. аараамзна бана аараамам̣ аараамавад̇т̇ум̣ вихаарам̣ вихааравад̇т̇унд̇и имаани жад̇д̇аари баривад̇д̇зд̇ум̣ ваддад̇и.
Tatrāyaṃ anupubbikathā – idaṃ tāva pañcavidhampi cīvarapiṇḍapātabhesajjatthāya upanetuṃ na vaṭṭati. Thāvarena ca thāvaraṃ garubhaṇḍena ca garubhaṇḍaṃ parivattetuṃ vaṭṭati. Thāvare pana khettaṃ vatthu taḷākaṃ mātikāti evarūpaṃ bhikkhusaṅghassa vicāretuṃ vā sampaṭicchituṃ vā adhivāsetuṃ vā na vaṭṭati, kappiyakārakeheva vicāritato kappiyabhaṇḍaṃ vaṭṭati. Ārāmena pana ārāmaṃ ārāmavatthuṃ vihāraṃ vihāravatthunti imāni cattāri parivattetuṃ vaṭṭati.
д̇ад̇рааяам̣ баривад̇д̇ананаяо – сан̇гхасса наал̣игзраараамо д̣̇уурз ход̇и, габбияагаарагаа ваа б̣ахуд̇арам̣ каад̣̇анд̇и. яамби на каад̣̇анд̇и, д̇ад̇о сагадавзд̇анам̣ д̣̇ад̇ваа аббамзва харанд̇и. ан̃н̃зсам̣ бана д̇асса аараамасса авид̣̇уураг̇аамаваасийнам̣ мануссаанам̣ вихаарасса самийбз аараамо ход̇и, д̇з сан̇гхам̣ убасан̇гамид̇ваа сагзна аараамзна д̇ам̣ аараамам̣ яаажанд̇и, сан̇гхзна ‘‘ружжад̇и сан̇гхассаа’’д̇и абалогзд̇ваа самбадижчид̇аб̣б̣о. сажзби бхигкуунам̣ ругкасахассам̣ ход̇и, мануссаанам̣ бан̃жа сад̇аани, ‘‘д̇умхаагам̣ аараамо куд̣̇д̣̇аго’’д̇и на вад̇д̇аб̣б̣ам̣. гин̃жааби хи аяам̣ куд̣̇д̣̇аго, ат̇а ко ид̇арад̇о б̣ахуд̇арам̣ ааяам̣ д̣̇зд̇и. сажзби самагамзва д̣̇зд̇и; звамби ижчид̇ижчид̇агкан̣з барибхун̃ж̇ид̇ум̣ саггаад̇и г̇ахзд̇аб̣б̣амзва. сажз бана мануссаанам̣ б̣ахуд̇араа ругкаа хонд̇и, ‘‘нану д̇умхаагам̣ б̣ахуд̇араа ругкаа’’д̇и вад̇д̇аб̣б̣ам̣. сажз ‘‘ад̇ирзгам̣ амхаагам̣ бун̃н̃ам̣ ход̇у, сан̇гхасса д̣̇змаа’’д̇и вад̣̇анд̇и, ж̇аанаабзд̇ваа самбадижчид̇ум̣ ваддад̇и. бхигкуунам̣ ругкаа палад̇хаарино, мануссаанам̣ ругкаа на д̇аава палам̣ г̇ан̣ханд̇и, гин̃жааби на г̇ан̣ханд̇и, на жирзна г̇ан̣хиссанд̇ийд̇и самбадижчид̇аб̣б̣амзва. мануссаанам̣ ругкаа палад̇хаарино, бхигкуунам̣ на д̇аава палам̣ г̇ан̣ханд̇и, ‘‘нану д̇умхаагам̣ ругкаа палад̇хаарино’’д̇и вад̇д̇аб̣б̣ам̣. сажз ‘‘г̇ан̣хат̇а, бханд̇з, амхаагам̣ бун̃н̃ам̣ бхависсад̇ий’’д̇и д̣̇знд̇и, ж̇аанаабзд̇ваа самбадижчид̇ум̣ ваддад̇и; звам̣ аараамзна аараамо баривад̇д̇зд̇аб̣б̣о. зд̇знзва наязна аараамавад̇т̇уби вихаароби вихааравад̇т̇уби аараамзна баривад̇д̇зд̇аб̣б̣ам̣. аараамавад̇т̇унаа жа маханд̇зна ваа куд̣̇д̣̇агзна ваа аараамааараамавад̇т̇у вихааравихааравад̇т̇ууни .
Tatrāyaṃ parivattananayo – saṅghassa nāḷikerārāmo dūre hoti, kappiyakārakā vā bahutaraṃ khādanti. Yampi na khādanti, tato sakaṭavetanaṃ datvā appameva haranti. Aññesaṃ pana tassa ārāmassa avidūragāmavāsīnaṃ manussānaṃ vihārassa samīpe ārāmo hoti, te saṅghaṃ upasaṅkamitvā sakena ārāmena taṃ ārāmaṃ yācanti, saṅghena ‘‘ruccati saṅghassā’’ti apaloketvā sampaṭicchitabbo. Sacepi bhikkhūnaṃ rukkhasahassaṃ hoti, manussānaṃ pañca satāni, ‘‘tumhākaṃ ārāmo khuddako’’ti na vattabbaṃ. Kiñcāpi hi ayaṃ khuddako, atha kho itarato bahutaraṃ āyaṃ deti. Sacepi samakameva deti; evampi icchiticchitakkhaṇe paribhuñjituṃ sakkāti gahetabbameva. Sace pana manussānaṃ bahutarā rukkhā honti, ‘‘nanu tumhākaṃ bahutarā rukkhā’’ti vattabbaṃ. Sace ‘‘atirekaṃ amhākaṃ puññaṃ hotu, saṅghassa demā’’ti vadanti, jānāpetvā sampaṭicchituṃ vaṭṭati. Bhikkhūnaṃ rukkhā phaladhārino, manussānaṃ rukkhā na tāva phalaṃ gaṇhanti, kiñcāpi na gaṇhanti, na cirena gaṇhissantīti sampaṭicchitabbameva. Manussānaṃ rukkhā phaladhārino, bhikkhūnaṃ na tāva phalaṃ gaṇhanti, ‘‘nanu tumhākaṃ rukkhā phaladhārino’’ti vattabbaṃ. Sace ‘‘gaṇhatha, bhante, amhākaṃ puññaṃ bhavissatī’’ti denti, jānāpetvā sampaṭicchituṃ vaṭṭati; evaṃ ārāmena ārāmo parivattetabbo. Eteneva nayena ārāmavatthupi vihāropi vihāravatthupi ārāmena parivattetabbaṃ. Ārāmavatthunā ca mahantena vā khuddakena vā ārāmaārāmavatthu vihāravihāravatthūni .
гат̇ам̣ вихаарзна вихааро баривад̇д̇зд̇аб̣б̣о? сан̇гхасса анд̇ог̇аамз г̇зхам̣ ход̇и, мануссаанам̣ вихаарамаж̇жхз баасаад̣̇о, убхоби аг̇гхзна самагаа, сажз мануссаа д̇зна баасаад̣̇зна д̇ам̣ г̇зхам̣ яаажанд̇и, самбадижчид̇ум̣ ваддад̇и. бхигкуунам̣ жз махаг̇гхад̇арам̣ г̇зхам̣ ход̇и, ‘‘махаг̇гхад̇арам̣ амхаагам̣ г̇зха’’нд̇и вуд̇д̇з ‘‘гин̃жааби махаг̇гхад̇арам̣, баб̣б̣аж̇ид̇аанам̣ асааруббам̣, на саггаа д̇ад̇т̇а баб̣б̣аж̇ид̇зхи васид̇ум̣, ид̣̇ам̣ бана сааруббам̣ г̇ан̣хат̇аа’’д̇и вад̣̇анд̇и; звамби самбадижчид̇ум̣ ваддад̇и. сажз бана мануссаанам̣ махаг̇гхам̣ ход̇и, ‘‘нану д̇умхаагам̣ г̇зхам̣ махаг̇гха’’нд̇и вад̇д̇аб̣б̣ам̣. ‘‘ход̇у, бханд̇з, амхаагам̣ бун̃н̃ам̣ бхависсад̇и, г̇ан̣хат̇аа’’д̇и вуд̇д̇з бана самбадижчид̇ум̣ ваддад̇и. звам̣ вихаарзна вихааро баривад̇д̇зд̇аб̣б̣о. зд̇знзва наязна вихааравад̇т̇уби аараамоби аараамавад̇т̇уби вихаарзна баривад̇д̇зд̇аб̣б̣ам̣. вихааравад̇т̇унаа жа махаг̇гхзна ваа аббаг̇гхзна ваа вихааравихааравад̇т̇уаараамааараамавад̇т̇ууни. звам̣ д̇аава т̇ааварзна т̇ааварабаривад̇д̇анам̣ взд̣̇ид̇аб̣б̣ам̣.
Kathaṃ vihārena vihāro parivattetabbo? Saṅghassa antogāme gehaṃ hoti, manussānaṃ vihāramajjhe pāsādo, ubhopi agghena samakā, sace manussā tena pāsādena taṃ gehaṃ yācanti, sampaṭicchituṃ vaṭṭati. Bhikkhūnaṃ ce mahagghataraṃ gehaṃ hoti, ‘‘mahagghataraṃ amhākaṃ geha’’nti vutte ‘‘kiñcāpi mahagghataraṃ, pabbajitānaṃ asāruppaṃ, na sakkā tattha pabbajitehi vasituṃ, idaṃ pana sāruppaṃ gaṇhathā’’ti vadanti; evampi sampaṭicchituṃ vaṭṭati. Sace pana manussānaṃ mahagghaṃ hoti, ‘‘nanu tumhākaṃ gehaṃ mahaggha’’nti vattabbaṃ. ‘‘Hotu, bhante, amhākaṃ puññaṃ bhavissati, gaṇhathā’’ti vutte pana sampaṭicchituṃ vaṭṭati. Evaṃ vihārena vihāro parivattetabbo. Eteneva nayena vihāravatthupi ārāmopi ārāmavatthupi vihārena parivattetabbaṃ. Vihāravatthunā ca mahagghena vā appagghena vā vihāravihāravatthuārāmaārāmavatthūni. Evaṃ tāva thāvarena thāvaraparivattanaṃ veditabbaṃ.
г̇арубхан̣д̣зна г̇арубхан̣д̣абаривад̇д̇анз бана ман̃жабийтам̣ маханд̇ам̣ ваа ход̇у куд̣̇д̣̇агам̣ ваа, анд̇амасо жад̇уран̇г̇улабаад̣̇агам̣ ваа г̇аамад̣̇аарагзхи бам̣свааг̇аарагзсу гийл̣анд̇зхи гад̇амби сан̇гхасса д̣̇иннагаалад̇о бадтааяа г̇арубхан̣д̣ам̣ ход̇и. сажзби рааж̇арааж̇амахаамад̇д̇аад̣̇аяо згаббахаарзнзва ман̃жасад̇ам̣ ваа ман̃жасахассам̣ ваа д̣̇знд̇и, саб̣б̣з габбияаман̃жаа самбадижчид̇аб̣б̣аа, самбадижчид̇ваа вуд̣дхабадибаадияаа ‘‘сан̇гхигабарибхог̇зна барибхун̃ж̇ат̇аа’’д̇и д̣̇аад̇аб̣б̣аа, буг̇г̇алигавасзна на д̣̇аад̇аб̣б̣аа. ад̇ирзгаман̃жз бхан̣д̣ааг̇аараад̣̇ийсу бан̃н̃абзд̇ваа бад̇д̇ажийварам̣ нигкибид̇умби ваддад̇и. б̣ахисиймааяа ‘‘сан̇гхасса д̣̇змаа’’д̇и д̣̇иннаман̃жо сан̇гхад̇т̇зрасса васанадтаанз д̣̇аад̇аб̣б̣о. д̇ад̇т̇а жз б̣ахуу ман̃жаа хонд̇и, ман̃жзна гаммам̣ над̇т̇и; яасса васанадтаанз гаммам̣ ад̇т̇и, д̇ад̇т̇а ‘‘сан̇гхигабарибхог̇зна барибхун̃ж̇ат̇аа’’д̇и д̣̇аад̇аб̣б̣о. махаг̇гхзна сад̇аг̇гханагзна ваа сахассаг̇гханагзна ваа сад̇асахассаг̇гханагзна ваа ман̃жзна ан̃н̃ам̣ ман̃жасад̇ам̣ лабхад̇и, баривад̇д̇зд̇ваа г̇ахзд̇аб̣б̣ам̣. на гзвалам̣ ман̃жзна ман̃жоязва, аараамааараамавад̇т̇увихааравихааравад̇т̇убийтабхисиб̣имб̣оханааниби баривад̇д̇зд̇ум̣ вадданд̇и. зса наяо бийтабхисиб̣имб̣оханзсуби. зд̇зсу хи габбияаагабяияам̣ вуд̇д̇анаяамзва. д̇ад̇т̇а агаббияам̣ на барибхун̃ж̇ид̇аб̣б̣ам̣, габбияам̣ сан̇гхигабарибхог̇зна барибхун̃ж̇ид̇аб̣б̣ам̣. агаббияам̣ ваа махаг̇гхам̣ габбияам̣ ваа баривад̇д̇зд̇ваа вуд̇д̇авад̇т̇ууни г̇ахзд̇аб̣б̣аани. аг̇арубхан̣д̣убаг̇ам̣ бана бхисиб̣имб̣оханам̣ наама над̇т̇и.
Garubhaṇḍena garubhaṇḍaparivattane pana mañcapīṭhaṃ mahantaṃ vā hotu khuddakaṃ vā, antamaso caturaṅgulapādakaṃ vā gāmadārakehi paṃsvāgārakesu kīḷantehi katampi saṅghassa dinnakālato paṭṭhāya garubhaṇḍaṃ hoti. Sacepi rājarājamahāmattādayo ekappahāreneva mañcasataṃ vā mañcasahassaṃ vā denti, sabbe kappiyamañcā sampaṭicchitabbā, sampaṭicchitvā vuḍḍhapaṭipāṭiyā ‘‘saṅghikaparibhogena paribhuñjathā’’ti dātabbā, puggalikavasena na dātabbā. Atirekamañce bhaṇḍāgārādīsu paññapetvā pattacīvaraṃ nikkhipitumpi vaṭṭati. Bahisīmāya ‘‘saṅghassa demā’’ti dinnamañco saṅghattherassa vasanaṭṭhāne dātabbo. Tattha ce bahū mañcā honti, mañcena kammaṃ natthi; yassa vasanaṭṭhāne kammaṃ atthi, tattha ‘‘saṅghikaparibhogena paribhuñjathā’’ti dātabbo. Mahagghena satagghanakena vā sahassagghanakena vā satasahassagghanakena vā mañcena aññaṃ mañcasataṃ labhati, parivattetvā gahetabbaṃ. Na kevalaṃ mañcena mañcoyeva, ārāmaārāmavatthuvihāravihāravatthupīṭhabhisibimbohanānipi parivattetuṃ vaṭṭanti. Esa nayo pīṭhabhisibimbohanesupi. Etesu hi kappiyākapyiyaṃ vuttanayameva. Tattha akappiyaṃ na paribhuñjitabbaṃ, kappiyaṃ saṅghikaparibhogena paribhuñjitabbaṃ. Akappiyaṃ vā mahagghaṃ kappiyaṃ vā parivattetvā vuttavatthūni gahetabbāni. Agarubhaṇḍupagaṃ pana bhisibimbohanaṃ nāma natthi.
лохагумбхий лохабхаан̣агам̣ лохагадааханд̇и имаани д̇ийн̣и маханд̇аани ваа хонд̇у куд̣̇д̣̇агаани ваа анд̇амасо басад̇амад̇д̇ауд̣̇агаг̇ан̣ханагааниби г̇арубхан̣д̣ааниязва. лохаваараго бана гаал̣алохад̇амб̣алохаваддалохагам̣салохаанам̣ язна гзнажи гад̇о сийхал̣ад̣̇ийбз баад̣̇аг̇ан̣ханаго бхааж̇зд̇аб̣б̣о. баад̣̇о жа наама маг̇ад̇ханаал̣ияаа бан̃жанаал̣имад̇д̇ам̣ г̇ан̣хаад̇и, д̇ад̇о ад̇хигаг̇ан̣ханаго г̇арубхан̣д̣ам̣. имаани д̇аава баал̣ияам̣ ааг̇ад̇аани лохабхааж̇анаани.
Lohakumbhī lohabhāṇakaṃ lohakaṭāhanti imāni tīṇi mahantāni vā hontu khuddakāni vā antamaso pasatamattaudakagaṇhanakānipi garubhaṇḍāniyeva. Lohavārako pana kāḷalohatambalohavaṭṭalohakaṃsalohānaṃ yena kenaci kato sīhaḷadīpe pādagaṇhanako bhājetabbo. Pādo ca nāma magadhanāḷiyā pañcanāḷimattaṃ gaṇhāti, tato adhikagaṇhanako garubhaṇḍaṃ. Imāni tāva pāḷiyaṃ āgatāni lohabhājanāni.
баал̣ияам̣ бана анааг̇ад̇ааниби бхин̇г̇аарабадиг̇г̇ахаул̣ун̇гад̣̇аб̣б̣игадажчубаад̇ид̇аддагасарагасамуг̇г̇аан̇г̇аарагабаллад̇хуумагадажчуаад̣̇ийни куд̣̇д̣̇агаани ваа маханд̇аани ваа саб̣б̣аани г̇арубхан̣д̣аани. бад̇д̇о, аяат̇аалагам̣, д̇амб̣алохат̇аалаганд̇и имаани бана бхааж̇анийяаани. гам̣салохаваддалохабхааж̇анавигад̇и сан̇гхигабарибхог̇зна ваа г̇ихивигадаа ваа ваддад̇и, буг̇г̇алигабарибхог̇зна на ваддад̇и. гам̣салохаад̣̇ибхааж̇анам̣ сан̇гхасса д̣̇иннамби хи баарихаарияам̣ на ваддад̇и. ‘‘г̇ихивигаданихаарзнзва барибхун̃ж̇ид̇аб̣б̣а’’нд̇и махаабажжарияам̣ вуд̇д̇ам̣.
Pāḷiyaṃ pana anāgatānipi bhiṅgārapaṭiggahauḷuṅkadabbikaṭacchupātitaṭṭakasarakasamuggaaṅgārakapalladhūmakaṭacchuādīni khuddakāni vā mahantāni vā sabbāni garubhaṇḍāni. Patto, ayathālakaṃ, tambalohathālakanti imāni pana bhājanīyāni. Kaṃsalohavaṭṭalohabhājanavikati saṅghikaparibhogena vā gihivikaṭā vā vaṭṭati, puggalikaparibhogena na vaṭṭati. Kaṃsalohādibhājanaṃ saṅghassa dinnampi hi pārihāriyaṃ na vaṭṭati. ‘‘Gihivikaṭanihāreneva paribhuñjitabba’’nti mahāpaccariyaṃ vuttaṃ.
табзд̇ваа бана бхааж̇анавигад̇им̣ ан̃н̃асмимби габбияалохабхан̣д̣з – ан̃ж̇аний, ан̃ж̇анисалаагаа, ган̣н̣амалахаран̣ий, суужи, бан̣н̣асуужи, куд̣̇д̣̇аго, бибпалаго, куд̣̇д̣̇агам̣, аараган̣дагам̣, гун̃жигаа, д̇аал̣ам̣, гад̇д̇араяадти взд̇хаго, над̇т̇уд̣̇аанам̣, бхинд̣̇иваало, лохагуудо, лохагудди, лохаг̇ул̣о, лохабин̣д̣и, лохажаггалигам̣, ан̃н̃амби виббагад̇алохабхан̣д̣ам̣ бхааж̇анийяам̣. д̇хууманзд̇д̇апаалад̣̇ийбаругкад̣̇ийбагабаллагаоламб̣агад̣̇ийбаид̇т̇ибурисад̇иражчаанаг̇ад̇аруубагаани бана ан̃н̃аани ваа бхид̇д̇ижчад̣̇анагаваадаад̣̇ийсу убанзд̇аб̣б̣аани, анд̇амасо лохакилагам̣ убаад̣̇ааяа саб̣б̣аани лохабхан̣д̣аани г̇арубхан̣д̣ааниязва хонд̇и, ад̇д̇анаа лад̣̇д̇хааниби барихарид̇ваа буг̇г̇алигабарибхог̇зна на барибхун̃ж̇ид̇аб̣б̣аани, сан̇гхигабарибхог̇зна ваа г̇ихивигадаани ваа вадданд̇и. д̇ибубхан̣д̣зби зсзва наяо. кийрабаасаан̣амаяаани д̇аддагасарагаад̣̇ийни г̇арубхан̣д̣ааниязва.
Ṭhapetvā pana bhājanavikatiṃ aññasmimpi kappiyalohabhaṇḍe – añjanī, añjanisalākā, kaṇṇamalaharaṇī, sūci, paṇṇasūci, khuddako, pipphalako, khuddakaṃ, ārakaṇṭakaṃ, kuñcikā, tāḷaṃ, kattarayaṭṭhi vedhako, natthudānaṃ, bhindivālo, lohakūṭo, lohakuṭṭi, lohaguḷo, lohapiṇḍi, lohacakkalikaṃ, aññampi vippakatalohabhaṇḍaṃ bhājanīyaṃ. Dhūmanettaphāladīparukkhadīpakapallakaolambakadīpaitthipurisatiracchānagatarūpakāni pana aññāni vā bhitticchadanakavāṭādīsu upanetabbāni, antamaso lohakhilakaṃ upādāya sabbāni lohabhaṇḍāni garubhaṇḍāniyeva honti, attanā laddhānipi pariharitvā puggalikaparibhogena na paribhuñjitabbāni, saṅghikaparibhogena vā gihivikaṭāni vā vaṭṭanti. Tipubhaṇḍepi eseva nayo. Khīrapāsāṇamayāni taṭṭakasarakādīni garubhaṇḍāniyeva.
гхадаго бана д̇злабхааж̇анам̣ ваа баад̣̇аг̇ан̣ханагад̇о ад̇ирзгамзва г̇арубхан̣д̣ам̣. суван̣н̣араж̇ад̇ахаарагуудаж̇аад̇ипалигабхааж̇анаани г̇ихивигадааниби на вадданд̇и, баг̇зва сан̇гхигабарибхог̇зна ваа буг̇г̇алигабарибхог̇зна ваа. сзнаасанабарибхог̇з бана аамаасамби анаамаасамби саб̣б̣ам̣ ваддад̇и.
Ghaṭako pana telabhājanaṃ vā pādagaṇhanakato atirekameva garubhaṇḍaṃ. Suvaṇṇarajatahārakūṭajātiphalikabhājanāni gihivikaṭānipi na vaṭṭanti, pageva saṅghikaparibhogena vā puggalikaparibhogena vā. Senāsanaparibhoge pana āmāsampi anāmāsampi sabbaṃ vaṭṭati.
ваасиаад̣̇ийсу яааяа ваасияаа табзд̇ваа д̣̇ан̣д̣агадтажчзд̣̇анам̣ ваа ужчуд̇ажчанам̣ ваа ан̃н̃ам̣ махаагаммам̣ гаад̇ум̣ на саггаа, аяам̣ бхааж̇анийяаа. д̇ад̇о махад̇д̇арий язна гзнажи аагаарзна гад̇аа вааси г̇арубхан̣д̣амзва. парасу бана анд̇амасо взж̇ж̇аанам̣ сираавзд̇ханапарасуби г̇арубхан̣д̣амзва. гутаарияам̣ парасусад̣̇исо зва винижчаяо. яаа бана аавуд̇хасан̇кзбзна гад̇аа, аяам̣ анаамаасаа. гуд̣̇аало анд̇амасо жад̇уран̇г̇уламад̇д̇оби г̇арубхан̣д̣амзва. никаад̣̇анам̣ жад̇урассамукам̣ ваа ход̇у д̣̇он̣имукам̣ ваа ван̇гам̣ ваа уж̇угам̣ ваа, анд̇амасо саммун̃ж̇анид̣̇ан̣д̣агавзд̇ханамби д̣̇ан̣д̣аб̣ад̣̇д̇хам̣ жз, г̇арубхан̣д̣амзва. саммун̃ж̇анид̣̇ан̣д̣акан̣анагам̣ бана ад̣̇ан̣д̣агам̣ паламад̇д̇амзва, яам̣ саггаа сибаадигааяа багкибид̇ваа барихарид̇ум̣, д̇ам̣ бхааж̇анийяам̣. сикарамби никаад̣̇анзнзва сан̇г̇ахид̇ам̣. язхи мануссзхи вихаарз ваасиаад̣̇ийни д̣̇иннаани хонд̇и, д̇з жа гхарз д̣̇ад̣дхз ваа жорзхи ваа вилуд̇д̇з ‘‘д̣̇зт̇а но, бханд̇з, убагаран̣з, буна баагад̇игз гариссаамаа’’д̇и вад̣̇анд̇и, д̣̇аад̇аб̣б̣аа. сажз аахаранд̇и , на ваарзд̇аб̣б̣аа; анаахаранд̇ааби на жод̣̇зд̇аб̣б̣аа.
Vāsiādīsu yāya vāsiyā ṭhapetvā daṇḍakaṭṭhacchedanaṃ vā ucchutacchanaṃ vā aññaṃ mahākammaṃ kātuṃ na sakkā, ayaṃ bhājanīyā. Tato mahattarī yena kenaci ākārena katā vāsi garubhaṇḍameva. Pharasu pana antamaso vejjānaṃ sirāvedhanapharasupi garubhaṇḍameva. Kuṭhāriyaṃ pharasusadiso eva vinicchayo. Yā pana āvudhasaṅkhepena katā, ayaṃ anāmāsā. Kudālo antamaso caturaṅgulamattopi garubhaṇḍameva. Nikhādanaṃ caturassamukhaṃ vā hotu doṇimukhaṃ vā vaṅkaṃ vā ujukaṃ vā, antamaso sammuñjanidaṇḍakavedhanampi daṇḍabaddhaṃ ce, garubhaṇḍameva. Sammuñjanidaṇḍakhaṇanakaṃ pana adaṇḍakaṃ phalamattameva, yaṃ sakkā sipāṭikāya pakkhipitvā pariharituṃ, taṃ bhājanīyaṃ. Sikharampi nikhādaneneva saṅgahitaṃ. Yehi manussehi vihāre vāsiādīni dinnāni honti, te ca ghare daḍḍhe vā corehi vā vilutte ‘‘detha no, bhante, upakaraṇe, puna pākatike karissāmā’’ti vadanti, dātabbā. Sace āharanti , na vāretabbā; anāharantāpi na codetabbā.
гаммаарад̇аддагааражунд̣̇агааранал̣агаараман̣игаарабад̇д̇аб̣анд̇хагаанам̣ ад̇хигаран̣имудтигасан̣д̣аасад̇улаад̣̇ийни саб̣б̣аани лохамаяаубагаран̣аани сан̇гхз д̣̇иннагаалад̇о бадтааяа г̇арубхан̣д̣аани. д̇ибугоддагасуван̣н̣агааражаммагаараубагаран̣зсуби зсзва наяо. аяам̣ бана висзсо – д̇ибугоддагаубагаран̣зсуби д̇ибужчзд̣̇анасад̇т̇агам̣, суван̣н̣агаараубагаран̣зсу суван̣н̣ажчзд̣̇анасад̇т̇агам̣, жаммагаараубагаран̣зсу гад̇абаригаммажаммачид̣̇д̣̇анагам̣ куд̣̇д̣̇агасад̇т̇аганд̇и имаани бхааж̇анийяабхан̣д̣аани. нахаабид̇ад̇уннагаараубагаран̣зсуби табзд̇ваа махаагад̇д̇арим̣ махаасан̣д̣аасам̣ махаабибпалаган̃жа саб̣б̣ам̣ бхааж̇анийяам̣. махаагад̇д̇ариаад̣̇ийни г̇арубхан̣д̣аани.
Kammārataṭṭakāracundakāranaḷakāramaṇikārapattabandhakānaṃ adhikaraṇimuṭṭhikasaṇḍāsatulādīni sabbāni lohamayaupakaraṇāni saṅghe dinnakālato paṭṭhāya garubhaṇḍāni. Tipukoṭṭakasuvaṇṇakāracammakāraupakaraṇesupi eseva nayo. Ayaṃ pana viseso – tipukoṭṭakaupakaraṇesupi tipucchedanasatthakaṃ, suvaṇṇakāraupakaraṇesu suvaṇṇacchedanasatthakaṃ, cammakāraupakaraṇesu kataparikammacammachiddanakaṃ khuddakasatthakanti imāni bhājanīyabhaṇḍāni. Nahāpitatunnakāraupakaraṇesupi ṭhapetvā mahākattariṃ mahāsaṇḍāsaṃ mahāpipphalakañca sabbaṃ bhājanīyaṃ. Mahākattariādīni garubhaṇḍāni.
валлиаад̣̇ийсу взд̇д̇аваллиаад̣̇игаа яаа гаажи ад̣дхаб̣аахуббамаан̣аа валли сан̇гхасса д̣̇иннаа ваа д̇ад̇т̇аж̇аад̇агаа ваа рагкид̇аг̇обид̇аа г̇арубхан̣д̣ам̣ ход̇и, саа сан̇гхагаммз жа жзд̇ияагаммз жа гад̇з сажз ад̇ирзгаа ход̇и, буг̇г̇алигагаммзби убанзд̇ум̣ ваддад̇и; арагкид̇аа бана г̇арубхан̣д̣амзва на ход̇и. суд̇д̇амагаживааганаал̣игзрахийражаммамаяаа раж̇ж̇угаа ваа яод̇д̇аани ваа ваагз жа наал̣игзрахийрз жа ваддзд̇ваа гад̇аа згаваддаа ваа д̣̇виваддаа ваа сан̇гхасса д̣̇иннагаалад̇о бадтааяа г̇арубхан̣д̣ам̣. суд̇д̇ам̣ бана аваддзд̇ваа д̣̇иннам̣ магаживааганаал̣игзрахийраа жа бхааж̇анийяаа. язхи банзд̇аани раж̇ж̇угаяод̇д̇аад̣̇ийни д̣̇иннаани хонд̇и, д̇з ад̇д̇ано гаран̣ийязна харанд̇аа на ваарзд̇аб̣б̣аа.
Valliādīsu vettavalliādikā yā kāci aḍḍhabāhuppamāṇā valli saṅghassa dinnā vā tatthajātakā vā rakkhitagopitā garubhaṇḍaṃ hoti, sā saṅghakamme ca cetiyakamme ca kate sace atirekā hoti, puggalikakammepi upanetuṃ vaṭṭati; arakkhitā pana garubhaṇḍameva na hoti. Suttamakacivākanāḷikerahīracammamayā rajjukā vā yottāni vā vāke ca nāḷikerahīre ca vaṭṭetvā katā ekavaṭṭā vā dvivaṭṭā vā saṅghassa dinnakālato paṭṭhāya garubhaṇḍaṃ. Suttaṃ pana avaṭṭetvā dinnaṃ makacivākanāḷikerahīrā ca bhājanīyā. Yehi panetāni rajjukayottādīni dinnāni honti, te attano karaṇīyena harantā na vāretabbā.
яо гожи анд̇амасо адтан̇г̇уласуужид̣̇ан̣д̣амад̇д̇оби взл̣у сан̇гхасса д̣̇инно ваа д̇ад̇т̇аж̇аад̇аго ваа рагкид̇аг̇обид̇о г̇арубхан̣д̣ам̣, соби сан̇гхагаммз жа жзд̇ияагаммз жа гад̇з ад̇ирзго буг̇г̇алигагаммз д̣̇аад̇ум̣ ваддад̇и. баад̣̇аг̇ан̣ханагад̇зланаал̣и бана гад̇д̇араяадти, убааханад̣̇ан̣д̣аго, чад̇д̇ад̣̇ан̣д̣о, чад̇д̇асалаагаад̇и ид̣̇амзд̇т̇а бхааж̇анийяабхан̣д̣ам̣. д̣̇ад̣дхаг̇зхамануссаа г̇ан̣хид̇ваа г̇ажчанд̇аа на ваарзд̇аб̣б̣аа. рагкид̇аг̇обид̇ам̣ взл̣ум̣ г̇ан̣ханд̇зна самагам̣ ваа ад̇ирзгам̣ ваа т̇ааварам̣ анд̇амасо д̇ам̣аг̇гханагамби паад̇игаммам̣ гад̇ваа г̇ахзд̇аб̣б̣о . паад̇игаммам̣ агад̇ваа г̇ан̣ханд̇зна д̇ад̇т̇зва вал̣ан̃ж̇зд̇аб̣б̣о , г̇аманагаалз сан̇гхигааваасз табзд̇ваа г̇анд̇аб̣б̣ам̣. асад̇ияаа г̇ахзд̇ваа г̇ад̇зна бахин̣ид̇ваа д̣̇аад̇аб̣б̣о. д̣̇зсанд̇арам̣ г̇ад̇зна самбад̇д̇авихаарз сан̇гхигааваасз табзд̇аб̣б̣о.
Yo koci antamaso aṭṭhaṅgulasūcidaṇḍamattopi veḷu saṅghassa dinno vā tatthajātako vā rakkhitagopito garubhaṇḍaṃ, sopi saṅghakamme ca cetiyakamme ca kate atireko puggalikakamme dātuṃ vaṭṭati. Pādagaṇhanakatelanāḷi pana kattarayaṭṭhi, upāhanadaṇḍako, chattadaṇḍo, chattasalākāti idamettha bhājanīyabhaṇḍaṃ. Daḍḍhagehamanussā gaṇhitvā gacchantā na vāretabbā. Rakkhitagopitaṃ veḷuṃ gaṇhantena samakaṃ vā atirekaṃ vā thāvaraṃ antamaso taṃagghanakampi phātikammaṃ katvā gahetabbo . Phātikammaṃ akatvā gaṇhantena tattheva vaḷañjetabbo , gamanakāle saṅghikāvāse ṭhapetvā gantabbaṃ. Asatiyā gahetvā gatena pahiṇitvā dātabbo. Desantaraṃ gatena sampattavihāre saṅghikāvāse ṭhapetabbo.
д̇ин̣анд̇и мун̃ж̇ам̣ баб̣б̣аж̇ан̃жа табзд̇ваа авасзсам̣ яам̣гин̃жи д̇ин̣ам̣. яад̇т̇а бана д̇ин̣ам̣ над̇т̇и, д̇ад̇т̇а бан̣н̣зхи чаад̣̇знд̇и; д̇асмаа бан̣н̣амби д̇ин̣знзва сан̇г̇ахид̇ам̣. ид̇и мун̃ж̇аад̣̇ийсу яам̣гин̃жи мудтиббамаан̣амби д̇ин̣ам̣ д̇аалабан̣н̣аад̣̇ийсу жа згам̣ бан̣н̣амби сан̇гхасса д̣̇иннам̣ ваа д̇ад̇т̇аж̇аад̇агам̣ ваа б̣ахаараамз сан̇гхасса д̇ин̣авад̇т̇уд̇о ж̇аад̇ад̇ин̣ам̣ ваа рагкид̇аг̇обид̇ам̣ г̇арубхан̣д̣ам̣ ход̇и, д̇амби сан̇гхагаммз жа жзд̇ияагаммз жа гад̇з ад̇ирзгам̣ буг̇г̇алигагаммз д̣̇аад̇ум̣ ваддад̇и. д̣̇ад̣дхаг̇зхамануссаа г̇ахзд̇ваа г̇ажчанд̇аа на ваарзд̇аб̣б̣аа. адтан̇г̇улаббамаан̣оби рид̇д̇абод̇т̇аго г̇арубхан̣д̣амзва.
Tiṇanti muñjaṃ pabbajañca ṭhapetvā avasesaṃ yaṃkiñci tiṇaṃ. Yattha pana tiṇaṃ natthi, tattha paṇṇehi chādenti; tasmā paṇṇampi tiṇeneva saṅgahitaṃ. Iti muñjādīsu yaṃkiñci muṭṭhippamāṇampi tiṇaṃ tālapaṇṇādīsu ca ekaṃ paṇṇampi saṅghassa dinnaṃ vā tatthajātakaṃ vā bahārāme saṅghassa tiṇavatthuto jātatiṇaṃ vā rakkhitagopitaṃ garubhaṇḍaṃ hoti, tampi saṅghakamme ca cetiyakamme ca kate atirekaṃ puggalikakamme dātuṃ vaṭṭati. Daḍḍhagehamanussā gahetvā gacchantā na vāretabbā. Aṭṭhaṅgulappamāṇopi rittapotthako garubhaṇḍameva.
мад̇д̇игаа багад̇имад̇д̇игаа ваа ход̇у бан̃жаван̣н̣аа ваа суд̇хаа ваа саж̇ж̇урасаган̇г̇удтасилзсаад̣̇ийсу ваа яам̣гин̃жи, д̣̇уллабхадтаанз аанзд̇ваа ваа д̣̇иннам̣ д̇ад̇т̇аж̇аад̇агам̣ ваа рагкид̇аг̇обид̇ам̣ д̇аалапалабаггамад̇д̇ам̣ г̇арубхан̣д̣ам̣ ход̇и. д̇амби сан̇гхагаммз жа жзд̇ияагаммз жа нидтид̇з ад̇ирзгам̣ буг̇г̇алигагаммз д̣̇аад̇ум̣ ваддад̇и. хин̇г̇ухин̇г̇улагахарид̇ааламаносилан̃ж̇анаани бана бхааж̇анийяабхан̣д̣аани.
Mattikā pakatimattikā vā hotu pañcavaṇṇā vā sudhā vā sajjurasakaṅguṭṭhasilesādīsu vā yaṃkiñci, dullabhaṭṭhāne ānetvā vā dinnaṃ tatthajātakaṃ vā rakkhitagopitaṃ tālaphalapakkamattaṃ garubhaṇḍaṃ hoti. Tampi saṅghakamme ca cetiyakamme ca niṭṭhite atirekaṃ puggalikakamme dātuṃ vaṭṭati. Hiṅguhiṅgulakaharitālamanosilañjanāni pana bhājanīyabhaṇḍāni.
д̣̇аарубхан̣д̣з яо гожи адтан̇г̇уласуужид̣̇ан̣д̣амад̇д̇оби д̣̇аарубхан̣д̣аго д̣̇ааруд̣̇уллабхадтаанз сан̇гхасса д̣̇инно ваа д̇ад̇т̇аж̇аад̇аго ваа рагкид̇аг̇обид̇о, аяам̣ г̇арубхан̣д̣ам̣ ход̇ийд̇и гурунд̣̇ияам̣ вуд̇д̇ам̣. махааадтагат̇ааяам̣ бана саб̣б̣амби д̣̇аарувзл̣ужаммабаасаан̣аад̣̇ивигад̇им̣ д̣̇аарубхан̣д̣зна сан̇г̇ан̣хид̇ваа ‘‘д̇зна ко бана самаязна сан̇гхасса аасанд̣̇иго уббанно ход̇ий’’д̇и ид̇о бадтааяа д̣̇аарубхан̣д̣авинижчаяо вуд̇д̇о.
Dārubhaṇḍe yo koci aṭṭhaṅgulasūcidaṇḍamattopi dārubhaṇḍako dārudullabhaṭṭhāne saṅghassa dinno vā tatthajātako vā rakkhitagopito, ayaṃ garubhaṇḍaṃ hotīti kurundiyaṃ vuttaṃ. Mahāaṭṭhakathāyaṃ pana sabbampi dāruveḷucammapāsāṇādivikatiṃ dārubhaṇḍena saṅgaṇhitvā ‘‘tena kho pana samayena saṅghassa āsandiko uppanno hotī’’ti ito paṭṭhāya dārubhaṇḍavinicchayo vutto.
д̇ад̇рааяам̣ ад̇т̇уд̣̇д̇хааро, аасанд̣̇иго, сад̇д̇ан̇г̇о, бхад̣̇д̣̇абийтам̣, бийтигаа, зл̣агабаад̣̇агабийтам̣, аамалагаваддагабийтам̣, палагам̣, гожчам̣, балаалабийтаганд̇и имзсу д̇аава яам̣гин̃жи куд̣̇д̣̇агам̣ ваа ход̇у маханд̇ам̣ ваа, сан̇гхасса д̣̇иннам̣ г̇арубхан̣д̣ам̣ ход̇и. балаалабийтзна жзд̇т̇а гад̣̇алибад̇д̇аад̣̇ибийтааниби сан̇г̇ахид̇аани. б̣яаг̇гхажаммаонад̣̇д̇хамби ваал̣аруубабаригкид̇д̇ам̣, рад̇анабарисиб̣б̣ид̇ам̣, гожчагам̣ г̇арубхан̣д̣амзва.
Tatrāyaṃ atthuddhāro, āsandiko, sattaṅgo, bhaddapīṭhaṃ, pīṭhikā, eḷakapādakapīṭhaṃ, āmalakavaṭṭakapīṭhaṃ, phalakaṃ, kocchaṃ, palālapīṭhakanti imesu tāva yaṃkiñci khuddakaṃ vā hotu mahantaṃ vā, saṅghassa dinnaṃ garubhaṇḍaṃ hoti. Palālapīṭhena cettha kadalipattādipīṭhānipi saṅgahitāni. Byagghacammaonaddhampi vāḷarūpaparikkhittaṃ, ratanaparisibbitaṃ, kocchakaṃ garubhaṇḍameva.
ван̇гапалагам̣, д̣̇ийгхапалагам̣, жийварад̇хованапалагам̣, гхадданапалагам̣, гхадданамуг̇г̇аро, д̣̇анд̇агадтажчзд̣̇анаг̇ан̣тигаа, д̣̇ан̣д̣амуг̇г̇аро, амб̣ан̣ам̣, раж̇анад̣̇он̣и, уд̣̇агабадижчаго, д̣̇аарумаяо ваа д̣̇анд̇амаяо ваа взл̣умаяо ваа сабаад̣̇агоби абаад̣̇агоби самуг̇г̇о, ман̃ж̇уусаа, баад̣̇аг̇ан̣ханагад̇о ад̇ирзгаббамаан̣о гаран̣д̣о, уд̣̇агад̣̇он̣и, уд̣̇агагадаахам̣, ул̣ун̇го, гадажчу, баанийяасараавам̣, баанийяасан̇код̇и зд̇зсуби яам̣гин̃жи сан̇гхз д̣̇иннам̣ г̇арубхан̣д̣ам̣. сан̇кат̇аалагам̣ бана бхааж̇анийяам̣, д̇ат̇аа д̣̇аарумаяо уд̣̇агад̇умб̣о.
Vaṅkaphalakaṃ, dīghaphalakaṃ, cīvaradhovanaphalakaṃ, ghaṭṭanaphalakaṃ, ghaṭṭanamuggaro, dantakaṭṭhacchedanagaṇṭhikā, daṇḍamuggaro, ambaṇaṃ, rajanadoṇi, udakapaṭicchako, dārumayo vā dantamayo vā veḷumayo vā sapādakopi apādakopi samuggo, mañjūsā, pādagaṇhanakato atirekappamāṇo karaṇḍo, udakadoṇi, udakakaṭāhaṃ, uḷuṅko, kaṭacchu, pānīyasarāvaṃ, pānīyasaṅkhoti etesupi yaṃkiñci saṅghe dinnaṃ garubhaṇḍaṃ. Saṅkhathālakaṃ pana bhājanīyaṃ, tathā dārumayo udakatumbo.
баад̣̇агат̇алигаман̣д̣алам̣ д̣̇аарумаяам̣ ваа ход̇у жол̣абан̣н̣аад̣̇имаяам̣ ваа саб̣б̣ам̣ г̇арубхан̣д̣ам̣. аад̇хаараго бад̇д̇абид̇хаанам̣, д̇аалаван̣дам̣, б̣ийж̇аний, жан̇годагам̣, бажчи, яадтисаммун̃ж̇аний мудтисаммун̃ж̇анийд̇и зд̇зсуби яам̣гин̃жи куд̣̇д̣̇агам̣ ваа маханд̇ам̣ ваа д̣̇аарувзл̣убан̣н̣ажаммаад̣̇ийсу язна гзнажи гад̇ам̣ г̇арубхан̣д̣амзва.
Pādakathalikamaṇḍalaṃ dārumayaṃ vā hotu coḷapaṇṇādimayaṃ vā sabbaṃ garubhaṇḍaṃ. Ādhārako pattapidhānaṃ, tālavaṇṭaṃ, bījanī, caṅkoṭakaṃ, pacchi, yaṭṭhisammuñjanī muṭṭhisammuñjanīti etesupi yaṃkiñci khuddakaṃ vā mahantaṃ vā dāruveḷupaṇṇacammādīsu yena kenaci kataṃ garubhaṇḍameva.
т̇амбхад̇улаасобаанапалагаад̣̇ийсу д̣̇аарумаяам̣ ваа баасаан̣амаяам̣ ваа яам̣гин̃жи г̇зхасамбхаараруубам̣, яо гожи гадасаараго, яам̣гин̃жи бхуумад̇т̇аран̣ам̣, яам̣гин̃жи агаббияажаммам̣, саб̣б̣ам̣ сан̇гхз д̣̇иннам̣ г̇арубхан̣д̣ам̣, бхуумад̇т̇аран̣ам̣ гаад̇ум̣ ваддад̇и. зл̣агажаммам̣ бана бажжад̇т̇аран̣аг̇ад̇игам̣ ход̇и, д̇амби г̇арубхан̣д̣амзва. габбияажаммаани бхааж̇анийяаани. гурунд̣̇ияам̣ бана ‘‘саб̣б̣ам̣ ман̃жаббамаан̣ам̣ жаммам̣ г̇арубхан̣д̣а’’нд̇и вуд̇д̇ам̣.
Thambhatulāsopānaphalakādīsu dārumayaṃ vā pāsāṇamayaṃ vā yaṃkiñci gehasambhārarūpaṃ, yo koci kaṭasārako, yaṃkiñci bhūmattharaṇaṃ, yaṃkiñci akappiyacammaṃ, sabbaṃ saṅghe dinnaṃ garubhaṇḍaṃ, bhūmattharaṇaṃ kātuṃ vaṭṭati. Eḷakacammaṃ pana paccattharaṇagatikaṃ hoti, tampi garubhaṇḍameva. Kappiyacammāni bhājanīyāni. Kurundiyaṃ pana ‘‘sabbaṃ mañcappamāṇaṃ cammaṃ garubhaṇḍa’’nti vuttaṃ.
уд̣̇угкалам̣, мусалам̣, суббам̣, нисад̣̇ам̣, нисад̣̇абод̇о, баасаан̣ад̣̇он̣и, баасаан̣агадаахам̣, д̇уривзмабхасд̇аад̣̇и саб̣б̣ам̣ бзсагаараад̣̇ибхан̣д̣ам̣, саб̣б̣ам̣ гасибхан̣д̣ам̣, саб̣б̣ам̣ жаггаяуд̇д̇агаяаанам̣ г̇арубхан̣д̣амзва. ман̃жабаад̣̇о , ман̃жааданий, бийтабаад̣̇о, бийтааданий, ваасипарасуаад̣̇ийнам̣ д̣̇ан̣д̣аад̇и зд̇зсу яам̣гин̃жи виббагад̇ад̇ажчанагаммам̣ анидтид̇амзва бхааж̇анийяам̣, д̇ажчид̇амадтам̣ бана г̇арубхан̣д̣ам̣ ход̇и. анун̃н̃аад̇аваасияаа бана д̣̇ан̣д̣о чад̇д̇амудтибан̣н̣ам̣ гад̇д̇араяадти убааханаа аран̣исахид̇ам̣ д̇хаммагаран̣о баад̣̇аг̇ан̣ханагад̇о анад̇ирид̇д̇ам̣ аамалагад̇умб̣ам̣ аамалагагхадо лааб̣угад̇умб̣ам̣ лааб̣угхадо висаан̣агад̇умб̣анд̇и саб̣б̣амзд̇ам̣ бхааж̇анийяам̣, д̇ад̇о маханд̇ад̇арам̣ г̇арубхан̣д̣ам̣.
Udukkhalaṃ, musalaṃ, suppaṃ, nisadaṃ, nisadapoto, pāsāṇadoṇi, pāsāṇakaṭāhaṃ, turivemabhastādi sabbaṃ pesakārādibhaṇḍaṃ, sabbaṃ kasibhaṇḍaṃ, sabbaṃ cakkayuttakayānaṃ garubhaṇḍameva. Mañcapādo , mañcaaṭanī, pīṭhapādo, pīṭhaaṭanī, vāsipharasuādīnaṃ daṇḍāti etesu yaṃkiñci vippakatatacchanakammaṃ aniṭṭhitameva bhājanīyaṃ, tacchitamaṭṭhaṃ pana garubhaṇḍaṃ hoti. Anuññātavāsiyā pana daṇḍo chattamuṭṭhipaṇṇaṃ kattarayaṭṭhi upāhanā araṇisahitaṃ dhammakaraṇo pādagaṇhanakato anatirittaṃ āmalakatumbaṃ āmalakaghaṭo lābukatumbaṃ lābughaṭo visāṇakatumbanti sabbametaṃ bhājanīyaṃ, tato mahantataraṃ garubhaṇḍaṃ.
хад̇т̇ид̣̇анд̇о ваа яам̣гин̃жи висаан̣ам̣ ваа ад̇ажчид̇ам̣ яат̇ааж̇аад̇амзва бхааж̇анийяам̣, д̇зхи гад̇аман̃жабаад̣̇аад̣̇ийсу буримасад̣̇исоязва винижчаяо. д̇ажчид̇анидтид̇оби хин̇г̇угаран̣д̣аго ан̃ж̇анагаран̣д̣аго г̇ан̣тигаа вид̇хо ан̃ж̇аний ан̃ж̇анисалаагаа уд̣̇агабун̃чанийд̇и ид̣̇ам̣ саб̣б̣ам̣ бхааж̇анийяамзва.
Hatthidanto vā yaṃkiñci visāṇaṃ vā atacchitaṃ yathājātameva bhājanīyaṃ, tehi katamañcapādādīsu purimasadisoyeva vinicchayo. Tacchitaniṭṭhitopi hiṅgukaraṇḍako añjanakaraṇḍako gaṇṭhikā vidho añjanī añjanisalākā udakapuñchanīti idaṃ sabbaṃ bhājanīyameva.
мад̇д̇игаабхан̣д̣з саб̣б̣ам̣ мануссаанам̣ убабхог̇абарибхог̇ам̣ гхадабитараад̣̇игулаалабхааж̇анам̣ бад̇д̇агадаахам̣ ан̇г̇аарагадаахам̣ д̇хуумад̣̇аанагам̣ д̣̇ийбаругкаго д̣̇ийбагабаллигаа жаяанидтагаа чад̣̇анидтагаа т̇уубигаад̇и сан̇гхасса д̣̇иннагаалад̇о бадтааяа г̇арубхан̣д̣ам̣, баад̣̇аг̇ан̣ханагад̇о анад̇ирид̇д̇аббамаан̣о бана гхадаго бад̇д̇ам̣ т̇аалагам̣ ган̃жанаго гун̣д̣игаад̇и ид̣̇амзд̇т̇а бхааж̇анийяабхан̣д̣ам̣. яат̇аа жа мад̇д̇игаабхан̣д̣з; звам̣ лохабхан̣д̣зби гун̣д̣игаа бхааж̇анийяагодтаасамзва бхаж̇ад̇ийд̇и аяамзд̇т̇а анубуб̣б̣игат̇аа.
Mattikābhaṇḍe sabbaṃ manussānaṃ upabhogaparibhogaṃ ghaṭapiṭharādikulālabhājanaṃ pattakaṭāhaṃ aṅgārakaṭāhaṃ dhūmadānakaṃ dīparukkhako dīpakapallikā cayaniṭṭhakā chadaniṭṭhakā thūpikāti saṅghassa dinnakālato paṭṭhāya garubhaṇḍaṃ, pādagaṇhanakato anatirittappamāṇo pana ghaṭako pattaṃ thālakaṃ kañcanako kuṇḍikāti idamettha bhājanīyabhaṇḍaṃ. Yathā ca mattikābhaṇḍe; evaṃ lohabhaṇḍepi kuṇḍikā bhājanīyakoṭṭhāsameva bhajatīti ayamettha anupubbikathā.
ависсаж̇ж̇ияавад̇т̇угат̇аа нидтид̇аа.
Avissajjiyavatthukathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / ависсаж̇ж̇ияавад̇т̇у • Avissajjiyavatthu
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / ависсаж̇ж̇ияавад̇т̇угат̇ааван̣н̣анаа • Avissajjiyavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ависсаж̇ж̇ияавад̇т̇угат̇ааван̣н̣анаа • Avissajjiyavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / ависсаж̇ж̇ияавад̇т̇угат̇ааван̣н̣анаа • Avissajjiyavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / ависсаж̇ж̇ияавад̇т̇угат̇аа • Avissajjiyavatthukathā
