| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
அவிஸ்ஸஜ்ஜியவத்து²கதா²வண்ணனா
Avissajjiyavatthukathāvaṇṇanā
321. அரஞ்ஜரோதி ப³ஹுஉத³கக³ண்ஹனகா மஹாசாடி. ஜலங் க³ண்ஹிதுங் அலந்தி அரஞ்ஜரோ. ‘‘வட்டசாடி விய ஹுத்வா தோ²கங் தீ³க⁴முகோ² மஜ்ஜே² பரிச்சே²த³ங் த³ஸ்ஸெத்வா கதோ’’தி க³ண்டி²பதே³ஸு வுத்தங். பஞ்சனிம்மலலோசனோதி மங்ஸதி³ப்³ப³த⁴ம்மபு³த்³த⁴ஸமந்தசக்கு²வஸேன பஞ்சலோசனோ.
321.Arañjaroti bahuudakagaṇhanakā mahācāṭi. Jalaṃ gaṇhituṃ alanti arañjaro. ‘‘Vaṭṭacāṭi viya hutvā thokaṃ dīghamukho majjhe paricchedaṃ dassetvā kato’’ti gaṇṭhipadesu vuttaṃ. Pañcanimmalalocanoti maṃsadibbadhammabuddhasamantacakkhuvasena pañcalocano.
தா²வரேன ச தா²வரங் க³ருப⁴ண்டே³ன ச க³ருப⁴ண்ட³ந்தி எத்த² பஞ்சஸு கொட்டா²ஸேஸு புரிமத்³வயங் தா²வரங், பச்சி²மத்தயங் க³ருப⁴ண்ட³ந்தி வேதி³தப்³ப³ங். ஜானாபெத்வாதி பி⁴க்கு²ஸங்க⁴ங் ஜானாபெத்வா. கப்பியமஞ்சா ஸம்படிச்சி²தப்³பா³தி ‘‘ஸங்க⁴ஸ்ஸ தே³மா’’தி தி³ன்னங் ஸந்தா⁴ய வுத்தங். ஸசே பன ‘‘விஹாரஸ்ஸ தே³மா’’தி வத³ந்தி, ஸுவண்ணரஜதமயாதி³அகப்பியமஞ்சேபி ஸம்படிச்சி²துங் வட்டதி. ந கேவலங்…பே॰… பரிவத்தேதுங் வட்டந்தீதி இமினா அதா²வரேன தா²வரம்பி அதா²வரம்பி பரிவத்தேதுங் வட்டதீதி த³ஸ்ஸேதி. தா²வரேன அதா²வரமேவ ஹி பரிவத்தேதுங் ந வட்டதி. அகப்பியங் வா மஹக்³க⁴ங் கப்பியங் வாதி எத்த² அகப்பியங் நாம ஸுவண்ணமயமஞ்சாதி³ அகப்பியபி⁴ஸிபி³ம்போ³ஹனானி ச. மஹக்³க⁴ங் கப்பியங் நாம த³ந்தமயமஞ்சாதி³ பாவாராதி³கப்பியஅத்த²ரணாதீ³னி ச.
Thāvarenaca thāvaraṃ garubhaṇḍena ca garubhaṇḍanti ettha pañcasu koṭṭhāsesu purimadvayaṃ thāvaraṃ, pacchimattayaṃ garubhaṇḍanti veditabbaṃ. Jānāpetvāti bhikkhusaṅghaṃ jānāpetvā. Kappiyamañcā sampaṭicchitabbāti ‘‘saṅghassa demā’’ti dinnaṃ sandhāya vuttaṃ. Sace pana ‘‘vihārassa demā’’ti vadanti, suvaṇṇarajatamayādiakappiyamañcepi sampaṭicchituṃ vaṭṭati. Na kevalaṃ…pe… parivattetuṃ vaṭṭantīti iminā athāvarena thāvarampi athāvarampi parivattetuṃ vaṭṭatīti dasseti. Thāvarena athāvarameva hi parivattetuṃ na vaṭṭati. Akappiyaṃ vā mahagghaṃ kappiyaṃ vāti ettha akappiyaṃ nāma suvaṇṇamayamañcādi akappiyabhisibimbohanāni ca. Mahagghaṃ kappiyaṃ nāma dantamayamañcādi pāvārādikappiyaattharaṇādīni ca.
பாரிஹாரியங் ந வட்டதீதி அத்தனோ ஸந்தகங் விய க³ஹெத்வா பரிஹரிதுங் ந வட்டதி. ‘‘கி³ஹிவிகதனீஹாரேனேவ பரிபு⁴ஞ்ஜிதப்³ப³’’ந்தி இமினா ஸசே ஆராமிகாத³யோ படிஸாமெத்வா படிதெ³ந்தி, பரிபு⁴ஞ்ஜிதுங் வட்டதீதி த³ஸ்ஸேதி. ‘‘பண்ணஸூசி நாம லேக²னீ’’தி மஹாக³ண்டி²பதே³ வுத்தங்.
Pārihāriyaṃ na vaṭṭatīti attano santakaṃ viya gahetvā pariharituṃ na vaṭṭati. ‘‘Gihivikatanīhāreneva paribhuñjitabba’’nti iminā sace ārāmikādayo paṭisāmetvā paṭidenti, paribhuñjituṃ vaṭṭatīti dasseti. ‘‘Paṇṇasūci nāma lekhanī’’ti mahāgaṇṭhipade vuttaṃ.
‘‘அட்³ட⁴பா³ஹூதி கப்பரதோ பட்டா²ய யாவ அங்ஸகூட’’ந்தி க³ண்டி²பதே³ஸு வுத்தங். அட்³ட⁴பா³ஹு நாம வித³த்தி²சதுரங்கு³லந்திபி வத³ந்தி. தத்த²ஜாதகாதி ஸங்கி⁴கபூ⁴மியங் ஜாதா. அட்ட²ங்கு³லஸூசித³ண்ட³மத்தோதி தீ³க⁴தோ அட்ட²ங்கு³லமத்தோ பரிணாஹதோ பண்ணஸூசித³ண்ட³மத்தோ. முஞ்ஜபப்³ப³ஜானங்யேவ பாளியங் விஸுங் ஆக³தத்தா ‘‘முஞ்ஜங் பப்³ப³ஜஞ்ச ட²பெத்வா’’தி வுத்தங். அட்ட²ங்கு³லப்பமாணோதி தீ³க⁴தோ அட்ட²ங்கு³லப்பமாணோ. க⁴ட்டனப²லகங் நாம யத்த² ட²பெத்வா ரஜிதசீவரங் ஹத்தே²ன க⁴ட்டெந்தி. க⁴ட்டனமுக்³க³ரோ நாம அனுவாதாதி³க⁴ட்டனத்த²ங் கதோதி வத³ந்தி. அம்ப³ணந்தி ப²லகேஹி பொக்க²ரணீஸதி³ஸங் கதபானீயபா⁴ஜனங். ரஜனதோ³ணீதி யத்த² பக்கரஜனங் ஆகிரித்வா ட²பெந்தி. பூ⁴மத்த²ரணங் காதுங் வட்டதீதி அகப்பியசம்மங் ஸந்தா⁴ய வுத்தங். பச்சத்த²ரணக³திகந்தி இமினா மஞ்சபீடே²பி அத்த²ரிதுங் வட்டதீதி தீ³பேதி. பாவாராதி³பச்சத்த²ரணம்பி க³ருப⁴ண்ட³ந்தி ஏகே, நோதி அபரே, வீமங்ஸித்வா க³ஹேதப்³ப³ங். முட்டி²பண்ணந்தி தாலபண்ணங் ஸந்தா⁴ய வுத்தங்.
‘‘Aḍḍhabāhūti kapparato paṭṭhāya yāva aṃsakūṭa’’nti gaṇṭhipadesu vuttaṃ. Aḍḍhabāhu nāma vidatthicaturaṅgulantipi vadanti. Tatthajātakāti saṅghikabhūmiyaṃ jātā. Aṭṭhaṅgulasūcidaṇḍamattoti dīghato aṭṭhaṅgulamatto pariṇāhato paṇṇasūcidaṇḍamatto. Muñjapabbajānaṃyeva pāḷiyaṃ visuṃ āgatattā ‘‘muñjaṃ pabbajañca ṭhapetvā’’ti vuttaṃ. Aṭṭhaṅgulappamāṇoti dīghato aṭṭhaṅgulappamāṇo. Ghaṭṭanaphalakaṃ nāma yattha ṭhapetvā rajitacīvaraṃ hatthena ghaṭṭenti. Ghaṭṭanamuggaro nāma anuvātādighaṭṭanatthaṃ katoti vadanti. Ambaṇanti phalakehi pokkharaṇīsadisaṃ katapānīyabhājanaṃ. Rajanadoṇīti yattha pakkarajanaṃ ākiritvā ṭhapenti. Bhūmattharaṇaṃ kātuṃ vaṭṭatīti akappiyacammaṃ sandhāya vuttaṃ. Paccattharaṇagatikanti iminā mañcapīṭhepi attharituṃ vaṭṭatīti dīpeti. Pāvārādipaccattharaṇampi garubhaṇḍanti eke, noti apare, vīmaṃsitvā gahetabbaṃ. Muṭṭhipaṇṇanti tālapaṇṇaṃ sandhāya vuttaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / அவிஸ்ஸஜ்ஜியவத்து² • Avissajjiyavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அவிஸ்ஸஜ்ஜியவத்து²கதா² • Avissajjiyavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அவிஸ்ஸஜ்ஜியவத்து²கதா²வண்ணனா • Avissajjiyavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அவிஸ்ஸஜ்ஜியவத்து²கதா²வண்ணனா • Avissajjiyavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அவிஸ்ஸஜ்ஜியவத்து²கதா² • Avissajjiyavatthukathā
