| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அவிஸ்ஸஜ்ஜியவத்து²கதா²வண்ணனா
Avissajjiyavatthukathāvaṇṇanā
321. அரஞ்ஜரோதி ப³ஹுஉத³கக³ண்ஹனிகா மஹாசாடி, ஜலங் க³ண்ஹிதுமலந்தி அரஞ்ஜரோ.
321.Arañjaroti bahuudakagaṇhanikā mahācāṭi, jalaṃ gaṇhitumalanti arañjaro.
தா²வரேன ச தா²வரந்திஆதீ³ஸு பஞ்சஸு கொட்டா²ஸேஸு புரிமத்³வயங் தா²வரங், பச்சி²மத்தயங் க³ருப⁴ண்ட³ந்தி வேதி³தப்³ப³ங். ஸமகமேவ தே³தீதி எத்த² ஊனகங் தெ³ந்தம்பி விஹாரவத்து²ஸாமந்தங் க³ஹெத்வா தூ³ரதரங் து³க்க²கோ³பங் விஸ்ஸஜ்ஜேதுங் வட்டதீதி த³ட்ட²ப்³ப³ங். வக்க²தி ஹி ‘‘பி⁴க்கூ²னங் சே மஹக்³க⁴தரங்…பே॰… ஸம்படிச்சி²துங் வட்டதீ’’தி (சூளவ॰ அட்ட²॰ 321). ஜானாபெத்வாதி பி⁴க்கு²ஸங்க⁴ஸ்ஸ ஜானாபெத்வா, அபலோகெத்வாதி அத்தோ². ‘‘நனு தும்ஹாகங் ப³ஹுதரா ருக்கா²தி வத்தப்³ப³’’ந்தி இத³ங் ஸாமிகேஸு அத்தனோ ப⁴ண்ட³ஸ்ஸ மஹக்³க⁴தங் அஜானித்வா தெ³ந்தேஸு தங் ஞத்வா தெ²ய்யசித்தேன க³ண்ஹதோ அவஹாரோ ஹோதீதி வுத்தங்.
Thāvarena ca thāvarantiādīsu pañcasu koṭṭhāsesu purimadvayaṃ thāvaraṃ, pacchimattayaṃ garubhaṇḍanti veditabbaṃ. Samakameva detīti ettha ūnakaṃ dentampi vihāravatthusāmantaṃ gahetvā dūrataraṃ dukkhagopaṃ vissajjetuṃ vaṭṭatīti daṭṭhabbaṃ. Vakkhati hi ‘‘bhikkhūnaṃ ce mahagghataraṃ…pe… sampaṭicchituṃ vaṭṭatī’’ti (cūḷava. aṭṭha. 321). Jānāpetvāti bhikkhusaṅghassa jānāpetvā, apaloketvāti attho. ‘‘Nanu tumhākaṃ bahutarā rukkhāti vattabba’’nti idaṃ sāmikesu attano bhaṇḍassa mahagghataṃ ajānitvā dentesu taṃ ñatvā theyyacittena gaṇhato avahāro hotīti vuttaṃ.
விஹாரேன விஹாரோ பரிவத்தேதப்³போ³தி ஸவத்து²கேன அஞ்ஞேஸங் பூ⁴மியங் கதபாஸாதா³தி³னா, அவத்து²கேன வா ஸவத்து²கங் பரிவத்தேதப்³ப³ங். அவத்து²கங் பன அவத்து²கேனேவ பரிவத்தேதப்³ப³ங். கேவலங் பாஸாத³ஸ்ஸ பூ⁴மிதோ அதா²வரத்தா. ஏவங் தா²வரேஸுபி தா²வரவிபா⁴க³ங் ஞத்வாவ பரிவத்தேதப்³ப³ங்.
Vihārena vihāro parivattetabboti savatthukena aññesaṃ bhūmiyaṃ katapāsādādinā, avatthukena vā savatthukaṃ parivattetabbaṃ. Avatthukaṃ pana avatthukeneva parivattetabbaṃ. Kevalaṃ pāsādassa bhūmito athāvarattā. Evaṃ thāvaresupi thāvaravibhāgaṃ ñatvāva parivattetabbaṃ.
‘‘கப்பியமஞ்சா ஸம்படிச்சி²தப்³பா³’’தி இமினா ஸுவண்ணாதி³விசித்தங் அகப்பியமஞ்சங் ‘‘ஸங்க⁴ஸ்ஸா’’தி வுத்தேபி ஸம்படிச்சி²துங் ந வட்டதீதி த³ஸ்ஸேதி. ‘‘விஹாரஸ்ஸ தே³மா’’தி வுத்தே ஸங்க⁴ஸ்ஸ வட்டதி, ந புக்³க³லஸ்ஸ கெ²த்தாதி³ வியாதி த³ட்ட²ப்³ப³ங். ஏதேஸூதி மஞ்சாதீ³ஸு. கப்பியாகப்பியங் வுத்தனயமேவாதி ஆஸந்தீ³தூலிகாதி³வினிச்ச²யேஸு வுத்தனயமேவ. அகப்பியங் வாதி ஆஸந்தீ³ஆதி³, பமாணாதிக்கந்தங் பி³ம்போ³ஹனாதி³ ச. மஹக்³க⁴ங் கப்பியங் வாதி ஸுவண்ணாதி³விசித்தங் கப்பியவோஹாரேன தி³ன்னங்.
‘‘Kappiyamañcā sampaṭicchitabbā’’ti iminā suvaṇṇādivicittaṃ akappiyamañcaṃ ‘‘saṅghassā’’ti vuttepi sampaṭicchituṃ na vaṭṭatīti dasseti. ‘‘Vihārassa demā’’ti vutte saṅghassa vaṭṭati, na puggalassa khettādi viyāti daṭṭhabbaṃ. Etesūti mañcādīsu. Kappiyākappiyaṃ vuttanayamevāti āsandītūlikādivinicchayesu vuttanayameva. Akappiyaṃ vāti āsandīādi, pamāṇātikkantaṃ bimbohanādi ca. Mahagghaṃ kappiyaṃ vāti suvaṇṇādivicittaṃ kappiyavohārena dinnaṃ.
‘‘காளலோஹ…பே॰… பா⁴ஜேதப்³போ³’’தி வுத்தத்தா வட்டகங்ஸலோஹமயம்பி பா⁴ஜனங் புக்³க³லிகம்பி ஸம்படிச்சி²தும்பி பரிஹரிதும்பி வட்டதி புக்³க³லபரிஹரிதப்³ப³ஸ்ஸேவ பா⁴ஜேதப்³ப³த்தாதி வத³ந்தி. தங் உபரி ‘‘கங்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதீ’’திஆதி³கேன மஹாபச்சரிவசனேன விருஜ்ஜ²தி. இமஸ்ஸ ஹி ‘‘வட்டலோஹகங்ஸலோஹானங் யேன கேனசி கதோ ஸீஹளதீ³பே பாத³க்³க³ண்ஹனகோ பா⁴ஜேதப்³போ³’’தி வுத்தஸ்ஸ மஹாஅட்ட²கதா²வசனஸ்ஸ படிக்கே²பாய தங் மஹாபச்சரிவசனங் பச்சா² த³ஸ்ஸிதங். தஸ்மா வட்டலோஹகங்ஸலோஹமயங் யங் கிஞ்சி பாத³க்³க³ண்ஹனகவாரகம்பி உபாதா³ய அபா⁴ஜனீயமேவ. கி³ஹீஹி தி³ய்யமானம்பி புக்³க³லஸ்ஸ ஸம்படிச்சி²தும்பி ந வட்டதி. பாரிஹாரியங் ந வட்டதீதி பத்தாதி³பரிக்கா²ரங் விய ஸயமேவ படிஸாமெத்வா பரிபு⁴ஞ்ஜிதுங் ந வட்டதி. கி³ஹிஸந்தகங் விய ஆராமிகாத³யோ சே ஸயமேவ கோ³பெத்வா வினியோக³காலே ஆனெத்வா படினெந்தி, பரிபு⁴ஞ்ஜிதுங் வட்டதி. ‘‘படிஸாமெத்வா பி⁴க்கூ²னங் தே³தா²’’தி வத்தும்பி வட்டதி.
‘‘Kāḷaloha…pe… bhājetabbo’’ti vuttattā vaṭṭakaṃsalohamayampi bhājanaṃ puggalikampi sampaṭicchitumpi pariharitumpi vaṭṭati puggalapariharitabbasseva bhājetabbattāti vadanti. Taṃ upari ‘‘kaṃsalohavaṭṭalohabhājanavikati saṅghikaparibhogena vā gihivikaṭā vā vaṭṭatī’’tiādikena mahāpaccarivacanena virujjhati. Imassa hi ‘‘vaṭṭalohakaṃsalohānaṃ yena kenaci kato sīhaḷadīpe pādaggaṇhanako bhājetabbo’’ti vuttassa mahāaṭṭhakathāvacanassa paṭikkhepāya taṃ mahāpaccarivacanaṃ pacchā dassitaṃ. Tasmā vaṭṭalohakaṃsalohamayaṃ yaṃ kiñci pādaggaṇhanakavārakampi upādāya abhājanīyameva. Gihīhi diyyamānampi puggalassa sampaṭicchitumpi na vaṭṭati. Pārihāriyaṃ na vaṭṭatīti pattādiparikkhāraṃ viya sayameva paṭisāmetvā paribhuñjituṃ na vaṭṭati. Gihisantakaṃ viya ārāmikādayo ce sayameva gopetvā viniyogakāle ānetvā paṭinenti, paribhuñjituṃ vaṭṭati. ‘‘Paṭisāmetvā bhikkhūnaṃ dethā’’ti vattumpi vaṭṭati.
பண்ணஸூசி நாம லேக²னீதி வத³ந்தி. ‘‘அத்தனா லத்³தா⁴னிபீ’’திஆதி³னா படிக்³க³ஹணே தோ³ஸோ நத்தி², பரிஹரித்வா பரிபோ⁴கோ³வ ஆபத்திகரோதி த³ஸ்ஸேதி. யதா² செத்த², ஏவங் உபரி அபா⁴ஜனீயவாஸிஆதீ³ஸு அத்தனோ ஸந்தகேஸுபி.
Paṇṇasūci nāma lekhanīti vadanti. ‘‘Attanā laddhānipī’’tiādinā paṭiggahaṇe doso natthi, pariharitvā paribhogova āpattikaroti dasseti. Yathā cettha, evaṃ upari abhājanīyavāsiādīsu attano santakesupi.
அனாமாஸம்பீதி ஸுவண்ணாதி³மயம்பி ஸப்³ப³ங் தங் ஆமஸித்வாபி பரிபு⁴ஞ்ஜிதுங் வட்டதி. உபக்க²ரேதி உபகரணே. அட்³ட⁴பா³ஹுப்பமாணா நாம அட்³ட⁴பா³ஹுமத்தா. அட்³ட⁴ப்³யாமமத்தாதிபி வத³ந்தி. யொத்தானீதி சம்மரஜ்ஜுகா.
Anāmāsampīti suvaṇṇādimayampi sabbaṃ taṃ āmasitvāpi paribhuñjituṃ vaṭṭati. Upakkhareti upakaraṇe. Aḍḍhabāhuppamāṇā nāma aḍḍhabāhumattā. Aḍḍhabyāmamattātipi vadanti. Yottānīti cammarajjukā.
அட்ட²ங்கு³லஸூசித³ண்ட³மத்தோபீதி தஸரத³ண்டா³தி³ஸூசிஆகாரதனுத³ண்ட³கமத்தோபி. ரித்தபொத்த²கோபீதி அலிகி²தபொத்த²கோ. இத³ஞ்ச பண்ணப்பஸங்கே³ன வுத்தங்.
Aṭṭhaṅgulasūcidaṇḍamattopīti tasaradaṇḍādisūciākāratanudaṇḍakamattopi. Rittapotthakopīti alikhitapotthako. Idañca paṇṇappasaṅgena vuttaṃ.
‘‘க⁴ட்டனப²லகங் க⁴ட்டனமுக்³க³ரோ’’தி இத³ங் ரஜிதசீவரங் ஏகஸ்மிங் மட்டே² த³ண்ட³முக்³க³ரே வேடெ²த்வா ஏகஸ்ஸ மட்ட²ப²லகஸ்ஸ உபரி ட²பெத்வா உபரி அபரேன மட்ட²ப²லகேன நிகுஜ்ஜித்வா ஏகோ உபரி அக்கமித்வா திட்ட²தி. த்³வே ஜனா உபரி ப²லகங் த்³வீஸு கோடீஸு க³ஹெத்வா அபராபரங் ஆகட்³ட⁴னவிகட்³ட⁴னங் கரொந்தி, ஏதங் ஸந்தா⁴ய வுத்தங். ஹத்தே² ட²பாபெத்வா ஹத்தே²ன பஹரணங் பன நிட்டி²தரஜனஸ்ஸ சீவரஸ்ஸ அல்லகாலே காதப்³ப³ங். இத³ங் பன ப²லகமுக்³க³ரேஹி க⁴ட்டனங் ஸுக்க²காலே த²த்³த⁴பா⁴வவிமோசனத்த²ந்தி த³ட்ட²ப்³ப³ங். அம்ப³ணந்தி ஏகதோ³ணிகனாவாப²லகேஹி பொக்க²ரணீஸதி³ஸங் கதங். பானீயபா⁴ஜனந்திபி வத³ந்தி. ரஜனதோ³ணீதி ஏகதா³ருனாவ கதங் ரஜனபா⁴ஜனங். உத³கதோ³ணீபி ஏகதா³ருனாவ கதங் உத³கபா⁴ஜனங்.
‘‘Ghaṭṭanaphalakaṃ ghaṭṭanamuggaro’’ti idaṃ rajitacīvaraṃ ekasmiṃ maṭṭhe daṇḍamuggare veṭhetvā ekassa maṭṭhaphalakassa upari ṭhapetvā upari aparena maṭṭhaphalakena nikujjitvā eko upari akkamitvā tiṭṭhati. Dve janā upari phalakaṃ dvīsu koṭīsu gahetvā aparāparaṃ ākaḍḍhanavikaḍḍhanaṃ karonti, etaṃ sandhāya vuttaṃ. Hatthe ṭhapāpetvā hatthena paharaṇaṃ pana niṭṭhitarajanassa cīvarassa allakāle kātabbaṃ. Idaṃ pana phalakamuggarehi ghaṭṭanaṃ sukkhakāle thaddhabhāvavimocanatthanti daṭṭhabbaṃ. Ambaṇanti ekadoṇikanāvāphalakehi pokkharaṇīsadisaṃ kataṃ. Pānīyabhājanantipi vadanti. Rajanadoṇīti ekadārunāva kataṃ rajanabhājanaṃ. Udakadoṇīpi ekadārunāva kataṃ udakabhājanaṃ.
பூ⁴மத்த²ரணங் காதுங் வட்டதீதி அகப்பியசம்மங் ஸந்தா⁴ய வுத்தங். தத்த² பூ⁴மத்த²ரணஸங்கே²பேன ஸயிதும்பி வட்டதியேவ. ‘‘பச்சத்த²ரணக³திக’’ந்தி இமினா மஞ்சாதீ³ஸு அத்த²ரிதப்³ப³ங் மஹாசம்மங் ஏளகசம்மங் நாமாதி த³ஸ்ஸேதி.
Bhūmattharaṇaṃ kātuṃ vaṭṭatīti akappiyacammaṃ sandhāya vuttaṃ. Tattha bhūmattharaṇasaṅkhepena sayitumpi vaṭṭatiyeva. ‘‘Paccattharaṇagatika’’nti iminā mañcādīsu attharitabbaṃ mahācammaṃ eḷakacammaṃ nāmāti dasseti.
ச²த்தமுட்டி²பண்ணந்தி தாலபண்ணங் ஸந்தா⁴ய வுத்தங். பத்தகடாஹந்தி பத்தபசனகடாஹங்.
Chattamuṭṭhipaṇṇanti tālapaṇṇaṃ sandhāya vuttaṃ. Pattakaṭāhanti pattapacanakaṭāhaṃ.
அவிஸ்ஸஜ்ஜியவத்து²கதா²வண்ணனா நிட்டி²தா.
Avissajjiyavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / அவிஸ்ஸஜ்ஜியவத்து² • Avissajjiyavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அவிஸ்ஸஜ்ஜியவத்து²கதா² • Avissajjiyavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அவிஸ்ஸஜ்ஜியவத்து²கதா²வண்ணனா • Avissajjiyavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அவிஸ்ஸஜ்ஜியவத்து²கதா²வண்ணனா • Avissajjiyavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அவிஸ்ஸஜ்ஜியவத்து²கதா² • Avissajjiyavatthukathā
