| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
অৰিস্সজ্জিযৰত্থুকথাৰণ্ণনা
Avissajjiyavatthukathāvaṇṇanā
৩২১. অরঞ্জরোতি বহুউদকগণ্হনিকা মহাচাটি, জলং গণ্হিতুমলন্তি অরঞ্জরো।
321.Arañjaroti bahuudakagaṇhanikā mahācāṭi, jalaṃ gaṇhitumalanti arañjaro.
থাৰরেন চ থাৰরন্তিআদীসু পঞ্চসু কোট্ঠাসেসু পুরিমদ্ৰযং থাৰরং, পচ্ছিমত্তযং গরুভণ্ডন্তি ৰেদিতব্বং। সমকমেৰ দেতীতি এত্থ ঊনকং দেন্তম্পি ৰিহারৰত্থুসামন্তং গহেত্ৰা দূরতরং দুক্খগোপং ৰিস্সজ্জেতুং ৰট্টতীতি দট্ঠব্বং। ৰক্খতি হি ‘‘ভিক্খূনং চে মহগ্ঘতরং…পে॰… সম্পটিচ্ছিতুং ৰট্টতী’’তি (চূল়ৰ॰ অট্ঠ॰ ৩২১)। জানাপেত্ৰাতি ভিক্খুসঙ্ঘস্স জানাপেত্ৰা, অপলোকেত্ৰাতি অত্থো। ‘‘ননু তুম্হাকং বহুতরা রুক্খাতি ৰত্তব্ব’’ন্তি ইদং সামিকেসু অত্তনো ভণ্ডস্স মহগ্ঘতং অজানিত্ৰা দেন্তেসু তং ঞত্ৰা থেয্যচিত্তেন গণ্হতো অৰহারো হোতীতি ৰুত্তং।
Thāvarena ca thāvarantiādīsu pañcasu koṭṭhāsesu purimadvayaṃ thāvaraṃ, pacchimattayaṃ garubhaṇḍanti veditabbaṃ. Samakameva detīti ettha ūnakaṃ dentampi vihāravatthusāmantaṃ gahetvā dūrataraṃ dukkhagopaṃ vissajjetuṃ vaṭṭatīti daṭṭhabbaṃ. Vakkhati hi ‘‘bhikkhūnaṃ ce mahagghataraṃ…pe… sampaṭicchituṃ vaṭṭatī’’ti (cūḷava. aṭṭha. 321). Jānāpetvāti bhikkhusaṅghassa jānāpetvā, apaloketvāti attho. ‘‘Nanu tumhākaṃ bahutarā rukkhāti vattabba’’nti idaṃ sāmikesu attano bhaṇḍassa mahagghataṃ ajānitvā dentesu taṃ ñatvā theyyacittena gaṇhato avahāro hotīti vuttaṃ.
ৰিহারেন ৰিহারো পরিৰত্তেতব্বোতি সৰত্থুকেন অঞ্ঞেসং ভূমিযং কতপাসাদাদিনা, অৰত্থুকেন ৰা সৰত্থুকং পরিৰত্তেতব্বং। অৰত্থুকং পন অৰত্থুকেনেৰ পরিৰত্তেতব্বং। কেৰলং পাসাদস্স ভূমিতো অথাৰরত্তা। এৰং থাৰরেসুপি থাৰরৰিভাগং ঞত্ৰাৰ পরিৰত্তেতব্বং।
Vihārena vihāro parivattetabboti savatthukena aññesaṃ bhūmiyaṃ katapāsādādinā, avatthukena vā savatthukaṃ parivattetabbaṃ. Avatthukaṃ pana avatthukeneva parivattetabbaṃ. Kevalaṃ pāsādassa bhūmito athāvarattā. Evaṃ thāvaresupi thāvaravibhāgaṃ ñatvāva parivattetabbaṃ.
‘‘কপ্পিযমঞ্চা সম্পটিচ্ছিতব্বা’’তি ইমিনা সুৰণ্ণাদিৰিচিত্তং অকপ্পিযমঞ্চং ‘‘সঙ্ঘস্সা’’তি ৰুত্তেপি সম্পটিচ্ছিতুং ন ৰট্টতীতি দস্সেতি। ‘‘ৰিহারস্স দেমা’’তি ৰুত্তে সঙ্ঘস্স ৰট্টতি, ন পুগ্গলস্স খেত্তাদি ৰিযাতি দট্ঠব্বং। এতেসূতি মঞ্চাদীসু। কপ্পিযাকপ্পিযং ৰুত্তনযমেৰাতি আসন্দীতূলিকাদিৰিনিচ্ছযেসু ৰুত্তনযমেৰ। অকপ্পিযং ৰাতি আসন্দীআদি, পমাণাতিক্কন্তং বিম্বোহনাদি চ। মহগ্ঘং কপ্পিযং ৰাতি সুৰণ্ণাদিৰিচিত্তং কপ্পিযৰোহারেন দিন্নং।
‘‘Kappiyamañcā sampaṭicchitabbā’’ti iminā suvaṇṇādivicittaṃ akappiyamañcaṃ ‘‘saṅghassā’’ti vuttepi sampaṭicchituṃ na vaṭṭatīti dasseti. ‘‘Vihārassa demā’’ti vutte saṅghassa vaṭṭati, na puggalassa khettādi viyāti daṭṭhabbaṃ. Etesūti mañcādīsu. Kappiyākappiyaṃ vuttanayamevāti āsandītūlikādivinicchayesu vuttanayameva. Akappiyaṃ vāti āsandīādi, pamāṇātikkantaṃ bimbohanādi ca. Mahagghaṃ kappiyaṃ vāti suvaṇṇādivicittaṃ kappiyavohārena dinnaṃ.
‘‘কাল়লোহ…পে॰… ভাজেতব্বো’’তি ৰুত্তত্তা ৰট্টকংসলোহমযম্পি ভাজনং পুগ্গলিকম্পি সম্পটিচ্ছিতুম্পি পরিহরিতুম্পি ৰট্টতি পুগ্গলপরিহরিতব্বস্সেৰ ভাজেতব্বত্তাতি ৰদন্তি। তং উপরি ‘‘কংসলোহৰট্টলোহভাজনৰিকতি সঙ্ঘিকপরিভোগেন ৰা গিহিৰিকটা ৰা ৰট্টতী’’তিআদিকেন মহাপচ্চরিৰচনেন ৰিরুজ্ঝতি। ইমস্স হি ‘‘ৰট্টলোহকংসলোহানং যেন কেনচি কতো সীহল়দীপে পাদগ্গণ্হনকো ভাজেতব্বো’’তি ৰুত্তস্স মহাঅট্ঠকথাৰচনস্স পটিক্খেপায তং মহাপচ্চরিৰচনং পচ্ছা দস্সিতং। তস্মা ৰট্টলোহকংসলোহমযং যং কিঞ্চি পাদগ্গণ্হনকৰারকম্পি উপাদায অভাজনীযমেৰ। গিহীহি দিয্যমানম্পি পুগ্গলস্স সম্পটিচ্ছিতুম্পি ন ৰট্টতি। পারিহারিযং ন ৰট্টতীতি পত্তাদিপরিক্খারং ৰিয সযমেৰ পটিসামেত্ৰা পরিভুঞ্জিতুং ন ৰট্টতি। গিহিসন্তকং ৰিয আরামিকাদযো চে সযমেৰ গোপেত্ৰা ৰিনিযোগকালে আনেত্ৰা পটিনেন্তি, পরিভুঞ্জিতুং ৰট্টতি। ‘‘পটিসামেত্ৰা ভিক্খূনং দেথা’’তি ৰত্তুম্পি ৰট্টতি।
‘‘Kāḷaloha…pe… bhājetabbo’’ti vuttattā vaṭṭakaṃsalohamayampi bhājanaṃ puggalikampi sampaṭicchitumpi pariharitumpi vaṭṭati puggalapariharitabbasseva bhājetabbattāti vadanti. Taṃ upari ‘‘kaṃsalohavaṭṭalohabhājanavikati saṅghikaparibhogena vā gihivikaṭā vā vaṭṭatī’’tiādikena mahāpaccarivacanena virujjhati. Imassa hi ‘‘vaṭṭalohakaṃsalohānaṃ yena kenaci kato sīhaḷadīpe pādaggaṇhanako bhājetabbo’’ti vuttassa mahāaṭṭhakathāvacanassa paṭikkhepāya taṃ mahāpaccarivacanaṃ pacchā dassitaṃ. Tasmā vaṭṭalohakaṃsalohamayaṃ yaṃ kiñci pādaggaṇhanakavārakampi upādāya abhājanīyameva. Gihīhi diyyamānampi puggalassa sampaṭicchitumpi na vaṭṭati. Pārihāriyaṃ na vaṭṭatīti pattādiparikkhāraṃ viya sayameva paṭisāmetvā paribhuñjituṃ na vaṭṭati. Gihisantakaṃ viya ārāmikādayo ce sayameva gopetvā viniyogakāle ānetvā paṭinenti, paribhuñjituṃ vaṭṭati. ‘‘Paṭisāmetvā bhikkhūnaṃ dethā’’ti vattumpi vaṭṭati.
পণ্ণসূচি নাম লেখনীতি ৰদন্তি। ‘‘অত্তনা লদ্ধানিপী’’তিআদিনা পটিগ্গহণে দোসো নত্থি, পরিহরিত্ৰা পরিভোগোৰ আপত্তিকরোতি দস্সেতি। যথা চেত্থ, এৰং উপরি অভাজনীযৰাসিআদীসু অত্তনো সন্তকেসুপি।
Paṇṇasūci nāma lekhanīti vadanti. ‘‘Attanā laddhānipī’’tiādinā paṭiggahaṇe doso natthi, pariharitvā paribhogova āpattikaroti dasseti. Yathā cettha, evaṃ upari abhājanīyavāsiādīsu attano santakesupi.
অনামাসম্পীতি সুৰণ্ণাদিমযম্পি সব্বং তং আমসিত্ৰাপি পরিভুঞ্জিতুং ৰট্টতি। উপক্খরেতি উপকরণে। অড্ঢবাহুপ্পমাণা নাম অড্ঢবাহুমত্তা। অড্ঢব্যামমত্তাতিপি ৰদন্তি। যোত্তানীতি চম্মরজ্জুকা।
Anāmāsampīti suvaṇṇādimayampi sabbaṃ taṃ āmasitvāpi paribhuñjituṃ vaṭṭati. Upakkhareti upakaraṇe. Aḍḍhabāhuppamāṇā nāma aḍḍhabāhumattā. Aḍḍhabyāmamattātipi vadanti. Yottānīti cammarajjukā.
অট্ঠঙ্গুলসূচিদণ্ডমত্তোপীতি তসরদণ্ডাদিসূচিআকারতনুদণ্ডকমত্তোপি। রিত্তপোত্থকোপীতি অলিখিতপোত্থকো। ইদঞ্চ পণ্ণপ্পসঙ্গেন ৰুত্তং।
Aṭṭhaṅgulasūcidaṇḍamattopīti tasaradaṇḍādisūciākāratanudaṇḍakamattopi. Rittapotthakopīti alikhitapotthako. Idañca paṇṇappasaṅgena vuttaṃ.
‘‘ঘট্টনফলকং ঘট্টনমুগ্গরো’’তি ইদং রজিতচীৰরং একস্মিং মট্ঠে দণ্ডমুগ্গরে ৰেঠেত্ৰা একস্স মট্ঠফলকস্স উপরি ঠপেত্ৰা উপরি অপরেন মট্ঠফলকেন নিকুজ্জিত্ৰা একো উপরি অক্কমিত্ৰা তিট্ঠতি। দ্ৰে জনা উপরি ফলকং দ্ৰীসু কোটীসু গহেত্ৰা অপরাপরং আকড্ঢনৰিকড্ঢনং করোন্তি, এতং সন্ধায ৰুত্তং। হত্থে ঠপাপেত্ৰা হত্থেন পহরণং পন নিট্ঠিতরজনস্স চীৰরস্স অল্লকালে কাতব্বং। ইদং পন ফলকমুগ্গরেহি ঘট্টনং সুক্খকালে থদ্ধভাৰৰিমোচনত্থন্তি দট্ঠব্বং। অম্বণন্তি একদোণিকনাৰাফলকেহি পোক্খরণীসদিসং কতং। পানীযভাজনন্তিপি ৰদন্তি। রজনদোণীতি একদারুনাৰ কতং রজনভাজনং। উদকদোণীপি একদারুনাৰ কতং উদকভাজনং।
‘‘Ghaṭṭanaphalakaṃ ghaṭṭanamuggaro’’ti idaṃ rajitacīvaraṃ ekasmiṃ maṭṭhe daṇḍamuggare veṭhetvā ekassa maṭṭhaphalakassa upari ṭhapetvā upari aparena maṭṭhaphalakena nikujjitvā eko upari akkamitvā tiṭṭhati. Dve janā upari phalakaṃ dvīsu koṭīsu gahetvā aparāparaṃ ākaḍḍhanavikaḍḍhanaṃ karonti, etaṃ sandhāya vuttaṃ. Hatthe ṭhapāpetvā hatthena paharaṇaṃ pana niṭṭhitarajanassa cīvarassa allakāle kātabbaṃ. Idaṃ pana phalakamuggarehi ghaṭṭanaṃ sukkhakāle thaddhabhāvavimocanatthanti daṭṭhabbaṃ. Ambaṇanti ekadoṇikanāvāphalakehi pokkharaṇīsadisaṃ kataṃ. Pānīyabhājanantipi vadanti. Rajanadoṇīti ekadārunāva kataṃ rajanabhājanaṃ. Udakadoṇīpi ekadārunāva kataṃ udakabhājanaṃ.
ভূমত্থরণং কাতুং ৰট্টতীতি অকপ্পিযচম্মং সন্ধায ৰুত্তং। তত্থ ভূমত্থরণসঙ্খেপেন সযিতুম্পি ৰট্টতিযেৰ। ‘‘পচ্চত্থরণগতিক’’ন্তি ইমিনা মঞ্চাদীসু অত্থরিতব্বং মহাচম্মং এল়কচম্মং নামাতি দস্সেতি।
Bhūmattharaṇaṃ kātuṃ vaṭṭatīti akappiyacammaṃ sandhāya vuttaṃ. Tattha bhūmattharaṇasaṅkhepena sayitumpi vaṭṭatiyeva. ‘‘Paccattharaṇagatika’’nti iminā mañcādīsu attharitabbaṃ mahācammaṃ eḷakacammaṃ nāmāti dasseti.
ছত্তমুট্ঠিপণ্ণন্তি তালপণ্ণং সন্ধায ৰুত্তং। পত্তকটাহন্তি পত্তপচনকটাহং।
Chattamuṭṭhipaṇṇanti tālapaṇṇaṃ sandhāya vuttaṃ. Pattakaṭāhanti pattapacanakaṭāhaṃ.
অৰিস্সজ্জিযৰত্থুকথাৰণ্ণনা নিট্ঠিতা।
Avissajjiyavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / অৰিস্সজ্জিযৰত্থু • Avissajjiyavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / অৰিস্সজ্জিযৰত্থুকথা • Avissajjiyavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অৰিস্সজ্জিযৰত্থুকথাৰণ্ণনা • Avissajjiyavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অৰিস্সজ্জিযৰত্থুকথাৰণ্ণনা • Avissajjiyavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অৰিস্সজ্জিযৰত্থুকথা • Avissajjiyavatthukathā
