| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
ависсаж̇ж̇ияавад̇т̇угат̇ааван̣н̣анаа
Avissajjiyavatthukathāvaṇṇanā
321. аран̃ж̇арод̇и б̣ахууд̣̇агаг̇ан̣ханигаа махаажаади, ж̇алам̣ г̇ан̣хид̇умаланд̇и аран̃ж̇аро.
321.Arañjaroti bahuudakagaṇhanikā mahācāṭi, jalaṃ gaṇhitumalanti arañjaro.
т̇ааварзна жа т̇ааваранд̇иаад̣̇ийсу бан̃жасу годтаасзсу буримад̣̇ваяам̣ т̇ааварам̣, бажчимад̇д̇аяам̣ г̇арубхан̣д̣анд̇и взд̣̇ид̇аб̣б̣ам̣. самагамзва д̣̇зд̇ийд̇и зд̇т̇а уунагам̣ д̣̇знд̇амби вихааравад̇т̇усааманд̇ам̣ г̇ахзд̇ваа д̣̇уурад̇арам̣ д̣̇угкаг̇обам̣ виссаж̇ж̇зд̇ум̣ ваддад̇ийд̇и д̣̇адтаб̣б̣ам̣. вагкад̇и хи ‘‘бхигкуунам̣ жз махаг̇гхад̇арам̣…бз… самбадижчид̇ум̣ ваддад̇ий’’д̇и (жуул̣ава. адта. 321). ж̇аанаабзд̇ваад̇и бхигкусан̇гхасса ж̇аанаабзд̇ваа, абалогзд̇ваад̇и ад̇т̇о. ‘‘нану д̇умхаагам̣ б̣ахуд̇араа ругкаад̇и вад̇д̇аб̣б̣а’’нд̇и ид̣̇ам̣ саамигзсу ад̇д̇ано бхан̣д̣асса махаг̇гхад̇ам̣ аж̇аанид̇ваа д̣̇знд̇зсу д̇ам̣ н̃ад̇ваа т̇зяяажид̇д̇зна г̇ан̣хад̇о авахааро ход̇ийд̇и вуд̇д̇ам̣.
Thāvarena ca thāvarantiādīsu pañcasu koṭṭhāsesu purimadvayaṃ thāvaraṃ, pacchimattayaṃ garubhaṇḍanti veditabbaṃ. Samakameva detīti ettha ūnakaṃ dentampi vihāravatthusāmantaṃ gahetvā dūrataraṃ dukkhagopaṃ vissajjetuṃ vaṭṭatīti daṭṭhabbaṃ. Vakkhati hi ‘‘bhikkhūnaṃ ce mahagghataraṃ…pe… sampaṭicchituṃ vaṭṭatī’’ti (cūḷava. aṭṭha. 321). Jānāpetvāti bhikkhusaṅghassa jānāpetvā, apaloketvāti attho. ‘‘Nanu tumhākaṃ bahutarā rukkhāti vattabba’’nti idaṃ sāmikesu attano bhaṇḍassa mahagghataṃ ajānitvā dentesu taṃ ñatvā theyyacittena gaṇhato avahāro hotīti vuttaṃ.
вихаарзна вихааро баривад̇д̇зд̇аб̣б̣од̇и савад̇т̇угзна ан̃н̃зсам̣ бхуумияам̣ гад̇абаасаад̣̇аад̣̇инаа, авад̇т̇угзна ваа савад̇т̇угам̣ баривад̇д̇зд̇аб̣б̣ам̣. авад̇т̇угам̣ бана авад̇т̇угзнзва баривад̇д̇зд̇аб̣б̣ам̣. гзвалам̣ баасаад̣̇асса бхуумид̇о ат̇ааварад̇д̇аа. звам̣ т̇ааварзсуби т̇ааваравибхааг̇ам̣ н̃ад̇ваава баривад̇д̇зд̇аб̣б̣ам̣.
Vihārena vihāro parivattetabboti savatthukena aññesaṃ bhūmiyaṃ katapāsādādinā, avatthukena vā savatthukaṃ parivattetabbaṃ. Avatthukaṃ pana avatthukeneva parivattetabbaṃ. Kevalaṃ pāsādassa bhūmito athāvarattā. Evaṃ thāvaresupi thāvaravibhāgaṃ ñatvāva parivattetabbaṃ.
‘‘габбияаман̃жаа самбадижчид̇аб̣б̣аа’’д̇и иминаа суван̣н̣аад̣̇ивижид̇д̇ам̣ агаббияаман̃жам̣ ‘‘сан̇гхассаа’’д̇и вуд̇д̇зби самбадижчид̇ум̣ на ваддад̇ийд̇и д̣̇ассзд̇и. ‘‘вихаарасса д̣̇змаа’’д̇и вуд̇д̇з сан̇гхасса ваддад̇и, на буг̇г̇аласса кзд̇д̇аад̣̇и вияаад̇и д̣̇адтаб̣б̣ам̣. зд̇зсууд̇и ман̃жаад̣̇ийсу. габбияаагаббияам̣ вуд̇д̇анаяамзваад̇и аасанд̣̇ийд̇уулигаад̣̇ивинижчаязсу вуд̇д̇анаяамзва. агаббияам̣ ваад̇и аасанд̣̇ийаад̣̇и, бамаан̣аад̇игганд̇ам̣ б̣имб̣оханаад̣̇и жа. махаг̇гхам̣ габбияам̣ ваад̇и суван̣н̣аад̣̇ивижид̇д̇ам̣ габбияавохаарзна д̣̇иннам̣.
‘‘Kappiyamañcā sampaṭicchitabbā’’ti iminā suvaṇṇādivicittaṃ akappiyamañcaṃ ‘‘saṅghassā’’ti vuttepi sampaṭicchituṃ na vaṭṭatīti dasseti. ‘‘Vihārassa demā’’ti vutte saṅghassa vaṭṭati, na puggalassa khettādi viyāti daṭṭhabbaṃ. Etesūti mañcādīsu. Kappiyākappiyaṃ vuttanayamevāti āsandītūlikādivinicchayesu vuttanayameva. Akappiyaṃ vāti āsandīādi, pamāṇātikkantaṃ bimbohanādi ca. Mahagghaṃ kappiyaṃ vāti suvaṇṇādivicittaṃ kappiyavohārena dinnaṃ.
‘‘гаал̣алоха…бз… бхааж̇зд̇аб̣б̣о’’д̇и вуд̇д̇ад̇д̇аа ваддагам̣салохамаяамби бхааж̇анам̣ буг̇г̇алигамби самбадижчид̇умби барихарид̇умби ваддад̇и буг̇г̇алабарихарид̇аб̣б̣ассзва бхааж̇зд̇аб̣б̣ад̇д̇аад̇и вад̣̇анд̇и. д̇ам̣ убари ‘‘гам̣салохаваддалохабхааж̇анавигад̇и сан̇гхигабарибхог̇зна ваа г̇ихивигадаа ваа ваддад̇ий’’д̇иаад̣̇игзна махаабажжариважанзна вируж̇жхад̇и. имасса хи ‘‘ваддалохагам̣салохаанам̣ язна гзнажи гад̇о сийхал̣ад̣̇ийбз баад̣̇аг̇г̇ан̣ханаго бхааж̇зд̇аб̣б̣о’’д̇и вуд̇д̇асса махааадтагат̇ааважанасса бадигкзбааяа д̇ам̣ махаабажжариважанам̣ бажчаа д̣̇ассид̇ам̣. д̇асмаа ваддалохагам̣салохамаяам̣ яам̣ гин̃жи баад̣̇аг̇г̇ан̣ханагаваарагамби убаад̣̇ааяа абхааж̇анийяамзва. г̇ихийхи д̣̇ияяамаанамби буг̇г̇аласса самбадижчид̇умби на ваддад̇и. баарихаарияам̣ на ваддад̇ийд̇и бад̇д̇аад̣̇ибаригкаарам̣ вияа саяамзва бадисаамзд̇ваа барибхун̃ж̇ид̇ум̣ на ваддад̇и. г̇ихисанд̇агам̣ вияа аараамигаад̣̇аяо жз саяамзва г̇обзд̇ваа винияог̇агаалз аанзд̇ваа бадинзнд̇и, барибхун̃ж̇ид̇ум̣ ваддад̇и. ‘‘бадисаамзд̇ваа бхигкуунам̣ д̣̇зт̇аа’’д̇и вад̇д̇умби ваддад̇и.
‘‘Kāḷaloha…pe… bhājetabbo’’ti vuttattā vaṭṭakaṃsalohamayampi bhājanaṃ puggalikampi sampaṭicchitumpi pariharitumpi vaṭṭati puggalapariharitabbasseva bhājetabbattāti vadanti. Taṃ upari ‘‘kaṃsalohavaṭṭalohabhājanavikati saṅghikaparibhogena vā gihivikaṭā vā vaṭṭatī’’tiādikena mahāpaccarivacanena virujjhati. Imassa hi ‘‘vaṭṭalohakaṃsalohānaṃ yena kenaci kato sīhaḷadīpe pādaggaṇhanako bhājetabbo’’ti vuttassa mahāaṭṭhakathāvacanassa paṭikkhepāya taṃ mahāpaccarivacanaṃ pacchā dassitaṃ. Tasmā vaṭṭalohakaṃsalohamayaṃ yaṃ kiñci pādaggaṇhanakavārakampi upādāya abhājanīyameva. Gihīhi diyyamānampi puggalassa sampaṭicchitumpi na vaṭṭati. Pārihāriyaṃ na vaṭṭatīti pattādiparikkhāraṃ viya sayameva paṭisāmetvā paribhuñjituṃ na vaṭṭati. Gihisantakaṃ viya ārāmikādayo ce sayameva gopetvā viniyogakāle ānetvā paṭinenti, paribhuñjituṃ vaṭṭati. ‘‘Paṭisāmetvā bhikkhūnaṃ dethā’’ti vattumpi vaṭṭati.
бан̣н̣асуужи наама лзканийд̇и вад̣̇анд̇и. ‘‘ад̇д̇анаа лад̣̇д̇хаанибий’’д̇иаад̣̇инаа бадиг̇г̇ахан̣з д̣̇осо над̇т̇и, барихарид̇ваа барибхог̇ова аабад̇д̇игарод̇и д̣̇ассзд̇и. яат̇аа жзд̇т̇а, звам̣ убари абхааж̇анийяаваасиаад̣̇ийсу ад̇д̇ано санд̇агзсуби.
Paṇṇasūci nāma lekhanīti vadanti. ‘‘Attanā laddhānipī’’tiādinā paṭiggahaṇe doso natthi, pariharitvā paribhogova āpattikaroti dasseti. Yathā cettha, evaṃ upari abhājanīyavāsiādīsu attano santakesupi.
анаамаасамбийд̇и суван̣н̣аад̣̇имаяамби саб̣б̣ам̣ д̇ам̣ аамасид̇вааби барибхун̃ж̇ид̇ум̣ ваддад̇и. убагкарзд̇и убагаран̣з. ад̣дхаб̣аахуббамаан̣аа наама ад̣дхаб̣аахумад̇д̇аа. ад̣дхаб̣яаамамад̇д̇аад̇иби вад̣̇анд̇и. яод̇д̇аанийд̇и жаммараж̇ж̇угаа.
Anāmāsampīti suvaṇṇādimayampi sabbaṃ taṃ āmasitvāpi paribhuñjituṃ vaṭṭati. Upakkhareti upakaraṇe. Aḍḍhabāhuppamāṇā nāma aḍḍhabāhumattā. Aḍḍhabyāmamattātipi vadanti. Yottānīti cammarajjukā.
адтан̇г̇уласуужид̣̇ан̣д̣амад̇д̇обийд̇и д̇асарад̣̇ан̣д̣аад̣̇исуужиаагаарад̇ануд̣̇ан̣д̣агамад̇д̇оби. рид̇д̇абод̇т̇агобийд̇и аликид̇абод̇т̇аго. ид̣̇ан̃жа бан̣н̣аббасан̇г̇зна вуд̇д̇ам̣.
Aṭṭhaṅgulasūcidaṇḍamattopīti tasaradaṇḍādisūciākāratanudaṇḍakamattopi. Rittapotthakopīti alikhitapotthako. Idañca paṇṇappasaṅgena vuttaṃ.
‘‘гхадданапалагам̣ гхадданамуг̇г̇аро’’д̇и ид̣̇ам̣ раж̇ид̇ажийварам̣ згасмим̣ мадтз д̣̇ан̣д̣амуг̇г̇арз взтзд̇ваа згасса мадтапалагасса убари табзд̇ваа убари абарзна мадтапалагзна нигуж̇ж̇ид̇ваа зго убари аггамид̇ваа д̇идтад̇и. д̣̇вз ж̇анаа убари палагам̣ д̣̇вийсу годийсу г̇ахзд̇ваа абараабарам̣ аагад̣дханавигад̣дханам̣ гаронд̇и, зд̇ам̣ санд̇хааяа вуд̇д̇ам̣. хад̇т̇з табаабзд̇ваа хад̇т̇зна бахаран̣ам̣ бана нидтид̇араж̇анасса жийварасса аллагаалз гаад̇аб̣б̣ам̣. ид̣̇ам̣ бана палагамуг̇г̇арзхи гхадданам̣ сугкагаалз т̇ад̣̇д̇хабхаававиможанад̇т̇анд̇и д̣̇адтаб̣б̣ам̣. амб̣ан̣анд̇и згад̣̇он̣иганааваапалагзхи богкаран̣ийсад̣̇исам̣ гад̇ам̣. баанийяабхааж̇ананд̇иби вад̣̇анд̇и. раж̇анад̣̇он̣ийд̇и згад̣̇аарунаава гад̇ам̣ раж̇анабхааж̇анам̣. уд̣̇агад̣̇он̣ийби згад̣̇аарунаава гад̇ам̣ уд̣̇агабхааж̇анам̣.
‘‘Ghaṭṭanaphalakaṃ ghaṭṭanamuggaro’’ti idaṃ rajitacīvaraṃ ekasmiṃ maṭṭhe daṇḍamuggare veṭhetvā ekassa maṭṭhaphalakassa upari ṭhapetvā upari aparena maṭṭhaphalakena nikujjitvā eko upari akkamitvā tiṭṭhati. Dve janā upari phalakaṃ dvīsu koṭīsu gahetvā aparāparaṃ ākaḍḍhanavikaḍḍhanaṃ karonti, etaṃ sandhāya vuttaṃ. Hatthe ṭhapāpetvā hatthena paharaṇaṃ pana niṭṭhitarajanassa cīvarassa allakāle kātabbaṃ. Idaṃ pana phalakamuggarehi ghaṭṭanaṃ sukkhakāle thaddhabhāvavimocanatthanti daṭṭhabbaṃ. Ambaṇanti ekadoṇikanāvāphalakehi pokkharaṇīsadisaṃ kataṃ. Pānīyabhājanantipi vadanti. Rajanadoṇīti ekadārunāva kataṃ rajanabhājanaṃ. Udakadoṇīpi ekadārunāva kataṃ udakabhājanaṃ.
бхуумад̇т̇аран̣ам̣ гаад̇ум̣ ваддад̇ийд̇и агаббияажаммам̣ санд̇хааяа вуд̇д̇ам̣. д̇ад̇т̇а бхуумад̇т̇аран̣асан̇кзбзна саяид̇умби ваддад̇иязва. ‘‘бажжад̇т̇аран̣аг̇ад̇ига’’нд̇и иминаа ман̃жаад̣̇ийсу ад̇т̇арид̇аб̣б̣ам̣ махаажаммам̣ зл̣агажаммам̣ наамаад̇и д̣̇ассзд̇и.
Bhūmattharaṇaṃ kātuṃ vaṭṭatīti akappiyacammaṃ sandhāya vuttaṃ. Tattha bhūmattharaṇasaṅkhepena sayitumpi vaṭṭatiyeva. ‘‘Paccattharaṇagatika’’nti iminā mañcādīsu attharitabbaṃ mahācammaṃ eḷakacammaṃ nāmāti dasseti.
чад̇д̇амудтибан̣н̣анд̇и д̇аалабан̣н̣ам̣ санд̇хааяа вуд̇д̇ам̣. бад̇д̇агадааханд̇и бад̇д̇абажанагадаахам̣.
Chattamuṭṭhipaṇṇanti tālapaṇṇaṃ sandhāya vuttaṃ. Pattakaṭāhanti pattapacanakaṭāhaṃ.
ависсаж̇ж̇ияавад̇т̇угат̇ааван̣н̣анаа нидтид̇аа.
Avissajjiyavatthukathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / ависсаж̇ж̇ияавад̇т̇у • Avissajjiyavatthu
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / ависсаж̇ж̇ияавад̇т̇угат̇аа • Avissajjiyavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / ависсаж̇ж̇ияавад̇т̇угат̇ааван̣н̣анаа • Avissajjiyavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ависсаж̇ж̇ияавад̇т̇угат̇ааван̣н̣анаа • Avissajjiyavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / ависсаж̇ж̇ияавад̇т̇угат̇аа • Avissajjiyavatthukathā
