| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
ཨཝིསྶཛྫིཡཝཏྠུཀཐཱཝཎྞནཱ
Avissajjiyavatthukathāvaṇṇanā
༣༢༡. ཨརཉྫརོཏི བཧུཨུདཀགཎྷནཀཱ མཧཱཙཱཊི། ཛལཾ གཎྷིཏུཾ ཨལནྟི ཨརཉྫརོ། ‘‘ཝཊྚཙཱཊི ཝིཡ ཧུཏྭཱ ཐོཀཾ དཱིགྷམུཁོ མཛ྄ཛྷེ པརིཙྪེདཾ དསྶེཏྭཱ ཀཏོ’’ཏི གཎྛིཔདེསུ ཝུཏྟཾ། པཉྩནིམྨལལོཙནོཏི མཾསདིབྦདྷམྨབུདྡྷསམནྟཙཀྑུཝསེན པཉྩལོཙནོ།
321.Arañjaroti bahuudakagaṇhanakā mahācāṭi. Jalaṃ gaṇhituṃ alanti arañjaro. ‘‘Vaṭṭacāṭi viya hutvā thokaṃ dīghamukho majjhe paricchedaṃ dassetvā kato’’ti gaṇṭhipadesu vuttaṃ. Pañcanimmalalocanoti maṃsadibbadhammabuddhasamantacakkhuvasena pañcalocano.
ཐཱཝརེན ཙ ཐཱཝརཾ གརུབྷཎྜེན ཙ གརུབྷཎྜནྟི ཨེཏྠ པཉྩསུ ཀོཊྛཱསེསུ པུརིམདྭཡཾ ཐཱཝརཾ, པཙྪིམཏྟཡཾ གརུབྷཎྜནྟི ཝེདིཏབྦཾ། ཛཱནཱཔེཏྭཱཏི བྷིཀྑུསངྒྷཾ ཛཱནཱཔེཏྭཱ། ཀཔྤིཡམཉྩཱ སམྤཊིཙྪིཏབྦཱཏི ‘‘སངྒྷསྶ དེམཱ’’ཏི དིནྣཾ སནྡྷཱཡ ཝུཏྟཾ། སཙེ པན ‘‘ཝིཧཱརསྶ དེམཱ’’ཏི ཝདནྟི, སུཝཎྞརཛཏམཡཱདིཨཀཔྤིཡམཉྩེཔི སམྤཊིཙྪིཏུཾ ཝཊྚཏི། ན ཀེཝལཾ…པེ॰… པརིཝཏྟེཏུཾ ཝཊྚནྟཱིཏི ཨིམིནཱ ཨཐཱཝརེན ཐཱཝརམྤི ཨཐཱཝརམྤི པརིཝཏྟེཏུཾ ཝཊྚཏཱིཏི དསྶེཏི། ཐཱཝརེན ཨཐཱཝརམེཝ ཧི པརིཝཏྟེཏུཾ ན ཝཊྚཏི། ཨཀཔྤིཡཾ ཝཱ མཧགྒྷཾ ཀཔྤིཡཾ ཝཱཏི ཨེཏྠ ཨཀཔྤིཡཾ ནཱམ སུཝཎྞམཡམཉྩཱདི ཨཀཔྤིཡབྷིསིབིམྦོཧནཱནི ཙ། མཧགྒྷཾ ཀཔྤིཡཾ ནཱམ དནྟམཡམཉྩཱདི པཱཝཱརཱདིཀཔྤིཡཨཏྠརཎཱདཱིནི ཙ།
Thāvarenaca thāvaraṃ garubhaṇḍena ca garubhaṇḍanti ettha pañcasu koṭṭhāsesu purimadvayaṃ thāvaraṃ, pacchimattayaṃ garubhaṇḍanti veditabbaṃ. Jānāpetvāti bhikkhusaṅghaṃ jānāpetvā. Kappiyamañcā sampaṭicchitabbāti ‘‘saṅghassa demā’’ti dinnaṃ sandhāya vuttaṃ. Sace pana ‘‘vihārassa demā’’ti vadanti, suvaṇṇarajatamayādiakappiyamañcepi sampaṭicchituṃ vaṭṭati. Na kevalaṃ…pe… parivattetuṃ vaṭṭantīti iminā athāvarena thāvarampi athāvarampi parivattetuṃ vaṭṭatīti dasseti. Thāvarena athāvarameva hi parivattetuṃ na vaṭṭati. Akappiyaṃ vā mahagghaṃ kappiyaṃ vāti ettha akappiyaṃ nāma suvaṇṇamayamañcādi akappiyabhisibimbohanāni ca. Mahagghaṃ kappiyaṃ nāma dantamayamañcādi pāvārādikappiyaattharaṇādīni ca.
པཱརིཧཱརིཡཾ ན ཝཊྚཏཱིཏི ཨཏྟནོ སནྟཀཾ ཝིཡ གཧེཏྭཱ པརིཧརིཏུཾ ན ཝཊྚཏི། ‘‘གིཧིཝིཀཏནཱིཧཱརེནེཝ པརིབྷུཉྫིཏབྦ’’ནྟི ཨིམིནཱ སཙེ ཨཱརཱམིཀཱདཡོ པཊིསཱམེཏྭཱ པཊིདེནྟི, པརིབྷུཉྫིཏུཾ ཝཊྚཏཱིཏི དསྶེཏི། ‘‘པཎྞསཱུཙི ནཱམ ལེཁནཱི’’ཏི མཧཱགཎྛིཔདེ ཝུཏྟཾ།
Pārihāriyaṃ na vaṭṭatīti attano santakaṃ viya gahetvā pariharituṃ na vaṭṭati. ‘‘Gihivikatanīhāreneva paribhuñjitabba’’nti iminā sace ārāmikādayo paṭisāmetvā paṭidenti, paribhuñjituṃ vaṭṭatīti dasseti. ‘‘Paṇṇasūci nāma lekhanī’’ti mahāgaṇṭhipade vuttaṃ.
‘‘ཨཌྜྷབཱཧཱུཏི ཀཔྤརཏོ པཊྛཱཡ ཡཱཝ ཨཾསཀཱུཊ’’ནྟི གཎྛིཔདེསུ ཝུཏྟཾ། ཨཌྜྷབཱཧུ ནཱམ ཝིདཏྠིཙཏུརངྒུལནྟིཔི ཝདནྟི། ཏཏྠཛཱཏཀཱཏི སངྒྷིཀབྷཱུམིཡཾ ཛཱཏཱ། ཨཊྛངྒུལསཱུཙིདཎྜམཏྟོཏི དཱིགྷཏོ ཨཊྛངྒུལམཏྟོ པརིཎཱཧཏོ པཎྞསཱུཙིདཎྜམཏྟོ། མུཉྫཔབྦཛཱནཾཡེཝ པཱལི༹ཡཾ ཝིསུཾ ཨཱགཏཏྟཱ ‘‘མུཉྫཾ པབྦཛཉྩ ཋཔེཏྭཱ’’ཏི ཝུཏྟཾ། ཨཊྛངྒུལཔྤམཱཎོཏི དཱིགྷཏོ ཨཊྛངྒུལཔྤམཱཎོ། གྷཊྚནཕལཀཾ ནཱམ ཡཏྠ ཋཔེཏྭཱ རཛིཏཙཱིཝརཾ ཧཏྠེན གྷཊྚེནྟི། གྷཊྚནམུགྒརོ ནཱམ ཨནུཝཱཏཱདིགྷཊྚནཏྠཾ ཀཏོཏི ཝདནྟི། ཨམྦཎནྟི ཕལཀེཧི པོཀྑརཎཱིསདིསཾ ཀཏཔཱནཱིཡབྷཱཛནཾ། རཛནདོཎཱིཏི ཡཏྠ པཀྐརཛནཾ ཨཱཀིརིཏྭཱ ཋཔེནྟི། བྷཱུམཏྠརཎཾ ཀཱཏུཾ ཝཊྚཏཱིཏི ཨཀཔྤིཡཙམྨཾ སནྡྷཱཡ ཝུཏྟཾ། པཙྩཏྠརཎགཏིཀནྟི ཨིམིནཱ མཉྩཔཱིཋེཔི ཨཏྠརིཏུཾ ཝཊྚཏཱིཏི དཱིཔེཏི། པཱཝཱརཱདིཔཙྩཏྠརཎམྤི གརུབྷཎྜནྟི ཨེཀེ, ནོཏི ཨཔརེ, ཝཱིམཾསིཏྭཱ གཧེཏབྦཾ། མུཊྛིཔཎྞནྟི ཏཱལཔཎྞཾ སནྡྷཱཡ ཝུཏྟཾ།
‘‘Aḍḍhabāhūti kapparato paṭṭhāya yāva aṃsakūṭa’’nti gaṇṭhipadesu vuttaṃ. Aḍḍhabāhu nāma vidatthicaturaṅgulantipi vadanti. Tatthajātakāti saṅghikabhūmiyaṃ jātā. Aṭṭhaṅgulasūcidaṇḍamattoti dīghato aṭṭhaṅgulamatto pariṇāhato paṇṇasūcidaṇḍamatto. Muñjapabbajānaṃyeva pāḷiyaṃ visuṃ āgatattā ‘‘muñjaṃ pabbajañca ṭhapetvā’’ti vuttaṃ. Aṭṭhaṅgulappamāṇoti dīghato aṭṭhaṅgulappamāṇo. Ghaṭṭanaphalakaṃ nāma yattha ṭhapetvā rajitacīvaraṃ hatthena ghaṭṭenti. Ghaṭṭanamuggaro nāma anuvātādighaṭṭanatthaṃ katoti vadanti. Ambaṇanti phalakehi pokkharaṇīsadisaṃ katapānīyabhājanaṃ. Rajanadoṇīti yattha pakkarajanaṃ ākiritvā ṭhapenti. Bhūmattharaṇaṃ kātuṃ vaṭṭatīti akappiyacammaṃ sandhāya vuttaṃ. Paccattharaṇagatikanti iminā mañcapīṭhepi attharituṃ vaṭṭatīti dīpeti. Pāvārādipaccattharaṇampi garubhaṇḍanti eke, noti apare, vīmaṃsitvā gahetabbaṃ. Muṭṭhipaṇṇanti tālapaṇṇaṃ sandhāya vuttaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ཨཝིསྶཛྫིཡཝཏྠུ • Avissajjiyavatthu
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨཝིསྶཛྫིཡཝཏྠུཀཐཱ • Avissajjiyavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཝིསྶཛྫིཡཝཏྠུཀཐཱཝཎྞནཱ • Avissajjiyavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཝིསྶཛྫིཡཝཏྠུཀཐཱཝཎྞནཱ • Avissajjiyavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨཝིསྶཛྫིཡཝཏྠུཀཐཱ • Avissajjiyavatthukathā
