| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২১. একৰীসতিমৰগ্গো
21. Ekavīsatimavaggo
(২০১) ২. অৰিৰিত্তকথা
(201) 2. Avivittakathā
৮৭৯. পুথুজ্জনো তেধাতুকেহি ধম্মেহি অৰিৰিত্তোতি? আমন্তা। পুথুজ্জনো তেধাতুকেহি ফস্সেহি…পে॰… তেধাতুকাহি ৰেদনাহি… সঞ্ঞাহি … চেতনাহি… চিত্তেহি… সদ্ধাহি… ৰীরিযেহি… সতীহি… সমাধীহি…পে॰… তেধাতুকাহি পঞ্ঞাহি অৰিৰিত্তোতি? ন হেৰং ৰত্তব্বে…পে॰…।
879. Puthujjano tedhātukehi dhammehi avivittoti? Āmantā. Puthujjano tedhātukehi phassehi…pe… tedhātukāhi vedanāhi… saññāhi … cetanāhi… cittehi… saddhāhi… vīriyehi… satīhi… samādhīhi…pe… tedhātukāhi paññāhi avivittoti? Na hevaṃ vattabbe…pe….
পুথুজ্জনো তেধাতুকেহি কম্মেহি অৰিৰিত্তোতি? আমন্তা। যস্মিং খণে পুথুজ্জনো চীৰরং দেতি, তস্মিং খণে পঠমং ঝানং উপসম্পজ্জ ৰিহরতি…পে॰… আকাসানঞ্চাযতনং উপসম্পজ্জ ৰিহরতীতি? ন হেৰং ৰত্তব্বে…পে॰… যস্মিং খণে পুথুজ্জনো পিণ্ডপাতং দেতি…পে॰… সেনাসনং দেতি…পে॰… গিলানপচ্চযভেসজ্জপরিক্খারং দেতি, তস্মিং খণে চতুত্থং ঝানং উপসম্পজ্জ ৰিহরতি… নেৰসঞ্ঞানাসঞ্ঞাযতনং উপসম্পজ্জ ৰিহরতীতি? ন হেৰং ৰত্তব্বে…পে॰…।
Puthujjano tedhātukehi kammehi avivittoti? Āmantā. Yasmiṃ khaṇe puthujjano cīvaraṃ deti, tasmiṃ khaṇe paṭhamaṃ jhānaṃ upasampajja viharati…pe… ākāsānañcāyatanaṃ upasampajja viharatīti? Na hevaṃ vattabbe…pe… yasmiṃ khaṇe puthujjano piṇḍapātaṃ deti…pe… senāsanaṃ deti…pe… gilānapaccayabhesajjaparikkhāraṃ deti, tasmiṃ khaṇe catutthaṃ jhānaṃ upasampajja viharati… nevasaññānāsaññāyatanaṃ upasampajja viharatīti? Na hevaṃ vattabbe…pe….
৮৮০. ন ৰত্তব্বং – ‘‘পুথুজ্জনো তেধাতুকেহি কম্মেহি অৰিৰিত্তো’’তি? আমন্তা । পুথুজ্জনস্স রূপধাতুঅরূপধাতূপগং কম্মং পরিঞ্ঞাতন্তি? ন হেৰং ৰত্তব্বে। তেন হি পুথুজ্জনো তেধাতুকেহি কম্মেহি অৰিৰিত্তোতি…পে॰…।
880. Na vattabbaṃ – ‘‘puthujjano tedhātukehi kammehi avivitto’’ti? Āmantā . Puthujjanassa rūpadhātuarūpadhātūpagaṃ kammaṃ pariññātanti? Na hevaṃ vattabbe. Tena hi puthujjano tedhātukehi kammehi avivittoti…pe….
অৰিৰিত্তকথা নিট্ঠিতা।
Avivittakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. অৰিৰিত্তকথাৰণ্ণনা • 2. Avivittakathāvaṇṇanā
