| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೨೧. ಏಕವೀಸತಿಮವಗ್ಗೋ
21. Ekavīsatimavaggo
(೨೦೧) ೨. ಅವಿವಿತ್ತಕಥಾ
(201) 2. Avivittakathā
೮೭೯. ಪುಥುಜ್ಜನೋ ತೇಧಾತುಕೇಹಿ ಧಮ್ಮೇಹಿ ಅವಿವಿತ್ತೋತಿ? ಆಮನ್ತಾ। ಪುಥುಜ್ಜನೋ ತೇಧಾತುಕೇಹಿ ಫಸ್ಸೇಹಿ…ಪೇ॰… ತೇಧಾತುಕಾಹಿ ವೇದನಾಹಿ… ಸಞ್ಞಾಹಿ … ಚೇತನಾಹಿ… ಚಿತ್ತೇಹಿ… ಸದ್ಧಾಹಿ… ವೀರಿಯೇಹಿ… ಸತೀಹಿ… ಸಮಾಧೀಹಿ…ಪೇ॰… ತೇಧಾತುಕಾಹಿ ಪಞ್ಞಾಹಿ ಅವಿವಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
879. Puthujjano tedhātukehi dhammehi avivittoti? Āmantā. Puthujjano tedhātukehi phassehi…pe… tedhātukāhi vedanāhi… saññāhi … cetanāhi… cittehi… saddhāhi… vīriyehi… satīhi… samādhīhi…pe… tedhātukāhi paññāhi avivittoti? Na hevaṃ vattabbe…pe….
ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋತಿ? ಆಮನ್ತಾ। ಯಸ್ಮಿಂ ಖಣೇ ಪುಥುಜ್ಜನೋ ಚೀವರಂ ದೇತಿ, ತಸ್ಮಿಂ ಖಣೇ ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ…ಪೇ॰… ಆಕಾಸಾನಞ್ಚಾಯತನಂ ಉಪಸಮ್ಪಜ್ಜ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ॰… ಯಸ್ಮಿಂ ಖಣೇ ಪುಥುಜ್ಜನೋ ಪಿಣ್ಡಪಾತಂ ದೇತಿ…ಪೇ॰… ಸೇನಾಸನಂ ದೇತಿ…ಪೇ॰… ಗಿಲಾನಪಚ್ಚಯಭೇಸಜ್ಜಪರಿಕ್ಖಾರಂ ದೇತಿ, ತಸ್ಮಿಂ ಖಣೇ ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ… ನೇವಸಞ್ಞಾನಾಸಞ್ಞಾಯತನಂ ಉಪಸಮ್ಪಜ್ಜ ವಿಹರತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Puthujjano tedhātukehi kammehi avivittoti? Āmantā. Yasmiṃ khaṇe puthujjano cīvaraṃ deti, tasmiṃ khaṇe paṭhamaṃ jhānaṃ upasampajja viharati…pe… ākāsānañcāyatanaṃ upasampajja viharatīti? Na hevaṃ vattabbe…pe… yasmiṃ khaṇe puthujjano piṇḍapātaṃ deti…pe… senāsanaṃ deti…pe… gilānapaccayabhesajjaparikkhāraṃ deti, tasmiṃ khaṇe catutthaṃ jhānaṃ upasampajja viharati… nevasaññānāsaññāyatanaṃ upasampajja viharatīti? Na hevaṃ vattabbe…pe….
೮೮೦. ನ ವತ್ತಬ್ಬಂ – ‘‘ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋ’’ತಿ? ಆಮನ್ತಾ । ಪುಥುಜ್ಜನಸ್ಸ ರೂಪಧಾತುಅರೂಪಧಾತೂಪಗಂ ಕಮ್ಮಂ ಪರಿಞ್ಞಾತನ್ತಿ? ನ ಹೇವಂ ವತ್ತಬ್ಬೇ। ತೇನ ಹಿ ಪುಥುಜ್ಜನೋ ತೇಧಾತುಕೇಹಿ ಕಮ್ಮೇಹಿ ಅವಿವಿತ್ತೋತಿ…ಪೇ॰…।
880. Na vattabbaṃ – ‘‘puthujjano tedhātukehi kammehi avivitto’’ti? Āmantā . Puthujjanassa rūpadhātuarūpadhātūpagaṃ kammaṃ pariññātanti? Na hevaṃ vattabbe. Tena hi puthujjano tedhātukehi kammehi avivittoti…pe….
ಅವಿವಿತ್ತಕಥಾ ನಿಟ್ಠಿತಾ।
Avivittakathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೨. ಅವಿವಿತ್ತಕಥಾವಣ್ಣನಾ • 2. Avivittakathāvaṇṇanā
