| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༢༡. ཨེཀཝཱིསཏིམཝགྒོ
21. Ekavīsatimavaggo
(༢༠༡) ༢. ཨཝིཝིཏྟཀཐཱ
(201) 2. Avivittakathā
༨༧༩. པུཐུཛྫནོ ཏེདྷཱཏུཀེཧི དྷམྨེཧི ཨཝིཝིཏྟོཏི? ཨཱམནྟཱ། པུཐུཛྫནོ ཏེདྷཱཏུཀེཧི ཕསྶེཧི…པེ॰… ཏེདྷཱཏུཀཱཧི ཝེདནཱཧི… སཉྙཱཧི … ཙེཏནཱཧི… ཙིཏྟེཧི… སདྡྷཱཧི… ཝཱིརིཡེཧི… སཏཱིཧི… སམཱདྷཱིཧི…པེ॰… ཏེདྷཱཏུཀཱཧི པཉྙཱཧི ཨཝིཝིཏྟོཏི? ན ཧེཝཾ ཝཏྟབྦེ…པེ॰…།
879. Puthujjano tedhātukehi dhammehi avivittoti? Āmantā. Puthujjano tedhātukehi phassehi…pe… tedhātukāhi vedanāhi… saññāhi … cetanāhi… cittehi… saddhāhi… vīriyehi… satīhi… samādhīhi…pe… tedhātukāhi paññāhi avivittoti? Na hevaṃ vattabbe…pe….
པུཐུཛྫནོ ཏེདྷཱཏུཀེཧི ཀམྨེཧི ཨཝིཝིཏྟོཏི? ཨཱམནྟཱ། ཡསྨིཾ ཁཎེ པུཐུཛྫནོ ཙཱིཝརཾ དེཏི, ཏསྨིཾ ཁཎེ པཋམཾ ཛྷཱནཾ ཨུཔསམྤཛྫ ཝིཧརཏི…པེ॰… ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏཱིཏི? ན ཧེཝཾ ཝཏྟབྦེ…པེ॰… ཡསྨིཾ ཁཎེ པུཐུཛྫནོ པིཎྜཔཱཏཾ དེཏི…པེ॰… སེནཱསནཾ དེཏི…པེ॰… གིལཱནཔཙྩཡབྷེསཛྫཔརིཀྑཱརཾ དེཏི, ཏསྨིཾ ཁཎེ ཙཏུཏྠཾ ཛྷཱནཾ ཨུཔསམྤཛྫ ཝིཧརཏི… ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏཱིཏི? ན ཧེཝཾ ཝཏྟབྦེ…པེ॰…།
Puthujjano tedhātukehi kammehi avivittoti? Āmantā. Yasmiṃ khaṇe puthujjano cīvaraṃ deti, tasmiṃ khaṇe paṭhamaṃ jhānaṃ upasampajja viharati…pe… ākāsānañcāyatanaṃ upasampajja viharatīti? Na hevaṃ vattabbe…pe… yasmiṃ khaṇe puthujjano piṇḍapātaṃ deti…pe… senāsanaṃ deti…pe… gilānapaccayabhesajjaparikkhāraṃ deti, tasmiṃ khaṇe catutthaṃ jhānaṃ upasampajja viharati… nevasaññānāsaññāyatanaṃ upasampajja viharatīti? Na hevaṃ vattabbe…pe….
༨༨༠. ན ཝཏྟབྦཾ – ‘‘པུཐུཛྫནོ ཏེདྷཱཏུཀེཧི ཀམྨེཧི ཨཝིཝིཏྟོ’’ཏི? ཨཱམནྟཱ ། པུཐུཛྫནསྶ རཱུཔདྷཱཏུཨརཱུཔདྷཱཏཱུཔགཾ ཀམྨཾ པརིཉྙཱཏནྟི? ན ཧེཝཾ ཝཏྟབྦེ། ཏེན ཧི པུཐུཛྫནོ ཏེདྷཱཏུཀེཧི ཀམྨེཧི ཨཝིཝིཏྟོཏི…པེ॰…།
880. Na vattabbaṃ – ‘‘puthujjano tedhātukehi kammehi avivitto’’ti? Āmantā . Puthujjanassa rūpadhātuarūpadhātūpagaṃ kammaṃ pariññātanti? Na hevaṃ vattabbe. Tena hi puthujjano tedhātukehi kammehi avivittoti…pe….
ཨཝིཝིཏྟཀཐཱ ནིཊྛིཏཱ།
Avivittakathā niṭṭhitā.
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༢. ཨཝིཝིཏྟཀཐཱཝཎྞནཱ • 2. Avivittakathāvaṇṇanā
