| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. அவோபுப்பி²யத்தே²ரஅபதா³னவண்ணனா
2. Avopupphiyattheraapadānavaṇṇanā
விஹாரா அபி⁴னிக்க²ம்மாதிஆதி³கங் ஆயஸ்மதோ அவோபுப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ ஸத்³தா⁴ஸம்பன்னோ த⁴ம்மங் ஸுத்வா ஸோமனஸ்ஸப்பத்தோ நானாபுப்பா²னி உபோ⁴ஹி ஹத்தே²ஹி க³ஹெத்வா பு³த்³த⁴ஸ்ஸ உபரி அப்³பு⁴க்கிரி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ ஸக்³க³ஸம்பத்திஞ்ச சக்கவத்திஸம்பத்திஞ்ச அனுப⁴வித்வா ஸப்³ப³த்த² பூஜிதோ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³தோ வுத்³தி⁴ப்பத்தோ ஸாஸனே பஸீதி³த்வா பப்³ப³ஜித்வா நசிரஸ்ஸேவ அரஹா அஹோஸி. ஆ ஸமந்ததோ காஸதி தி³ப்பதீதி ஆகாஸோ, தஸ்மிங் ஆகாஸே புப்பா²னங் அவகிரிதத்தா அவோபுப்பி²யத்தே²ரோதி பாகடோ.
Vihārā abhinikkhammātiādikaṃ āyasmato avopupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto saddhāsampanno dhammaṃ sutvā somanassappatto nānāpupphāni ubhohi hatthehi gahetvā buddhassa upari abbhukkiri. So tena puññena devamanussesu saṃsaranto saggasampattiñca cakkavattisampattiñca anubhavitvā sabbattha pūjito imasmiṃ buddhuppāde ekasmiṃ kulagehe nibbato vuddhippatto sāsane pasīditvā pabbajitvā nacirasseva arahā ahosi. Ā samantato kāsati dippatīti ākāso, tasmiṃ ākāse pupphānaṃ avakiritattā avopupphiyattheroti pākaṭo.
7. ஏவங் பத்தஸந்திபதோ³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விஹாரா அபி⁴னிக்க²ம்மாதிஆதி³மாஹ. தத்த² விஹாராதி விஸேஸேன ஹரதி சதூஹி இரியாபதே²ஹி அபதந்தங் அத்தபா⁴வங் ஆஹரதி பவத்தேதி எத்தா²தி விஹாரோ, தஸ்மா விஹாரா அபி⁴ விஸேஸேன நிக்க²ம்ம நிக்க²மித்வா. அப்³பு⁴ட்டா²ஸி ச சங்கமேதி சங்கமனத்தா²ய ஸட்டி²ரதனே சங்கமே அபி⁴விஸேஸேன உட்டா²ஸி, அபி⁴ருஹீதி அத்தோ². சதுஸச்சங் பகாஸெந்தோதி தஸ்மிங் சங்கமே சங்கமந்தோ து³க்க²ஸமுத³யனிரோத⁴மக்³க³ஸச்சஸங்கா²தங் சதுஸச்சங் பகாஸெந்தோ பாகடங் கரொந்தோ அமதங் பத³ங் நிப்³பா³னங் தே³ஸெந்தோ விப⁴ஜந்தோ உத்தானீகரொந்தோ தஸ்மிங் சங்கமேதி ஸம்ப³ந்தோ⁴.
7. Evaṃ pattasantipado attano pubbakammaṃ saritvā somanassajāto pubbacaritāpadānaṃ pakāsento vihārā abhinikkhammātiādimāha. Tattha vihārāti visesena harati catūhi iriyāpathehi apatantaṃ attabhāvaṃ āharati pavatteti etthāti vihāro, tasmā vihārā abhi visesena nikkhamma nikkhamitvā. Abbhuṭṭhāsi ca caṅkameti caṅkamanatthāya saṭṭhiratane caṅkame abhivisesena uṭṭhāsi, abhiruhīti attho. Catusaccaṃpakāsentoti tasmiṃ caṅkame caṅkamanto dukkhasamudayanirodhamaggasaccasaṅkhātaṃ catusaccaṃ pakāsento pākaṭaṃ karonto amataṃ padaṃ nibbānaṃ desento vibhajanto uttānīkaronto tasmiṃ caṅkameti sambandho.
8. ஸிகி²ஸ்ஸ கி³ரமஞ்ஞாய, பு³த்³த⁴ஸெட்ட²ஸ்ஸ தாதி³னோதி ஸெட்ட²ஸ்ஸ தாதி³கு³ணஸமங்கி³ஸ்ஸ ஸிகி²ஸ்ஸ பு³த்³த⁴ஸ்ஸ கி³ரங் ஸத்³த³ங் கோ⁴ஸங் அஞ்ஞாய ஜானித்வா. நானாபுப்ப²ங் க³ஹெத்வானாதி நாக³புன்னாகா³தி³அனேகானி புப்பா²னி க³ஹெத்வா ஆஹரித்வா. ஆகாஸம்ஹி ஸமோகிரிந்தி சங்கமந்தஸ்ஸ ப⁴க³வதோ முத்³த⁴னி ஆகாஸே ஓகிரிங் பூஜேஸிங்.
8.Sikhissa giramaññāya, buddhaseṭṭhassa tādinoti seṭṭhassa tādiguṇasamaṅgissa sikhissa buddhassa giraṃ saddaṃ ghosaṃ aññāya jānitvā. Nānāpupphaṃ gahetvānāti nāgapunnāgādianekāni pupphāni gahetvā āharitvā. Ākāsamhi samokirinti caṅkamantassa bhagavato muddhani ākāse okiriṃ pūjesiṃ.
9. தேன கம்மேன த்³விபதி³ந்தா³தி த்³விபதா³னங் தே³வப்³ரஹ்மமனுஸ்ஸானங் இந்த³ பதா⁴னபூ⁴த. நராஸப⁴ நரானங் ஆஸப⁴பூ⁴த. பத்தொம்ஹி அசலங் டா²னந்தி தும்ஹாகங் ஸந்திகே பப்³ப³ஜித்வா அசலங் டா²னங் நிப்³பா³னங் பத்தோ அம்ஹி ப⁴வாமி. ஹித்வா ஜயபராஜயந்தி தி³ப்³ப³மனுஸ்ஸஸம்பத்திஸங்கா²தங் ஜயஞ்ச சதுராபாயது³க்க²ஸங்கா²தங் பராஜயஞ்ச ஹித்வா ச²ட்³டெ³த்வா நிப்³பா³னங் பத்தொஸ்மீதி அத்தோ². ஸேஸங் ஸுவிஞ்ஞெய்யமேவாதி.
9.Tena kammena dvipadindāti dvipadānaṃ devabrahmamanussānaṃ inda padhānabhūta. Narāsabha narānaṃ āsabhabhūta. Pattomhi acalaṃ ṭhānanti tumhākaṃ santike pabbajitvā acalaṃ ṭhānaṃ nibbānaṃ patto amhi bhavāmi. Hitvā jayaparājayanti dibbamanussasampattisaṅkhātaṃ jayañca caturāpāyadukkhasaṅkhātaṃ parājayañca hitvā chaḍḍetvā nibbānaṃ pattosmīti attho. Sesaṃ suviññeyyamevāti.
அவோபுப்பி²யத்தே²ரஅபதா³னவண்ணனா ஸமத்தோ.
Avopupphiyattheraapadānavaṇṇanā samatto.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. அவோபுப்பி²யத்தே²ரஅபதா³னங் • 2. Avopupphiyattheraapadānaṃ
