| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. অৰোপুপ্ফিযত্থেরঅপদানৰণ্ণনা
2. Avopupphiyattheraapadānavaṇṇanā
ৰিহারা অভিনিক্খম্মাতিআদিকং আযস্মতো অৰোপুপ্ফিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তো ৰিঞ্ঞুতং পত্তো সদ্ধাসম্পন্নো ধম্মং সুত্ৰা সোমনস্সপ্পত্তো নানাপুপ্ফানি উভোহি হত্থেহি গহেত্ৰা বুদ্ধস্স উপরি অব্ভুক্কিরি। সো তেন পুঞ্ঞেন দেৰমনুস্সেসু সংসরন্তো সগ্গসম্পত্তিঞ্চ চক্কৰত্তিসম্পত্তিঞ্চ অনুভৰিত্ৰা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বতো ৰুদ্ধিপ্পত্তো সাসনে পসীদিত্ৰা পব্বজিত্ৰা নচিরস্সেৰ অরহা অহোসি। আ সমন্ততো কাসতি দিপ্পতীতি আকাসো, তস্মিং আকাসে পুপ্ফানং অৰকিরিতত্তা অৰোপুপ্ফিযত্থেরোতি পাকটো।
Vihārā abhinikkhammātiādikaṃ āyasmato avopupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto saddhāsampanno dhammaṃ sutvā somanassappatto nānāpupphāni ubhohi hatthehi gahetvā buddhassa upari abbhukkiri. So tena puññena devamanussesu saṃsaranto saggasampattiñca cakkavattisampattiñca anubhavitvā sabbattha pūjito imasmiṃ buddhuppāde ekasmiṃ kulagehe nibbato vuddhippatto sāsane pasīditvā pabbajitvā nacirasseva arahā ahosi. Ā samantato kāsati dippatīti ākāso, tasmiṃ ākāse pupphānaṃ avakiritattā avopupphiyattheroti pākaṭo.
৭. এৰং পত্তসন্তিপদো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিহারা অভিনিক্খম্মাতিআদিমাহ। তত্থ ৰিহারাতি ৰিসেসেন হরতি চতূহি ইরিযাপথেহি অপতন্তং অত্তভাৰং আহরতি পৰত্তেতি এত্থাতি ৰিহারো, তস্মা ৰিহারা অভি ৰিসেসেন নিক্খম্ম নিক্খমিত্ৰা। অব্ভুট্ঠাসি চ চঙ্কমেতি চঙ্কমনত্থায সট্ঠিরতনে চঙ্কমে অভিৰিসেসেন উট্ঠাসি, অভিরুহীতি অত্থো। চতুসচ্চং পকাসেন্তোতি তস্মিং চঙ্কমে চঙ্কমন্তো দুক্খসমুদযনিরোধমগ্গসচ্চসঙ্খাতং চতুসচ্চং পকাসেন্তো পাকটং করোন্তো অমতং পদং নিব্বানং দেসেন্তো ৰিভজন্তো উত্তানীকরোন্তো তস্মিং চঙ্কমেতি সম্বন্ধো।
7. Evaṃ pattasantipado attano pubbakammaṃ saritvā somanassajāto pubbacaritāpadānaṃ pakāsento vihārā abhinikkhammātiādimāha. Tattha vihārāti visesena harati catūhi iriyāpathehi apatantaṃ attabhāvaṃ āharati pavatteti etthāti vihāro, tasmā vihārā abhi visesena nikkhamma nikkhamitvā. Abbhuṭṭhāsi ca caṅkameti caṅkamanatthāya saṭṭhiratane caṅkame abhivisesena uṭṭhāsi, abhiruhīti attho. Catusaccaṃpakāsentoti tasmiṃ caṅkame caṅkamanto dukkhasamudayanirodhamaggasaccasaṅkhātaṃ catusaccaṃ pakāsento pākaṭaṃ karonto amataṃ padaṃ nibbānaṃ desento vibhajanto uttānīkaronto tasmiṃ caṅkameti sambandho.
৮. সিখিস্স গিরমঞ্ঞায, বুদ্ধসেট্ঠস্স তাদিনোতি সেট্ঠস্স তাদিগুণসমঙ্গিস্স সিখিস্স বুদ্ধস্স গিরং সদ্দং ঘোসং অঞ্ঞায জানিত্ৰা। নানাপুপ্ফং গহেত্ৰানাতি নাগপুন্নাগাদিঅনেকানি পুপ্ফানি গহেত্ৰা আহরিত্ৰা। আকাসম্হি সমোকিরিন্তি চঙ্কমন্তস্স ভগৰতো মুদ্ধনি আকাসে ওকিরিং পূজেসিং।
8.Sikhissa giramaññāya, buddhaseṭṭhassa tādinoti seṭṭhassa tādiguṇasamaṅgissa sikhissa buddhassa giraṃ saddaṃ ghosaṃ aññāya jānitvā. Nānāpupphaṃ gahetvānāti nāgapunnāgādianekāni pupphāni gahetvā āharitvā. Ākāsamhi samokirinti caṅkamantassa bhagavato muddhani ākāse okiriṃ pūjesiṃ.
৯. তেন কম্মেন দ্ৰিপদিন্দাতি দ্ৰিপদানং দেৰব্রহ্মমনুস্সানং ইন্দ পধানভূত। নরাসভ নরানং আসভভূত। পত্তোম্হি অচলং ঠানন্তি তুম্হাকং সন্তিকে পব্বজিত্ৰা অচলং ঠানং নিব্বানং পত্তো অম্হি ভৰামি। হিত্ৰা জযপরাজযন্তি দিব্বমনুস্সসম্পত্তিসঙ্খাতং জযঞ্চ চতুরাপাযদুক্খসঙ্খাতং পরাজযঞ্চ হিত্ৰা ছড্ডেত্ৰা নিব্বানং পত্তোস্মীতি অত্থো। সেসং সুৰিঞ্ঞেয্যমেৰাতি।
9.Tena kammena dvipadindāti dvipadānaṃ devabrahmamanussānaṃ inda padhānabhūta. Narāsabha narānaṃ āsabhabhūta. Pattomhi acalaṃ ṭhānanti tumhākaṃ santike pabbajitvā acalaṃ ṭhānaṃ nibbānaṃ patto amhi bhavāmi. Hitvā jayaparājayanti dibbamanussasampattisaṅkhātaṃ jayañca caturāpāyadukkhasaṅkhātaṃ parājayañca hitvā chaḍḍetvā nibbānaṃ pattosmīti attho. Sesaṃ suviññeyyamevāti.
অৰোপুপ্ফিযত্থেরঅপদানৰণ্ণনা সমত্তো।
Avopupphiyattheraapadānavaṇṇanā samatto.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. অৰোপুপ্ফিযত্থেরঅপদানং • 2. Avopupphiyattheraapadānaṃ
