| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
2. අවොපුප්‌ඵියත්‌ථෙරඅපදානවණ්‌ණනා
2. Avopupphiyattheraapadānavaṇṇanā
විහාරා අභිනික්‌ඛම්‌මාතිආදිකං ආයස්‌මතො අවොපුප්‌ඵියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිඛිස්‌ස භගවතො කාලෙ කුලගෙහෙ නිබ්‌බත්‌තො විඤ්‌ඤුතං පත්‌තො සද්‌ධාසම්‌පන්‌නො ධම්‌මං සුත්‌වා සොමනස්‌සප්‌පත්‌තො නානාපුප්‌ඵානි උභොහි හත්‌ථෙහි ගහෙත්‌වා බුද්‌ධස්‌ස උපරි අබ්‌භුක්‌කිරි. සො තෙන පුඤ්‌ඤෙන දෙවමනුස්‌සෙසු සංසරන්‌තො සග්‌ගසම්‌පත්‌තිඤ්‌ච චක්‌කවත්‌තිසම්‌පත්‌තිඤ්‌ච අනුභවිත්‌වා සබ්‌බත්‌ථ පූජිතො ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බතො වුද්‌ධිප්‌පත්‌තො සාසනෙ පසීදිත්‌වා පබ්‌බජිත්‌වා නචිරස්‌සෙව අරහා අහොසි. ආ සමන්‌තතො කාසති දිප්‌පතීති ආකාසො, තස්‌මිං ආකාසෙ පුප්‌ඵානං අවකිරිතත්‌තා අවොපුප්‌ඵියත්‌ථෙරොති පාකටො.
Vihārā abhinikkhammātiādikaṃ āyasmato avopupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto saddhāsampanno dhammaṃ sutvā somanassappatto nānāpupphāni ubhohi hatthehi gahetvā buddhassa upari abbhukkiri. So tena puññena devamanussesu saṃsaranto saggasampattiñca cakkavattisampattiñca anubhavitvā sabbattha pūjito imasmiṃ buddhuppāde ekasmiṃ kulagehe nibbato vuddhippatto sāsane pasīditvā pabbajitvā nacirasseva arahā ahosi. Ā samantato kāsati dippatīti ākāso, tasmiṃ ākāse pupphānaṃ avakiritattā avopupphiyattheroti pākaṭo.
7. එවං පත්‌තසන්‌තිපදො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො විහාරා අභිනික්‌ඛම්‌මාතිආදිමාහ. තත්‌ථ විහාරාති විසෙසෙන හරති චතූහි ඉරියාපථෙහි අපතන්‌තං අත්‌තභාවං ආහරති පවත්‌තෙති එත්‌ථාති විහාරො, තස්‌මා විහාරා අභි විසෙසෙන නික්‌ඛම්‌ම නික්‌ඛමිත්‌වා. අබ්‌භුට්‌ඨාසි ච චඞ්‌කමෙති චඞ්‌කමනත්‌ථාය සට්‌ඨිරතනෙ චඞ්‌කමෙ අභිවිසෙසෙන උට්‌ඨාසි, අභිරුහීති අත්‌ථො. චතුසච්‌චං පකාසෙන්‌තොති තස්‌මිං චඞ්‌කමෙ චඞ්‌කමන්‌තො දුක්‌ඛසමුදයනිරොධමග්‌ගසච්‌චසඞ්‌ඛාතං චතුසච්‌චං පකාසෙන්‌තො පාකටං කරොන්‌තො අමතං පදං නිබ්‌බානං දෙසෙන්‌තො විභජන්‌තො උත්‌තානීකරොන්‌තො තස්‌මිං චඞ්‌කමෙති සම්‌බන්‌ධො.
7. Evaṃ pattasantipado attano pubbakammaṃ saritvā somanassajāto pubbacaritāpadānaṃ pakāsento vihārā abhinikkhammātiādimāha. Tattha vihārāti visesena harati catūhi iriyāpathehi apatantaṃ attabhāvaṃ āharati pavatteti etthāti vihāro, tasmā vihārā abhi visesena nikkhamma nikkhamitvā. Abbhuṭṭhāsi ca caṅkameti caṅkamanatthāya saṭṭhiratane caṅkame abhivisesena uṭṭhāsi, abhiruhīti attho. Catusaccaṃpakāsentoti tasmiṃ caṅkame caṅkamanto dukkhasamudayanirodhamaggasaccasaṅkhātaṃ catusaccaṃ pakāsento pākaṭaṃ karonto amataṃ padaṃ nibbānaṃ desento vibhajanto uttānīkaronto tasmiṃ caṅkameti sambandho.
8. සිඛිස්‌ස ගිරමඤ්‌ඤාය, බුද්‌ධසෙට්‌ඨස්‌ස තාදිනොති සෙට්‌ඨස්‌ස තාදිගුණසමඞ්‌ගිස්‌ස සිඛිස්‌ස බුද්‌ධස්‌ස ගිරං සද්‌දං ඝොසං අඤ්‌ඤාය ජානිත්‌වා. නානාපුප්‌ඵං ගහෙත්‌වානාති නාගපුන්‌නාගාදිඅනෙකානි පුප්‌ඵානි ගහෙත්‌වා ආහරිත්‌වා. ආකාසම්‌හි සමොකිරින්‌ති චඞ්‌කමන්‌තස්‌ස භගවතො මුද්‌ධනි ආකාසෙ ඔකිරිං පූජෙසිං.
8.Sikhissa giramaññāya, buddhaseṭṭhassa tādinoti seṭṭhassa tādiguṇasamaṅgissa sikhissa buddhassa giraṃ saddaṃ ghosaṃ aññāya jānitvā. Nānāpupphaṃ gahetvānāti nāgapunnāgādianekāni pupphāni gahetvā āharitvā. Ākāsamhi samokirinti caṅkamantassa bhagavato muddhani ākāse okiriṃ pūjesiṃ.
9. තෙන කම්‌මෙන ද්‌විපදින්‌දාති ද්‌විපදානං දෙවබ්‍රහ්‌මමනුස්‌සානං ඉන්‌ද පධානභූත. නරාසභ නරානං ආසභභූත. පත්‌තොම්‌හි අචලං ඨානන්‌ති තුම්‌හාකං සන්‌තිකෙ පබ්‌බජිත්‌වා අචලං ඨානං නිබ්‌බානං පත්‌තො අම්‌හි භවාමි. හිත්‌වා ජයපරාජයන්‌ති දිබ්‌බමනුස්‌සසම්‌පත්‌තිසඞ්‌ඛාතං ජයඤ්‌ච චතුරාපායදුක්‌ඛසඞ්‌ඛාතං පරාජයඤ්‌ච හිත්‌වා ඡඩ්‌ඩෙත්‌වා නිබ්‌බානං පත්‌තොස්‌මීති අත්‌ථො. සෙසං සුවිඤ්‌ඤෙය්‍යමෙවාති.
9.Tena kammena dvipadindāti dvipadānaṃ devabrahmamanussānaṃ inda padhānabhūta. Narāsabha narānaṃ āsabhabhūta. Pattomhi acalaṃ ṭhānanti tumhākaṃ santike pabbajitvā acalaṃ ṭhānaṃ nibbānaṃ patto amhi bhavāmi. Hitvā jayaparājayanti dibbamanussasampattisaṅkhātaṃ jayañca caturāpāyadukkhasaṅkhātaṃ parājayañca hitvā chaḍḍetvā nibbānaṃ pattosmīti attho. Sesaṃ suviññeyyamevāti.
අවොපුප්‌ඵියත්‌ථෙරඅපදානවණ්‌ණනා සමත්‌තො.
Avopupphiyattheraapadānavaṇṇanā samatto.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 2. අවොපුප්‌ඵියත්‌ථෙරඅපදානං • 2. Avopupphiyattheraapadānaṃ
