| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(12) 2. ஆயாசனவக்³க³வண்ணனா
(12) 2. Āyācanavaggavaṇṇanā
131. து³தியஸ்ஸ பட²மே ஏவங் ஸம்மா ஆயாசமானோ ஆயாசெய்யாதி ஸத்³தோ⁴ பி⁴க்கு² உட்ட²ஹித்வா ‘‘யாதி³ஸோ ஸாரிபுத்தத்தே²ரோ பஞ்ஞாய, அஹம்பி தாதி³ஸோ ஹோமி. யாதி³ஸோ மஹாமொக்³க³ல்லானத்தே²ரோ இத்³தி⁴யா, அஹம்பி தாதி³ஸோ ஹோமீ’’தி ஏவங் ஆயாசந்தோ பிஹெந்தோ பத்தெ²ந்தோ யங் அத்தி², தஸ்ஸேவ பத்தி²தத்தா ஸம்மா பத்தெ²ய்ய நாம. இதோ உத்தரி பத்தெ²ந்தோ மிச்சா² பத்தெ²ய்ய. ஏவரூபா ஹி பத்த²னா யங் நத்தி², தஸ்ஸ பத்தி²தத்தா மிச்சா²பத்த²னா நாம ஹோதி. கிங் காரணா? ஏஸா, பி⁴க்க²வே, துலா ஏதங் பமாணந்தி யதா² ஹி ஸுவண்ணங் வா ஹிரஞ்ஞங் வா துலெந்தஸ்ஸ துலா இச்சி²தப்³பா³, த⁴ஞ்ஞங் மினந்தஸ்ஸ மானந்தி துலனே துலா, மினநே ச மானங் பமாணங் ஹோதி, ஏவமேவ மம ஸாவகானங் பி⁴க்கூ²னங் ஏஸா துலா ஏதங் பமாணங் யதி³த³ங் ஸாரிபுத்தமொக்³க³ல்லானா. தே க³ஹெத்வா ‘‘அஹம்பி ஞாணேன வா இத்³தி⁴யா வா ஏதம்பமாணோ ஹோமீ’’தி அத்தானங் துலேதுங் வா பமாணேதுங் வா ஸக்கா, ந இதோ அஞ்ஞதா².
131. Dutiyassa paṭhame evaṃ sammā āyācamāno āyāceyyāti saddho bhikkhu uṭṭhahitvā ‘‘yādiso sāriputtatthero paññāya, ahampi tādiso homi. Yādiso mahāmoggallānatthero iddhiyā, ahampi tādiso homī’’ti evaṃ āyācanto pihento patthento yaṃ atthi, tasseva patthitattā sammā pattheyya nāma. Ito uttari patthento micchā pattheyya. Evarūpā hi patthanā yaṃ natthi, tassa patthitattā micchāpatthanā nāma hoti. Kiṃ kāraṇā? Esā, bhikkhave, tulā etaṃ pamāṇanti yathā hi suvaṇṇaṃ vā hiraññaṃ vā tulentassa tulā icchitabbā, dhaññaṃ minantassa mānanti tulane tulā, minane ca mānaṃ pamāṇaṃ hoti, evameva mama sāvakānaṃ bhikkhūnaṃ esā tulā etaṃ pamāṇaṃ yadidaṃ sāriputtamoggallānā. Te gahetvā ‘‘ahampi ñāṇena vā iddhiyā vā etampamāṇo homī’’ti attānaṃ tuletuṃ vā pamāṇetuṃ vā sakkā, na ito aññathā.
132. து³தியாதீ³ஸுபி ஏஸேவ நயோ. இத³ங் பனெத்த² விஸேஸமத்தங் – கே²மா ச பி⁴க்கு²னீ உப்பலவண்ணா சாதி ஏதாஸு ஹி கே²மா பஞ்ஞாய அக்³கா³, உப்பலவண்ணா இத்³தி⁴யா. தஸ்மா ‘‘பஞ்ஞாய வா இத்³தி⁴யா வா ஏதாதி³ஸீ ஹோமீ’’தி ஸம்மா ஆயாசமானா ஆயாசெய்ய. ததா² சித்தோ க³ஹபதி பஞ்ஞாய அக்³கோ³, ஹத்த²கோ ராஜகுமாரோ மஹித்³தி⁴கதாய. தஸ்மா ‘‘பஞ்ஞாய வா இத்³தி⁴யா வா ஏதி³ஸோ ஹோமீ’’தி ஸம்மா ஆயாசமானோ ஆயாசெய்ய. கு²ஜ்ஜுத்தராபி மஹாபஞ்ஞதாய அக்³கா³, நந்த³மாதா மஹித்³தி⁴கதாய. தஸ்மா ‘‘பஞ்ஞாய வா இத்³தி⁴யா வா ஏதாதி³ஸீ ஹோமீ’’தி ஸம்மா ஆயாசமானா ஆயாசெய்ய.
132. Dutiyādīsupi eseva nayo. Idaṃ panettha visesamattaṃ – khemā ca bhikkhunī uppalavaṇṇā cāti etāsu hi khemā paññāya aggā, uppalavaṇṇā iddhiyā. Tasmā ‘‘paññāya vā iddhiyā vā etādisī homī’’ti sammā āyācamānā āyāceyya. Tathā citto gahapati paññāya aggo, hatthako rājakumāro mahiddhikatāya. Tasmā ‘‘paññāya vā iddhiyā vā ediso homī’’ti sammā āyācamāno āyāceyya. Khujjuttarāpi mahāpaññatāya aggā, nandamātā mahiddhikatāya. Tasmā ‘‘paññāya vā iddhiyā vā etādisī homī’’ti sammā āyācamānā āyāceyya.
135. பஞ்சமே க²தந்தி கு³ணானங் க²தத்தா க²தங். உபஹதந்தி கு³ணானங் உபஹதத்தா உபஹதங், சி²ன்னகு³ணங் நட்ட²கு³ணந்தி அத்தோ². அத்தானங் பரிஹரதீதி நிக்³கு³ணங் அத்தானங் ஜக்³க³தி கோ³பாயதி. ஸாவஜ்ஜோதி ஸதோ³ஸோ. ஸானுவஜ்ஜோதி ஸஉபவாதோ³. பஸவதீதி படிலப⁴தி. அனநுவிச்சாதி அஜானித்வா அவினிச்சி²னித்வா. அபரியோகா³ஹெத்வாதி அனநுபவிஸித்வா. அவண்ணாரஹஸ்ஸாதி அவண்ணயுத்தஸ்ஸ மிச்சா²படிபன்னஸ்ஸ தித்தி²யஸ்ஸ வா தித்தி²யஸாவகஸ்ஸ வா. வண்ணங் பா⁴ஸதீதி ‘‘ஸுப்படிபன்னோ ஏஸ ஸம்மாபடிபன்னோ’’தி கு³ணங் கதே²தி. வண்ணாரஹஸ்ஸாதி பு³த்³தா⁴தீ³ஸு அஞ்ஞதரஸ்ஸ ஸம்மாபடிபன்னஸ்ஸ. அவண்ணங் பா⁴ஸதீதி ‘‘து³ப்படிபன்னோ ஏஸ மிச்சா²படிபன்னோ’’தி அகு³ணங் கதே²தி. அவண்ணாரஹஸ்ஸ அவண்ணங் பா⁴ஸதீதி இதே⁴கச்சோ புக்³க³லோ து³ப்படிபன்னானங் மிச்சா²படிபன்னானங் தித்தி²யானங் தித்தி²யஸாவகானங் ‘‘இதிபி து³ப்படிபன்னா இதிபி மிச்சா²படிபன்னா’’தி அவண்ணங் பா⁴ஸதி. வண்ணாரஹஸ்ஸ வண்ணங் பா⁴ஸதீதி ஸுப்படிபன்னானங் ஸம்மாபடிபன்னானங் பு³த்³தா⁴னங் பு³த்³த⁴ஸாவகானங் ‘‘இதிபி ஸுப்படிபன்னா இதிபி ஸம்மாபடிபன்னா’’தி வண்ணங் பா⁴ஸதி.
135. Pañcame khatanti guṇānaṃ khatattā khataṃ. Upahatanti guṇānaṃ upahatattā upahataṃ, chinnaguṇaṃ naṭṭhaguṇanti attho. Attānaṃ pariharatīti nigguṇaṃ attānaṃ jaggati gopāyati. Sāvajjoti sadoso. Sānuvajjoti saupavādo. Pasavatīti paṭilabhati. Ananuviccāti ajānitvā avinicchinitvā. Apariyogāhetvāti ananupavisitvā. Avaṇṇārahassāti avaṇṇayuttassa micchāpaṭipannassa titthiyassa vā titthiyasāvakassa vā. Vaṇṇaṃ bhāsatīti ‘‘suppaṭipanno esa sammāpaṭipanno’’ti guṇaṃ katheti. Vaṇṇārahassāti buddhādīsu aññatarassa sammāpaṭipannassa. Avaṇṇaṃ bhāsatīti ‘‘duppaṭipanno esa micchāpaṭipanno’’ti aguṇaṃ katheti. Avaṇṇārahassa avaṇṇaṃ bhāsatīti idhekacco puggalo duppaṭipannānaṃ micchāpaṭipannānaṃ titthiyānaṃ titthiyasāvakānaṃ ‘‘itipi duppaṭipannā itipi micchāpaṭipannā’’ti avaṇṇaṃ bhāsati. Vaṇṇārahassa vaṇṇaṃ bhāsatīti suppaṭipannānaṃ sammāpaṭipannānaṃ buddhānaṃ buddhasāvakānaṃ ‘‘itipi suppaṭipannā itipi sammāpaṭipannā’’ti vaṇṇaṃ bhāsati.
136. ச²ட்டே² அப்பஸாத³னீயே டா²னேதி அப்பஸாத³காரணே. பஸாத³ங் உபத³ங்ஸேதீதி து³ப்படிபதா³ய மிச்சா²படிபதா³ய ‘‘அயங் ஸுப்படிபதா³ ஸம்மாபடிபதா³’’தி பஸாத³ங் ஜனேதி. பஸாத³னீயே டா²னே அப்பஸாத³ந்தி ஸுப்படிபதா³ய ஸம்மாபடிபதா³ய ‘‘அயங் து³ப்படிபதா³ மிச்சா²படிபதா³’’தி அப்பஸாத³ங் ஜனேதீதி. ஸேஸமெத்த² உத்தானமேவ.
136. Chaṭṭhe appasādanīye ṭhāneti appasādakāraṇe. Pasādaṃupadaṃsetīti duppaṭipadāya micchāpaṭipadāya ‘‘ayaṃ suppaṭipadā sammāpaṭipadā’’ti pasādaṃ janeti. Pasādanīye ṭhāne appasādanti suppaṭipadāya sammāpaṭipadāya ‘‘ayaṃ duppaṭipadā micchāpaṭipadā’’ti appasādaṃ janetīti. Sesamettha uttānameva.
137. ஸத்தமே த்³வீஸூதி த்³வீஸு ஓகாஸேஸு த்³வீஸு காரணேஸு. மிச்சா²படிபஜ்ஜமானோதி மிச்சா²படிபத்திங் படிபஜ்ஜமானோ. மாதரி ச பிதரி சாதி மித்தவிந்த³கோ விய மாதரி, அஜாதஸத்து விய பிதரி. ஸுக்கபக்கோ² வுத்தனயேனேவ வேதி³தப்³போ³.
137.Sattame dvīsūti dvīsu okāsesu dvīsu kāraṇesu. Micchāpaṭipajjamānoti micchāpaṭipattiṃ paṭipajjamāno. Mātari ca pitari cāti mittavindako viya mātari, ajātasattu viya pitari. Sukkapakkho vuttanayeneva veditabbo.
138. அட்ட²மே ததா²க³தே ச ததா²க³தஸாவகே சாதி தே³வத³த்தோ விய ததா²க³தே, கோகாலிகோ விய ச ததா²க³தஸாவகே. ஸுக்கபக்கே² ஆனந்த³த்தே²ரோ விய ததா²க³தே, நந்த³கோ³பாலகஸெட்டி²புத்தோ விய ச ததா²க³தஸாவகே.
138. Aṭṭhame tathāgate ca tathāgatasāvake cāti devadatto viya tathāgate, kokāliko viya ca tathāgatasāvake. Sukkapakkhe ānandatthero viya tathāgate, nandagopālakaseṭṭhiputto viya ca tathāgatasāvake.
139. நவமே ஸசித்தவோதா³னந்தி ஸகசித்தஸ்ஸ வோதா³னங், அட்ட²ன்னங் ஸமாபத்தீனங் ஏதங் நாமங். ந ச கிஞ்சி லோகே உபாதி³யதீதி லோகே ச ரூபாதீ³ஸு த⁴ம்மேஸு கிஞ்சி ஏகங் த⁴ம்மம்பி ந க³ண்ஹாதி ந பராமஸதி. ஏவமெத்த² அனுபாதா³னங் நாம து³தியோ த⁴ம்மோ ஹோதி. த³ஸமேகாத³ஸமானி உத்தானத்தா²னேவாதி.
139. Navame sacittavodānanti sakacittassa vodānaṃ, aṭṭhannaṃ samāpattīnaṃ etaṃ nāmaṃ. Na ca kiñci loke upādiyatīti loke ca rūpādīsu dhammesu kiñci ekaṃ dhammampi na gaṇhāti na parāmasati. Evamettha anupādānaṃ nāma dutiyo dhammo hoti. Dasamekādasamāni uttānatthānevāti.
ஆயாசனவக்³கோ³ து³தியோ.
Āyācanavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (12) 2. ஆயாசனவக்³கோ³ • (12) 2. Āyācanavaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / (12) 2. ஆயாசனவக்³க³வண்ணனா • (12) 2. Āyācanavaggavaṇṇanā
