| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(12) 2. ஆயாசனவக்³க³வண்ணனா
(12) 2. Āyācanavaggavaṇṇanā
131. ஸத்³தோ⁴ பி⁴க்கூ²தி ஸத்³தா⁴ய ஸமன்னாக³தோ பி⁴க்கு². யோ பி⁴க்கு² ஸாரிபுத்தமொக்³க³ல்லானேஹி ஸதி³ஸபா⁴வங் பத்தே²தி, ஸோ யேஹி கு³ணேஹி ஸாரிபுத்தமொக்³க³ல்லானா ஏதத³க்³கே³ ட²பிதா, தே கு³ணே அத்தனோ அபி⁴கங்கெ²ய்யாதி ஆஹ ‘‘யாதி³ஸோ ஸாரிபுத்தத்தே²ரோ பஞ்ஞாயா’’திஆதி³. இதோ உத்தரி பத்தெ²ந்தோ மிச்சா² பத்தெ²ய்யாதி ஸாரிபுத்தமொக்³க³ல்லானானங் யே பஞ்ஞாத³யோ கு³ணா உபலப்³ப⁴ந்தி, ததோ உத்தரி பத்தெ²ந்தோ மிச்சா² பத்தெ²ய்ய. அக்³க³ஸாவககு³ணபரமா ஹி ஸாவககு³ணமரியாதா³. தேஸங் ஸாவககு³ணானங் யதி³த³ங் அக்³க³ஸாவககு³ணா, ந ததோ பரங் ஸாவககு³ணா நாம அத்தி². தேனேவாஹ ‘‘யங் நத்தி², தஸ்ஸ பத்தி²தத்தா’’தி. ஸேஸமெத்த² உத்தானமேவ.
131.Saddho bhikkhūti saddhāya samannāgato bhikkhu. Yo bhikkhu sāriputtamoggallānehi sadisabhāvaṃ pattheti, so yehi guṇehi sāriputtamoggallānā etadagge ṭhapitā, te guṇe attano abhikaṅkheyyāti āha ‘‘yādiso sāriputtatthero paññāyā’’tiādi. Ito uttari patthento micchā pattheyyāti sāriputtamoggallānānaṃ ye paññādayo guṇā upalabbhanti, tato uttari patthento micchā pattheyya. Aggasāvakaguṇaparamā hi sāvakaguṇamariyādā. Tesaṃ sāvakaguṇānaṃ yadidaṃ aggasāvakaguṇā, na tato paraṃ sāvakaguṇā nāma atthi. Tenevāha ‘‘yaṃ natthi, tassa patthitattā’’ti. Sesamettha uttānameva.
135. பஞ்சமே யஸ்ஸ கு³ணா க²தா உபஹதா ச, ஸோ க²தோ உபஹதோ நாம ஹோதீதி ஆஹ ‘‘கு³ணானங் க²தத்தா’’திஆதி³. க²தத்தாதி சி²ன்னத்தா. உபஹதத்தாதி நட்ட²த்தா. தேனாஹ ‘‘சி²ன்னகு³ணங் நட்ட²கு³ணந்தி அத்தோ²’’தி. அபுஞ்ஞஸ்ஸ பஸவோ நாம அத்த²தோ படிலாபோ⁴தி ஆஹ ‘‘பஸவதீதி படிலப⁴தீ’’தி, அத்தனோ ஸந்தானே உப்பாதே³தீதி அத்தோ². அனநுபவிஸித்வாதி ஞாணேன அனோகா³ஹெத்வா. ஸேஸமெத்த² ச²ட்டா²தீ³னி ச ஸுவிஞ்ஞெய்யானேவ.
135. Pañcame yassa guṇā khatā upahatā ca, so khato upahato nāma hotīti āha ‘‘guṇānaṃ khatattā’’tiādi. Khatattāti chinnattā. Upahatattāti naṭṭhattā. Tenāha ‘‘chinnaguṇaṃ naṭṭhaguṇantiattho’’ti. Apuññassa pasavo nāma atthato paṭilābhoti āha ‘‘pasavatīti paṭilabhatī’’ti, attano santāne uppādetīti attho. Ananupavisitvāti ñāṇena anogāhetvā. Sesamettha chaṭṭhādīni ca suviññeyyāneva.
ஆயாசனவக்³க³வண்ணனா நிட்டி²தா.
Āyācanavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (12) 2. ஆயாசனவக்³கோ³ • (12) 2. Āyācanavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (12) 2. ஆயாசனவக்³க³வண்ணனா • (12) 2. Āyācanavaggavaṇṇanā
