| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(১২) ২. আযাচনৰগ্গৰণ্ণনা
(12) 2. Āyācanavaggavaṇṇanā
১৩১. সদ্ধো ভিক্খূতি সদ্ধায সমন্নাগতো ভিক্খু। যো ভিক্খু সারিপুত্তমোগ্গল্লানেহি সদিসভাৰং পত্থেতি, সো যেহি গুণেহি সারিপুত্তমোগ্গল্লানা এতদগ্গে ঠপিতা, তে গুণে অত্তনো অভিকঙ্খেয্যাতি আহ ‘‘যাদিসো সারিপুত্তত্থেরো পঞ্ঞাযা’’তিআদি। ইতো উত্তরি পত্থেন্তো মিচ্ছা পত্থেয্যাতি সারিপুত্তমোগ্গল্লানানং যে পঞ্ঞাদযো গুণা উপলব্ভন্তি, ততো উত্তরি পত্থেন্তো মিচ্ছা পত্থেয্য। অগ্গসাৰকগুণপরমা হি সাৰকগুণমরিযাদা। তেসং সাৰকগুণানং যদিদং অগ্গসাৰকগুণা, ন ততো পরং সাৰকগুণা নাম অত্থি। তেনেৰাহ ‘‘যং নত্থি, তস্স পত্থিতত্তা’’তি। সেসমেত্থ উত্তানমেৰ।
131.Saddho bhikkhūti saddhāya samannāgato bhikkhu. Yo bhikkhu sāriputtamoggallānehi sadisabhāvaṃ pattheti, so yehi guṇehi sāriputtamoggallānā etadagge ṭhapitā, te guṇe attano abhikaṅkheyyāti āha ‘‘yādiso sāriputtatthero paññāyā’’tiādi. Ito uttari patthento micchā pattheyyāti sāriputtamoggallānānaṃ ye paññādayo guṇā upalabbhanti, tato uttari patthento micchā pattheyya. Aggasāvakaguṇaparamā hi sāvakaguṇamariyādā. Tesaṃ sāvakaguṇānaṃ yadidaṃ aggasāvakaguṇā, na tato paraṃ sāvakaguṇā nāma atthi. Tenevāha ‘‘yaṃ natthi, tassa patthitattā’’ti. Sesamettha uttānameva.
১৩৫. পঞ্চমে যস্স গুণা খতা উপহতা চ, সো খতো উপহতো নাম হোতীতি আহ ‘‘গুণানং খতত্তা’’তিআদি। খতত্তাতি ছিন্নত্তা। উপহতত্তাতি নট্ঠত্তা। তেনাহ ‘‘ছিন্নগুণং নট্ঠগুণন্তি অত্থো’’তি। অপুঞ্ঞস্স পসৰো নাম অত্থতো পটিলাভোতি আহ ‘‘পসৰতীতি পটিলভতী’’তি, অত্তনো সন্তানে উপ্পাদেতীতি অত্থো। অননুপৰিসিত্ৰাতি ঞাণেন অনোগাহেত্ৰা। সেসমেত্থ ছট্ঠাদীনি চ সুৰিঞ্ঞেয্যানেৰ।
135. Pañcame yassa guṇā khatā upahatā ca, so khato upahato nāma hotīti āha ‘‘guṇānaṃ khatattā’’tiādi. Khatattāti chinnattā. Upahatattāti naṭṭhattā. Tenāha ‘‘chinnaguṇaṃ naṭṭhaguṇantiattho’’ti. Apuññassa pasavo nāma atthato paṭilābhoti āha ‘‘pasavatīti paṭilabhatī’’ti, attano santāne uppādetīti attho. Ananupavisitvāti ñāṇena anogāhetvā. Sesamettha chaṭṭhādīni ca suviññeyyāneva.
আযাচনৰগ্গৰণ্ণনা নিট্ঠিতা।
Āyācanavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (১২) ২. আযাচনৰগ্গো • (12) 2. Āyācanavaggo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / (১২) ২. আযাচনৰগ্গৰণ্ণনা • (12) 2. Āyācanavaggavaṇṇanā
