| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
(೧೨) ೨. ಆಯಾಚನವಗ್ಗವಣ್ಣನಾ
(12) 2. Āyācanavaggavaṇṇanā
೧೩೧. ಸದ್ಧೋ ಭಿಕ್ಖೂತಿ ಸದ್ಧಾಯ ಸಮನ್ನಾಗತೋ ಭಿಕ್ಖು। ಯೋ ಭಿಕ್ಖು ಸಾರಿಪುತ್ತಮೋಗ್ಗಲ್ಲಾನೇಹಿ ಸದಿಸಭಾವಂ ಪತ್ಥೇತಿ, ಸೋ ಯೇಹಿ ಗುಣೇಹಿ ಸಾರಿಪುತ್ತಮೋಗ್ಗಲ್ಲಾನಾ ಏತದಗ್ಗೇ ಠಪಿತಾ, ತೇ ಗುಣೇ ಅತ್ತನೋ ಅಭಿಕಙ್ಖೇಯ್ಯಾತಿ ಆಹ ‘‘ಯಾದಿಸೋ ಸಾರಿಪುತ್ತತ್ಥೇರೋ ಪಞ್ಞಾಯಾ’’ತಿಆದಿ। ಇತೋ ಉತ್ತರಿ ಪತ್ಥೇನ್ತೋ ಮಿಚ್ಛಾ ಪತ್ಥೇಯ್ಯಾತಿ ಸಾರಿಪುತ್ತಮೋಗ್ಗಲ್ಲಾನಾನಂ ಯೇ ಪಞ್ಞಾದಯೋ ಗುಣಾ ಉಪಲಬ್ಭನ್ತಿ, ತತೋ ಉತ್ತರಿ ಪತ್ಥೇನ್ತೋ ಮಿಚ್ಛಾ ಪತ್ಥೇಯ್ಯ। ಅಗ್ಗಸಾವಕಗುಣಪರಮಾ ಹಿ ಸಾವಕಗುಣಮರಿಯಾದಾ। ತೇಸಂ ಸಾವಕಗುಣಾನಂ ಯದಿದಂ ಅಗ್ಗಸಾವಕಗುಣಾ, ನ ತತೋ ಪರಂ ಸಾವಕಗುಣಾ ನಾಮ ಅತ್ಥಿ। ತೇನೇವಾಹ ‘‘ಯಂ ನತ್ಥಿ, ತಸ್ಸ ಪತ್ಥಿತತ್ತಾ’’ತಿ। ಸೇಸಮೇತ್ಥ ಉತ್ತಾನಮೇವ।
131.Saddho bhikkhūti saddhāya samannāgato bhikkhu. Yo bhikkhu sāriputtamoggallānehi sadisabhāvaṃ pattheti, so yehi guṇehi sāriputtamoggallānā etadagge ṭhapitā, te guṇe attano abhikaṅkheyyāti āha ‘‘yādiso sāriputtatthero paññāyā’’tiādi. Ito uttari patthento micchā pattheyyāti sāriputtamoggallānānaṃ ye paññādayo guṇā upalabbhanti, tato uttari patthento micchā pattheyya. Aggasāvakaguṇaparamā hi sāvakaguṇamariyādā. Tesaṃ sāvakaguṇānaṃ yadidaṃ aggasāvakaguṇā, na tato paraṃ sāvakaguṇā nāma atthi. Tenevāha ‘‘yaṃ natthi, tassa patthitattā’’ti. Sesamettha uttānameva.
೧೩೫. ಪಞ್ಚಮೇ ಯಸ್ಸ ಗುಣಾ ಖತಾ ಉಪಹತಾ ಚ, ಸೋ ಖತೋ ಉಪಹತೋ ನಾಮ ಹೋತೀತಿ ಆಹ ‘‘ಗುಣಾನಂ ಖತತ್ತಾ’’ತಿಆದಿ। ಖತತ್ತಾತಿ ಛಿನ್ನತ್ತಾ। ಉಪಹತತ್ತಾತಿ ನಟ್ಠತ್ತಾ। ತೇನಾಹ ‘‘ಛಿನ್ನಗುಣಂ ನಟ್ಠಗುಣನ್ತಿ ಅತ್ಥೋ’’ತಿ। ಅಪುಞ್ಞಸ್ಸ ಪಸವೋ ನಾಮ ಅತ್ಥತೋ ಪಟಿಲಾಭೋತಿ ಆಹ ‘‘ಪಸವತೀತಿ ಪಟಿಲಭತೀ’’ತಿ, ಅತ್ತನೋ ಸನ್ತಾನೇ ಉಪ್ಪಾದೇತೀತಿ ಅತ್ಥೋ। ಅನನುಪವಿಸಿತ್ವಾತಿ ಞಾಣೇನ ಅನೋಗಾಹೇತ್ವಾ। ಸೇಸಮೇತ್ಥ ಛಟ್ಠಾದೀನಿ ಚ ಸುವಿಞ್ಞೇಯ್ಯಾನೇವ।
135. Pañcame yassa guṇā khatā upahatā ca, so khato upahato nāma hotīti āha ‘‘guṇānaṃ khatattā’’tiādi. Khatattāti chinnattā. Upahatattāti naṭṭhattā. Tenāha ‘‘chinnaguṇaṃ naṭṭhaguṇantiattho’’ti. Apuññassa pasavo nāma atthato paṭilābhoti āha ‘‘pasavatīti paṭilabhatī’’ti, attano santāne uppādetīti attho. Ananupavisitvāti ñāṇena anogāhetvā. Sesamettha chaṭṭhādīni ca suviññeyyāneva.
ಆಯಾಚನವಗ್ಗವಣ್ಣನಾ ನಿಟ್ಠಿತಾ।
Āyācanavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೧೨) ೨. ಆಯಾಚನವಗ್ಗೋ • (12) 2. Āyācanavaggo
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / (೧೨) ೨. ಆಯಾಚನವಗ್ಗವಣ್ಣನಾ • (12) 2. Āyācanavaggavaṇṇanā
