| Library / Tipiṭaka / තිපිටක • Tipiṭaka / අපදානපාළි • Apadānapāḷi |
8. ආයාගදායකත්‌ථෙරඅපදානං
8. Āyāgadāyakattheraapadānaṃ
94.
94.
‘‘නිබ්‌බුතෙ ලොකනාථම්‌හි, සිඛිම්‌හි වදතං වරෙ;
‘‘Nibbute lokanāthamhi, sikhimhi vadataṃ vare;
හට්‌ඨො හට්‌ඨෙන චිත්‌තෙන, අවන්‌දිං ථූපමුත්‌තමං.
Haṭṭho haṭṭhena cittena, avandiṃ thūpamuttamaṃ.
95.
95.
‘‘වඩ්‌ඪකීහි කථාපෙත්‌වා, මූලං දත්‌වානහං තදා;
‘‘Vaḍḍhakīhi kathāpetvā, mūlaṃ datvānahaṃ tadā;
හට්‌ඨො හට්‌ඨෙන චිත්‌තෙන, ආයාගං කාරපෙසහං.
Haṭṭho haṭṭhena cittena, āyāgaṃ kārapesahaṃ.
96.
96.
අවසෙසෙසු කප්‌පෙසු, වොකිණ්‌ණං සංසරිං අහං.
Avasesesu kappesu, vokiṇṇaṃ saṃsariṃ ahaṃ.
97.
97.
‘‘කායෙ විසං න කමති, සත්‌ථානි න ච හන්‌ති මෙ;
‘‘Kāye visaṃ na kamati, satthāni na ca hanti me;
උදකෙහං න මිය්‍යාමි, ආයාගස්‌ස ඉදං ඵලං.
Udakehaṃ na miyyāmi, āyāgassa idaṃ phalaṃ.
98.
98.
‘‘යදිච්‌ඡාමි අහං වස්‌සං, මහාමෙඝො පවස්‌සති;
‘‘Yadicchāmi ahaṃ vassaṃ, mahāmegho pavassati;
දෙවාපි මෙ වසං එන්‌ති, පුඤ්‌ඤකම්‌මස්‌සිදං ඵලං.
Devāpi me vasaṃ enti, puññakammassidaṃ phalaṃ.
99.
99.
‘‘සත්‌තරතනසම්‌පන්‌නො, තිසක්‌ඛත්‌තුං අහොසහං;
‘‘Sattaratanasampanno, tisakkhattuṃ ahosahaṃ;
න මං කෙචාවජානන්‌ති, පුඤ්‌ඤකම්‌මස්‌සිදං ඵලං.
Na maṃ kecāvajānanti, puññakammassidaṃ phalaṃ.
100.
100.
‘‘එකත්‌තිංසෙ ඉතො කප්‌පෙ, ආයාගං යමකාරයිං;
‘‘Ekattiṃse ito kappe, āyāgaṃ yamakārayiṃ;
දුග්‌ගතිං නාභිජානාමි, ආයාගස්‌ස ඉදං ඵලං.
Duggatiṃ nābhijānāmi, āyāgassa idaṃ phalaṃ.
101.
101.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා ආයාගදායකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā āyāgadāyako thero imā gāthāyo abhāsitthāti.
ආයාගදායකත්‌ථෙරස්‌සාපදානං අට්‌ඨමං.
Āyāgadāyakattherassāpadānaṃ aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 8. ආයාගදායකත්‌ථෙරඅපදානවණ්‌ණනා • 8. Āyāgadāyakattheraapadānavaṇṇanā
