| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. ஆயாக³தா³யகத்தே²ரஅபதா³னவண்ணனா
8. Āyāgadāyakattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ ஆயாக³தா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ பரினிப்³பு³தகாலே ஏகஸ்மிங் குலகே³ஹே நிப்³ப³த்தோ ஸாஸனே பஸன்னோ வட்³ட⁴கீனங் மூலங் த³த்வா அதிமனோஹரங் தீ³க⁴ங் போ⁴ஜனஸாலங் காராபெத்வா பி⁴க்கு²ஸங்க⁴ங் நிமந்தெத்வா பணீதேனாஹாரேன போ⁴ஜெத்வா மஹாதா³னங் த³த்வா சித்தங் பஸாதே³ஸி. ஸோ யாவதாயுகங் புஞ்ஞானி கத்வா தே³வமனுஸ்ஸேஸுயேவ ஸங்ஸரந்தோ உப⁴யஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ படிலத்³த⁴ஸத்³தோ⁴ பப்³ப³ஜித்வா க⁴டெந்தோ வாயமந்தோ விபஸ்ஸனங் வட்³டெ⁴த்வா ந சிரஸ்ஸேவ அரஹத்தங் பாபுணி. புப்³பே³ கதபுஞ்ஞவஸேன ஆயாக³த்தே²ரோதி பாகடோ.
Nibbutelokanāthamhītiādikaṃ āyasmato āyāgadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato parinibbutakāle ekasmiṃ kulagehe nibbatto sāsane pasanno vaḍḍhakīnaṃ mūlaṃ datvā atimanoharaṃ dīghaṃ bhojanasālaṃ kārāpetvā bhikkhusaṅghaṃ nimantetvā paṇītenāhārena bhojetvā mahādānaṃ datvā cittaṃ pasādesi. So yāvatāyukaṃ puññāni katvā devamanussesuyeva saṃsaranto ubhayasampattiṃ anubhavitvā imasmiṃ buddhuppāde kulagehe nibbatto paṭiladdhasaddho pabbajitvā ghaṭento vāyamanto vipassanaṃ vaḍḍhetvā na cirasseva arahattaṃ pāpuṇi. Pubbe katapuññavasena āyāgattheroti pākaṭo.
94. ஏவங் ஸோ கதபுஞ்ஞஸம்பா⁴ரவஸேன அரஹத்தங் பத்வா அத்தனா புப்³பே³ கதகுஸலகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தத்த² நிப்³பு³தேதி வத³தங் ‘‘மயங் பு³த்³தா⁴’’தி வத³ந்தானங் அந்தரே வரே உத்தமே ஸிகி²ம்ஹி ப⁴க³வதி பரினிப்³பு³தேதி அத்தோ². ஹட்டோ² ஹட்டே²ன சித்தேனாதி ஸத்³த⁴தாய ஹட்ட²பஹட்டோ² ஸோமனஸ்ஸயுத்தசித்ததாய பஹட்டே²ன சித்தேன உத்தமங் தூ²பங் ஸெட்ட²ங் சேதியங் அவந்தி³ங் பணாமயிந்தி அத்தோ².
94. Evaṃ so katapuññasambhāravasena arahattaṃ patvā attanā pubbe katakusalakammaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Tattha nibbuteti vadataṃ ‘‘mayaṃ buddhā’’ti vadantānaṃ antare vare uttame sikhimhi bhagavati parinibbuteti attho. Haṭṭho haṭṭhena cittenāti saddhatāya haṭṭhapahaṭṭho somanassayuttacittatāya pahaṭṭhena cittena uttamaṃ thūpaṃ seṭṭhaṃ cetiyaṃ avandiṃ paṇāmayinti attho.
95. வட்³ட⁴கீஹி கதா²பெத்வாதி ‘‘போ⁴ஜனஸாலாய பமாணங் கித்தக’’ந்தி பமாணங் கதா²பெத்வாதி அத்தோ². மூலங் த³த்வானஹங் ததா³தி ததா³ தஸ்மிங் காலே அஹங் கம்மகரணத்தா²ய தேஸங் வட்³ட⁴கீனங் மூலங் த³த்வா ஆயாக³ங் ஆயதங் தீ³க⁴ங் போ⁴ஜனஸாலங் அஹங் ஸந்துட்டோ² ஸோமனஸ்ஸசித்தேன காரபேஸஹங் காராபேஸிங் அஹந்தி அத்தோ². ஸேஸங் ஸுவிஞ்ஞெய்யமேவாதி.
95.Vaḍḍhakīhi kathāpetvāti ‘‘bhojanasālāya pamāṇaṃ kittaka’’nti pamāṇaṃ kathāpetvāti attho. Mūlaṃ datvānahaṃ tadāti tadā tasmiṃ kāle ahaṃ kammakaraṇatthāya tesaṃ vaḍḍhakīnaṃ mūlaṃ datvā āyāgaṃ āyataṃ dīghaṃ bhojanasālaṃ ahaṃ santuṭṭho somanassacittena kārapesahaṃ kārāpesiṃ ahanti attho. Sesaṃ suviññeyyamevāti.
97. ஆயாக³ஸ்ஸ இத³ங் ப²லந்தி போ⁴ஜனஸாலதா³னஸ்ஸ இத³ங் விபாகந்தி அத்தோ².
97.Āyāgassa idaṃ phalanti bhojanasāladānassa idaṃ vipākanti attho.
ஆயாக³தா³யகத்தே²ரஅபதா³னவண்ணனா ஸமத்தா.
Āyāgadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. ஆயாக³தா³யகத்தே²ரஅபதா³னங் • 8. Āyāgadāyakattheraapadānaṃ
