| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
3. ааяад̇анаяамагам̣
3. Āyatanayamakaṃ
1. бан̣н̣ад̇д̇иуд̣̇д̣̇зсаваараван̣н̣анаа
1. Paṇṇattiuddesavāravaṇṇanā
1-9. ид̣̇аани муулаяамагз д̣̇зсид̇зязва гусалаад̣̇ид̇хаммз ааяад̇анавасзнааби сан̇г̇ан̣хид̇ваа канд̇хаяамагаананд̇арам̣ д̣̇зсид̇асса ааяад̇анаяамагасса ван̣н̣анаа ход̇и. д̇ад̇т̇а канд̇хаяамагз вуд̇д̇анаязнзва баал̣ивавад̇т̇аанам̣ взд̣̇ид̇аб̣б̣ам̣. яат̇зва хи д̇ад̇т̇а бан̣н̣ад̇д̇ивааро, бавад̇д̇ивааро, барин̃н̃ааваарод̇и д̇аяо махааваараа хонд̇и, д̇ат̇аа ид̇хааби. важанад̇т̇оби нзсам̣ д̇ад̇т̇а вуд̇д̇анаязнзва взд̣̇ид̇аб̣б̣о. ид̇хааби жа бан̣н̣ад̇д̇ивааро уд̣̇д̣̇зсанид̣̇д̣̇зсавасзна д̣̇вид̇хаа вавад̇т̇ид̇о. ид̇арз нид̣̇д̣̇зсавасзнзва. ‘д̇ад̇т̇а д̣̇ваад̣̇асааяад̇анааний’д̇и бад̣̇ам̣ аад̣̇им̣ гад̇ваа яаава нааяад̇анаа на манод̇и, д̇аава бан̣н̣ад̇д̇иваарасса уд̣̇д̣̇зсавааро взд̣̇ид̇аб̣б̣о. д̇ад̇т̇а д̣̇ваад̣̇асааяад̇анаанийд̇и аяам̣ яамагавасзна бужчид̇аб̣б̣аанам̣ ааяад̇анаанам̣ уд̣̇д̣̇зсо. жагкааяад̇анам̣…бз… д̇хаммааяад̇ананд̇и д̇зсан̃н̃зва бабхзд̣̇ад̇о наамававад̇т̇аанам̣. яамагавасзна бужчаасукад̇т̇ан̃жзд̇т̇а батамам̣ бадибаадияаа аж̇жхад̇д̇аруубааяад̇анаани вуд̇д̇аани. бажчаа б̣аахираруубааяад̇анаани. барияосаанз манааяад̇анад̇хаммааяад̇анаани.
1-9. Idāni mūlayamake desiteyeva kusalādidhamme āyatanavasenāpi saṅgaṇhitvā khandhayamakānantaraṃ desitassa āyatanayamakassa vaṇṇanā hoti. Tattha khandhayamake vuttanayeneva pāḷivavatthānaṃ veditabbaṃ. Yatheva hi tattha paṇṇattivāro, pavattivāro, pariññāvāroti tayo mahāvārā honti, tathā idhāpi. Vacanatthopi nesaṃ tattha vuttanayeneva veditabbo. Idhāpi ca paṇṇattivāro uddesaniddesavasena dvidhā vavatthito. Itare niddesavaseneva. ‘Tattha dvādasāyatanānī’ti padaṃ ādiṃ katvā yāva nāyatanā na manoti, tāva paṇṇattivārassa uddesavāro veditabbo. Tattha dvādasāyatanānīti ayaṃ yamakavasena pucchitabbānaṃ āyatanānaṃ uddeso. Cakkhāyatanaṃ…pe… dhammāyatananti tesaññeva pabhedato nāmavavatthānaṃ. Yamakavasena pucchāsukhatthañcettha paṭhamaṃ paṭipāṭiyā ajjhattarūpāyatanāni vuttāni. Pacchā bāhirarūpāyatanāni. Pariyosāne manāyatanadhammāyatanāni.
яат̇аа бана хздтаа канд̇хавасзна, звамид̇ха имзсам̣ ааяад̇анаанам̣ васзна бад̣̇асод̇ханавааро, бад̣̇асод̇ханамуулажаггавааро, суд̣̇д̇хааяад̇анавааро, суд̣̇д̇хааяад̇анамуулажаггаваарод̇и, жад̇д̇аарова наяаваараа хонд̇и. згзго жзд̇т̇а ануломабадиломавасзна д̣̇увид̇хоязва. д̇зсамад̇т̇о д̇ад̇т̇а вуд̇д̇анаязнзва взд̣̇ид̇аб̣б̣о. яат̇аа бана канд̇хаяамагз бад̣̇асод̇ханаваарасса ануломаваарз ‘руубам̣ руубагканд̇хо, руубагканд̇хо рууба’нд̇иаад̣̇ийни бан̃жа яамагаани, д̇ат̇аа ид̇ха ‘жагку, жагкааяад̇анам̣; жагкааяад̇анам̣; жагкуу’д̇иаад̣̇ийни д̣̇ваад̣̇аса. бадиломаваарзби ‘на жагку, на жагкааяад̇анам̣; на жагкааяад̇анам̣, на жагкуу’д̇иаад̣̇ийни д̣̇ваад̣̇аса , бад̣̇асод̇ханамуулажаггаваарасса банзд̇т̇а ануломаваарз згзгааяад̇анамуулагаани згаад̣̇аса згаад̣̇аса гад̇ваа д̣̇вад̇д̇им̣сасад̇ам̣ яамагаани. бадиломаваарзби д̣̇вад̇д̇им̣сасад̇амзва. суд̣̇д̇хааяад̇анаваарассааби ануломаваарз д̣̇ваад̣̇аса, бадиломаваарз д̣̇ваад̣̇аса, суд̣̇д̇хааяад̇анамуулажаггаваарассааби ануломаваарз згзгааяад̇анамуулагаани згаад̣̇аса згаад̣̇аса гад̇ваа д̣̇вад̇д̇им̣сасад̇ам̣ яамагаани. бадиломаваарзби д̣̇вад̇д̇им̣сасад̇амзваад̇и звамид̇ха часад̇д̇ад̇аад̇хигзхи бан̃жахи яамагасад̇зхи, д̣̇вибан̃н̃аасаад̇хигзхи згаад̣̇асахи бужчаасад̇зхи, жад̇ураад̇хигзхи д̇звийсааяа ад̇т̇асад̇зхи жа бадиман̣д̣ид̇о бан̣н̣ад̇д̇иваарасса уд̣̇д̣̇зсавааро взд̣̇ид̇аб̣б̣о.
Yathā pana heṭṭhā khandhavasena, evamidha imesaṃ āyatanānaṃ vasena padasodhanavāro, padasodhanamūlacakkavāro, suddhāyatanavāro, suddhāyatanamūlacakkavāroti, cattārova nayavārā honti. Ekeko cettha anulomapaṭilomavasena duvidhoyeva. Tesamattho tattha vuttanayeneva veditabbo. Yathā pana khandhayamake padasodhanavārassa anulomavāre ‘rūpaṃ rūpakkhandho, rūpakkhandho rūpa’ntiādīni pañca yamakāni, tathā idha ‘cakkhu, cakkhāyatanaṃ; cakkhāyatanaṃ; cakkhū’tiādīni dvādasa. Paṭilomavārepi ‘na cakkhu, na cakkhāyatanaṃ; na cakkhāyatanaṃ, na cakkhū’tiādīni dvādasa , padasodhanamūlacakkavārassa panettha anulomavāre ekekāyatanamūlakāni ekādasa ekādasa katvā dvattiṃsasataṃ yamakāni. Paṭilomavārepi dvattiṃsasatameva. Suddhāyatanavārassāpi anulomavāre dvādasa, paṭilomavāre dvādasa, suddhāyatanamūlacakkavārassāpi anulomavāre ekekāyatanamūlakāni ekādasa ekādasa katvā dvattiṃsasataṃ yamakāni. Paṭilomavārepi dvattiṃsasatamevāti evamidha chasattatādhikehi pañcahi yamakasatehi, dvipaññāsādhikehi ekādasahi pucchāsatehi, caturādhikehi tevīsāya atthasatehi ca paṭimaṇḍito paṇṇattivārassa uddesavāro veditabbo.
бан̣н̣ад̇д̇иуд̣̇д̣̇зсаваараван̣н̣анаа.
Paṇṇattiuddesavāravaṇṇanā.
1. бан̣н̣ад̇д̇инид̣̇д̣̇зсаваараван̣н̣анаа
1. Paṇṇattiniddesavāravaṇṇanā
10-17. нид̣̇д̣̇зсаваарз бана хздтаа канд̇хаяамагасса бан̣н̣ад̇д̇ивааранид̣̇д̣̇зсз вуд̇д̇анаязнзва ад̇т̇о взд̣̇ид̇аб̣б̣о. ан̃н̃ад̇ра висзсаа. д̇ад̇рааяам̣ висзсо – д̣̇иб̣б̣ажагкууд̇и д̣̇уд̇ияавиж̇ж̇аан̃аан̣ам̣. бан̃н̃аажагкууд̇и д̇ад̇ияавиж̇ж̇аан̃аан̣ам̣. д̣̇иб̣б̣асод̇анд̇и д̣̇уд̇ияаабхин̃н̃аан̃аан̣ам̣. д̇ан̣хаасод̇анд̇и д̇ан̣хаава. авасзсо гааяод̇и наамагааяо, руубагааяо, хад̇т̇игааяо, ассагааяод̇и звамаад̣̇и. авасзсам̣ руубанд̇и руубааяад̇анад̇о сзсам̣ бхууд̇убаад̣̇ааяаруубан̃жзва бияаруубасаад̇аруубан̃жа. сийлаг̇анд̇ход̇иаад̣̇ийни вааяанадтзна сийлаад̣̇ийнам̣язва наамаани. ад̇т̇арасод̇иаад̣̇ийниби саад̇хумад̇хурадтзна ад̇т̇аад̣̇ийнан̃н̃зва наамаани. авасзсо д̇хаммод̇и барияад̇д̇ид̇хаммаад̣̇ианзгаббабхзд̣̇од̇и аяамзд̇т̇а висзсо.
10-17. Niddesavāre pana heṭṭhā khandhayamakassa paṇṇattivāraniddese vuttanayeneva attho veditabbo. Aññatra visesā. Tatrāyaṃ viseso – dibbacakkhūti dutiyavijjāñāṇaṃ. Paññācakkhūti tatiyavijjāñāṇaṃ. Dibbasotanti dutiyaabhiññāñāṇaṃ. Taṇhāsotanti taṇhāva. Avaseso kāyoti nāmakāyo, rūpakāyo, hatthikāyo, assakāyoti evamādi. Avasesaṃ rūpanti rūpāyatanato sesaṃ bhūtupādāyarūpañceva piyarūpasātarūpañca. Sīlagandhotiādīni vāyanaṭṭhena sīlādīnaṃyeva nāmāni. Attharasotiādīnipi sādhumadhuraṭṭhena atthādīnaññeva nāmāni. Avaseso dhammoti pariyattidhammādianekappabhedoti ayamettha viseso.
бан̣н̣ад̇д̇инид̣̇д̣̇зсаваараван̣н̣анаа.
Paṇṇattiniddesavāravaṇṇanā.
2. бавад̇д̇иваараван̣н̣анаа
2. Pavattivāravaṇṇanā
18-21. ид̇хааби жа бавад̇д̇иваарасса уббаад̣̇аваараад̣̇ийсу д̇ийсу анд̇араваарзсу згзгасмим̣ чал̣зва гаалабхзд̣̇аа. д̇зсам̣ згзгасмим̣ гаалз буг̇г̇алаваараад̣̇аяо д̇аяо ваараа. д̇з саб̣б̣зби ануломабадиломанаяавасзна д̣̇увид̇хаава хонд̇и. д̇ад̇т̇а бажжуббаннагаалз буг̇г̇алаваарасса ануломанаяз яат̇аа канд̇хаяамагз руубагканд̇хамуулагаани жад̇д̇аари, взд̣̇анаагканд̇хамуулагаани д̇ийн̣и, сан̃н̃аагканд̇хамуулагаани д̣̇вз, сан̇каарагканд̇хамуулагам̣ зганд̇и аг̇г̇ахид̇аг̇г̇ахан̣зна д̣̇аса яамагаани хонд̇и. звам̣ ‘‘яасса жагкааяад̇анам̣ уббаж̇ж̇ад̇и, д̇асса сод̇ааяад̇анам̣ уббаж̇ж̇ад̇и; яасса ваа бана сод̇ааяад̇анам̣ уббаж̇ж̇ад̇и, д̇асса жагкааяад̇анам̣ уббаж̇ж̇ад̇и; яасса жагкааяад̇анам̣ уббаж̇ж̇ад̇и, д̇асса гхаан̣ааяад̇анам̣, ж̇ивхааяад̇анам̣, гааяааяад̇анам̣, руубааяад̇анам̣, сад̣̇д̣̇ааяад̇анам̣, г̇анд̇хааяад̇анам̣, расааяад̇анам̣, подтаб̣б̣ааяад̇анам̣, манааяад̇анам̣, д̇хаммааяад̇анам̣, уббаж̇ж̇ад̇и; яасса ваа бана д̇хаммааяад̇анам̣ уббаж̇ж̇ад̇и, д̇асса жагкааяад̇анам̣ уббаж̇ж̇ад̇ий’’д̇и звам̣ жагкааяад̇анамуулагаани згаад̣̇аса. ‘‘яасса сод̇ааяад̇анам̣ уббаж̇ж̇ад̇и, д̇асса гхаанааяад̇анам̣ уббаж̇ж̇ад̇ий’’д̇иаад̣̇инаа наязна сод̇ааяад̇анамуулагаани д̣̇аса; гхаанааяад̇анамуулагаани нава, ж̇ивхааяад̇анамуулагаани адта; гааяааяад̇анамуулагаани сад̇д̇а; руубааяад̇анамуулагаани ча; сад̣̇д̣̇ааяад̇анамуулагаани бан̃жа; г̇анд̇хааяад̇анамуулагаани жад̇д̇аари; расааяад̇анамуулагаани д̇ийн̣и; подтаб̣б̣ааяад̇анамуулагаани д̣̇вз; манааяад̇анамуулагам̣ зганд̇и аг̇г̇ахид̇аг̇г̇ахан̣зна часадти яамагаани хонд̇и.
18-21. Idhāpi ca pavattivārassa uppādavārādīsu tīsu antaravāresu ekekasmiṃ chaḷeva kālabhedā. Tesaṃ ekekasmiṃ kāle puggalavārādayo tayo vārā. Te sabbepi anulomapaṭilomanayavasena duvidhāva honti. Tattha paccuppannakāle puggalavārassa anulomanaye yathā khandhayamake rūpakkhandhamūlakāni cattāri, vedanākkhandhamūlakāni tīṇi, saññākkhandhamūlakāni dve, saṅkhārakkhandhamūlakaṃ ekanti aggahitaggahaṇena dasa yamakāni honti. Evaṃ ‘‘yassa cakkhāyatanaṃ uppajjati, tassa sotāyatanaṃ uppajjati; yassa vā pana sotāyatanaṃ uppajjati, tassa cakkhāyatanaṃ uppajjati; yassa cakkhāyatanaṃ uppajjati, tassa ghāṇāyatanaṃ, jivhāyatanaṃ, kāyāyatanaṃ, rūpāyatanaṃ, saddāyatanaṃ, gandhāyatanaṃ, rasāyatanaṃ, phoṭṭhabbāyatanaṃ, manāyatanaṃ, dhammāyatanaṃ, uppajjati; yassa vā pana dhammāyatanaṃ uppajjati, tassa cakkhāyatanaṃ uppajjatī’’ti evaṃ cakkhāyatanamūlakāni ekādasa. ‘‘Yassa sotāyatanaṃ uppajjati, tassa ghānāyatanaṃ uppajjatī’’tiādinā nayena sotāyatanamūlakāni dasa; ghānāyatanamūlakāni nava, jivhāyatanamūlakāni aṭṭha; kāyāyatanamūlakāni satta; rūpāyatanamūlakāni cha; saddāyatanamūlakāni pañca; gandhāyatanamūlakāni cattāri; rasāyatanamūlakāni tīṇi; phoṭṭhabbāyatanamūlakāni dve; manāyatanamūlakaṃ ekanti aggahitaggahaṇena chasaṭṭhi yamakāni honti.
д̇ад̇т̇а жагкааяад̇анамуулагзсу згаад̣̇асасу ‘‘яасса жагкааяад̇анам̣ уббаж̇ж̇ад̇и, д̇асса сод̇ааяад̇анам̣, гхаанааяад̇анам̣, руубааяад̇анам̣, манааяад̇анам̣, д̇хаммааяад̇анам̣ уббаж̇ж̇ад̇ий’’д̇и имаани бан̃жзва виссаж̇ж̇ид̇аани. д̇зсу батамам̣ виссаж̇ж̇зд̇аб̣б̣ам̣ д̇аава виссаж̇ж̇ид̇ам̣. д̣̇уд̇ияам̣ гин̃жааби батамзна сад̣̇исависсаж̇ж̇анам̣, жагкусод̇ааяад̇анаанам̣ бавад̇д̇идтаанз бана гхаанааяад̇анасса на зганд̇зна бавад̇д̇ид̇о ‘‘гат̇ам̣ ну ко зд̇ам̣ виссаж̇ж̇зд̇аб̣б̣а’’нд̇и вимад̇инивааран̣ад̇т̇ам̣ виссаж̇ж̇ид̇ам̣. руубааяад̇анаманааяад̇анад̇хаммааяад̇анзхи сад̣̇д̇хим̣ д̇ийн̣и яамагаани асад̣̇исависсаж̇ж̇анад̇д̇аа виссаж̇ж̇ид̇аани. сзсзсу ж̇ивхааяад̇анагааяааяад̇анзхи д̇аава сад̣̇д̇хим̣ д̣̇вз яамагаани буримзхи д̣̇вийхи сад̣̇д̇хим̣ сад̣̇исависсаж̇ж̇анаани. сад̣̇д̣̇ааяад̇анасса бадисанд̇хигкан̣з ануббад̇д̇ид̇о д̇зна сад̣̇д̇хим̣ яамагасса виссаж̇ж̇анамзва над̇т̇и. г̇анд̇харасаподтаб̣б̣ааяад̇анзхиби сад̣̇д̇хим̣ д̇ийн̣и яамагаани буримзхи д̣̇вийхи сад̣̇исависсаж̇ж̇анаанзва хонд̇ийд̇и д̇анд̇ияаа лахубхаавад̇т̇ам̣ сан̇кид̇д̇аани. сод̇ааяад̇анамуулагзсу яам̣ лаб̣бхад̇и , д̇ам̣ буримзхи сад̣̇исависсаж̇ж̇анамзваад̇и згамби баал̣им̣ наарул̣хам̣. гхаанааяад̇анамуулагзсу руубааяад̇анзна сад̣̇д̇хим̣ згам̣, манааяад̇анад̇хаммааяад̇анзхи сад̣̇д̇хим̣ д̣̇взд̇и д̇ийн̣и яамагаани баал̣им̣ аарул̣хаани. сзсаани гхаанааяад̇анаяамагзна сад̣̇исависсаж̇ж̇анад̇д̇аа наарул̣хаани. д̇ат̇аа ж̇ивхааяад̇анагааяааяад̇анамуулагаани. руубааяад̇анамуулагзсу манааяад̇анад̇хаммааяад̇анзхи сад̣̇д̇хим̣ д̣̇взязва виссаж̇ж̇ид̇аани. г̇анд̇харасаподтаб̣б̣зхи бана сад̣̇д̇хим̣ д̇ийн̣и руубааяад̇анаманааяад̇анзхи сад̣̇д̇хим̣ сад̣̇исависсаж̇ж̇анаани. яат̇зва хзд̇т̇а ‘‘саруубагаанам̣ ажид̇д̇агаана’’нд̇иаад̣̇и вуд̇д̇ам̣, д̇ат̇аа ид̇хааби ‘‘саруубагаанам̣ аг̇анд̇хагаанам̣, арасагаанам̣ аподтаб̣б̣агаана’’нд̇и яож̇анаа взд̣̇ид̇аб̣б̣аа. г̇анд̇хаад̣̇ийни жзд̇т̇а ааяад̇анабхууд̇аанзва ад̇хиббзд̇аани. д̇асмаа ‘‘саруубагаанам̣ саг̇анд̇хааяад̇анаана’’нд̇и ааяад̇анавасзнзд̇т̇а ад̇т̇о д̣̇адтаб̣б̣о.
Tattha cakkhāyatanamūlakesu ekādasasu ‘‘yassa cakkhāyatanaṃ uppajjati, tassa sotāyatanaṃ, ghānāyatanaṃ, rūpāyatanaṃ, manāyatanaṃ, dhammāyatanaṃ uppajjatī’’ti imāni pañceva vissajjitāni. Tesu paṭhamaṃ vissajjetabbaṃ tāva vissajjitaṃ. Dutiyaṃ kiñcāpi paṭhamena sadisavissajjanaṃ, cakkhusotāyatanānaṃ pavattiṭṭhāne pana ghānāyatanassa na ekantena pavattito ‘‘kathaṃ nu kho etaṃ vissajjetabba’’nti vimatinivāraṇatthaṃ vissajjitaṃ. Rūpāyatanamanāyatanadhammāyatanehi saddhiṃ tīṇi yamakāni asadisavissajjanattā vissajjitāni. Sesesu jivhāyatanakāyāyatanehi tāva saddhiṃ dve yamakāni purimehi dvīhi saddhiṃ sadisavissajjanāni. Saddāyatanassa paṭisandhikkhaṇe anuppattito tena saddhiṃ yamakassa vissajjanameva natthi. Gandharasaphoṭṭhabbāyatanehipi saddhiṃ tīṇi yamakāni purimehi dvīhi sadisavissajjanāneva hontīti tantiyā lahubhāvatthaṃ saṅkhittāni. Sotāyatanamūlakesu yaṃ labbhati , taṃ purimehi sadisavissajjanamevāti ekampi pāḷiṃ nāruḷhaṃ. Ghānāyatanamūlakesu rūpāyatanena saddhiṃ ekaṃ, manāyatanadhammāyatanehi saddhiṃ dveti tīṇi yamakāni pāḷiṃ āruḷhāni. Sesāni ghānāyatanayamakena sadisavissajjanattā nāruḷhāni. Tathā jivhāyatanakāyāyatanamūlakāni. Rūpāyatanamūlakesu manāyatanadhammāyatanehi saddhiṃ dveyeva vissajjitāni. Gandharasaphoṭṭhabbehi pana saddhiṃ tīṇi rūpāyatanamanāyatanehi saddhiṃ sadisavissajjanāni. Yatheva hettha ‘‘sarūpakānaṃ acittakāna’’ntiādi vuttaṃ, tathā idhāpi ‘‘sarūpakānaṃ agandhakānaṃ, arasakānaṃ aphoṭṭhabbakāna’’nti yojanā veditabbā. Gandhādīni cettha āyatanabhūtāneva adhippetāni. Tasmā ‘‘sarūpakānaṃ sagandhāyatanāna’’nti āyatanavasenettha attho daṭṭhabbo.
сад̣̇д̣̇ааяад̇анамуулагаани ад̇т̇аабхаавад̇о баал̣им̣ наарул̣хаанзва. г̇анд̇харасаподтаб̣б̣амуулагаани жад̇д̇аари д̇ийн̣и д̣̇вз жа хздтимзхи сад̣̇исависсаж̇ж̇анад̇д̇аа баал̣им̣ наарул̣хаани. манааяад̇анамуулагам̣ виссаж̇ж̇ид̇амзваад̇и звамзд̇аани бажжуббаннагаалз буг̇г̇алаваарасса ануломанаяз гад̇ибаяаяамагависсаж̇ж̇анзнзва часадтияамагаани виссаж̇ж̇ид̇аани наама хонд̇ийд̇и взд̣̇ид̇аб̣б̣аани. яат̇аа жа буг̇г̇алаваарз, звам̣ огаасаваарзби буг̇г̇алогаасаваарзби часадтийд̇и бажжуббаннагаалз д̇ийсу ваарзсу ануломанаяз адтанавуд̇исад̇ам̣ яамагаани хонд̇и. яат̇аа жа ануломанаяз, звам̣ бадиломанаязбийд̇и саб̣б̣ааниби бажжуббаннагаалз чаннавуд̇аад̇хигаани д̇ийн̣и яамагасад̇аани хонд̇и. д̇зсу д̣̇ваанавуд̇аад̇хигаани сад̇д̇а бужчаасад̇аани, жад̇ураасийд̇аад̇хигаани жа баннараса ад̇т̇асад̇аани хонд̇ийд̇и взд̣̇ид̇аб̣б̣аани. звам̣ сзсзсуби бан̃жасу гаалабхзд̣̇зсууд̇и саб̣б̣ааниби часад̇д̇ад̇аад̇хигаани д̇звийсад̇и яамагасад̇аани. д̇ад̇о д̣̇иг̇ун̣аа бужчаа, д̇ад̇о д̣̇иг̇ун̣аа ад̇т̇аад̇и ид̣̇амзд̇т̇а уббаад̣̇аваарз баал̣ивавад̇т̇аанам̣. нирод̇хаваарауббаад̣̇анирод̇хаваарзсуби зсзва наяод̇и. саб̣б̣асмимби бавад̇д̇иваарз адтавийсаани згасад̇д̇ад̇и яамагасад̇аани. д̇ад̇о д̣̇иг̇ун̣аа бужчаа, д̇ад̇о д̣̇иг̇ун̣аа ад̇т̇аа взд̣̇ид̇аб̣б̣аа. баал̣и бана манааяад̇анам̣ д̇хаммааяад̇анан̃жа згасад̣̇исам̣, наанам̣ над̇т̇и. убари бана ‘‘ваарасан̇кзбо ход̇ий’’д̇иаад̣̇ийни вад̇ваа д̇ад̇т̇а д̇ад̇т̇а сан̇кид̇д̇аа. д̇асмаа яам̣ д̇ад̇т̇а д̇ад̇т̇а сан̇кид̇д̇ам̣, д̇ам̣ саб̣б̣ам̣ асаммуяханд̇зхи саллагкзд̇аб̣б̣ам̣.
Saddāyatanamūlakāni atthābhāvato pāḷiṃ nāruḷhāneva. Gandharasaphoṭṭhabbamūlakāni cattāri tīṇi dve ca heṭṭhimehi sadisavissajjanattā pāḷiṃ nāruḷhāni. Manāyatanamūlakaṃ vissajjitamevāti evametāni paccuppannakāle puggalavārassa anulomanaye katipayayamakavissajjaneneva chasaṭṭhiyamakāni vissajjitāni nāma hontīti veditabbāni. Yathā ca puggalavāre, evaṃ okāsavārepi puggalokāsavārepi chasaṭṭhīti paccuppannakāle tīsu vāresu anulomanaye aṭṭhanavutisataṃ yamakāni honti. Yathā ca anulomanaye, evaṃ paṭilomanayepīti sabbānipi paccuppannakāle channavutādhikāni tīṇi yamakasatāni honti. Tesu dvānavutādhikāni satta pucchāsatāni, caturāsītādhikāni ca pannarasa atthasatāni hontīti veditabbāni. Evaṃ sesesupi pañcasu kālabhedesūti sabbānipi chasattatādhikāni tevīsati yamakasatāni. Tato diguṇā pucchā, tato diguṇā atthāti idamettha uppādavāre pāḷivavatthānaṃ. Nirodhavārauppādanirodhavāresupi eseva nayoti. Sabbasmimpi pavattivāre aṭṭhavīsāni ekasattati yamakasatāni. Tato diguṇā pucchā, tato diguṇā atthā veditabbā. Pāḷi pana manāyatanaṃ dhammāyatanañca ekasadisaṃ, nānaṃ natthi. Upari pana ‘‘vārasaṅkhepo hotī’’tiādīni vatvā tattha tattha saṅkhittā. Tasmā yaṃ tattha tattha saṅkhittaṃ, taṃ sabbaṃ asammuyhantehi sallakkhetabbaṃ.
ад̇т̇авинижчаяз банзд̇т̇а ид̣̇ам̣ наяамукам̣. сажагкугаанам̣ асод̇агаананд̇и абааяз ж̇аад̇иб̣ад̇хираобабаад̇игам̣ санд̇хааяа вуд̇д̇ам̣. со хи сажагкуго асод̇аго худ̇ваа убабаж̇ж̇ад̇и. яат̇ааха – ‘‘гаамад̇хаад̇уяаа убабад̇д̇игкан̣з гассажи абараани д̣̇асааяад̇анаани баад̇убхаванд̇и. обабаад̇игаанам̣ бзд̇аанам̣ , обабаад̇игаанам̣ асураанам̣, обабаад̇игаанам̣ д̇иражчаанаг̇ад̇аанам̣, обабаад̇игаанам̣ нзраяигаанам̣; ж̇ажжаб̣ад̇хираанам̣ убабад̇д̇игкан̣з д̣̇асааяад̇анаани баад̇убхаванд̇и, жагкааяад̇анам̣ руубагхаанаг̇анд̇хаж̇ивхаарасагааяаподтаб̣б̣ааяад̇анам̣ манааяад̇анам̣ д̇хаммааяад̇ана’’нд̇и. сажагкугаанам̣ сасод̇агаананд̇и суг̇ад̇ид̣̇уг̇г̇ад̇ийсу барибун̣н̣ааяад̇анз жа обабаад̇игз руубийб̣рахмаано жа санд̇хааяа вуд̇д̇ам̣. д̇з хи сажагкугаа сасод̇агаа худ̇ваа убабаж̇ж̇анд̇и. яат̇ааха – ‘‘гаамад̇хаад̇уяаа убабад̇д̇игкан̣з гассажи згаад̣̇асааяад̇анаани баад̇убхаванд̇и; гаамааважараанам̣ д̣̇зваанам̣, батамагаббигаанам̣ мануссаанам̣, обабаад̇игаанам̣ бзд̇аанам̣, обабаад̇игаанам̣ асураанам̣, обабаад̇игаанам̣ д̇иражчаанаг̇ад̇аанам̣, обабаад̇игаанам̣ нзраяигаанам̣, барибун̣н̣ааяад̇анаанам̣. руубад̇хаад̇уяаа убабад̇д̇игкан̣з бан̃жааяад̇анаани баад̇убхаванд̇и, жагкааяад̇анам̣ руубасод̇аманааяад̇анам̣ д̇хаммааяад̇ана’’нд̇и.
Atthavinicchaye panettha idaṃ nayamukhaṃ. Sacakkhukānaṃ asotakānanti apāye jātibadhiraopapātikaṃ sandhāya vuttaṃ. So hi sacakkhuko asotako hutvā upapajjati. Yathāha – ‘‘kāmadhātuyā upapattikkhaṇe kassaci aparāni dasāyatanāni pātubhavanti. Opapātikānaṃ petānaṃ , opapātikānaṃ asurānaṃ, opapātikānaṃ tiracchānagatānaṃ, opapātikānaṃ nerayikānaṃ; jaccabadhirānaṃ upapattikkhaṇe dasāyatanāni pātubhavanti, cakkhāyatanaṃ rūpaghānagandhajivhārasakāyaphoṭṭhabbāyatanaṃ manāyatanaṃ dhammāyatana’’nti. Sacakkhukānaṃ sasotakānanti sugatiduggatīsu paripuṇṇāyatane ca opapātike rūpībrahmāno ca sandhāya vuttaṃ. Te hi sacakkhukā sasotakā hutvā upapajjanti. Yathāha – ‘‘kāmadhātuyā upapattikkhaṇe kassaci ekādasāyatanāni pātubhavanti; kāmāvacarānaṃ devānaṃ, paṭhamakappikānaṃ manussānaṃ, opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ, opapātikānaṃ nerayikānaṃ, paripuṇṇāyatanānaṃ. Rūpadhātuyā upapattikkhaṇe pañcāyatanāni pātubhavanti, cakkhāyatanaṃ rūpasotamanāyatanaṃ dhammāyatana’’nti.
агхаанагаананд̇и б̣рахмабаарисаж̇ж̇аад̣̇аяо санд̇хааяа вуд̇д̇ам̣. д̇з хи сажагкугаа агхаанагаа худ̇ваа убабаж̇ж̇анд̇и. гаамад̇хаад̇уяам̣ бана агхаанаго обабаад̇иго над̇т̇и. яад̣̇и бхавзяяа ‘‘гассажи адтааяад̇анаани баад̇убхаванд̇ий’’д̇и взд̣̇аяяа. яо г̇аб̣бхасзяяаго бана агхаанаго сияаа, со ‘‘сажагкугаана’’нд̇и важанад̇о ид̇ха анад̇хиббзд̇о. сажагкугаанам̣ сагхаанагаананд̇и ж̇ажжаб̣ад̇хирамби барибун̣н̣ааяад̇анамби обабаад̇игам̣ санд̇хааяа вуд̇д̇ам̣. сагхаанагаанам̣ ажагкугаананд̇и ж̇ажжанд̇хамби ж̇ажжаб̣ад̇хирамби обабаад̇игам̣ санд̇хааяа вуд̇д̇амзва. сагхаанагаанам̣ сажагкугаананд̇и барибун̣н̣ааяад̇анамзва обабаад̇игам̣ санд̇хааяа вуд̇д̇ам̣.
Aghānakānanti brahmapārisajjādayo sandhāya vuttaṃ. Te hi sacakkhukā aghānakā hutvā upapajjanti. Kāmadhātuyaṃ pana aghānako opapātiko natthi. Yadi bhaveyya ‘‘kassaci aṭṭhāyatanāni pātubhavantī’’ti vedayya. Yo gabbhaseyyako pana aghānako siyā, so ‘‘sacakkhukāna’’nti vacanato idha anadhippeto. Sacakkhukānaṃ saghānakānanti jaccabadhirampi paripuṇṇāyatanampi opapātikaṃ sandhāya vuttaṃ. Saghānakānaṃ acakkhukānanti jaccandhampi jaccabadhirampi opapātikaṃ sandhāya vuttameva. Saghānakānaṃ sacakkhukānanti paripuṇṇāyatanameva opapātikaṃ sandhāya vuttaṃ.
саруубагаанам̣ ажагкугаананд̇и зд̇т̇а ж̇ажжанд̇хаж̇ажжаб̣ад̇хираобабаад̇игзсу ан̃н̃ад̇ароби г̇аб̣бхасзяяагоби лаб̣бхад̇иязва. сажид̇д̇агаанам̣ ажагкугаананд̇и зд̇т̇а хздтаа вуд̇д̇зхи ж̇ажжанд̇хаад̣̇ийхи д̇ийхи сад̣̇д̇хим̣ аруубиноби лаб̣бханд̇и. ажагкугаананд̇и зд̇т̇а буримабад̣̇з вуд̇д̇зхи жад̇уухи сад̣̇д̇хим̣ асан̃н̃асад̇д̇ааби лаб̣бханд̇и. саруубагаанам̣ агхаанагаананд̇и зд̇т̇а г̇аб̣бхасзяяагаа жа асан̃н̃асад̇д̇аа жа сзсаруубийб̣рахмаано жа лаб̣бханд̇и. сажид̇д̇агаанам̣ агхаанагаананд̇и зд̇т̇а г̇аб̣бхасзяяагаа жа руубааруубаб̣рахмаано жа лаб̣бханд̇и. ажид̇д̇агаанам̣ аруубагаананд̇ибад̣̇зсу бана згавогааражад̇увогаарасад̇д̇аава лаб̣бханд̇ийд̇и иминаа наязна саб̣б̣зсу буг̇г̇алаваарзсу буг̇г̇алавибхааг̇о взд̣̇ид̇аб̣б̣о.
Sarūpakānaṃ acakkhukānanti ettha jaccandhajaccabadhiraopapātikesu aññataropi gabbhaseyyakopi labbhatiyeva. Sacittakānaṃ acakkhukānanti ettha heṭṭhā vuttehi jaccandhādīhi tīhi saddhiṃ arūpinopi labbhanti. Acakkhukānanti ettha purimapade vuttehi catūhi saddhiṃ asaññasattāpi labbhanti. Sarūpakānaṃ aghānakānanti ettha gabbhaseyyakā ca asaññasattā ca sesarūpībrahmāno ca labbhanti. Sacittakānaṃ aghānakānanti ettha gabbhaseyyakā ca rūpārūpabrahmāno ca labbhanti. Acittakānaṃ arūpakānantipadesu pana ekavokāracatuvokārasattāva labbhantīti iminā nayena sabbesu puggalavāresu puggalavibhāgo veditabbo.
22-254. огаасаваарз яад̇т̇а жагкааяад̇ананд̇и руубийб̣рахмалогам̣ бужчад̇и. д̇знзва ааманд̇аад̇и вуд̇д̇ам̣ . д̇асмин̃хи д̇алз нияамад̇о д̇аани ааяад̇анаани бадисанд̇хияам̣ уббаж̇ж̇анд̇и. ид̣̇амзд̇т̇а наяамукам̣. иминаа наяамукзна сагалзби бавад̇д̇иваарз ад̇т̇о взд̣̇ид̇аб̣б̣о. барин̃н̃аавааро канд̇хаяамагз вуд̇д̇анаяоязваад̇и.
22-254. Okāsavāre yattha cakkhāyatananti rūpībrahmalokaṃ pucchati. Teneva āmantāti vuttaṃ . Tasmiñhi tale niyamato tāni āyatanāni paṭisandhiyaṃ uppajjanti. Idamettha nayamukhaṃ. Iminā nayamukhena sakalepi pavattivāre attho veditabbo. Pariññāvāro khandhayamake vuttanayoyevāti.
бавад̇д̇иваараван̣н̣анаа.
Pavattivāravaṇṇanā.
ааяад̇анаяамагаван̣н̣анаа нидтид̇аа.
Āyatanayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 3. ааяад̇анаяамагам̣ • 3. Āyatanayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 3. ааяад̇анаяамагам̣ • 3. Āyatanayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 3. ааяад̇анаяамагам̣ • 3. Āyatanayamakaṃ
