| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
3. ааяад̇анаяамагам̣
3. Āyatanayamakaṃ
1. бан̣н̣ад̇д̇ивааро
1. Paṇṇattivāro
уд̣̇д̣̇зсаваараван̣н̣анаа
Uddesavāravaṇṇanā
1-9. вуд̇д̇анаязнаад̇и ‘‘аваяавабад̣̇зхи вуд̇д̇о згад̣̇зсо сагало ваа самуд̣̇ааяабад̣̇аанам̣ ад̇т̇о, самуд̣̇ааяабад̣̇зхи бана вуд̇д̇о зганд̇зна аваяавабад̣̇аанам̣ ад̇т̇о’’д̇иаад̣̇инаа вуд̇д̇зна наязна. зд̇зна яат̇аавуд̇д̇аад̇т̇аван̣н̣анаанаяад̣̇ассанад̇ааяа саб̣б̣абан̣н̣ад̇д̇иваараад̣̇ийсу яат̇аарахам̣ ад̇т̇о нзд̇аб̣б̣од̇и д̣̇ассзд̇и.
1-9. Vuttanayenāti ‘‘avayavapadehi vutto ekadeso sakalo vā samudāyapadānaṃ attho, samudāyapadehi pana vutto ekantena avayavapadānaṃ attho’’tiādinā vuttena nayena. Etena yathāvuttaatthavaṇṇanānayadassanatāya sabbapaṇṇattivārādīsu yathārahaṃ attho netabboti dasseti.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
10-17. вааяанам̣ сависаяам̣ б̣яаабзд̇ваа бавад̇д̇анам̣, д̇аяид̣̇ам̣ яат̇аа г̇анд̇хааяад̇анз лаб̣бхад̇и, звам̣ сийлаад̣̇ийсубийд̇и баал̣ияам̣ ‘‘сийлаг̇анд̇хо’’д̇иаад̣̇и вуд̇д̇ам̣ ‘‘сийлаад̣̇иязва г̇анд̇хо’’д̇и гад̇ваа. д̇знааха адтагат̇ааяам̣ ‘‘сийлаг̇анд̇хо…бз… наамааний’’д̇и. яасмаа бана сависаяаб̣яаабанам̣ д̇ад̇т̇а басадабхааво баагадабхааво ваа ход̇и, д̇асмаа ‘‘басааран̣адтзна баагадабхаавадтзна ваа’’д̇и вуд̇д̇ам̣. ад̇д̇ано вад̇т̇усса суужанам̣ ваа вааяанам̣. ‘‘д̣̇звагааяаа самааг̇ад̇аа (д̣̇ий. ни. 2.332; сам̣. ни. 1.37), бан̣н̣ад̇д̇ид̇хаммаа’’д̇иаад̣̇ийсу (д̇ха. са. д̣̇угамаад̇игаа 108) самуухабан̃н̃ад̇д̇ийсуби гааяад̇хаммасад̣̇д̣̇аа ааг̇ад̇аад̇и ‘‘сасабхаава’’нд̇и висзсзд̇и. гааяаважанзна…бз… над̇т̇ийд̇и ид̣̇ам̣ ‘‘на д̇хаммо нааяад̇ана’’нд̇и зд̇т̇а д̇хаммасад̣̇д̣̇асса винивад̇д̇ависзсасаб̣б̣асабхаавад̇хаммаваажагад̇ам̣ санд̇хааяа вуд̇д̇ам̣, на д̇хаммааяад̇анасан̇каад̇ад̇хаммависзсаваажагад̇анд̇и д̣̇адтаб̣б̣ам̣.
10-17. Vāyanaṃ savisayaṃ byāpetvā pavattanaṃ, tayidaṃ yathā gandhāyatane labbhati, evaṃ sīlādīsupīti pāḷiyaṃ ‘‘sīlagandho’’tiādi vuttaṃ ‘‘sīlādiyeva gandho’’ti katvā. Tenāha aṭṭhakathāyaṃ ‘‘sīlagandho…pe… nāmānī’’ti. Yasmā pana savisayabyāpanaṃ tattha pasaṭabhāvo pākaṭabhāvo vā hoti, tasmā ‘‘pasāraṇaṭṭhena pākaṭabhāvaṭṭhena vā’’ti vuttaṃ. Attano vatthussa sūcanaṃ vā vāyanaṃ. ‘‘Devakāyā samāgatā (dī. ni. 2.332; saṃ. ni. 1.37), paṇṇattidhammā’’tiādīsu (dha. sa. dukamātikā 108) samūhapaññattīsupi kāyadhammasaddā āgatāti ‘‘sasabhāva’’nti viseseti. Kāyavacanena…pe… natthīti idaṃ ‘‘na dhammo nāyatana’’nti ettha dhammasaddassa vinivattavisesasabbasabhāvadhammavācakataṃ sandhāya vuttaṃ, na dhammāyatanasaṅkhātadhammavisesavācakatanti daṭṭhabbaṃ.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
2. бавад̇д̇иваараван̣н̣анаа
2. Pavattivāravaṇṇanā
18-21. зд̇асминд̇и бавад̇д̇иваарз. бужчаамад̇д̇алаабхзнаад̇и могхабужчаабхаавамааха. згзганд̇и ‘‘яасса жагкааяад̇анам̣ уббаж̇ж̇ад̇и, д̇асса сад̣̇д̣̇ааяад̇анам̣ уббаж̇ж̇ад̇ий’’д̇иаад̣̇игам̣ згзгам̣. бан̃жаад̇и ‘‘яасса сад̣̇д̣̇ааяад̇анам̣ уббаж̇ж̇ад̇и, д̇асса г̇анд̇хааяад̇анам̣ уббаж̇ж̇ад̇ий’’д̇иаад̣̇ийни бан̃жа. бужчаамад̇д̇алаабхзна сан̇г̇ахам̣ ануж̇аананд̇о ‘‘виссаж̇ж̇анавасзна хаабзд̇аб̣б̣ааний’’д̇и ааха. ‘‘вагкад̇и хий’’д̇иаад̣̇инаа яат̇аавуд̇д̇амад̇т̇ам̣ адтагат̇ааяа самад̇т̇зд̇и.
18-21. Etasminti pavattivāre. Pucchāmattalābhenāti moghapucchābhāvamāha. Ekekanti ‘‘yassa cakkhāyatanaṃ uppajjati, tassa saddāyatanaṃ uppajjatī’’tiādikaṃ ekekaṃ. Pañcāti ‘‘yassa saddāyatanaṃ uppajjati, tassa gandhāyatanaṃ uppajjatī’’tiādīni pañca. Pucchāmattalābhena saṅgahaṃ anujānanto ‘‘vissajjanavasena hāpetabbānī’’ti āha. ‘‘Vakkhati hī’’tiādinā yathāvuttamatthaṃ aṭṭhakathāya samattheti.
сад̣̇исависсаж̇ж̇ананд̇и сааман̃н̃аважанам̣ висзсанивидтамзва ход̇ийд̇и д̇ам̣ висзсам̣ д̣̇ассзнд̇о ‘‘буг̇г̇алаваарамзва санд̇хааяа вуд̇д̇а’’нд̇и вад̇ваа д̇ассаа бана сад̣̇исависсаж̇ж̇анад̇ааяа аб̣яаабид̇ад̇д̇аа яад̇т̇а сад̣̇исам̣, д̇ад̇т̇ааби виссаж̇ж̇ид̇анд̇и д̣̇ассзнд̇о ‘‘огаасаваарз бана…бз… виссаж̇ж̇ид̇а’’нд̇и ааха. д̇ад̇т̇а д̇анд̇и д̣̇уд̇ияам̣. буг̇г̇алаваарзбийд̇и яад̇т̇а сад̣̇исам̣ виссаж̇ж̇анам̣, д̇ад̇т̇а буг̇г̇алаваарзби виссаж̇ж̇ид̇ам̣, баг̇зва огаасаваарзд̇и ад̇хиббааяо. вирад̇д̇агаамагамманиб̣б̣ад̇д̇ассаад̇и бхааванааб̣алзна вирад̇д̇о гаамо зд̇знаад̇и вирад̇д̇агаамам̣, руубааважарагаммам̣, д̇ад̇о ниб̣б̣ад̇д̇асса. бадисанд̇хи зва б̣ийж̇ам̣ бадисанд̇хиб̣ийж̇ам̣, д̇асса. ‘‘звам̣сабхаавад̇д̇аа’’д̇и зд̇зна зганд̇ад̇о гаамад̇ан̣хаанид̣̇аанагаммахзд̇угаани гхаанаад̣̇ийнийд̇и д̣̇ассзд̇и. г̇анд̇хаад̣̇аяо жа на санд̇ийд̇и саб̣б̣зна саб̣б̣ам̣ д̇зсамби абхаавам̣ санд̇хааяа вад̣̇ад̇и. д̇ад̇т̇а яам̣ вад̇д̇аб̣б̣ам̣, д̇ам̣ хздтаа вуд̇д̇амзва.
Sadisavissajjananti sāmaññavacanaṃ visesaniviṭṭhameva hotīti taṃ visesaṃ dassento ‘‘puggalavārameva sandhāya vutta’’nti vatvā tassā pana sadisavissajjanatāya abyāpitattā yattha sadisaṃ, tatthāpi vissajjitanti dassento ‘‘okāsavāre pana…pe… vissajjita’’nti āha. Tattha tanti dutiyaṃ. Puggalavārepīti yattha sadisaṃ vissajjanaṃ, tattha puggalavārepi vissajjitaṃ, pageva okāsavāreti adhippāyo. Virattakāmakammanibbattassāti bhāvanābalena viratto kāmo etenāti virattakāmaṃ, rūpāvacarakammaṃ, tato nibbattassa. Paṭisandhi eva bījaṃ paṭisandhibījaṃ, tassa. ‘‘Evaṃsabhāvattā’’ti etena ekantato kāmataṇhānidānakammahetukāni ghānādīnīti dasseti. Gandhādayo ca na santīti sabbena sabbaṃ tesampi abhāvaṃ sandhāya vadati. Tattha yaṃ vattabbaṃ, taṃ heṭṭhā vuttameva.
‘‘сажжа’’нд̇и яат̇аавуд̇д̇авасзна г̇ахзд̇аб̣б̣ам̣ жод̣̇агзна вуд̇д̇амад̇т̇ам̣ самбадижчид̇ваа буна язнаад̇хиббааязна д̇аани яамагаани сад̣̇исависсаж̇ж̇анаани, д̇ам̣ д̣̇ассзд̇ум̣ ‘‘яат̇аа банаа’’д̇иаад̣̇и вуд̇д̇ам̣. д̇ад̇рааяам̣ сан̇кзбад̇т̇о – д̇ад̇т̇а жагкааяад̇анамуулагзсу гхаанааяад̇анаяамагзна ‘‘сажагкугаанам̣ агхаанагаанам̣ убабаж̇ж̇анд̇аана’’нд̇иаад̣̇инаа наязна ж̇ивхаагааяааяад̇анаяамагаани яат̇аа сад̣̇исависсаж̇ж̇анаани, д̇ат̇аа ид̇ха гхаанааяад̇анамуулагзсу гхаанааяад̇анаяамагзна д̇аани ж̇ивхаагааяааяад̇анаяамагаани ‘‘яасса гхаанааяад̇анам̣ уббаж̇ж̇ад̇и, д̇асса ж̇ивхааяад̇анам̣ уббаж̇ж̇ад̇ийд̇и? ааманд̇аа’’д̇иаад̣̇инаа наязна сад̣̇исависсаж̇ж̇анаанийд̇и. звамзд̇т̇а убхаязсам̣ висум̣ ан̃н̃аман̃н̃ам̣ сад̣̇исависсаж̇ж̇анад̇ааяа ид̣̇ам̣ вуд̇д̇ам̣, на згаж̇жхам̣ ан̃н̃аман̃н̃ам̣ сад̣̇исависсаж̇ж̇анад̇ааяа. д̇знааха ‘‘д̇асмаа д̇ад̇т̇а д̇ад̇т̇зва сад̣̇исависсаж̇ж̇анад̇аа баал̣ианаарул̣хад̇ааяа гааран̣а’’нд̇и. зван̃жа сад̇и жагкааяад̇анамуулаг̇г̇ахан̣ам̣ гимад̇т̇ияанд̇и ааха ‘‘нид̣̇ассанабхаавзнаа’’д̇иаад̣̇и. д̇ад̇т̇а нид̣̇ассанабхаавзнаад̇и нид̣̇ассанабхууд̇аанам̣ ан̃н̃аман̃н̃асад̣̇исависсаж̇ж̇анад̇аасан̇каад̇зна нид̣̇ассанабхаавзнзва, на бана д̇зсам̣ нид̣̇ассид̇аб̣б̣зхи саб̣б̣ат̇аа сад̣̇исависсаж̇ж̇анад̇ааяаад̇и ад̇хиббааяо. ‘‘язбхуяяад̇ааяаа’’д̇и вуд̇д̇ам̣ язбхуяяад̇ам̣ д̣̇ассзд̇ум̣ ‘‘д̇зсу хий’’д̇иаад̣̇и вуд̇д̇ам̣.
‘‘Sacca’’nti yathāvuttavasena gahetabbaṃ codakena vuttamatthaṃ sampaṭicchitvā puna yenādhippāyena tāni yamakāni sadisavissajjanāni, taṃ dassetuṃ ‘‘yathā panā’’tiādi vuttaṃ. Tatrāyaṃ saṅkhepattho – tattha cakkhāyatanamūlakesu ghānāyatanayamakena ‘‘sacakkhukānaṃ aghānakānaṃ upapajjantāna’’ntiādinā nayena jivhākāyāyatanayamakāni yathā sadisavissajjanāni, tathā idha ghānāyatanamūlakesu ghānāyatanayamakena tāni jivhākāyāyatanayamakāni ‘‘yassa ghānāyatanaṃ uppajjati, tassa jivhāyatanaṃ uppajjatīti? Āmantā’’tiādinā nayena sadisavissajjanānīti. Evamettha ubhayesaṃ visuṃ aññamaññaṃ sadisavissajjanatāya idaṃ vuttaṃ, na ekajjhaṃ aññamaññaṃ sadisavissajjanatāya. Tenāha ‘‘tasmā tattha tattheva sadisavissajjanatā pāḷianāruḷhatāya kāraṇa’’nti. Evañca sati cakkhāyatanamūlaggahaṇaṃ kimatthiyanti āha ‘‘nidassanabhāvenā’’tiādi. Tattha nidassanabhāvenāti nidassanabhūtānaṃ aññamaññasadisavissajjanatāsaṅkhātena nidassanabhāveneva, na pana tesaṃ nidassitabbehi sabbathā sadisavissajjanatāyāti adhippāyo. ‘‘Yebhuyyatāyā’’ti vuttaṃ yebhuyyataṃ dassetuṃ ‘‘tesu hī’’tiādi vuttaṃ.
званд̇и иминаа ‘‘ааманд̇аа’’д̇и бадиважанависсаж̇ж̇анзна яат̇аавуд̇д̇аважанассзва виссаж̇ж̇анабхааваануж̇аананам̣ гад̇д̇аб̣б̣анд̇и имамад̇т̇ам̣ аагад̣дхад̇и. саад̇и д̣̇уд̇ияабужчаа. гхаанааяад̇анаяамагзнаад̇и жагкааяад̇анамуулагзсу гхаанааяад̇анаяамагзнзва. д̇ам̣сзсаанийд̇и д̇зна гхаанааяад̇анамуулагагааяааяад̇анаяамагзна сад̣̇д̇хим̣ сзсаани. сад̣̇исависсаж̇ж̇анад̇д̇аа анаарул̣хаанийд̇и зд̇т̇а ‘‘анаарул̣хааний’’д̇и зд̇д̇агамзва д̇ат̇аа-сад̣̇д̣̇зна анугад̣дхийяад̇и, на ‘‘сад̣̇исависсаж̇ж̇анад̇д̇аа’’д̇и д̣̇ассзнд̇о ‘‘д̇ат̇аад̇и…бз… саман̃н̃знаа’’д̇и вад̇ваа ид̣̇аани ‘‘гааран̣асааман̃н̃знаа’’д̇и вуд̇д̇асса сад̣̇исависсаж̇ж̇анад̇д̇асса д̇ад̇т̇а абхаавам̣ д̣̇ассзд̇ум̣ ‘‘гхаанаж̇ивхаагааяааяад̇анаанам̣ банаа’’д̇иаад̣̇и вуд̇д̇ам̣. д̇ад̇т̇а аг̇аб̣бхасзяяагзсу бавад̇д̇амаанаананд̇и зд̇т̇ааби ‘‘сахажаарид̇ааяаа’’д̇и бад̣̇ам̣ аанзд̇ваа самб̣анд̇хид̇аб̣б̣ам̣, д̇ат̇аа ‘‘г̇аб̣бхасзяяагзсу жа бавад̇д̇амаанаана’’нд̇и. ид̇араани гхаанааяад̇анамуулагаани ж̇ивхаагааяааяад̇анаяамагаани д̣̇вз на виссаж̇ж̇ийяанд̇и, гхаанааяад̇анамуулагзсу жа яамагзсу виссаж̇ж̇ид̇зсу ид̇арад̣̇ваяамуулагаани ж̇ивхаагааяааяад̇анамуулагаани на виссаж̇ж̇ийяанд̇и ависзсад̇д̇аа аббависзсад̇д̇аа жаад̇и яож̇зд̇аб̣б̣ам̣. д̇ад̇т̇а гааяааяад̇анаяамагз д̣̇уд̇ияабужчаавасзна аббависзсо, ид̇аравасзна ависзсо взд̣̇ид̇аб̣б̣о. руубааяад̇анаманааяад̇анзхи сад̣̇д̇хинд̇и ид̣̇ам̣ руубааяад̇анамуулагаманааяад̇анавасзна вуд̇д̇анд̇и ааха ‘‘руубааяад̇ана…бз… ад̇хиббааяо’’д̇и. д̇знзвааха ‘‘руубааяад̇анамуулагзсу хий’’д̇иаад̣̇и. яамагаананд̇и руубааяад̇анамуулагаг̇анд̇харасаподтаб̣б̣ааяад̇анаяамагаанам̣. д̣̇уд̇ияабужчаананд̇и яат̇аавуд̇д̇аяамагаанам̣язва д̣̇уд̇ияабужчаанам̣. вуд̇д̇анаязнаад̇и ‘‘саруубагаанам̣ ажид̇д̇агаана’’нд̇иаад̣̇инаа вуд̇д̇зна наязна. аад̣̇ибужчаананд̇и д̇зсам̣язва яамагаанам̣ батамабужчаанам̣.
Evanti iminā ‘‘āmantā’’ti paṭivacanavissajjanena yathāvuttavacanasseva vissajjanabhāvānujānanaṃ kattabbanti imamatthaṃ ākaḍḍhati. Sāti dutiyapucchā. Ghānāyatanayamakenāti cakkhāyatanamūlakesu ghānāyatanayamakeneva. Taṃsesānīti tena ghānāyatanamūlakakāyāyatanayamakena saddhiṃ sesāni. Sadisavissajjanattā anāruḷhānīti ettha ‘‘anāruḷhānī’’ti ettakameva tathā-saddena anukaḍḍhīyati, na ‘‘sadisavissajjanattā’’ti dassento ‘‘tathāti…pe… samaññenā’’ti vatvā idāni ‘‘kāraṇasāmaññenā’’ti vuttassa sadisavissajjanattassa tattha abhāvaṃ dassetuṃ ‘‘ghānajivhākāyāyatanānaṃ panā’’tiādi vuttaṃ. Tattha agabbhaseyyakesu pavattamānānanti etthāpi ‘‘sahacāritāyā’’ti padaṃ ānetvā sambandhitabbaṃ, tathā ‘‘gabbhaseyyakesu ca pavattamānāna’’nti. Itarāni ghānāyatanamūlakāni jivhākāyāyatanayamakāni dve na vissajjīyanti, ghānāyatanamūlakesu ca yamakesu vissajjitesu itaradvayamūlakāni jivhākāyāyatanamūlakāni na vissajjīyanti avisesattā appavisesattā cāti yojetabbaṃ. Tattha kāyāyatanayamake dutiyapucchāvasena appaviseso, itaravasena aviseso veditabbo. Rūpāyatanamanāyatanehi saddhinti idaṃ rūpāyatanamūlakamanāyatanavasena vuttanti āha ‘‘rūpāyatana…pe… adhippāyo’’ti. Tenevāha ‘‘rūpāyatanamūlakesu hī’’tiādi. Yamakānanti rūpāyatanamūlakagandharasaphoṭṭhabbāyatanayamakānaṃ. Dutiyapucchānanti yathāvuttayamakānaṃyeva dutiyapucchānaṃ. Vuttanayenāti ‘‘sarūpakānaṃ acittakāna’’ntiādinā vuttena nayena. Ādipucchānanti tesaṃyeva yamakānaṃ paṭhamapucchānaṃ.
хздтимзхийд̇и ид̣̇ам̣ ависзсаважанамби язсу сад̣̇исависсаж̇ж̇анад̇аа самбхавад̇и, д̇ад̣̇абзгканд̇и ааха ‘‘г̇анд̇хараса…бз… ад̇т̇о’’д̇и. уд̣̇д̣̇идтад̇хаммзсу уд̣̇д̣̇зсаануруубам̣ лаб̣бхамаанависзсагат̇анам̣ виссаж̇ж̇анам̣, яо д̇ад̇т̇а на саб̣б̣зна саб̣б̣ам̣ уд̣̇д̣̇зсаануруубаг̇ун̣зна убалаб̣бхад̇и, д̇асса агат̇анамби ад̇т̇ад̇о виссаж̇ж̇анамзва наама ход̇ийд̇и ааха ‘‘ависсаж̇ж̇анзнзва алаб̣бхамаанад̇аад̣̇ассанзна виссаж̇ж̇ид̇аани наама хонд̇ий’’д̇и.
Heṭṭhimehīti idaṃ avisesavacanampi yesu sadisavissajjanatā sambhavati, tadapekkhanti āha ‘‘gandharasa…pe… attho’’ti. Uddiṭṭhadhammesu uddesānurūpaṃ labbhamānavisesakathanaṃ vissajjanaṃ, yo tattha na sabbena sabbaṃ uddesānurūpaguṇena upalabbhati, tassa akathanampi atthato vissajjanameva nāma hotīti āha ‘‘avissajjaneneva alabbhamānatādassanena vissajjitāni nāma hontī’’ti.
жагкувигаласод̇авигалаа вияа жагкусод̇авигалоби лаб̣бхад̇ийд̇и со бана адтагат̇ааяам̣ би-сад̣̇д̣̇зна сан̇г̇ахид̇од̇и д̣̇ассзнд̇о ‘‘ж̇ажжанд̇хамби…бз… взд̣̇ид̇аб̣б̣о’’д̇и ааха. барибун̣н̣ааяад̇анамзва обабаад̇игам̣ санд̇хааяа вуд̇д̇анд̇и зд̇т̇а адтаанаббаяуд̇д̇о зва-сад̣̇д̣̇од̇и д̇асса таанам̣ д̣̇ассзнд̇о ‘‘вуд̇д̇амзваад̇и ад̇т̇о’’д̇и вад̇ваа д̇зна барибун̣н̣ааяад̇анасса д̇ад̇т̇а анияад̇ад̇д̇аа абарибун̣н̣ааяад̇анассаби сан̇г̇ахо сид̣̇д̇ход̇и д̣̇ассзнд̇о ‘‘д̇зна ж̇ажжанд̇хаб̣ад̇хирамби санд̇хааяа вуд̇д̇ад̇аа на ниваарид̇аа ход̇ий’’д̇и ааха.
Cakkhuvikalasotavikalā viya cakkhusotavikalopi labbhatīti so pana aṭṭhakathāyaṃ pi-saddena saṅgahitoti dassento ‘‘jaccandhampi…pe… veditabbo’’ti āha. Paripuṇṇāyatanameva opapātikaṃ sandhāya vuttanti ettha aṭṭhānappayutto eva-saddoti tassa ṭhānaṃ dassento ‘‘vuttamevāti attho’’ti vatvā tena paripuṇṇāyatanassa tattha aniyatattā aparipuṇṇāyatanassapi saṅgaho siddhoti dassento ‘‘tena jaccandhabadhirampi sandhāya vuttatā na nivāritā hotī’’ti āha.
22-254. д̇асмим̣ буг̇г̇аласса анаамадтад̇д̇аад̇и гасмаа вуд̇д̇ам̣, яаавад̇аа ‘‘руубийб̣рахмалогам̣ бужчад̇ий’’д̇и иминааби огаасоязва аамадтод̇и. ‘‘ааманд̇аа’’д̇и бадин̃н̃ааяа гааран̣авибхааванаад̇хиббааязнзва ‘‘гасмаа бадин̃н̃аад̇а’’нд̇и жод̣̇анам̣ самудтаабзд̇ваа д̇ам̣ гааран̣ам̣ д̣̇ассзд̇угаамо ‘‘нануу’’д̇иаад̣̇имааха . г̇аб̣бхасзяяагабхаавам̣ г̇анд̇ваа бариниб̣б̣ааяиссад̇ийд̇и бажчимабхавигам̣ санд̇хааяааха. д̇ад̣̇авад̇т̇ассаад̇и бажчимабхаваавад̇т̇асса. бхависсанд̇ассаад̇и бхаавино. бадин̃н̃аад̇аб̣б̣ад̇д̇аад̇и ‘‘уббаж̇ж̇иссад̇ий’’д̇и бадин̃н̃аад̇аб̣б̣ад̇д̇аа.
22-254. Tasmiṃ puggalassa anāmaṭṭhattāti kasmā vuttaṃ, yāvatā ‘‘rūpībrahmalokaṃ pucchatī’’ti imināpi okāsoyeva āmaṭṭhoti. ‘‘Āmantā’’ti paṭiññāya kāraṇavibhāvanādhippāyeneva ‘‘kasmā paṭiññāta’’nti codanaṃ samuṭṭhāpetvā taṃ kāraṇaṃ dassetukāmo ‘‘nanū’’tiādimāha . Gabbhaseyyakabhāvaṃ gantvā parinibbāyissatīti pacchimabhavikaṃ sandhāyāha. Tadavatthassāti pacchimabhavāvatthassa. Bhavissantassāti bhāvino. Paṭiññātabbattāti ‘‘uppajjissatī’’ti paṭiññātabbattā.
ат̇а гасмаад̇и зд̇т̇ааяам̣ сан̇кзбад̇т̇о – яад̣̇и ‘‘яасса руубааяад̇анам̣ уббаж̇ж̇иссад̇и, д̇асса жагкааяад̇анам̣ уббаж̇ж̇иссад̇ий’’д̇и бужчааяам̣ вуд̇д̇зна вид̇хинаа бадин̃н̃аад̇аб̣б̣ам̣, ат̇а гасмаа ат̇а гзна гааран̣зна бадиломз ‘‘яасса ваа бана руубааяад̇анам̣ нуббаж̇ж̇иссад̇и, д̇асса жагкааяад̇анам̣ нуббаж̇ж̇иссад̇ий’’д̇и бужчааяа ‘‘ааманд̇аа’’д̇и бадин̃н̃аад̇ам̣, нану ид̣̇ам̣ ан̃н̃аман̃н̃ам̣ вируд̣̇д̇ханд̇и? нанууд̇иаад̣̇инааби жод̣̇аго д̇амзва вирод̇хам̣ вибхаавзд̇и. но жа нуббаж̇ж̇иссад̇и уббаж̇ж̇иссад̇и зваад̇и ад̇т̇о. ‘‘д̇асмим̣ бхавз’’д̇иаад̣̇и д̇асса барихааро. д̇ад̇т̇а д̇асмим̣ бхавзд̇и яасмим̣ бхавз ‘‘руубааяад̇анам̣ нуббаж̇ж̇иссад̇ий’’д̇и вуд̇д̇ам̣ бавад̇д̇амаанад̇д̇аа, д̇асмим̣ бхавз. анааг̇ад̇абхаавзна аважанад̇од̇и бхаавийбхаавзна авад̇д̇аб̣б̣ад̇о аарад̣̇д̇хуббаад̣̇абхаавзна бавад̇д̇амаанад̇д̇аад̇и ад̇хиббааяо. д̇знзвааха ‘‘бхаванд̇арз хий’’д̇иаад̣̇и. на бана вужжад̇ийд̇и самб̣анд̇хо. зван̃жа гад̇ваад̇иаад̣̇инаа баатанд̇арзна яат̇аавуд̇д̇амад̇т̇ам̣ самад̇т̇зд̇и.
Atha kasmāti etthāyaṃ saṅkhepattho – yadi ‘‘yassa rūpāyatanaṃ uppajjissati, tassa cakkhāyatanaṃ uppajjissatī’’ti pucchāyaṃ vuttena vidhinā paṭiññātabbaṃ, atha kasmā atha kena kāraṇena paṭilome ‘‘yassa vā pana rūpāyatanaṃ nuppajjissati, tassa cakkhāyatanaṃ nuppajjissatī’’ti pucchāya ‘‘āmantā’’ti paṭiññātaṃ, nanu idaṃ aññamaññaṃ viruddhanti? Nanūtiādināpi codako tameva virodhaṃ vibhāveti. No ca nuppajjissati uppajjissati evāti attho. ‘‘Tasmiṃ bhave’’tiādi tassa parihāro. Tattha tasmiṃ bhaveti yasmiṃ bhave ‘‘rūpāyatanaṃ nuppajjissatī’’ti vuttaṃ pavattamānattā, tasmiṃ bhave. Anāgatabhāvena avacanatoti bhāvībhāvena avattabbato āraddhuppādabhāvena pavattamānattāti adhippāyo. Tenevāha ‘‘bhavantare hī’’tiādi. Na pana vuccatīti sambandho. Evañca katvātiādinā pāṭhantarena yathāvuttamatthaṃ samattheti.
яасмим̣ ад̇д̇абхаавз язхи ааяад̇анзхи бхавид̇аб̣б̣ам̣, д̇ам̣д̇ам̣ааяад̇ананиб̣б̣ад̇д̇агагаммзна авассам̣бхаавийааяад̇анасса сад̇д̇асса, санд̇аанасса ваа, ‘‘яасса ваа бана руубааяад̇анам̣ уббаж̇ж̇иссад̇и, д̇асса жагкааяад̇анам̣ уббаж̇ж̇иссад̇ийд̇и? ааманд̇аа, яасса ваа бана руубааяад̇анам̣ нуббаж̇ж̇иссад̇и, д̇асса жагкааяад̇анам̣ нуббаж̇ж̇иссад̇ийд̇и? ааманд̇аа’’д̇и жа звам̣ бавад̇д̇ам̣ бужчаад̣̇ваяависсаж̇ж̇анам̣ ааяад̇анабадилаабхасса ж̇аад̇ибхаавад̇о судту убабаннам̣ бхавад̇и. бажчимабхавигаад̣̇аяод̇и зд̇т̇а аад̣̇и-сад̣̇д̣̇зна аруубз уббаж̇ж̇ид̇ваа бариниб̣б̣ааяанагаа сан̇г̇аяханд̇и. ид̣̇амби виссаж̇ж̇анам̣. абхинанд̣̇ид̇аб̣б̣ад̇д̇аад̇и ‘‘ааманд̇аа’’д̇и самбадижчид̇аб̣б̣ад̇д̇аа.
Yasmiṃ attabhāve yehi āyatanehi bhavitabbaṃ, taṃtaṃāyatananibbattakakammena avassaṃbhāvīāyatanassa sattassa, santānassa vā, ‘‘yassa vā pana rūpāyatanaṃ uppajjissati, tassa cakkhāyatanaṃ uppajjissatīti? Āmantā, yassa vā pana rūpāyatanaṃ nuppajjissati, tassa cakkhāyatanaṃ nuppajjissatīti? Āmantā’’ti ca evaṃ pavattaṃ pucchādvayavissajjanaṃ āyatanapaṭilābhassa jātibhāvato suṭṭhu upapannaṃ bhavati. Pacchimabhavikādayoti ettha ādi-saddena arūpe uppajjitvā parinibbāyanakā saṅgayhanti. Idampi vissajjanaṃ. Abhinanditabbattāti ‘‘āmantā’’ti sampaṭicchitabbattā.
яам̣ бана агхаанагаанам̣ гаамааважарам̣ убабаж̇ж̇анд̇аананд̇и вуд̇д̇анд̇и самб̣анд̇хо. яасса вибааго гхаанааяад̇ануббад̇д̇ид̇о бурзд̇арамзва убажчиж̇ж̇иссад̇и, д̇ам̣ гхаанааяад̇анааниб̣б̣ад̇д̇агагамманд̇и вуд̇д̇ам̣. гат̇ам̣ банийд̣̇исам̣ гаммам̣ ад̇т̇ийд̇и вин̃н̃ааяад̇ийд̇и ааха ‘‘яасса яад̇т̇аа’’д̇иаад̣̇и. звамби г̇аб̣бхасзяяаго зва ид̇ха агхаанагод̇и ад̇хиббзд̇од̇и гат̇амид̣̇ам̣ вин̃н̃ааяад̇ийд̇и жод̣̇анааяа ‘‘на хий’’д̇иаад̣̇им̣ вад̇ваа д̇амад̇т̇ам̣ саад̇хзд̇ум̣ ‘‘д̇хаммахад̣̇аяавибхан̇г̇з’’д̇иаад̣̇и вуд̇д̇ам̣. аважанад̇д̇амби хи яат̇аад̇хаммасаасанз абхид̇хаммз бадигкзбоязваад̇и . ид̇хаад̇и имасмим̣ ааяад̇анаяамагз. яат̇аад̣̇ассид̇аасууд̇и ‘‘яасса ваа бана сод̇ааяад̇анам̣ нуббаж̇ж̇иссад̇и, д̇асса жагкааяад̇анам̣ нуббаж̇ж̇ад̇и, яасса яад̇т̇а гхаанааяад̇анам̣ на нируж̇жхад̇и, д̇асса д̇ад̇т̇а руубааяад̇анам̣ на нируж̇жхиссад̇ий’’д̇и жа д̣̇ассид̇аббагаараасу бужчаасу. ааманд̇аад̇и вуд̇д̇анд̇и ат̇а гасмаа на вин̃н̃ааяад̇ийд̇и яож̇анаа. зд̇аасу бужчаасу гасмаа бадиважанзна виссаж̇ж̇анам̣ на гад̇анд̇и ад̇хиббааяо. саннидтаанзна г̇ахид̇ад̇т̇ассаад̇и ‘‘яасса ваа бана сод̇ааяад̇анам̣ нуббаж̇ж̇иссад̇и, яасса яад̇т̇а гхаанааяад̇анам̣ на нируж̇жхиссад̇ий’’д̇и жа звамаад̣̇игзна саннидтаанабад̣̇зна г̇ахид̇асса ад̇т̇асса. згад̣̇зсз сам̣саяад̇т̇асса самбхавзнаад̇и згад̣̇зсз сам̣саяид̇аб̣б̣асса ад̇т̇асса самбхавзна саннидтаанад̇т̇абадияог̇абхууд̇асам̣саяад̇т̇асса бадиважанасса агаран̣ад̇о ‘‘ааманд̇аа’’д̇и бадиважанависсаж̇ж̇анасса агад̇д̇аб̣б̣ад̇о ад̇т̇асса абхинд̣̇ид̇ваа згаж̇жхам̣ гад̇ваа авад̇д̇аб̣б̣ад̇о. д̇знааха ‘‘бхинд̣̇ид̇аб̣б̣зхи на бадиважанависсаж̇ж̇анам̣ ход̇ий’’д̇и.
Yaṃ pana aghānakānaṃ kāmāvacaraṃ upapajjantānanti vuttanti sambandho. Yassa vipāko ghānāyatanuppattito puretarameva upacchijjissati, taṃ ghānāyatanānibbattakakammanti vuttaṃ. Kathaṃ panīdisaṃ kammaṃ atthīti viññāyatīti āha ‘‘yassa yatthā’’tiādi. Evampi gabbhaseyyako eva idha aghānakoti adhippetoti kathamidaṃ viññāyatīti codanāya ‘‘na hī’’tiādiṃ vatvā tamatthaṃ sādhetuṃ ‘‘dhammahadayavibhaṅge’’tiādi vuttaṃ. Avacanattampi hi yathādhammasāsane abhidhamme paṭikkhepoyevāti . Idhāti imasmiṃ āyatanayamake. Yathādassitāsūti ‘‘yassa vā pana sotāyatanaṃ nuppajjissati, tassa cakkhāyatanaṃ nuppajjati, yassa yattha ghānāyatanaṃ na nirujjhati, tassa tattha rūpāyatanaṃ na nirujjhissatī’’ti ca dassitappakārāsu pucchāsu. Āmantāti vuttanti atha kasmā na viññāyatīti yojanā. Etāsu pucchāsu kasmā paṭivacanena vissajjanaṃ na katanti adhippāyo. Sanniṭṭhānena gahitatthassāti ‘‘yassa vā pana sotāyatanaṃ nuppajjissati, yassa yattha ghānāyatanaṃ na nirujjhissatī’’ti ca evamādikena sanniṭṭhānapadena gahitassa atthassa. Ekadese saṃsayatthassa sambhavenāti ekadese saṃsayitabbassa atthassa sambhavena sanniṭṭhānatthapaṭiyogabhūtasaṃsayatthassa paṭivacanassa akaraṇato ‘‘āmantā’’ti paṭivacanavissajjanassa akattabbato atthassa abhinditvā ekajjhaṃ katvā avattabbato. Tenāha ‘‘bhinditabbehi na paṭivacanavissajjanaṃ hotī’’ti.
яад̣̇и сияаад̇и бхинд̣̇ид̇ваа вад̇д̇аб̣б̣зби ад̇т̇з яад̣̇и бадиважанависсаж̇ж̇анам̣ сияаа, барибун̣н̣ависсаж̇ж̇анамзва на сияаа аногаасабхаавад̇о бхинд̣̇ид̇аб̣б̣ад̇о жаад̇и ад̇т̇о. д̇ат̇аа хи ‘‘бан̃жавогаарз бариниб̣б̣анд̇аанам̣, аруубз бажчимабхавигаанам̣, яз жа аруубам̣ убабаж̇ж̇ид̇ваа бариниб̣б̣ааяиссанд̇и, д̇зсам̣ жаванд̇аанам̣ д̇зсам̣ сод̇ааяад̇анан̃жа нуббаж̇ж̇иссад̇и, жагкааяад̇анан̃жа нуббаж̇ж̇ад̇ий’’д̇и жа, д̇ат̇аа ‘‘руубааважарз бариниб̣б̣анд̇аанам̣, аруубаанам̣ д̇зсам̣ д̇ад̇т̇а гхаанааяад̇анан̃жа на нируж̇жхад̇и, руубааяад̇анан̃жа на нируж̇жхиссад̇ий’’д̇и жа д̇ад̇т̇а вибхааг̇авасзна бавад̇д̇о баатасзсо. ат̇а гасмаад̇и яад̣̇и абхинд̣̇ид̇аб̣б̣з бадиважанависсаж̇ж̇анам̣, на бхинд̣̇ид̇аб̣б̣з, звам̣ санд̇з ‘‘яасса ваа бана соманассинд̣̇рияам̣ уббаж̇ж̇ад̇и, д̇асса жагкунд̣̇рияам̣ уббаж̇ж̇ад̇ийд̇и? ааманд̇аа’’д̇и иминаа бадиважанависсаж̇ж̇анзна г̇аб̣бхасзяяагаанам̣ соманассабадисанд̇хи над̇т̇ийд̇и гасмаа на вин̃н̃ааяад̇и, бхинд̣̇ид̇аб̣б̣з на бадиважанависсаж̇ж̇анам̣ ход̇ийд̇и самбадижчид̇аб̣б̣анд̇и? д̇ам̣ на, ан̃н̃ааяа баал̣ияаа д̇ад̣̇ад̇т̇асса вин̃н̃ааяамаанад̇д̇аад̇и д̣̇ассзнд̇о ‘‘гаамад̇хаад̇уяаа’’д̇иаад̣̇имааха.
Yadi siyāti bhinditvā vattabbepi atthe yadi paṭivacanavissajjanaṃ siyā, paripuṇṇavissajjanameva na siyā anokāsabhāvato bhinditabbato cāti attho. Tathā hi ‘‘pañcavokāre parinibbantānaṃ, arūpe pacchimabhavikānaṃ, ye ca arūpaṃ upapajjitvā parinibbāyissanti, tesaṃ cavantānaṃ tesaṃ sotāyatanañca nuppajjissati, cakkhāyatanañca nuppajjatī’’ti ca, tathā ‘‘rūpāvacare parinibbantānaṃ, arūpānaṃ tesaṃ tattha ghānāyatanañca na nirujjhati, rūpāyatanañca na nirujjhissatī’’ti ca tattha vibhāgavasena pavatto pāṭhaseso. Atha kasmāti yadi abhinditabbe paṭivacanavissajjanaṃ, na bhinditabbe, evaṃ sante ‘‘yassa vā pana somanassindriyaṃ uppajjati, tassa cakkhundriyaṃ uppajjatīti? Āmantā’’ti iminā paṭivacanavissajjanena gabbhaseyyakānaṃ somanassapaṭisandhi natthīti kasmā na viññāyati, bhinditabbe na paṭivacanavissajjanaṃ hotīti sampaṭicchitabbanti? Taṃ na, aññāya pāḷiyā tadatthassa viññāyamānattāti dassento ‘‘kāmadhātuyā’’tiādimāha.
‘‘яам̣ жид̇д̇ам̣ уббаж̇ж̇ад̇и, на нируж̇жхад̇и, д̇ам̣ жид̇д̇ам̣ нируж̇жхиссад̇и, нуббаж̇ж̇иссад̇ийд̇и? ааманд̇аа’’д̇и д̇ассзва жид̇д̇асса нирод̇хо анааг̇ад̇абхаавзна д̇асса уббаад̣̇агкан̣з яат̇аа вуд̇д̇о, звам̣ д̇ассзва гаммаж̇асанд̇аанасса нирод̇хо д̇асса уббаад̣̇з анааг̇ад̇абхаавзна вад̇д̇аб̣б̣о. д̇знзд̇ам̣ д̣̇ассзд̇и ‘‘згажид̇д̇асса наама уббаад̣̇агкан̣з нирод̇хо анааг̇ад̇абхаавзна вужжад̇и, гиман̇г̇ам̣ бана згасанд̇аанассаа’’д̇и . саб̣б̣ад̇т̇а саб̣б̣асмим̣ анааг̇ад̇аваарз. убабаж̇ж̇анд̇аанам̣ зва васзна со нирод̇хо д̇ат̇аа анааг̇ад̇абхаавзна вуд̇д̇о, гасмаа банзд̇т̇а нирод̇хо убабаннаанам̣ васзна на вуд̇д̇од̇и ааха ‘‘уббаннаанам̣ банаа’’д̇иаад̣̇и. д̇ассзва яат̇аабавад̇д̇асса гаммаж̇асанд̇аанасса зва. д̇асмаад̇и яасмаа уббаад̣̇агкан̣ад̇о уд̣̇д̇хам̣ нирод̇хо аарад̣̇д̇хо наама ход̇и, д̇асмаа. бхзд̣̇з сад̇иби гаалабхзд̣̇аамасанасса гааран̣з сад̇иби. анааг̇ад̇агаалаамасанавасзнзва нирод̇хассзва васзна виссаж̇ж̇анад̣̇ваяам̣ убабаннамзва яуд̇д̇амзва ход̇ийд̇и. ан̃н̃зсам̣ васзна нирод̇хассзва вад̇д̇ум̣ асаггун̣зяяад̇д̇аа ‘‘арахад̇а’’нд̇и вуд̇д̇ам̣.
‘‘Yaṃ cittaṃ uppajjati, na nirujjhati, taṃ cittaṃ nirujjhissati, nuppajjissatīti? Āmantā’’ti tasseva cittassa nirodho anāgatabhāvena tassa uppādakkhaṇe yathā vutto, evaṃ tasseva kammajasantānassa nirodho tassa uppāde anāgatabhāvena vattabbo. Tenetaṃ dasseti ‘‘ekacittassa nāma uppādakkhaṇe nirodho anāgatabhāvena vuccati, kimaṅgaṃ pana ekasantānassā’’ti . Sabbattha sabbasmiṃ anāgatavāre. Upapajjantānaṃ eva vasena so nirodho tathā anāgatabhāvena vutto, kasmā panettha nirodho upapannānaṃ vasena na vuttoti āha ‘‘uppannānaṃ panā’’tiādi. Tasseva yathāpavattassa kammajasantānassa eva. Tasmāti yasmā uppādakkhaṇato uddhaṃ nirodho āraddho nāma hoti, tasmā. Bhede satipi kālabhedāmasanassa kāraṇe satipi. Anāgatakālāmasanavaseneva nirodhasseva vasena vissajjanadvayaṃ upapannameva yuttameva hotīti. Aññesaṃ vasena nirodhasseva vattuṃ asakkuṇeyyattā ‘‘arahata’’nti vuttaṃ.
яад̣̇и убабад̇д̇иананд̇арам̣ нирод̇хо аарад̣̇д̇хо наама ход̇и, ат̇а гасмаа жуд̇ияаа нирод̇хаважананд̇и жод̣̇анам̣ санд̇хааяааха ‘‘д̇аннидтаанабхаавад̇о бана жуд̇ияаа нирод̇хаважана’’нд̇и. д̇аннидтаанабхаавад̇од̇и д̇асса санд̇аанасса нидтаанабхаавад̇о. бавад̇д̇зд̇иаад̣̇и вуд̇д̇ассзвад̇т̇асса баагадагаран̣ам̣. д̇ад̇т̇а д̇ассаад̇и санд̇аанасса. вагкад̇ийд̇иаад̣̇иби бавад̇д̇з нирод̇хам̣ анаад̣̇ияид̇ваа жуд̇инирод̇хассзва г̇ахид̇ад̇ааяа гааран̣аважанам̣. д̇знаад̇и д̇зна яат̇аавуд̇д̇зна баатанд̇араважанзна. зд̇т̇аад̇и зд̇асмим̣ ‘‘яасса жагкааяад̇анам̣ нируж̇жхиссад̇ий’’д̇иаад̣̇игз ааяад̇анаяамагз. яад̣̇и бавад̇д̇з нируд̣̇д̇хассаби жуд̇ияаа зва нирод̇хо ижчид̇о, ‘‘сажагкугаана’’нд̇иаад̣̇и гат̇анд̇и ааха ‘‘сажагкугаананд̇иаад̣̇ийсу жа бадилад̣̇д̇хажагкугаананд̇иаад̣̇инаа ад̇т̇о вин̃н̃ааяад̇ий’’д̇и. д̇зд̇и аруубз бажчимабхавигаа. ажагкугаважанан̃жа саавасзсанд̇и яож̇анаа.
Yadi upapattianantaraṃ nirodho āraddho nāma hoti, atha kasmā cutiyā nirodhavacananti codanaṃ sandhāyāha ‘‘tanniṭṭhānabhāvato pana cutiyā nirodhavacana’’nti. Tanniṭṭhānabhāvatoti tassa santānassa niṭṭhānabhāvato. Pavattetiādi vuttassevatthassa pākaṭakaraṇaṃ. Tattha tassāti santānassa. Vakkhatītiādipi pavatte nirodhaṃ anādiyitvā cutinirodhasseva gahitatāya kāraṇavacanaṃ. Tenāti tena yathāvuttena pāṭhantaravacanena. Etthāti etasmiṃ ‘‘yassa cakkhāyatanaṃ nirujjhissatī’’tiādike āyatanayamake. Yadi pavatte niruddhassapi cutiyā eva nirodho icchito, ‘‘sacakkhukāna’’ntiādi kathanti āha ‘‘sacakkhukānantiādīsu ca paṭiladdhacakkhukānantiādinā attho viññāyatī’’ti. Teti arūpe pacchimabhavikā. Acakkhukavacanañca sāvasesanti yojanā.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
ааяад̇анаяамагаван̣н̣анаа нидтид̇аа.
Āyatanayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 3. ааяад̇анаяамагам̣ • 3. Āyatanayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 3. ааяад̇анаяамагам̣ • 3. Āyatanayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 3. ааяад̇анаяамагам̣ • 3. Āyatanayamakaṃ
