| Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā |
3. அயோக⁴ரசரியாவண்ணனா
3. Ayogharacariyāvaṇṇanā
24. ததியே அயோக⁴ரம்ஹி ஸங்வட்³டோ⁴தி அமனுஸ்ஸஉபத்³த³வபரிவஜ்ஜனத்த²ங் சதுரஸ்ஸஸாலவஸேன கதே மஹதி ஸப்³ப³அயோமயே கே³ஹே ஸங்வட்³டோ⁴. நாமேனாஸி அயோக⁴ரோதி அயோக⁴ரே ஜாதஸங்வட்³ட⁴பா⁴வேனேவ ‘‘அயோக⁴ரகுமாரோ’’தி நாமேன பாகடோ அஹோஸி.
24. Tatiye ayogharamhi saṃvaḍḍhoti amanussaupaddavaparivajjanatthaṃ caturassasālavasena kate mahati sabbaayomaye gehe saṃvaḍḍho. Nāmenāsi ayogharoti ayoghare jātasaṃvaḍḍhabhāveneva ‘‘ayogharakumāro’’ti nāmena pākaṭo ahosi.
25-6. ததா³ ஹி காஸிரஞ்ஞோ அக்³க³மஹேஸியா புரிமத்தபா⁴வே ஸபத்தி ‘‘தவ ஜாதங் ஜாதங் பஜங் கா²தெ³ய்ய’’ந்தி பத்த²னங் பட்ட²பெத்வா யக்கி²னியோனியங் நிப்³ப³த்தா ஓகாஸங் லபி⁴த்வா தஸ்ஸா விஜாதகாலே த்³வே வாரே புத்தே கா²தி³. ததியவாரே பன போ³தி⁴ஸத்தோ தஸ்ஸா குச்சி²யங் படிஸந்தி⁴ங் க³ண்ஹி. ராஜா ‘‘தே³வியா ஜாதங் ஜாதங் பஜங் ஏகா யக்கி²னீ கா²த³தி, கிங் நு கோ² காதப்³ப³’’ந்தி மனுஸ்ஸேஹி ஸம்மந்தெத்வா ‘‘அமனுஸ்ஸா நாம அயோக⁴ரஸ்ஸ பா⁴யந்தி, அயோக⁴ரங் காதுங் வட்டதீ’’தி வுத்தே கம்மாரே ஆணாபெத்வா த²ம்பே⁴ ஆதி³ங் கத்வா அயோமயேஹேவ ஸப்³ப³கே³ஹஸம்பா⁴ரேஹி சதுரஸ்ஸஸாலங் மஹந்தங் அயோக⁴ரங் நிட்டா²பெத்வா பரிபக்கக³ப்³ப⁴ங் தே³விங் தத்த² வாஸேஸி. ஸா தத்த² த⁴ஞ்ஞபுஞ்ஞலக்க²ணங் புத்தங் விஜாயி. ‘‘அயோக⁴ரகுமாரோ’’த்வேவஸ்ஸ நாமங் கரிங்ஸு. தங் தா⁴தீனங் த³த்வா மஹந்தங் ஆரக்க²ங் ஸங்வித³ஹித்வா ராஜா தே³விங் அந்தேபுரங் ஆனேஸி. யக்கி²னீபி உத³கவாரங் க³ந்த்வா வெஸ்ஸவணஸ்ஸ உத³கங் வஹந்தீ ஜீவிதக்க²யங் பத்தா.
25-6. Tadā hi kāsirañño aggamahesiyā purimattabhāve sapatti ‘‘tava jātaṃ jātaṃ pajaṃ khādeyya’’nti patthanaṃ paṭṭhapetvā yakkhiniyoniyaṃ nibbattā okāsaṃ labhitvā tassā vijātakāle dve vāre putte khādi. Tatiyavāre pana bodhisatto tassā kucchiyaṃ paṭisandhiṃ gaṇhi. Rājā ‘‘deviyā jātaṃ jātaṃ pajaṃ ekā yakkhinī khādati, kiṃ nu kho kātabba’’nti manussehi sammantetvā ‘‘amanussā nāma ayogharassa bhāyanti, ayogharaṃ kātuṃ vaṭṭatī’’ti vutte kammāre āṇāpetvā thambhe ādiṃ katvā ayomayeheva sabbagehasambhārehi caturassasālaṃ mahantaṃ ayogharaṃ niṭṭhāpetvā paripakkagabbhaṃ deviṃ tattha vāsesi. Sā tattha dhaññapuññalakkhaṇaṃ puttaṃ vijāyi. ‘‘Ayogharakumāro’’tvevassa nāmaṃ kariṃsu. Taṃ dhātīnaṃ datvā mahantaṃ ārakkhaṃ saṃvidahitvā rājā deviṃ antepuraṃ ānesi. Yakkhinīpi udakavāraṃ gantvā vessavaṇassa udakaṃ vahantī jīvitakkhayaṃ pattā.
மஹாஸத்தோ அயோக⁴ரேயேவ வட்³டி⁴த்வா விஞ்ஞுதங் பத்தோ, தத்தே²வ ஸப்³ப³ஸிப்பானி உக்³க³ண்ஹி. ராஜா புத்தங் ஸோளஸவஸ்ஸுத்³தே³ஸிகங் விதி³த்வா ‘‘ரஜ்ஜமஸ்ஸ த³ஸ்ஸாமீ’’தி அமச்சே ஆணாபேஸி – ‘‘புத்தங் மே ஆனேதா²’’தி. தே ‘‘ஸாது⁴, தே³வா’’தி நக³ரங் அலங்காராபெத்வா ஸப்³பா³லங்காரவிபூ⁴ஸிதங் மங்க³லவாரணங் ஆதா³ய தத்த² க³ந்த்வா குமாரங் அலங்கரித்வா ஹத்தி²க்க²ந்தே⁴ நிஸீதா³பெத்வா நக³ரங் பத³க்கி²ணங் காரெத்வா ரஞ்ஞோ த³ஸ்ஸேஸுங். மஹாஸத்தோ ராஜானங் வந்தி³த்வா அட்டா²ஸி. ராஜா தஸ்ஸ ஸரீரஸோப⁴ங் ஓலோகெத்வா ப³லவஸினேஹேன தங் ஆலிங்கி³த்வா ‘‘அஜ்ஜேவ மே புத்தங் அபி⁴ஸிஞ்சதா²’’தி அமச்சே ஆணாபேஸி. மஹாஸத்தோ பிதரங் வந்தி³த்வா ‘‘ந மய்ஹங் ரஜ்ஜேன அத்தோ², அஹங் பப்³ப³ஜிஸ்ஸாமி, பப்³ப³ஜ்ஜங் மே அனுஜானாதா²’’தி ஆஹ. தேன வுத்தங் ‘‘து³க்கே²ன ஜீவிதோ லத்³தோ⁴’’திஆதி³.
Mahāsatto ayoghareyeva vaḍḍhitvā viññutaṃ patto, tattheva sabbasippāni uggaṇhi. Rājā puttaṃ soḷasavassuddesikaṃ viditvā ‘‘rajjamassa dassāmī’’ti amacce āṇāpesi – ‘‘puttaṃ me ānethā’’ti. Te ‘‘sādhu, devā’’ti nagaraṃ alaṅkārāpetvā sabbālaṅkāravibhūsitaṃ maṅgalavāraṇaṃ ādāya tattha gantvā kumāraṃ alaṅkaritvā hatthikkhandhe nisīdāpetvā nagaraṃ padakkhiṇaṃ kāretvā rañño dassesuṃ. Mahāsatto rājānaṃ vanditvā aṭṭhāsi. Rājā tassa sarīrasobhaṃ oloketvā balavasinehena taṃ āliṅgitvā ‘‘ajjeva me puttaṃ abhisiñcathā’’ti amacce āṇāpesi. Mahāsatto pitaraṃ vanditvā ‘‘na mayhaṃ rajjena attho, ahaṃ pabbajissāmi, pabbajjaṃ me anujānāthā’’ti āha. Tena vuttaṃ ‘‘dukkhena jīvito laddho’’tiādi.
தத்த² து³க்கே²னாதி, தாத, தவ பா⁴திகா த்³வே ஏகாய யக்கி²னியா கா²தி³தா, துய்ஹங் பன ததோ அமனுஸ்ஸப⁴யதோ நிவாரணத்த²ங் கதேன து³க்கே²ன மஹதா ஆயாஸேன ஜீவிதோ லத்³தோ⁴. ஸங்பீளே பதிபோஸிதோதி நானாவிதா⁴ய அமனுஸ்ஸரக்கா²ய ஸம்பா³தே⁴ அயோக⁴ரே விஜாயனகாலதோ பட்டா²ய யாவ ஸோளஸவஸ்ஸுப்பத்தியா ஸம்பா³தே⁴ ஸங்வட்³டி⁴தோதி அத்தோ². அஜ்ஜேவ, புத்த, படிபஜ்ஜ, கேவலங் வஸுத⁴ங் இமந்தி கஞ்சனமாலாலங்கதஸ்ஸ ஸேதச்ச²த்தஸ்ஸ ஹெட்டா² ரதனராஸிம்ஹி ட²பெத்வா தீஹி ஸங்கே²ஹி அபி⁴ஸிஞ்சியமானோ இமங் குலஸந்தகங் கேவலங் ஸகலங் ஸமுத்³த³பரியந்தங் ததோயேவ ஸஹ ரட்டே²ஹீதி ஸரட்ட²கங் ஸஹ நிக³மேஹி மஹாகா³மேஹீதி ஸனிக³மங் அபரிமிதேன பரிவாரஜனேன ஸத்³தி⁴ங் ஸஜனங் இமங் வஸுத⁴ங் மஹாபத²விங் அஜ்ஜேவ, புத்த, படிபஜ்ஜ, ரஜ்ஜங் காரேஹீதி அத்தோ². வந்தி³த்வா க²த்தியங். அஞ்ஜலிங் பக்³க³ஹெத்வான, இத³ங் வசனமப்³ரவிந்தி க²த்தியங் காஸிராஜானங் மம பிதரங் வந்தி³த்வா தஸ்ஸ அஞ்ஜலிங் பணாமெத்வா இத³ங் வசனங் அபா⁴ஸிங்.
Tattha dukkhenāti, tāta, tava bhātikā dve ekāya yakkhiniyā khāditā, tuyhaṃ pana tato amanussabhayato nivāraṇatthaṃ katena dukkhena mahatā āyāsena jīvito laddho. Saṃpīḷe patipositoti nānāvidhāya amanussarakkhāya sambādhe ayoghare vijāyanakālato paṭṭhāya yāva soḷasavassuppattiyā sambādhe saṃvaḍḍhitoti attho. Ajjeva, putta, paṭipajja, kevalaṃ vasudhaṃ imanti kañcanamālālaṅkatassa setacchattassa heṭṭhā ratanarāsimhi ṭhapetvā tīhi saṅkhehi abhisiñciyamāno imaṃ kulasantakaṃ kevalaṃ sakalaṃ samuddapariyantaṃ tatoyeva saha raṭṭhehīti saraṭṭhakaṃ saha nigamehi mahāgāmehīti sanigamaṃ aparimitena parivārajanena saddhiṃ sajanaṃ imaṃ vasudhaṃ mahāpathaviṃ ajjeva, putta, paṭipajja, rajjaṃ kārehīti attho. Vanditvā khattiyaṃ. Añjaliṃ paggahetvāna, idaṃ vacanamabravinti khattiyaṃ kāsirājānaṃ mama pitaraṃ vanditvā tassa añjaliṃ paṇāmetvā idaṃ vacanaṃ abhāsiṃ.
27. யே கேசி மஹியா ஸத்தாதி இமிஸ்ஸா மஹாபத²வியா யே கேசி ஸத்தா நாம. ஹீனமுக்கட்ட²மஜ்ஜி²மாதி லாமகா சேவ உத்தமா ச, உபி⁴ன்னங் வேமஜ்ஜே² ப⁴வத்தா மஜ்ஜி²மா ச. ஸகே கே³ஹேதி ஸப்³பே³ தே ஸகே கே³ஹே. ஸகஞாதிபீ⁴தி ஸகேஹி ஞாதீஹி ஸம்மோத³மானா விஸ்ஸட்டா² அனுக்கண்டி²தா யதா²விப⁴வங் வட்³ட⁴ந்தி.
27.Yekeci mahiyā sattāti imissā mahāpathaviyā ye keci sattā nāma. Hīnamukkaṭṭhamajjhimāti lāmakā ceva uttamā ca, ubhinnaṃ vemajjhe bhavattā majjhimā ca. Sake geheti sabbe te sake gehe. Sakañātibhīti sakehi ñātīhi sammodamānā vissaṭṭhā anukkaṇṭhitā yathāvibhavaṃ vaḍḍhanti.
28. இத³ங் லோகே உத்தரியந்தி இத³ங் பன இமஸ்மிங் லோகே அஸதி³ஸங், மய்ஹங் ஏவ ஆவேணிகங். கிங் பன தங் ஸங்பீளே மம போஸனந்தி ஸம்பா³தே⁴ மம ஸங்வட்³ட⁴னங். ததா² ஹி அயோக⁴ரம்ஹி ஸங்வட்³டோ⁴, அப்பபே⁴ சந்த³ஸூரியேதி சந்த³ஸூரியானங் பபா⁴ரஹிதே அயோக⁴ரே ஸங்வட்³டொ⁴ம்ஹீதி ஸங்வட்³டோ⁴ அம்ஹி.
28.Idaṃ loke uttariyanti idaṃ pana imasmiṃ loke asadisaṃ, mayhaṃ eva āveṇikaṃ. Kiṃ pana taṃ saṃpīḷe mama posananti sambādhe mama saṃvaḍḍhanaṃ. Tathā hi ayogharamhi saṃvaḍḍho, appabhe candasūriyeti candasūriyānaṃ pabhārahite ayoghare saṃvaḍḍhomhīti saṃvaḍḍho amhi.
29. பூதிகுணபஸம்புண்ணாதி பூதிக³ந்த⁴னானப்பகாரகுணபஸம்புண்ணா கூ³த²னிரயஸதி³ஸா. மாது குச்சி²தோ ஜீவிதஸங்ஸயே வத்தமானே கத²ங் முச்சித்வா நிக்க²மித்வா. ததோ கோ⁴ரதரேதி ததோபி க³ப்³ப⁴வாஸதோ தா³ருணதரே, அவிஸ்ஸட்ட²வாஸேன து³க்கே². பக்கி²த்தயோக⁴ரேதி பக்கி²த்தோ அயோக⁴ரே, ப³ந்த⁴னாகா³ரே ட²பிதோ விய அஹோஸிந்தி த³ஸ்ஸேதி.
29.Pūtikuṇapasampuṇṇāti pūtigandhanānappakārakuṇapasampuṇṇā gūthanirayasadisā. Mātu kucchito jīvitasaṃsaye vattamāne kathaṃ muccitvā nikkhamitvā. Tato ghoratareti tatopi gabbhavāsato dāruṇatare, avissaṭṭhavāsena dukkhe. Pakkhittayoghareti pakkhitto ayoghare, bandhanāgāre ṭhapito viya ahosinti dasseti.
30. யதி³ஹந்தி எத்த² யதீ³தி நிபாதமத்தங். தாதி³ஸந்தி யாதி³ஸங் புப்³பே³ வுத்தங், தாதி³ஸங் பரமதா³ருணங் து³க்க²ங் பத்வா அஹங் ரஜ்ஜேஸு யதி³ ரஜ்ஜாமி யதி³ ரமிஸ்ஸாமி, ஏவங் ஸந்தே பாபானங் லாமகானங் நிஹீனபுரிஸானங் உத்தமோ நிஹீனதமோ ஸியங் .
30.Yadihanti ettha yadīti nipātamattaṃ. Tādisanti yādisaṃ pubbe vuttaṃ, tādisaṃ paramadāruṇaṃ dukkhaṃ patvā ahaṃ rajjesu yadi rajjāmi yadi ramissāmi, evaṃ sante pāpānaṃ lāmakānaṃ nihīnapurisānaṃ uttamo nihīnatamo siyaṃ.
31. உக்கண்டி²தொம்ஹி காயேனாதி அபரிமுத்தக³ப்³ப⁴வாஸாதி³னா பூதிகாயேன உக்கண்டி²தோ நிப்³பி³ன்னோ அம்ஹி. ரஜ்ஜேனம்ஹி அனத்தி²கோதி ரஜ்ஜேனபி அனத்தி²கோ அம்ஹி. யக்கி²னியா ஹத்த²தோ முத்தோபி ஹி நாஹங் அஜராமரோ, கிங் மே ரஜ்ஜேன, ரஜ்ஜஞ்ஹி நாம ஸப்³பே³ஸங் அனத்தா²னங் ஸன்னிபாதட்டா²னங், தத்த² டி²தகாலதோ பட்டா²ய து³ன்னிக்க²மங் ஹோதி, தஸ்மா தங் அனுபக³ந்த்வா நிப்³பு³திங் பரியேஸிஸ்ஸங், யத்த² மங் மச்சு ந மத்³தி³யேதி யத்த² டி²தங் மங் மஹாஸேனோ மச்சுராஜா ந மத்³தி³யே ந ஒத்த²ரெய்ய ந அபி⁴ப⁴வெய்ய, தங் நிப்³பு³திங் அமதமஹானிப்³பா³னங் பரியேஸிஸ்ஸாமீதி.
31.Ukkaṇṭhitomhi kāyenāti aparimuttagabbhavāsādinā pūtikāyena ukkaṇṭhito nibbinno amhi. Rajjenamhi anatthikoti rajjenapi anatthiko amhi. Yakkhiniyā hatthato muttopi hi nāhaṃ ajarāmaro, kiṃ me rajjena, rajjañhi nāma sabbesaṃ anatthānaṃ sannipātaṭṭhānaṃ, tattha ṭhitakālato paṭṭhāya dunnikkhamaṃ hoti, tasmā taṃ anupagantvā nibbutiṃ pariyesissaṃ, yattha maṃ maccu na maddiyeti yattha ṭhitaṃ maṃ mahāseno maccurājā na maddiye na otthareyya na abhibhaveyya, taṃ nibbutiṃ amatamahānibbānaṃ pariyesissāmīti.
32. ஏவாஹங் சிந்தயித்வானாதி ஏவங் இமினா வுத்தப்பகாரேன நானப்பகாரங் ஸங்ஸாரே ஆதீ³னவங் பச்சவெக்க²ணேன நிப்³பா³னே ஆனிஸங்ஸத³ஸ்ஸனேன ச யோனிஸோ சிந்தெத்வா. விரவந்தே மஹாஜனேதி மயா விப்பயோக³து³க்கா²ஸஹனேன விரவந்தே பரிதே³வந்தே மாதாபிதுப்பமுகே² மஹந்தே ஜனே. நாகோ³வ ப³ந்த⁴னங் செ²த்வாதி யதா² நாம மஹாப³லோ ஹத்தி²னாகோ³ து³ப்³ப³லதரங் ரஜ்ஜுப³ந்த⁴னங் ஸுகே²னேவ சி²ந்த³தி, ஏவமேவ ஞாதிஸங்கா³தி³பே⁴த³ஸ்ஸ தஸ்மிங் ஜனே தண்ஹாப³ந்த⁴னஸ்ஸ சி²ந்த³னேன ப³ந்த⁴னங் செ²த்வா கானநஸங்கா²தங் மஹாவனங் பப்³ப³ஜ்ஜூபக³மனவஸேன பாவிஸிங். ஓஸானகா³தா² வுத்தத்தா² ஏவ.
32.Evāhaṃ cintayitvānāti evaṃ iminā vuttappakārena nānappakāraṃ saṃsāre ādīnavaṃ paccavekkhaṇena nibbāne ānisaṃsadassanena ca yoniso cintetvā. Viravante mahājaneti mayā vippayogadukkhāsahanena viravante paridevante mātāpituppamukhe mahante jane. Nāgova bandhanaṃ chetvāti yathā nāma mahābalo hatthināgo dubbalataraṃ rajjubandhanaṃ sukheneva chindati, evameva ñātisaṅgādibhedassa tasmiṃ jane taṇhābandhanassa chindanena bandhanaṃ chetvā kānanasaṅkhātaṃ mahāvanaṃ pabbajjūpagamanavasena pāvisiṃ. Osānagāthā vuttatthā eva.
தத்த² ச மஹாஸத்தோ அத்தனோ பப்³ப³ஜ்ஜாதி⁴ப்பாயங் ஜானித்வா ‘‘தாத, கிங்காரணா பப்³ப³ஜஸீ’’தி ரஞ்ஞா வுத்தோ ‘‘தே³வ, அஹங் மாதுகுச்சி²ம்ஹி த³ஸ மாஸே கூ³த²னிரயே விய வஸித்வா மாது குச்சி²தோ நிக்க²ந்தோ யக்கி²னியா ப⁴யேன ஸோளஸவஸ்ஸானி ப³ந்த⁴னாகா³ரே வஸந்தோ ப³ஹி ஓலோகேதும்பி ந லபி⁴ங், உஸ்ஸத³னிரயே பக்கி²த்தோ விய அஹோஸிங், யக்கி²னிதோ முத்தோபி அஜராமரோ ந ஹோமி, மச்சு நாமேஸ ந ஸக்கா கேனசி ஜினிதுங், ப⁴வே உக்கண்டி²தொம்ஹி, யாவ மே ப்³யாதி⁴ஜராமரணானி நாக³ச்ச²ந்தி, தாவதே³வ பப்³ப³ஜித்வா த⁴ம்மங் சரிஸ்ஸாமி, அலங் மே ரஜ்ஜேன, அனுஜானாஹி மங், தே³வ, பப்³ப³ஜிது’’ந்தி வத்வா –
Tattha ca mahāsatto attano pabbajjādhippāyaṃ jānitvā ‘‘tāta, kiṃkāraṇā pabbajasī’’ti raññā vutto ‘‘deva, ahaṃ mātukucchimhi dasa māse gūthaniraye viya vasitvā mātu kucchito nikkhanto yakkhiniyā bhayena soḷasavassāni bandhanāgāre vasanto bahi oloketumpi na labhiṃ, ussadaniraye pakkhitto viya ahosiṃ, yakkhinito muttopi ajarāmaro na homi, maccu nāmesa na sakkā kenaci jinituṃ, bhave ukkaṇṭhitomhi, yāva me byādhijarāmaraṇāni nāgacchanti, tāvadeva pabbajitvā dhammaṃ carissāmi, alaṃ me rajjena, anujānāhi maṃ, deva, pabbajitu’’nti vatvā –
‘‘யமேகரத்திங் பட²மங், க³ப்³பே⁴ வஸதி மாணவோ;
‘‘Yamekarattiṃ paṭhamaṃ, gabbhe vasati māṇavo;
அப்³பு⁴ட்டி²தோவ ஸோ யாதி, ஸ க³ச்ச²ங் ந நிவத்ததீ’’தி. (ஜா॰ 1.15.363) –
Abbhuṭṭhitova so yāti, sa gacchaṃ na nivattatī’’ti. (jā. 1.15.363) –
ஆதி³னா சதுவீஸதியா கா³தா²ஹி பிது த⁴ம்மங் தே³ஸெத்வா ‘‘மஹாராஜ, தும்ஹாகங் ரஜ்ஜங் தும்ஹாகமேவ ஹோது, ந மய்ஹங் இமினா அத்தோ², தும்ஹேஹி ஸத்³தி⁴ங் கதெ²ந்தேயேவ ப்³யாதி⁴ஜராமரணானி ஆக³ச்செ²ய்யுங், திட்ட²த² தும்ஹே’’தி வத்வா அயதா³மங் சி²ந்தி³த்வா மத்தஹத்தீ² விய, கஞ்சனபஞ்ஜரங் பி⁴ந்தி³த்வா ஸீஹபோதகோ விய, காமே பஹாய மாதாபிதரோ வந்தி³த்வா நிக்க²மி. அத²ஸ்ஸ பிதா ‘‘அயங் நாம குமாரோ பப்³ப³ஜிதுகாமோ, கிமங்க³ங் பனாஹங், மமாபி ரஜ்ஜேன அத்தோ² நத்தீ²’’தி ரஜ்ஜங் பஹாய தேன ஸத்³தி⁴ங் ஏவ நிக்க²மி. தஸ்மிங் நிக்க²மந்தே தே³வீபி அமச்சாபி ப்³ராஹ்மணக³ஹபதிகாத³யோபீதி ஸகலனக³ரவாஸினோ போ⁴கே³ ச²ட்³டெ³த்வா நிக்க²மிங்ஸு. ஸமாக³மோ மஹா அஹோஸி, பரிஸா த்³வாத³ஸயோஜனிகா ஜாதா, தே ஆதா³ய மஹாஸத்தோ ஹிமவந்தங் பாவிஸி.
Ādinā catuvīsatiyā gāthāhi pitu dhammaṃ desetvā ‘‘mahārāja, tumhākaṃ rajjaṃ tumhākameva hotu, na mayhaṃ iminā attho, tumhehi saddhiṃ kathenteyeva byādhijarāmaraṇāni āgaccheyyuṃ, tiṭṭhatha tumhe’’ti vatvā ayadāmaṃ chinditvā mattahatthī viya, kañcanapañjaraṃ bhinditvā sīhapotako viya, kāme pahāya mātāpitaro vanditvā nikkhami. Athassa pitā ‘‘ayaṃ nāma kumāro pabbajitukāmo, kimaṅgaṃ panāhaṃ, mamāpi rajjena attho natthī’’ti rajjaṃ pahāya tena saddhiṃ eva nikkhami. Tasmiṃ nikkhamante devīpi amaccāpi brāhmaṇagahapatikādayopīti sakalanagaravāsino bhoge chaḍḍetvā nikkhamiṃsu. Samāgamo mahā ahosi, parisā dvādasayojanikā jātā, te ādāya mahāsatto himavantaṃ pāvisi.
ஸக்கோ தே³வராஜா தஸ்ஸ நிக்க²ந்தபா⁴வங் ஞத்வா விஸ்ஸகம்மங் பேஸெத்வா த்³வாத³ஸயோஜனாயாமங் ஸத்தயோஜனவித்தா²ரங் அஸ்ஸமபத³ங் காரேஸி, ஸப்³பே³ ச பப்³ப³ஜிதபரிக்கா²ரே படியாதா³பேஸி. இத⁴ மஹாஸத்தஸ்ஸ பப்³ப³ஜ்ஜா ச ஓவாத³தா³னஞ்ச ப்³ரஹ்மலோகபராயனதா ச பரிஸாய ஸம்மா படிபத்தி ச ஸப்³பா³ மஹாகோ³விந்த³சரியாயங் (சரியா॰ 1.37 ஆத³யோ) வுத்தனயேனேவ வேதி³தப்³பா³.
Sakko devarājā tassa nikkhantabhāvaṃ ñatvā vissakammaṃ pesetvā dvādasayojanāyāmaṃ sattayojanavitthāraṃ assamapadaṃ kāresi, sabbe ca pabbajitaparikkhāre paṭiyādāpesi. Idha mahāsattassa pabbajjā ca ovādadānañca brahmalokaparāyanatā ca parisāya sammā paṭipatti ca sabbā mahāgovindacariyāyaṃ (cariyā. 1.37 ādayo) vuttanayeneva veditabbā.
ததா³ மாதாபிதரோ மஹாராஜகுலானி அஹேஸுங், பரிஸா பு³த்³த⁴பரிஸா, அயோக⁴ரபண்டி³தோ லோகனாதோ².
Tadā mātāpitaro mahārājakulāni ahesuṃ, parisā buddhaparisā, ayogharapaṇḍito lokanātho.
தஸ்ஸ ஸேஸபாரமினித்³தா⁴ரணா ஆனுபா⁴வவிபா⁴வனா ச ஹெட்டா² வுத்தனயேனேவ வேதி³தப்³பா³தி.
Tassa sesapāraminiddhāraṇā ānubhāvavibhāvanā ca heṭṭhā vuttanayeneva veditabbāti.
அயோக⁴ரசரியாவண்ணனா நிட்டி²தா.
Ayogharacariyāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 3. அயோக⁴ரசரியா • 3. Ayogharacariyā
