| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. அயோகு³ளஸுத்தங்
2. Ayoguḷasuttaṃ
834. ஸாவத்தி²னிதா³னங். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘அபி⁴ஜானாதி நு கோ², ப⁴ந்தே, ப⁴க³வா இத்³தி⁴யா மனோமயேன காயேன ப்³ரஹ்மலோகங் உபஸங்கமிதா’’தி? ‘‘அபி⁴ஜானாமி க்²வாஹங், ஆனந்த³, இத்³தி⁴யா மனோமயேன காயேன ப்³ரஹ்மலோகங் உபஸங்கமிதா’’தி. ‘‘அபி⁴ஜானாதி பன, ப⁴ந்தே, ப⁴க³வா இமினா சாதுமஹாபூ⁴திகேன காயேன இத்³தி⁴யா ப்³ரஹ்மலோகங் உபஸங்கமிதா’’தி ? ‘‘அபி⁴ஜானாமி க்²வாஹங், ஆனந்த³, இமினா சாதுமஹாபூ⁴திகேன 1 காயேன இத்³தி⁴யா ப்³ரஹ்மலோகங் உபஸங்கமிதா’’தி.
834. Sāvatthinidānaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘abhijānāti nu kho, bhante, bhagavā iddhiyā manomayena kāyena brahmalokaṃ upasaṅkamitā’’ti? ‘‘Abhijānāmi khvāhaṃ, ānanda, iddhiyā manomayena kāyena brahmalokaṃ upasaṅkamitā’’ti. ‘‘Abhijānāti pana, bhante, bhagavā iminā cātumahābhūtikena kāyena iddhiyā brahmalokaṃ upasaṅkamitā’’ti ? ‘‘Abhijānāmi khvāhaṃ, ānanda, iminā cātumahābhūtikena 2 kāyena iddhiyā brahmalokaṃ upasaṅkamitā’’ti.
‘‘யஞ்ச கோ², ஓமாதி, ப⁴ந்தே, ப⁴க³வா இத்³தி⁴யா மனோமயேன காயேன ப்³ரஹ்மலோகங் உபஸங்கமிதுங், யஞ்ச கோ² அபி⁴ஜானாதி, ப⁴ந்தே, ப⁴க³வா இமினா சாதுமஹாபூ⁴திகேன காயேன இத்³தி⁴யா ப்³ரஹ்மலோகங் உபஸங்கமிதா , தயித³ங், ப⁴ந்தே, ப⁴க³வதோ அச்ச²ரியஞ்சேவ அப்³பு⁴தஞ்சா’’தி. ‘‘அச்ச²ரியா சேவ, ஆனந்த³, ததா²க³தா அச்ச²ரியத⁴ம்மஸமன்னாக³தா ச, அப்³பு⁴தா சேவ, ஆனந்த³, ததா²க³தா அப்³பு⁴தத⁴ம்மஸமன்னாக³தா ச’’.
‘‘Yañca kho, omāti, bhante, bhagavā iddhiyā manomayena kāyena brahmalokaṃ upasaṅkamituṃ, yañca kho abhijānāti, bhante, bhagavā iminā cātumahābhūtikena kāyena iddhiyā brahmalokaṃ upasaṅkamitā , tayidaṃ, bhante, bhagavato acchariyañceva abbhutañcā’’ti. ‘‘Acchariyā ceva, ānanda, tathāgatā acchariyadhammasamannāgatā ca, abbhutā ceva, ānanda, tathāgatā abbhutadhammasamannāgatā ca’’.
‘‘யஸ்மிங், ஆனந்த³, ஸமயே ததா²க³தோ காயம்பி சித்தே ஸமோத³ஹதி 3 சித்தம்பி காயே ஸமோத³ஹதி, ஸுக²ஸஞ்ஞஞ்ச லஹுஸஞ்ஞஞ்ச காயே ஓக்கமித்வா விஹரதி; தஸ்மிங், ஆனந்த³, ஸமயே ததா²க³தஸ்ஸ காயோ லஹுதரோ சேவ ஹோதி முது³தரோ ச கம்மனியதரோ ச பப⁴ஸ்ஸரதரோ ச.
‘‘Yasmiṃ, ānanda, samaye tathāgato kāyampi citte samodahati 4 cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo lahutaro ceva hoti mudutaro ca kammaniyataro ca pabhassarataro ca.
‘‘ஸெய்யதா²பி, ஆனந்த³, அயோகு³ளோ தி³வஸங் ஸந்தத்தோ லஹுதரோ சேவ ஹோதி முது³தரோ ச கம்மனியதரோ ச பப⁴ஸ்ஸரதரோ ச; ஏவமேவ கோ², ஆனந்த³, யஸ்மிங் ஸமயே ததா²க³தோ காயம்பி சித்தே ஸமோத³ஹதி, சித்தம்பி காயே ஸமோத³ஹதி, ஸுக²ஸஞ்ஞஞ்ச லஹுஸஞ்ஞஞ்ச காயே ஓக்கமித்வா விஹரதி; தஸ்மிங், ஆனந்த³, ஸமயே ததா²க³தஸ்ஸ காயோ லஹுதரோ சேவ ஹோதி முது³தரோ ச கம்மனியதரோ ச பப⁴ஸ்ஸரதரோ ச.
‘‘Seyyathāpi, ānanda, ayoguḷo divasaṃ santatto lahutaro ceva hoti mudutaro ca kammaniyataro ca pabhassarataro ca; evameva kho, ānanda, yasmiṃ samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo lahutaro ceva hoti mudutaro ca kammaniyataro ca pabhassarataro ca.
‘‘யஸ்மிங், ஆனந்த³, ஸமயே ததா²க³தோ காயம்பி சித்தே ஸமோத³ஹதி, சித்தம்பி காயே ஸமோத³ஹதி, ஸுக²ஸஞ்ஞஞ்ச லஹுஸஞ்ஞஞ்ச காயே ஓக்கமித்வா விஹரதி; தஸ்மிங், ஆனந்த³, ஸமயே ததா²க³தஸ்ஸ காயோ அப்பகஸிரேனேவ பத²வியா வேஹாஸங் அப்³பு⁴க்³க³ச்ச²தி, ஸோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி…பே॰… யாவ ப்³ரஹ்மலோகாபி காயேன வஸங் வத்தேதி.
‘‘Yasmiṃ, ānanda, samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo appakasireneva pathaviyā vehāsaṃ abbhuggacchati, so anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti…pe… yāva brahmalokāpi kāyena vasaṃ vatteti.
‘‘ஸெய்யதா²பி , ஆனந்த³, தூலபிசு வா கப்பாஸபிசு வா லஹுகோ வாதூபாதா³னோ அப்பகஸிரேனேவ பத²வியா வேஹாஸங் அப்³பு⁴க்³க³ச்ச²தி; ஏவமேவ கோ², ஆனந்த³, யஸ்மிங் ஸமயே ததா²க³தோ காயம்பி சித்தே ஸமோத³ஹதி, சித்தம்பி காயே ஸமோத³ஹதி, ஸுக²ஸஞ்ஞஞ்ச லஹுஸஞ்ஞஞ்ச காயே ஓக்கமித்வா விஹரதி; தஸ்மிங், ஆனந்த³, ஸமயே ததா²க³தஸ்ஸ காயோ அப்பகஸிரேனேவ பத²வியா வேஹாஸங் அப்³பு⁴க்³க³ச்ச²தி, ஸோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி…பே॰… யாவ ப்³ரஹ்மலோகாபி காயேன வஸங் வத்தேதீ’’தி. து³தியங்.
‘‘Seyyathāpi , ānanda, tūlapicu vā kappāsapicu vā lahuko vātūpādāno appakasireneva pathaviyā vehāsaṃ abbhuggacchati; evameva kho, ānanda, yasmiṃ samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo appakasireneva pathaviyā vehāsaṃ abbhuggacchati, so anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vattetī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. அயோகு³ளஸுத்தவண்ணனா • 2. Ayoguḷasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அயோகு³ளஸுத்தவண்ணனா • 2. Ayoguḷasuttavaṇṇanā
