| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. අයොගුළසුත්‌තං
2. Ayoguḷasuttaṃ
834. සාවත්‌ථිනිදානං. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච – ‘‘අභිජානාති නු ඛො, භන්‌තෙ, භගවා ඉද්‌ධියා මනොමයෙන කායෙන බ්‍රහ්‌මලොකං උපසඞ්‌කමිතා’’ති? ‘‘අභිජානාමි ඛ්‌වාහං, ආනන්‌ද, ඉද්‌ධියා මනොමයෙන කායෙන බ්‍රහ්‌මලොකං උපසඞ්‌කමිතා’’ති. ‘‘අභිජානාති පන, භන්‌තෙ, භගවා ඉමිනා චාතුමහාභූතිකෙන කායෙන ඉද්‌ධියා බ්‍රහ්‌මලොකං උපසඞ්‌කමිතා’’ති ? ‘‘අභිජානාමි ඛ්‌වාහං, ආනන්‌ද, ඉමිනා චාතුමහාභූතිකෙන 1 කායෙන ඉද්‌ධියා බ්‍රහ්‌මලොකං උපසඞ්‌කමිතා’’ති.
834. Sāvatthinidānaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘abhijānāti nu kho, bhante, bhagavā iddhiyā manomayena kāyena brahmalokaṃ upasaṅkamitā’’ti? ‘‘Abhijānāmi khvāhaṃ, ānanda, iddhiyā manomayena kāyena brahmalokaṃ upasaṅkamitā’’ti. ‘‘Abhijānāti pana, bhante, bhagavā iminā cātumahābhūtikena kāyena iddhiyā brahmalokaṃ upasaṅkamitā’’ti ? ‘‘Abhijānāmi khvāhaṃ, ānanda, iminā cātumahābhūtikena 2 kāyena iddhiyā brahmalokaṃ upasaṅkamitā’’ti.
‘‘යඤ්‌ච ඛො, ඔමාති, භන්‌තෙ, භගවා ඉද්‌ධියා මනොමයෙන කායෙන බ්‍රහ්‌මලොකං උපසඞ්‌කමිතුං, යඤ්‌ච ඛො අභිජානාති, භන්‌තෙ, භගවා ඉමිනා චාතුමහාභූතිකෙන කායෙන ඉද්‌ධියා බ්‍රහ්‌මලොකං උපසඞ්‌කමිතා , තයිදං, භන්‌තෙ, භගවතො අච්‌ඡරියඤ්‌චෙව අබ්‌භුතඤ්‌චා’’ති. ‘‘අච්‌ඡරියා චෙව, ආනන්‌ද, තථාගතා අච්‌ඡරියධම්‌මසමන්‌නාගතා ච, අබ්‌භුතා චෙව, ආනන්‌ද, තථාගතා අබ්‌භුතධම්‌මසමන්‌නාගතා ච’’.
‘‘Yañca kho, omāti, bhante, bhagavā iddhiyā manomayena kāyena brahmalokaṃ upasaṅkamituṃ, yañca kho abhijānāti, bhante, bhagavā iminā cātumahābhūtikena kāyena iddhiyā brahmalokaṃ upasaṅkamitā , tayidaṃ, bhante, bhagavato acchariyañceva abbhutañcā’’ti. ‘‘Acchariyā ceva, ānanda, tathāgatā acchariyadhammasamannāgatā ca, abbhutā ceva, ānanda, tathāgatā abbhutadhammasamannāgatā ca’’.
‘‘යස්‌මිං, ආනන්‌ද, සමයෙ තථාගතො කායම්‌පි චිත්‌තෙ සමොදහති 3 චිත්‌තම්‌පි කායෙ සමොදහති, සුඛසඤ්‌ඤඤ්‌ච ලහුසඤ්‌ඤඤ්‌ච කායෙ ඔක්‌කමිත්‌වා විහරති; තස්‌මිං, ආනන්‌ද, සමයෙ තථාගතස්‌ස කායො ලහුතරො චෙව හොති මුදුතරො ච කම්‌මනියතරො ච පභස්‌සරතරො ච.
‘‘Yasmiṃ, ānanda, samaye tathāgato kāyampi citte samodahati 4 cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo lahutaro ceva hoti mudutaro ca kammaniyataro ca pabhassarataro ca.
‘‘සෙය්‍යථාපි, ආනන්‌ද, අයොගුළො දිවසං සන්‌තත්‌තො ලහුතරො චෙව හොති මුදුතරො ච කම්‌මනියතරො ච පභස්‌සරතරො ච; එවමෙව ඛො, ආනන්‌ද, යස්‌මිං සමයෙ තථාගතො කායම්‌පි චිත්‌තෙ සමොදහති, චිත්‌තම්‌පි කායෙ සමොදහති, සුඛසඤ්‌ඤඤ්‌ච ලහුසඤ්‌ඤඤ්‌ච කායෙ ඔක්‌කමිත්‌වා විහරති; තස්‌මිං, ආනන්‌ද, සමයෙ තථාගතස්‌ස කායො ලහුතරො චෙව හොති මුදුතරො ච කම්‌මනියතරො ච පභස්‌සරතරො ච.
‘‘Seyyathāpi, ānanda, ayoguḷo divasaṃ santatto lahutaro ceva hoti mudutaro ca kammaniyataro ca pabhassarataro ca; evameva kho, ānanda, yasmiṃ samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo lahutaro ceva hoti mudutaro ca kammaniyataro ca pabhassarataro ca.
‘‘යස්‌මිං, ආනන්‌ද, සමයෙ තථාගතො කායම්‌පි චිත්‌තෙ සමොදහති, චිත්‌තම්‌පි කායෙ සමොදහති, සුඛසඤ්‌ඤඤ්‌ච ලහුසඤ්‌ඤඤ්‌ච කායෙ ඔක්‌කමිත්‌වා විහරති; තස්‌මිං, ආනන්‌ද, සමයෙ තථාගතස්‌ස කායො අප්‌පකසිරෙනෙව පථවියා වෙහාසං අබ්‌භුග්‌ගච්‌ඡති, සො අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති, බහුධාපි හුත්‌වා එකො හොති…පෙ.… යාව බ්‍රහ්‌මලොකාපි කායෙන වසං වත්‌තෙති.
‘‘Yasmiṃ, ānanda, samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo appakasireneva pathaviyā vehāsaṃ abbhuggacchati, so anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti…pe… yāva brahmalokāpi kāyena vasaṃ vatteti.
‘‘සෙය්‍යථාපි , ආනන්‌ද, තූලපිචු වා කප්‌පාසපිචු වා ලහුකො වාතූපාදානො අප්‌පකසිරෙනෙව පථවියා වෙහාසං අබ්‌භුග්‌ගච්‌ඡති; එවමෙව ඛො, ආනන්‌ද, යස්‌මිං සමයෙ තථාගතො කායම්‌පි චිත්‌තෙ සමොදහති, චිත්‌තම්‌පි කායෙ සමොදහති, සුඛසඤ්‌ඤඤ්‌ච ලහුසඤ්‌ඤඤ්‌ච කායෙ ඔක්‌කමිත්‌වා විහරති; තස්‌මිං, ආනන්‌ද, සමයෙ තථාගතස්‌ස කායො අප්‌පකසිරෙනෙව පථවියා වෙහාසං අබ්‌භුග්‌ගච්‌ඡති, සො අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති…පෙ.… යාව බ්‍රහ්‌මලොකාපි කායෙන වසං වත්‌තෙතී’’ති. දුතියං.
‘‘Seyyathāpi , ānanda, tūlapicu vā kappāsapicu vā lahuko vātūpādāno appakasireneva pathaviyā vehāsaṃ abbhuggacchati; evameva kho, ānanda, yasmiṃ samaye tathāgato kāyampi citte samodahati, cittampi kāye samodahati, sukhasaññañca lahusaññañca kāye okkamitvā viharati; tasmiṃ, ānanda, samaye tathāgatassa kāyo appakasireneva pathaviyā vehāsaṃ abbhuggacchati, so anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vattetī’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. අයොගුළසුත්‌තවණ්‌ණනා • 2. Ayoguḷasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. අයොගුළසුත්‌තවණ්‌ණනා • 2. Ayoguḷasuttavaṇṇanā
