| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. அயோகு³ளவக்³கோ³
3. Ayoguḷavaggo
2. அயோகு³ளஸுத்தவண்ணனா
2. Ayoguḷasuttavaṇṇanā
834. ததியவக்³க³ஸ்ஸ து³தியே இமினா சாதுமஹாபூ⁴திகேனாதி இமினா சதுமஹாபூ⁴தமயேன ஏவங் பா⁴ரிகேன க³ருகேன ஸமானேனாபி. ஓமாதீதி பஹோதி ஸக்கோதி, இத³ங் தேபிடகே பு³த்³த⁴வசனே அஸம்பி⁴ன்னபத³ங். காயம்பி சித்தே ஸமோத³ஹதீதி காயங் க³ஹெத்வா சித்தே ஆரோபேதி, சித்தஸன்னிஸ்ஸிதங் கரோதி, சித்தக³தியா பேஸேதி. சித்தங் நாம மஹக்³க³தசித்தங், சித்தக³திக³மனங் லஹுகங் ஹோதி. சித்தம்பி காயே ஸமோத³ஹதீதி சித்தங் க³ஹெத்வா காயே ஆரோபேதி, காயஸன்னிஸ்ஸிதங் கரோதி, காயக³தியா பேஸேதி, காயோ நாம கரஜகாயோ, காயக³திக³மனங் த³ந்த⁴ங் ஹோதி. ஸுக²ஸஞ்ஞஞ்ச லஹுஸஞ்ஞஞ்சாதி அபி⁴ஞ்ஞாசித்தஸஹஜாதஸஞ்ஞா. ஸா ஹி ஸந்தஸுக²ஸமன்னாக³தத்தா ஸுக²ஸஞ்ஞா நாம ஹோதி, கிலேஸத³ந்தா⁴யிதத்தஸ்ஸ ச அபா⁴வா லஹுஸஞ்ஞா நாம.
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
அயோகு³ளோ தி³வஸங் ஸந்தத்தோ லஹுதரோ சேவ ஹோதீதி ஸோ ஹி த்³வீஹி தீஹி ஜனேஹி உக்கி²பித்வா கம்மாருத்³த⁴னே பக்கி²த்தோபி தி³வஸங் பச்சமானோ விவரானுபவிட்டே²ன தேஜேன சேவ வாயேன ச வாயோஸஹக³தோ ச உஸ்மாஸஹக³தோ ச தேஜோஸஹக³தோ ச ஹுத்வா ஏவங் லஹுகோ ஹோதி, யதா² நங் கம்மாரோ மஹாஸண்டா³ஸேன க³ஹெத்வா ஏகதோ பரிவத்தேதி உக்கி²பதி ப³ஹி நீஹரதி. ஏவங் பன முது³ ச ஹோதி கம்மனியோ ச. யதா² நங் ஸோ க²ண்ட³ங் க²ண்ட³ங் விச்சி²ந்த³தி, கூடேன ஹனந்தோ தீ³க⁴சதுரஸ்ஸாதி³பே⁴த³ங் கரோதி. இமஸ்மிங் ஸுத்தே விகுப்³ப³னித்³தி⁴ கதி²தா.
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. அயோகு³ளஸுத்தங் • 2. Ayoguḷasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அயோகு³ளஸுத்தவண்ணனா • 2. Ayoguḷasuttavaṇṇanā
