| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. অযোগুল়ৰগ্গো
3. Ayoguḷavaggo
২. অযোগুল়সুত্তৰণ্ণনা
2. Ayoguḷasuttavaṇṇanā
৮৩৪. ততিযৰগ্গস্স দুতিযে ইমিনা চাতুমহাভূতিকেনাতি ইমিনা চতুমহাভূতমযেন এৰং ভারিকেন গরুকেন সমানেনাপি। ওমাতীতি পহোতি সক্কোতি, ইদং তেপিটকে বুদ্ধৰচনে অসম্ভিন্নপদং। কাযম্পি চিত্তে সমোদহতীতি কাযং গহেত্ৰা চিত্তে আরোপেতি, চিত্তসন্নিস্সিতং করোতি, চিত্তগতিযা পেসেতি। চিত্তং নাম মহগ্গতচিত্তং, চিত্তগতিগমনং লহুকং হোতি। চিত্তম্পি কাযে সমোদহতীতি চিত্তং গহেত্ৰা কাযে আরোপেতি, কাযসন্নিস্সিতং করোতি, কাযগতিযা পেসেতি, কাযো নাম করজকাযো, কাযগতিগমনং দন্ধং হোতি। সুখসঞ্ঞঞ্চ লহুসঞ্ঞঞ্চাতি অভিঞ্ঞাচিত্তসহজাতসঞ্ঞা। সা হি সন্তসুখসমন্নাগতত্তা সুখসঞ্ঞা নাম হোতি, কিলেসদন্ধাযিতত্তস্স চ অভাৰা লহুসঞ্ঞা নাম।
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
অযোগুল়ো দিৰসং সন্তত্তো লহুতরো চেৰ হোতীতি সো হি দ্ৰীহি তীহি জনেহি উক্খিপিত্ৰা কম্মারুদ্ধনে পক্খিত্তোপি দিৰসং পচ্চমানো ৰিৰরানুপৰিট্ঠেন তেজেন চেৰ ৰাযেন চ ৰাযোসহগতো চ উস্মাসহগতো চ তেজোসহগতো চ হুত্ৰা এৰং লহুকো হোতি, যথা নং কম্মারো মহাসণ্ডাসেন গহেত্ৰা একতো পরিৰত্তেতি উক্খিপতি বহি নীহরতি। এৰং পন মুদু চ হোতি কম্মনিযো চ। যথা নং সো খণ্ডং খণ্ডং ৰিচ্ছিন্দতি, কূটেন হনন্তো দীঘচতুরস্সাদিভেদং করোতি। ইমস্মিং সুত্তে ৰিকুব্বনিদ্ধি কথিতা।
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. অযোগুল়সুত্তং • 2. Ayoguḷasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. অযোগুল়সুত্তৰণ্ণনা • 2. Ayoguḷasuttavaṇṇanā
