| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៣. អយោគុឡវគ្គោ
3. Ayoguḷavaggo
២. អយោគុឡសុត្តវណ្ណនា
2. Ayoguḷasuttavaṇṇanā
៨៣៤. តតិយវគ្គស្ស ទុតិយេ ឥមិនា ចាតុមហាភូតិកេនាតិ ឥមិនា ចតុមហាភូតមយេន ឯវំ ភារិកេន គរុកេន សមានេនាបិ។ ឱមាតីតិ បហោតិ សក្កោតិ, ឥទំ តេបិដកេ ពុទ្ធវចនេ អសម្ភិន្នបទំ។ កាយម្បិ ចិត្តេ សមោទហតីតិ កាយំ គហេត្វា ចិត្តេ អារោបេតិ, ចិត្តសន្និស្សិតំ ករោតិ, ចិត្តគតិយា បេសេតិ។ ចិត្តំ នាម មហគ្គតចិត្តំ, ចិត្តគតិគមនំ លហុកំ ហោតិ។ ចិត្តម្បិ កាយេ សមោទហតីតិ ចិត្តំ គហេត្វា កាយេ អារោបេតិ, កាយសន្និស្សិតំ ករោតិ, កាយគតិយា បេសេតិ, កាយោ នាម ករជកាយោ, កាយគតិគមនំ ទន្ធំ ហោតិ។ សុខសញ្ញញ្ច លហុសញ្ញញ្ចាតិ អភិញ្ញាចិត្តសហជាតសញ្ញា។ សា ហិ សន្តសុខសមន្នាគតត្តា សុខសញ្ញា នាម ហោតិ, កិលេសទន្ធាយិតត្តស្ស ច អភាវា លហុសញ្ញា នាម។
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
អយោគុឡោ ទិវសំ សន្តត្តោ លហុតរោ ចេវ ហោតីតិ សោ ហិ ទ្វីហិ តីហិ ជនេហិ ឧក្ខិបិត្វា កម្មារុទ្ធនេ បក្ខិត្តោបិ ទិវសំ បច្ចមានោ វិវរានុបវិដ្ឋេន តេជេន ចេវ វាយេន ច វាយោសហគតោ ច ឧស្មាសហគតោ ច តេជោសហគតោ ច ហុត្វា ឯវំ លហុកោ ហោតិ, យថា នំ កម្មារោ មហាសណ្ឌាសេន គហេត្វា ឯកតោ បរិវត្តេតិ ឧក្ខិបតិ ពហិ នីហរតិ។ ឯវំ បន មុទុ ច ហោតិ កម្មនិយោ ច។ យថា នំ សោ ខណ្ឌំ ខណ្ឌំ វិច្ឆិន្ទតិ, កូដេន ហនន្តោ ទីឃចតុរស្សាទិភេទំ ករោតិ។ ឥមស្មិំ សុត្តេ វិកុព្ពនិទ្ធិ កថិតា។
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. អយោគុឡសុត្តំ • 2. Ayoguḷasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២. អយោគុឡសុត្តវណ្ណនា • 2. Ayoguḷasuttavaṇṇanā
