| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೩. ಅಯೋಗುಳವಗ್ಗೋ
3. Ayoguḷavaggo
೨. ಅಯೋಗುಳಸುತ್ತವಣ್ಣನಾ
2. Ayoguḷasuttavaṇṇanā
೮೩೪. ತತಿಯವಗ್ಗಸ್ಸ ದುತಿಯೇ ಇಮಿನಾ ಚಾತುಮಹಾಭೂತಿಕೇನಾತಿ ಇಮಿನಾ ಚತುಮಹಾಭೂತಮಯೇನ ಏವಂ ಭಾರಿಕೇನ ಗರುಕೇನ ಸಮಾನೇನಾಪಿ। ಓಮಾತೀತಿ ಪಹೋತಿ ಸಕ್ಕೋತಿ, ಇದಂ ತೇಪಿಟಕೇ ಬುದ್ಧವಚನೇ ಅಸಮ್ಭಿನ್ನಪದಂ। ಕಾಯಮ್ಪಿ ಚಿತ್ತೇ ಸಮೋದಹತೀತಿ ಕಾಯಂ ಗಹೇತ್ವಾ ಚಿತ್ತೇ ಆರೋಪೇತಿ, ಚಿತ್ತಸನ್ನಿಸ್ಸಿತಂ ಕರೋತಿ, ಚಿತ್ತಗತಿಯಾ ಪೇಸೇತಿ। ಚಿತ್ತಂ ನಾಮ ಮಹಗ್ಗತಚಿತ್ತಂ, ಚಿತ್ತಗತಿಗಮನಂ ಲಹುಕಂ ಹೋತಿ। ಚಿತ್ತಮ್ಪಿ ಕಾಯೇ ಸಮೋದಹತೀತಿ ಚಿತ್ತಂ ಗಹೇತ್ವಾ ಕಾಯೇ ಆರೋಪೇತಿ, ಕಾಯಸನ್ನಿಸ್ಸಿತಂ ಕರೋತಿ, ಕಾಯಗತಿಯಾ ಪೇಸೇತಿ, ಕಾಯೋ ನಾಮ ಕರಜಕಾಯೋ, ಕಾಯಗತಿಗಮನಂ ದನ್ಧಂ ಹೋತಿ। ಸುಖಸಞ್ಞಞ್ಚ ಲಹುಸಞ್ಞಞ್ಚಾತಿ ಅಭಿಞ್ಞಾಚಿತ್ತಸಹಜಾತಸಞ್ಞಾ। ಸಾ ಹಿ ಸನ್ತಸುಖಸಮನ್ನಾಗತತ್ತಾ ಸುಖಸಞ್ಞಾ ನಾಮ ಹೋತಿ, ಕಿಲೇಸದನ್ಧಾಯಿತತ್ತಸ್ಸ ಚ ಅಭಾವಾ ಲಹುಸಞ್ಞಾ ನಾಮ।
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
ಅಯೋಗುಳೋ ದಿವಸಂ ಸನ್ತತ್ತೋ ಲಹುತರೋ ಚೇವ ಹೋತೀತಿ ಸೋ ಹಿ ದ್ವೀಹಿ ತೀಹಿ ಜನೇಹಿ ಉಕ್ಖಿಪಿತ್ವಾ ಕಮ್ಮಾರುದ್ಧನೇ ಪಕ್ಖಿತ್ತೋಪಿ ದಿವಸಂ ಪಚ್ಚಮಾನೋ ವಿವರಾನುಪವಿಟ್ಠೇನ ತೇಜೇನ ಚೇವ ವಾಯೇನ ಚ ವಾಯೋಸಹಗತೋ ಚ ಉಸ್ಮಾಸಹಗತೋ ಚ ತೇಜೋಸಹಗತೋ ಚ ಹುತ್ವಾ ಏವಂ ಲಹುಕೋ ಹೋತಿ, ಯಥಾ ನಂ ಕಮ್ಮಾರೋ ಮಹಾಸಣ್ಡಾಸೇನ ಗಹೇತ್ವಾ ಏಕತೋ ಪರಿವತ್ತೇತಿ ಉಕ್ಖಿಪತಿ ಬಹಿ ನೀಹರತಿ। ಏವಂ ಪನ ಮುದು ಚ ಹೋತಿ ಕಮ್ಮನಿಯೋ ಚ। ಯಥಾ ನಂ ಸೋ ಖಣ್ಡಂ ಖಣ್ಡಂ ವಿಚ್ಛಿನ್ದತಿ, ಕೂಟೇನ ಹನನ್ತೋ ದೀಘಚತುರಸ್ಸಾದಿಭೇದಂ ಕರೋತಿ। ಇಮಸ್ಮಿಂ ಸುತ್ತೇ ವಿಕುಬ್ಬನಿದ್ಧಿ ಕಥಿತಾ।
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಅಯೋಗುಳಸುತ್ತಂ • 2. Ayoguḷasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಅಯೋಗುಳಸುತ್ತವಣ್ಣನಾ • 2. Ayoguḷasuttavaṇṇanā
