| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
3. අයොගුළවග්‌ගො
3. Ayoguḷavaggo
2. අයොගුළසුත්‌තවණ්‌ණනා
2. Ayoguḷasuttavaṇṇanā
834. තතියවග්‌ගස්‌ස දුතියෙ ඉමිනා චාතුමහාභූතිකෙනාති ඉමිනා චතුමහාභූතමයෙන එවං භාරිකෙන ගරුකෙන සමානෙනාපි. ඔමාතීති පහොති සක්‌කොති, ඉදං තෙපිටකෙ බුද්‌ධවචනෙ අසම්‌භින්‌නපදං. කායම්‌පි චිත්‌තෙ සමොදහතීති කායං ගහෙත්‌වා චිත්‌තෙ ආරොපෙති, චිත්‌තසන්‌නිස්‌සිතං කරොති, චිත්‌තගතියා පෙසෙති. චිත්‌තං නාම මහග්‌ගතචිත්‌තං, චිත්‌තගතිගමනං ලහුකං හොති. චිත්‌තම්‌පි කායෙ සමොදහතීති චිත්‌තං ගහෙත්‌වා කායෙ ආරොපෙති, කායසන්‌නිස්‌සිතං කරොති, කායගතියා පෙසෙති, කායො නාම කරජකායො, කායගතිගමනං දන්‌ධං හොති. සුඛසඤ්‌ඤඤ්‌ච ලහුසඤ්‌ඤඤ්‌චාති අභිඤ්‌ඤාචිත්‌තසහජාතසඤ්‌ඤා. සා හි සන්‌තසුඛසමන්‌නාගතත්‌තා සුඛසඤ්‌ඤා නාම හොති, කිලෙසදන්‌ධායිතත්‌තස්‌ස ච අභාවා ලහුසඤ්‌ඤා නාම.
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
අයොගුළො දිවසං සන්‌තත්‌තො ලහුතරො චෙව හොතීති සො හි ද්‌වීහි තීහි ජනෙහි උක්‌ඛිපිත්‌වා කම්‌මාරුද්‌ධනෙ පක්‌ඛිත්‌තොපි දිවසං පච්‌චමානො විවරානුපවිට්‌ඨෙන තෙජෙන චෙව වායෙන ච වායොසහගතො ච උස්‌මාසහගතො ච තෙජොසහගතො ච හුත්‌වා එවං ලහුකො හොති, යථා නං කම්‌මාරො මහාසණ්‌ඩාසෙන ගහෙත්‌වා එකතො පරිවත්‌තෙති උක්‌ඛිපති බහි නීහරති. එවං පන මුදු ච හොති කම්‌මනියො ච. යථා නං සො ඛණ්‌ඩං ඛණ්‌ඩං විච්‌ඡින්‌දති, කූටෙන හනන්‌තො දීඝචතුරස්‌සාදිභෙදං කරොති. ඉමස්‌මිං සුත්‌තෙ විකුබ්‌බනිද්‌ධි කථිතා.
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. අයොගුළසුත්‌තං • 2. Ayoguḷasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. අයොගුළසුත්‌තවණ්‌ණනා • 2. Ayoguḷasuttavaṇṇanā
