| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਅਯੋਗੁਲ਼વਗ੍ਗੋ
3. Ayoguḷavaggo
੨. ਅਯੋਗੁਲ਼ਸੁਤ੍ਤવਣ੍ਣਨਾ
2. Ayoguḷasuttavaṇṇanā
੮੩੪. ਤਤਿਯવਗ੍ਗਸ੍ਸ ਦੁਤਿਯੇ ਇਮਿਨਾ ਚਾਤੁਮਹਾਭੂਤਿਕੇਨਾਤਿ ਇਮਿਨਾ ਚਤੁਮਹਾਭੂਤਮਯੇਨ ਏવਂ ਭਾਰਿਕੇਨ ਗਰੁਕੇਨ ਸਮਾਨੇਨਾਪਿ। ਓਮਾਤੀਤਿ ਪਹੋਤਿ ਸਕ੍ਕੋਤਿ, ਇਦਂ ਤੇਪਿਟਕੇ ਬੁਦ੍ਧવਚਨੇ ਅਸਮ੍ਭਿਨ੍ਨਪਦਂ। ਕਾਯਮ੍ਪਿ ਚਿਤ੍ਤੇ ਸਮੋਦਹਤੀਤਿ ਕਾਯਂ ਗਹੇਤ੍વਾ ਚਿਤ੍ਤੇ ਆਰੋਪੇਤਿ, ਚਿਤ੍ਤਸਨ੍ਨਿਸ੍ਸਿਤਂ ਕਰੋਤਿ, ਚਿਤ੍ਤਗਤਿਯਾ ਪੇਸੇਤਿ। ਚਿਤ੍ਤਂ ਨਾਮ ਮਹਗ੍ਗਤਚਿਤ੍ਤਂ, ਚਿਤ੍ਤਗਤਿਗਮਨਂ ਲਹੁਕਂ ਹੋਤਿ। ਚਿਤ੍ਤਮ੍ਪਿ ਕਾਯੇ ਸਮੋਦਹਤੀਤਿ ਚਿਤ੍ਤਂ ਗਹੇਤ੍વਾ ਕਾਯੇ ਆਰੋਪੇਤਿ, ਕਾਯਸਨ੍ਨਿਸ੍ਸਿਤਂ ਕਰੋਤਿ, ਕਾਯਗਤਿਯਾ ਪੇਸੇਤਿ, ਕਾਯੋ ਨਾਮ ਕਰਜਕਾਯੋ, ਕਾਯਗਤਿਗਮਨਂ ਦਨ੍ਧਂ ਹੋਤਿ। ਸੁਖਸਞ੍ਞਞ੍ਚ ਲਹੁਸਞ੍ਞਞ੍ਚਾਤਿ ਅਭਿਞ੍ਞਾਚਿਤ੍ਤਸਹਜਾਤਸਞ੍ਞਾ। ਸਾ ਹਿ ਸਨ੍ਤਸੁਖਸਮਨ੍ਨਾਗਤਤ੍ਤਾ ਸੁਖਸਞ੍ਞਾ ਨਾਮ ਹੋਤਿ, ਕਿਲੇਸਦਨ੍ਧਾਯਿਤਤ੍ਤਸ੍ਸ ਚ ਅਭਾવਾ ਲਹੁਸਞ੍ਞਾ ਨਾਮ।
834. Tatiyavaggassa dutiye iminā cātumahābhūtikenāti iminā catumahābhūtamayena evaṃ bhārikena garukena samānenāpi. Omātīti pahoti sakkoti, idaṃ tepiṭake buddhavacane asambhinnapadaṃ. Kāyampicitte samodahatīti kāyaṃ gahetvā citte āropeti, cittasannissitaṃ karoti, cittagatiyā peseti. Cittaṃ nāma mahaggatacittaṃ, cittagatigamanaṃ lahukaṃ hoti. Cittampi kāye samodahatīti cittaṃ gahetvā kāye āropeti, kāyasannissitaṃ karoti, kāyagatiyā peseti, kāyo nāma karajakāyo, kāyagatigamanaṃ dandhaṃ hoti. Sukhasaññañca lahusaññañcāti abhiññācittasahajātasaññā. Sā hi santasukhasamannāgatattā sukhasaññā nāma hoti, kilesadandhāyitattassa ca abhāvā lahusaññā nāma.
ਅਯੋਗੁਲ਼ੋ ਦਿવਸਂ ਸਨ੍ਤਤ੍ਤੋ ਲਹੁਤਰੋ ਚੇવ ਹੋਤੀਤਿ ਸੋ ਹਿ ਦ੍વੀਹਿ ਤੀਹਿ ਜਨੇਹਿ ਉਕ੍ਖਿਪਿਤ੍વਾ ਕਮ੍ਮਾਰੁਦ੍ਧਨੇ ਪਕ੍ਖਿਤ੍ਤੋਪਿ ਦਿવਸਂ ਪਚ੍ਚਮਾਨੋ વਿવਰਾਨੁਪવਿਟ੍ਠੇਨ ਤੇਜੇਨ ਚੇવ વਾਯੇਨ ਚ વਾਯੋਸਹਗਤੋ ਚ ਉਸ੍ਮਾਸਹਗਤੋ ਚ ਤੇਜੋਸਹਗਤੋ ਚ ਹੁਤ੍વਾ ਏવਂ ਲਹੁਕੋ ਹੋਤਿ, ਯਥਾ ਨਂ ਕਮ੍ਮਾਰੋ ਮਹਾਸਣ੍ਡਾਸੇਨ ਗਹੇਤ੍વਾ ਏਕਤੋ ਪਰਿવਤ੍ਤੇਤਿ ਉਕ੍ਖਿਪਤਿ ਬਹਿ ਨੀਹਰਤਿ। ਏવਂ ਪਨ ਮੁਦੁ ਚ ਹੋਤਿ ਕਮ੍ਮਨਿਯੋ ਚ। ਯਥਾ ਨਂ ਸੋ ਖਣ੍ਡਂ ਖਣ੍ਡਂ વਿਚ੍ਛਿਨ੍ਦਤਿ, ਕੂਟੇਨ ਹਨਨ੍ਤੋ ਦੀਘਚਤੁਰਸ੍ਸਾਦਿਭੇਦਂ ਕਰੋਤਿ। ਇਮਸ੍ਮਿਂ ਸੁਤ੍ਤੇ વਿਕੁਬ੍ਬਨਿਦ੍ਧਿ ਕਥਿਤਾ।
Ayoguḷo divasaṃ santatto lahutaro ceva hotīti so hi dvīhi tīhi janehi ukkhipitvā kammāruddhane pakkhittopi divasaṃ paccamāno vivarānupaviṭṭhena tejena ceva vāyena ca vāyosahagato ca usmāsahagato ca tejosahagato ca hutvā evaṃ lahuko hoti, yathā naṃ kammāro mahāsaṇḍāsena gahetvā ekato parivatteti ukkhipati bahi nīharati. Evaṃ pana mudu ca hoti kammaniyo ca. Yathā naṃ so khaṇḍaṃ khaṇḍaṃ vicchindati, kūṭena hananto dīghacaturassādibhedaṃ karoti. Imasmiṃ sutte vikubbaniddhi kathitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਅਯੋਗੁਲ਼ਸੁਤ੍ਤਂ • 2. Ayoguḷasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੨. ਅਯੋਗੁਲ਼ਸੁਤ੍ਤવਣ੍ਣਨਾ • 2. Ayoguḷasuttavaṇṇanā
