| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. අයොනිසොමනසිකාරසුත්‌තං
4. Ayonisomanasikārasuttaṃ
205. ‘‘අයොනිසො, භික්‌ඛවෙ, මනසිකරොතො අනුප්‌පන්‌නො චෙව කාමච්‌ඡන්‌දො උප්‌පජ්‌ජති, උප්‌පන්‌නො ච කාමච්‌ඡන්‌දො භිය්‍යොභාවාය වෙපුල්‌ලාය සංවත්‌තති; අනුප්‌පන්‌නො චෙව බ්‍යාපාදො උප්‌පජ්‌ජති, උප්‌පන්‌නො ච බ්‍යාපාදො භිය්‍යොභාවාය වෙපුල්‌ලාය සංවත්‌තති; අනුප්‌පන්‌නඤ්‌චෙව ථිනමිද්‌ධං උප්‌පජ්‌ජති, උප්‌පන්‌නඤ්‌ච ථිනමිද්‌ධං භිය්‍යොභාවාය වෙපුල්‌ලාය සංවත්‌තති; අනුප්‌පන්‌නඤ්‌චෙව උද්‌ධච්‌චකුක්‌කුච්‌චං උප්‌පජ්‌ජති, උප්‌පන්‌නඤ්‌ච උද්‌ධච්‌චකුක්‌කුච්‌චං භිය්‍යොභාවාය වෙපුල්‌ලාය සංවත්‌තති; අනුප්‌පන්‌නා චෙව විචිකිච්‌ඡා උප්‌පජ්‌ජති, උප්‌පන්‌නා ච විචිකිච්‌ඡා භිය්‍යොභාවාය වෙපුල්‌ලාය සංවත්‌තති; අනුප්‌පන්‌නො චෙව සතිසම්‌බොජ්‌ඣඞ්‌ගො නුප්‌පජ්‌ජති, උප්‌පන්‌නො ච සතිසම්‌බොජ්‌ඣඞ්‌ගො නිරුජ්‌ඣති…පෙ.… අනුප්‌පන්‌නො චෙව උපෙක්‌ඛාසම්‌බොජ්‌ඣඞ්‌ගො නුප්‌පජ්‌ජති, උප්‌පන්‌නො ච උපෙක්‌ඛාසම්‌බොජ්‌ඣඞ්‌ගො නිරුජ්‌ඣති.
205. ‘‘Ayoniso, bhikkhave, manasikaroto anuppanno ceva kāmacchando uppajjati, uppanno ca kāmacchando bhiyyobhāvāya vepullāya saṃvattati; anuppanno ceva byāpādo uppajjati, uppanno ca byāpādo bhiyyobhāvāya vepullāya saṃvattati; anuppannañceva thinamiddhaṃ uppajjati, uppannañca thinamiddhaṃ bhiyyobhāvāya vepullāya saṃvattati; anuppannañceva uddhaccakukkuccaṃ uppajjati, uppannañca uddhaccakukkuccaṃ bhiyyobhāvāya vepullāya saṃvattati; anuppannā ceva vicikicchā uppajjati, uppannā ca vicikicchā bhiyyobhāvāya vepullāya saṃvattati; anuppanno ceva satisambojjhaṅgo nuppajjati, uppanno ca satisambojjhaṅgo nirujjhati…pe… anuppanno ceva upekkhāsambojjhaṅgo nuppajjati, uppanno ca upekkhāsambojjhaṅgo nirujjhati.
යොනිසො ච ඛො, භික්‌ඛවෙ, මනසිකරොතො අනුප්‌පන්‌නො චෙව කාමච්‌ඡන්‌දො නුප්‌පජ්‌ජති, උප්‌පන්‌නො ච කාමච්‌ඡන්‌දො පහීයති; අනුප්‌පන්‌නො චෙව බ්‍යාපාදො නුප්‌පජ්‌ජති, උප්‌පන්‌නො ච බ්‍යාපාදො පහීයති; අනුප්‌පන්‌නඤ්‌චෙව ථිනමිද්‌ධං නුප්‌පජ්‌ජති, උප්‌පන්‌නඤ්‌ච ථිනමිද්‌ධං පහීයති; අනුප්‌පන්‌නඤ්‌චෙව උද්‌ධච්‌චකුක්‌කුච්‌චං නුප්‌පජ්‌ජති, උප්‌පන්‌නඤ්‌ච උද්‌ධච්‌චකුක්‌කුච්‌චං පහීයති; අනුප්‌පන්‌නා චෙව විචිකිච්‌ඡා නුප්‌පජ්‌ජති, උප්‌පන්‌නා ච විචිකිච්‌ඡා පහීයති.
Yoniso ca kho, bhikkhave, manasikaroto anuppanno ceva kāmacchando nuppajjati, uppanno ca kāmacchando pahīyati; anuppanno ceva byāpādo nuppajjati, uppanno ca byāpādo pahīyati; anuppannañceva thinamiddhaṃ nuppajjati, uppannañca thinamiddhaṃ pahīyati; anuppannañceva uddhaccakukkuccaṃ nuppajjati, uppannañca uddhaccakukkuccaṃ pahīyati; anuppannā ceva vicikicchā nuppajjati, uppannā ca vicikicchā pahīyati.
‘‘අනුප්‌පන්‌නො චෙව සතිසම්‌බොජ්‌ඣඞ්‌ගො උප්‌පජ්‌ජති, උප්‌පන්‌නො ච සතිසම්‌බොජ්‌ඣඞ්‌ගො භාවනාපාරිපූරිං ගච්‌ඡති…පෙ.… අනුප්‌පන්‌නො චෙව උපෙක්‌ඛාසම්‌බොජ්‌ඣඞ්‌ගො උප්‌පජ්‌ජති, උප්‌පන්‌නො ච උපෙක්‌ඛාසම්‌බොජ්‌ඣඞ්‌ගො භාවනාපාරිපූරිං ගච්‌ඡතී’’ති. චතුත්‌ථං.
‘‘Anuppanno ceva satisambojjhaṅgo uppajjati, uppanno ca satisambojjhaṅgo bhāvanāpāripūriṃ gacchati…pe… anuppanno ceva upekkhāsambojjhaṅgo uppajjati, uppanno ca upekkhāsambojjhaṅgo bhāvanāpāripūriṃ gacchatī’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-5. ඨානියසුත්‌තාදිවණ්‌ණනා • 3-5. Ṭhāniyasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-5. ඨානියසුත්‌තාදිවණ්‌ණනා • 3-5. Ṭhāniyasuttādivaṇṇanā
