| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5-10. அயோனிஸோஸுத்தாதி³வண்ணனா
5-10. Ayonisosuttādivaṇṇanā
5-10. பஞ்சமே கதி நு கோ² அனுஸ்ஸதிட்டா²னானீதிஆதி³ ச²க்கே ஆவி ப⁴விஸ்ஸதீதி. ஏவங் சிந்திதந்தி அயோனிஸோ சிந்திதங். அபஞ்ஹமேவ பஞ்ஹந்தி கதே²ஸீதி அபஞ்ஹமேவ பஞ்ஹோ அயந்தி மஞ்ஞமானோ விஸ்ஸஜ்ஜேஸி. த³ஸவித⁴ங் ப்³யஞ்ஜனபு³த்³தி⁴ங் அபரிஹாபெத்வாதி –
5-10. Pañcame kati nu kho anussatiṭṭhānānītiādi chakke āvi bhavissatīti. Evaṃ cintitanti ayoniso cintitaṃ. Apañhameva pañhanti kathesīti apañhameva pañho ayanti maññamāno vissajjesi. Dasavidhaṃ byañjanabuddhiṃ aparihāpetvāti –
‘‘ஸிதி²லங் த⁴னிதஞ்ச தீ³க⁴ரஸ்ஸங், க³ருகங் லஹுகஞ்ச நிக்³க³ஹீதங்;
‘‘Sithilaṃ dhanitañca dīgharassaṃ, garukaṃ lahukañca niggahītaṃ;
ஸம்ப³ந்த⁴ங் வவத்தி²தங் விமுத்தங், த³ஸதா⁴ ப்³யஞ்ஜனபு³த்³தி⁴யா பபே⁴தோ³’’தி. (தீ³॰ நி॰ அட்ட²॰ 1.190; ம॰ நி॰ அட்ட²॰ 2.291; பரி॰ அட்ட²॰ 485; வி॰ ஸங்க³॰ அட்ட²॰ 252) –
Sambandhaṃ vavatthitaṃ vimuttaṃ, dasadhā byañjanabuddhiyā pabhedo’’ti. (dī. ni. aṭṭha. 1.190; ma. ni. aṭṭha. 2.291; pari. aṭṭha. 485; vi. saṅga. aṭṭha. 252) –
ஏவங் வுத்தங் த³ஸவித⁴ங் ப்³யஞ்ஜனபு³த்³தி⁴ங் அபரிஹாபெத்வா.
Evaṃ vuttaṃ dasavidhaṃ byañjanabuddhiṃ aparihāpetvā.
தத்த² டா²னகரணானி ஸிதி²லானி கத்வா உச்சாரேதப்³ப³ங் அக்க²ரங் ஸிதி²லங், தானியேவ த⁴னிதானி அஸிதி²லானி கத்வா உச்சாரேதப்³ப³ங் அக்க²ரங் த⁴னிதங். த்³விமத்தகாலங் தீ³க⁴ங், ஏகமத்தகாலங் ரஸ்ஸங். க³ருகந்தி தீ³க⁴மேவ, யங் வா ‘‘ஆயஸ்மதோ பு³த்³த⁴ரக்கி²தத்தே²ரஸ்ஸா’’தி ஸங்யோக³பரங் கத்வா வுச்சதி, லஹுகந்தி ரஸ்ஸமேவ, யங் வா ‘‘ஆயஸ்மதோ பு³த்³த⁴ரக்கி²ததே²ரஸ்ஸா’’தி ஏவங் விஸங்யோக³பரங் கத்வா வுச்சதி. நிக்³க³ஹீதந்தி யங் கரணானி நிக்³க³ஹெத்வா அவிஸ்ஸஜ்ஜெத்வா அவிவடேன முகே²ன ஸானுனாஸிகங் கத்வா வத்தப்³ப³ங். ஸம்ப³ந்த⁴ந்தி யங் பரபதே³ன ஸம்ப³ந்தி⁴த்வா ‘‘துண்ஹஸ்ஸா’’தி வுச்சதி. வவத்தி²தந்தி யங் பரபதே³ன அஸம்ப³ந்த⁴ங் கத்வா விச்சி²ந்தி³த்வா ‘‘துண்ஹீ அஸ்ஸா’’தி வுச்சதி. விமுத்தந்தி யங் கரணானி அனிக்³க³ஹெத்வா விஸ்ஸஜ்ஜெத்வா விவடேன முகே²ன ஸானுனாஸிகங் அகத்வா வுச்சதி. த³ஸதா⁴ ப்³யஞ்ஜனபு³த்³தி⁴யா பபே⁴தோ³தி ஏவங் ஸிதி²லாதி³வஸேன ப்³யஞ்ஜனபு³த்³தி⁴யா அக்க²ருப்பாத³கசித்தஸ்ஸ த³ஸப்பகாரேன பபே⁴தோ³. ஸப்³பா³னி ஹி அக்க²ரானி சித்தஸமுட்டா²னானி யதா²தி⁴ப்பேதத்த²ப்³யஞ்ஜனதோ ப்³யஞ்ஜனானி ச.
Tattha ṭhānakaraṇāni sithilāni katvā uccāretabbaṃ akkharaṃ sithilaṃ, tāniyeva dhanitāni asithilāni katvā uccāretabbaṃ akkharaṃ dhanitaṃ. Dvimattakālaṃ dīghaṃ, ekamattakālaṃ rassaṃ. Garukanti dīghameva, yaṃ vā ‘‘āyasmato buddharakkhitattherassā’’ti saṃyogaparaṃ katvā vuccati, lahukanti rassameva, yaṃ vā ‘‘āyasmato buddharakkhitatherassā’’ti evaṃ visaṃyogaparaṃ katvā vuccati. Niggahītanti yaṃ karaṇāni niggahetvā avissajjetvā avivaṭena mukhena sānunāsikaṃ katvā vattabbaṃ. Sambandhanti yaṃ parapadena sambandhitvā ‘‘tuṇhassā’’ti vuccati. Vavatthitanti yaṃ parapadena asambandhaṃ katvā vicchinditvā ‘‘tuṇhī assā’’ti vuccati. Vimuttanti yaṃ karaṇāni aniggahetvā vissajjetvā vivaṭena mukhena sānunāsikaṃ akatvā vuccati. Dasadhā byañjanabuddhiyā pabhedoti evaṃ sithilādivasena byañjanabuddhiyā akkharuppādakacittassa dasappakārena pabhedo. Sabbāni hi akkharāni cittasamuṭṭhānāni yathādhippetatthabyañjanato byañjanāni ca.
‘‘அட்டா²னங் கோ² ஏதங், ஆவுஸோ ஸாரிபுத்தா’’திஆதி³ பஞ்சகே ஆவி ப⁴விஸ்ஸதி. ‘‘கதி நு கோ², ஆனந்த³, அனுஸ்ஸதிட்டா²னானீ’’திஆதி³ பன ச²க்கே ஆவி ப⁴விஸ்ஸதி. ச²ட்டா²தீ³ஸு நத்தி² வத்தப்³ப³ங்.
‘‘Aṭṭhānaṃkho etaṃ, āvuso sāriputtā’’tiādi pañcake āvi bhavissati. ‘‘Kati nu kho, ānanda, anussatiṭṭhānānī’’tiādi pana chakke āvi bhavissati. Chaṭṭhādīsu natthi vattabbaṃ.
அயோனிஸோஸுத்தாதி³வண்ணனா நிட்டி²தா.
Ayonisosuttādivaṇṇanā niṭṭhitā.
பா³லவக்³க³வண்ணனா நிட்டி²தா.
Bālavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. அயோனிஸோஸுத்தங் • 5. Ayonisosuttaṃ
6. அகுஸலஸுத்தங் • 6. Akusalasuttaṃ
7. ஸாவஜ்ஜஸுத்தங் • 7. Sāvajjasuttaṃ
8. ஸப்³யாப³ஜ்ஜ²ஸுத்தங் • 8. Sabyābajjhasuttaṃ
9. க²தஸுத்தங் • 9. Khatasuttaṃ
10. மலஸுத்தங் • 10. Malasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
5. அயோனிஸோஸுத்தவண்ணனா • 5. Ayonisosuttavaṇṇanā
9. க²தஸுத்தவண்ணனா • 9. Khatasuttavaṇṇanā
10. மலஸுத்தவண்ணனா • 10. Malasuttavaṇṇanā
