| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫-১০. অযোনিসোসুত্তাদিৰণ্ণনা
5-10. Ayonisosuttādivaṇṇanā
৫-১০. পঞ্চমে কতি নু খো অনুস্সতিট্ঠানানীতিআদি ছক্কে আৰি ভৰিস্সতীতি। এৰং চিন্তিতন্তি অযোনিসো চিন্তিতং। অপঞ্হমেৰ পঞ্হন্তি কথেসীতি অপঞ্হমেৰ পঞ্হো অযন্তি মঞ্ঞমানো ৰিস্সজ্জেসি। দসৰিধং ব্যঞ্জনবুদ্ধিং অপরিহাপেত্ৰাতি –
5-10. Pañcame kati nu kho anussatiṭṭhānānītiādi chakke āvi bhavissatīti. Evaṃ cintitanti ayoniso cintitaṃ. Apañhameva pañhanti kathesīti apañhameva pañho ayanti maññamāno vissajjesi. Dasavidhaṃ byañjanabuddhiṃ aparihāpetvāti –
‘‘সিথিলং ধনিতঞ্চ দীঘরস্সং, গরুকং লহুকঞ্চ নিগ্গহীতং।
‘‘Sithilaṃ dhanitañca dīgharassaṃ, garukaṃ lahukañca niggahītaṃ;
সম্বন্ধং ৰৰত্থিতং ৰিমুত্তং, দসধা ব্যঞ্জনবুদ্ধিযা পভেদো’’তি॥ (দী॰ নি॰ অট্ঠ॰ ১.১৯০; ম॰ নি॰ অট্ঠ॰ ২.২৯১; পরি॰ অট্ঠ॰ ৪৮৫; ৰি॰ সঙ্গ॰ অট্ঠ॰ ২৫২) –
Sambandhaṃ vavatthitaṃ vimuttaṃ, dasadhā byañjanabuddhiyā pabhedo’’ti. (dī. ni. aṭṭha. 1.190; ma. ni. aṭṭha. 2.291; pari. aṭṭha. 485; vi. saṅga. aṭṭha. 252) –
এৰং ৰুত্তং দসৰিধং ব্যঞ্জনবুদ্ধিং অপরিহাপেত্ৰা।
Evaṃ vuttaṃ dasavidhaṃ byañjanabuddhiṃ aparihāpetvā.
তত্থ ঠানকরণানি সিথিলানি কত্ৰা উচ্চারেতব্বং অক্খরং সিথিলং, তানিযেৰ ধনিতানি অসিথিলানি কত্ৰা উচ্চারেতব্বং অক্খরং ধনিতং। দ্ৰিমত্তকালং দীঘং, একমত্তকালং রস্সং। গরুকন্তি দীঘমেৰ, যং ৰা ‘‘আযস্মতো বুদ্ধরক্খিতত্থেরস্সা’’তি সংযোগপরং কত্ৰা ৰুচ্চতি, লহুকন্তি রস্সমেৰ, যং ৰা ‘‘আযস্মতো বুদ্ধরক্খিতথেরস্সা’’তি এৰং ৰিসংযোগপরং কত্ৰা ৰুচ্চতি। নিগ্গহীতন্তি যং করণানি নিগ্গহেত্ৰা অৰিস্সজ্জেত্ৰা অৰিৰটেন মুখেন সানুনাসিকং কত্ৰা ৰত্তব্বং। সম্বন্ধন্তি যং পরপদেন সম্বন্ধিত্ৰা ‘‘তুণ্হস্সা’’তি ৰুচ্চতি। ৰৰত্থিতন্তি যং পরপদেন অসম্বন্ধং কত্ৰা ৰিচ্ছিন্দিত্ৰা ‘‘তুণ্হী অস্সা’’তি ৰুচ্চতি। ৰিমুত্তন্তি যং করণানি অনিগ্গহেত্ৰা ৰিস্সজ্জেত্ৰা ৰিৰটেন মুখেন সানুনাসিকং অকত্ৰা ৰুচ্চতি। দসধা ব্যঞ্জনবুদ্ধিযা পভেদোতি এৰং সিথিলাদিৰসেন ব্যঞ্জনবুদ্ধিযা অক্খরুপ্পাদকচিত্তস্স দসপ্পকারেন পভেদো। সব্বানি হি অক্খরানি চিত্তসমুট্ঠানানি যথাধিপ্পেতত্থব্যঞ্জনতো ব্যঞ্জনানি চ।
Tattha ṭhānakaraṇāni sithilāni katvā uccāretabbaṃ akkharaṃ sithilaṃ, tāniyeva dhanitāni asithilāni katvā uccāretabbaṃ akkharaṃ dhanitaṃ. Dvimattakālaṃ dīghaṃ, ekamattakālaṃ rassaṃ. Garukanti dīghameva, yaṃ vā ‘‘āyasmato buddharakkhitattherassā’’ti saṃyogaparaṃ katvā vuccati, lahukanti rassameva, yaṃ vā ‘‘āyasmato buddharakkhitatherassā’’ti evaṃ visaṃyogaparaṃ katvā vuccati. Niggahītanti yaṃ karaṇāni niggahetvā avissajjetvā avivaṭena mukhena sānunāsikaṃ katvā vattabbaṃ. Sambandhanti yaṃ parapadena sambandhitvā ‘‘tuṇhassā’’ti vuccati. Vavatthitanti yaṃ parapadena asambandhaṃ katvā vicchinditvā ‘‘tuṇhī assā’’ti vuccati. Vimuttanti yaṃ karaṇāni aniggahetvā vissajjetvā vivaṭena mukhena sānunāsikaṃ akatvā vuccati. Dasadhā byañjanabuddhiyā pabhedoti evaṃ sithilādivasena byañjanabuddhiyā akkharuppādakacittassa dasappakārena pabhedo. Sabbāni hi akkharāni cittasamuṭṭhānāni yathādhippetatthabyañjanato byañjanāni ca.
‘‘অট্ঠানং খো এতং, আৰুসো সারিপুত্তা’’তিআদি পঞ্চকে আৰি ভৰিস্সতি। ‘‘কতি নু খো, আনন্দ, অনুস্সতিট্ঠানানী’’তিআদি পন ছক্কে আৰি ভৰিস্সতি। ছট্ঠাদীসু নত্থি ৰত্তব্বং।
‘‘Aṭṭhānaṃkho etaṃ, āvuso sāriputtā’’tiādi pañcake āvi bhavissati. ‘‘Kati nu kho, ānanda, anussatiṭṭhānānī’’tiādi pana chakke āvi bhavissati. Chaṭṭhādīsu natthi vattabbaṃ.
অযোনিসোসুত্তাদিৰণ্ণনা নিট্ঠিতা।
Ayonisosuttādivaṇṇanā niṭṭhitā.
বালৰগ্গৰণ্ণনা নিট্ঠিতা।
Bālavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৫. অযোনিসোসুত্তং • 5. Ayonisosuttaṃ
৬. অকুসলসুত্তং • 6. Akusalasuttaṃ
৭. সাৰজ্জসুত্তং • 7. Sāvajjasuttaṃ
৮. সব্যাবজ্ঝসুত্তং • 8. Sabyābajjhasuttaṃ
৯. খতসুত্তং • 9. Khatasuttaṃ
১০. মলসুত্তং • 10. Malasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৫. অযোনিসোসুত্তৰণ্ণনা • 5. Ayonisosuttavaṇṇanā
৯. খতসুত্তৰণ্ণনা • 9. Khatasuttavaṇṇanā
১০. মলসুত্তৰণ্ণনা • 10. Malasuttavaṇṇanā
