| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
6. ж̇ажжанд̇хаваг̇г̇о
6. Jaccandhavaggo
1. ааяусан̇каароссаж̇ж̇анасуд̇д̇аван̣н̣анаа
1. Āyusaṅkhārossajjanasuttavaṇṇanā
51. ж̇ажжанд̇хаваг̇г̇асса батамз взсаалияанд̇иаад̣̇и хздтаа вуд̇д̇ад̇т̇амзва. взсаалим̣ бин̣д̣ааяа баависийд̇и гад̣̇аа баависи? уггаажзлад̇о нигкамид̇ваа взсаалим̣ г̇ад̇агаалз. бхаг̇аваа хи взл̣уваг̇аамагз вассам̣ васид̇ваа д̇ад̇о нигкамид̇ваа анубуб̣б̣зна саавад̇т̇им̣ бад̇ваа ж̇зд̇аванз вихааси. д̇асмим̣ гаалз д̇хаммасзнаабад̇и ад̇д̇ано ааяусан̇каарам̣ ологзд̇ваа ‘‘сад̇д̇аахамзва бавад̇д̇иссад̇ий’’д̇и н̃ад̇ваа бхаг̇аванд̇ам̣ ануж̇аанаабзд̇ваа наал̣агаг̇аамам̣ г̇анд̇ваа д̇ад̇т̇а маад̇арам̣ сод̇аабад̇д̇ипалз бад̇идтаабзд̇ваа бариниб̣б̣ааяи. сад̇т̇аа жунд̣̇зна аабхад̇аа д̇асса д̇хаад̇уяо г̇ахзд̇ваа д̇хаад̇ужзд̇ияам̣ гаараабзд̇ваа махаабхигкусан̇гхабаривуд̇о рааж̇аг̇ахам̣ аг̇амааси. д̇ад̇т̇а г̇ад̇агаалз ааяасмаа махаамог̇г̇аллаано бариниб̣б̣ааяи. бхаг̇аваа д̇ассаби д̇хаад̇уяо г̇ахзд̇ваа жзд̇ияам̣ гаараабзд̇ваа рааж̇аг̇ахад̇о нигкамид̇ваа анубуб̣б̣зна уггаажзлам̣ аг̇амааси. д̇ад̇т̇а г̇ан̇г̇аад̇ийрз бхигкусан̇гхабаривуд̇о нисийд̣̇ид̇ваа аг̇г̇асаавагаанам̣ бариниб̣б̣аанаббадисам̣яуд̇д̇ам̣ д̇хаммам̣ д̣̇зсзд̇ваа уггаажзлад̇о нигкамид̇ваа взсаалим̣ аг̇амааси. звам̣ г̇ад̇о бхаг̇аваа ‘‘буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа взсаалим̣ бин̣д̣ааяа баависий’’д̇и вужжад̇и. д̇зна вуд̇д̇ам̣ – ‘‘уггаажзлад̇о нигкамид̇ваа взсаалим̣ г̇ад̇агаалз’’д̇и.
51. Jaccandhavaggassa paṭhame vesāliyantiādi heṭṭhā vuttatthameva. Vesāliṃ piṇḍāya pāvisīti kadā pāvisi? Ukkācelato nikkhamitvā vesāliṃ gatakāle. Bhagavā hi veḷuvagāmake vassaṃ vasitvā tato nikkhamitvā anupubbena sāvatthiṃ patvā jetavane vihāsi. Tasmiṃ kāle dhammasenāpati attano āyusaṅkhāraṃ oloketvā ‘‘sattāhameva pavattissatī’’ti ñatvā bhagavantaṃ anujānāpetvā nāḷakagāmaṃ gantvā tattha mātaraṃ sotāpattiphale patiṭṭhāpetvā parinibbāyi. Satthā cundena ābhatā tassa dhātuyo gahetvā dhātucetiyaṃ kārāpetvā mahābhikkhusaṅghaparivuto rājagahaṃ agamāsi. Tattha gatakāle āyasmā mahāmoggallāno parinibbāyi. Bhagavā tassapi dhātuyo gahetvā cetiyaṃ kārāpetvā rājagahato nikkhamitvā anupubbena ukkācelaṃ agamāsi. Tattha gaṅgātīre bhikkhusaṅghaparivuto nisīditvā aggasāvakānaṃ parinibbānappaṭisaṃyuttaṃ dhammaṃ desetvā ukkācelato nikkhamitvā vesāliṃ agamāsi. Evaṃ gato bhagavā ‘‘pubbaṇhasamayaṃ nivāsetvā pattacīvaramādāya vesāliṃ piṇḍāya pāvisī’’ti vuccati. Tena vuttaṃ – ‘‘ukkācelato nikkhamitvā vesāliṃ gatakāle’’ti.
нисийд̣̇ананд̇и ид̇ха жаммагкан̣д̣ам̣ ад̇хиббзд̇ам̣. жаабаалам̣ жзд̇ияанд̇и буб̣б̣з жаабааласса наама яагкасса васид̇адтаанам̣ ‘‘жаабаалажзд̇ияа’’нд̇и бан̃н̃ааяид̇т̇а. д̇ад̇т̇а бхаг̇авад̇о гад̇авихаароби д̇ааяа рул̣хияаа ‘‘жаабаалажзд̇ияа’’нд̇и вужжад̇и. уд̣̇знам̣ жзд̇ияанд̇и звамаад̣̇ийсуби зсзва наяо. сад̇д̇амб̣анд̇и гигисса гира гаасиран̃н̃о д̇хийд̇аро сад̇д̇а гумаарияо сам̣взг̇аж̇аад̇аа рааж̇аг̇зхад̇о нигкамид̇ваа яад̇т̇а бад̇хаанам̣ бад̣̇ахим̣су, д̇ам̣ таанам̣ ‘‘сад̇д̇амб̣ам̣ жзд̇ияа’’нд̇и вад̣̇анд̇и. б̣ахубуд̇д̇анд̇и б̣ахубаарохо зго ниг̇род̇харугко, д̇асмим̣ ад̇хивад̇т̇ам̣ д̣̇звад̇ам̣ б̣ахуу мануссаа буд̇д̇з бад̇т̇знд̇и, д̇ад̣̇убаад̣̇ааяа д̇ам̣ таанам̣ ‘‘б̣ахубуд̇д̇ам̣ жзд̇ияа’’нд̇и бан̃н̃ааяид̇т̇а. сааранд̣̇ад̣̇анд̇и сааранд̣̇ад̣̇асса наама яагкасса васид̇адтаанам̣. ид̇и саб̣б̣аанзва д̇аани б̣уд̣̇д̇хуббаад̣̇ад̇о буб̣б̣з д̣̇звад̇аабариг̇г̇ахид̇ад̇д̇аа жзд̇ияавохаарзна вохарид̇аани , бхаг̇авад̇о вихаарз гад̇зби жа д̇ат̇зва бан̃н̃ааяанд̇и. раман̣ийяаад̇и зд̇т̇а взсаалияаа д̇аава бхуумибхааг̇асамбад̇д̇ияаа буг̇г̇аласамбад̇д̇ияаа сулабхабажжаяад̇ааяа жа раман̣ийяабхааво взд̣̇ид̇аб̣б̣о. вихаараанам̣ бана наг̇арад̇о наад̇ид̣̇уурад̇ааяа наажжаасаннад̇ааяа г̇аманааг̇аманасамбад̇д̇ияаа анаагин̣н̣авихаарадтаанад̇ааяа чааяууд̣̇агасамбад̇д̇ияаа бавивзгабад̇ируубад̇ааяа жа раман̣ийяад̇аа д̣̇адтаб̣б̣аа. жад̇д̇ааро ид̣̇д̇хибаад̣̇аад̇и зд̇т̇а ид̣̇д̇хибаад̣̇абад̣̇асса ад̇т̇о хздтаа вуд̇д̇оязва. бхаавид̇аад̇и вад̣дхид̇аа. б̣ахулийгад̇аад̇и бунаббунам̣ гад̇аа. яаанийгад̇аад̇и яуд̇д̇аяаанам̣ вияа гад̇аа. вад̇т̇угад̇аад̇и бад̇идтадтзна вад̇т̇у вияа гад̇аа. анудтид̇аад̇и ад̇хидтид̇аа. барижид̇аад̇и саманд̇ад̇о жид̇аа сувад̣дхид̇аа. сусамаарад̣̇д̇хаад̇и судту самаарад̣̇д̇хаа, ад̇ивияа саммаа нибпаад̣̇ид̇аад̇и.
Nisīdananti idha cammakkhaṇḍaṃ adhippetaṃ. Cāpālaṃ cetiyanti pubbe cāpālassa nāma yakkhassa vasitaṭṭhānaṃ ‘‘cāpālacetiya’’nti paññāyittha. Tattha bhagavato katavihāropi tāya ruḷhiyā ‘‘cāpālacetiya’’nti vuccati. Udenaṃ cetiyanti evamādīsupi eseva nayo. Sattambanti kikissa kira kāsirañño dhītaro satta kumāriyo saṃvegajātā rājagehato nikkhamitvā yattha padhānaṃ padahiṃsu, taṃ ṭhānaṃ ‘‘sattambaṃ cetiya’’nti vadanti. Bahuputtanti bahupāroho eko nigrodharukkho, tasmiṃ adhivatthaṃ devataṃ bahū manussā putte patthenti, tadupādāya taṃ ṭhānaṃ ‘‘bahuputtaṃ cetiya’’nti paññāyittha. Sārandadanti sārandadassa nāma yakkhassa vasitaṭṭhānaṃ. Iti sabbāneva tāni buddhuppādato pubbe devatāpariggahitattā cetiyavohārena voharitāni , bhagavato vihāre katepi ca tatheva paññāyanti. Ramaṇīyāti ettha vesāliyā tāva bhūmibhāgasampattiyā puggalasampattiyā sulabhapaccayatāya ca ramaṇīyabhāvo veditabbo. Vihārānaṃ pana nagarato nātidūratāya nāccāsannatāya gamanāgamanasampattiyā anākiṇṇavihāraṭṭhānatāya chāyūdakasampattiyā pavivekapatirūpatāya ca ramaṇīyatā daṭṭhabbā. Cattāro iddhipādāti ettha iddhipādapadassa attho heṭṭhā vuttoyeva. Bhāvitāti vaḍḍhitā. Bahulīkatāti punappunaṃ katā. Yānīkatāti yuttayānaṃ viya katā. Vatthukatāti patiṭṭhaṭṭhena vatthu viya katā. Anuṭṭhitāti adhiṭṭhitā. Paricitāti samantato citā suvaḍḍhitā. Susamāraddhāti suṭṭhu samāraddhā, ativiya sammā nipphāditāti.
звам̣ анияамзна гат̇зд̇ваа буна нияамзд̇ваа д̣̇ассзд̇ум̣, ‘‘д̇ат̇ааг̇ад̇асса ко’’д̇иаад̣̇имааха. зд̇т̇а жа габбанд̇и ааяугаббам̣. д̇идтзяяаад̇и д̇асмим̣ д̇асмим̣ гаалз яам̣ мануссаанам̣ ааяуббамаан̣ам̣, д̇ам̣ барибун̣н̣ам̣ гад̇ваа д̇идтзяяа д̇харзяяа. габбаавасзсам̣ ваад̇и ‘‘аббам̣ ваа бхияяо ваа’’д̇и (д̣̇ий. ни. 2.7; а. ни. 7.74) вуд̇д̇ам̣ вассасад̇ад̇о ад̇ирзгам̣ ваа. махаасийвад̇т̇зро банааха – ‘‘б̣уд̣̇д̇хаанам̣ адтаанз г̇аж̇ж̇ид̇ам̣ наама над̇т̇и. яат̇зва хи взл̣уваг̇аамагз уббаннам̣ мааран̣анд̇игам̣ взд̣̇анам̣ д̣̇аса маасз вигкамбхзси, звам̣ бунаббунам̣ д̇ам̣ самаабад̇д̇им̣ самаабаж̇ж̇ид̇ваа вигкамбхзнд̇о имам̣ бхад̣̇д̣̇агаббамзва д̇идтзяяаа’’д̇и. гасмаа бана на тид̇од̇и? убаад̣̇иннагасарийрам̣ наама кан̣д̣ижжаад̣̇ийхи абхибхуяяад̇и, б̣уд̣̇д̇хаа жа бана кан̣д̣ижжаад̣̇ибхаавам̣ аббад̇ваа бан̃жамз ааяугодтаасз б̣ахуж̇анасса бияаманаабагаалзязва бариниб̣б̣ааяанд̇и. б̣уд̣̇д̇хаануб̣уд̣̇д̇хзсу аг̇г̇асаавагамахаасаавагзсу бариниб̣б̣уд̇зсу абариваарзна згагзнзва таад̇аб̣б̣ам̣ ход̇и, д̣̇ахарасааман̣зрабариваарзна ваа. д̇ад̇о ‘‘ахо б̣уд̣̇д̇хаанам̣ барисаа’’д̇и хийл̣зд̇аб̣б̣ад̇ам̣ аабаж̇ж̇зяяа, д̇асмаа на тид̇од̇и. звам̣ вуд̇д̇зби со бана на ружжад̇и, ‘‘ааяугаббо’’д̇и ид̣̇амзва адтагат̇ааяа нияамид̇ам̣.
Evaṃ aniyamena kathetvā puna niyametvā dassetuṃ, ‘‘tathāgatassa kho’’tiādimāha. Ettha ca kappanti āyukappaṃ. Tiṭṭheyyāti tasmiṃ tasmiṃ kāle yaṃ manussānaṃ āyuppamāṇaṃ, taṃ paripuṇṇaṃ katvā tiṭṭheyya dhareyya. Kappāvasesaṃ vāti ‘‘appaṃ vā bhiyyo vā’’ti (dī. ni. 2.7; a. ni. 7.74) vuttaṃ vassasatato atirekaṃ vā. Mahāsīvatthero panāha – ‘‘buddhānaṃ aṭṭhāne gajjitaṃ nāma natthi. Yatheva hi veḷuvagāmake uppannaṃ māraṇantikaṃ vedanaṃ dasa māse vikkhambhesi, evaṃ punappunaṃ taṃ samāpattiṃ samāpajjitvā vikkhambhento imaṃ bhaddakappameva tiṭṭheyyā’’ti. Kasmā pana na ṭhitoti? Upādinnakasarīraṃ nāma khaṇḍiccādīhi abhibhuyyati, buddhā ca pana khaṇḍiccādibhāvaṃ appatvā pañcame āyukoṭṭhāse bahujanassa piyamanāpakāleyeva parinibbāyanti. Buddhānubuddhesu aggasāvakamahāsāvakesu parinibbutesu aparivārena ekakeneva ṭhātabbaṃ hoti, daharasāmaṇeraparivārena vā. Tato ‘‘aho buddhānaṃ parisā’’ti hīḷetabbataṃ āpajjeyya, tasmā na ṭhitoti. Evaṃ vuttepi so pana na ruccati, ‘‘āyukappo’’ti idameva aṭṭhakathāya niyamitaṃ.
ол̣ааригз нимид̇д̇зд̇и т̇уулз сан̃н̃уббаад̣̇анз. т̇ууласан̃н̃уббаад̣̇анан̃хзд̇ам̣, ‘‘д̇идтад̇у бхаг̇аваа габба’’нд̇и сагалагаббам̣ авадтаанаяаажанааяа яад̣̇ид̣̇ам̣ ‘‘яасса гассажи, аананд̣̇а, жад̇д̇ааро ид̣̇д̇хибаад̣̇аа бхаавид̇аа’’д̇иаад̣̇инаа ан̃н̃аабад̣̇зсзна ад̇д̇ано жад̇урид̣̇д̇хибаад̣̇абхааванаанубхаавзна габбам̣ авадтаанасамад̇т̇ад̇аавибхааванам̣. обхаасзд̇и баагадаважанз. баагадан̃жзд̇ам̣ важанам̣ барияааяам̣ мун̃жид̇ваа уж̇угамзва ад̇д̇ано ад̇хиббааяавибхааванам̣.
Oḷārikenimitteti thūle saññuppādane. Thūlasaññuppādanañhetaṃ, ‘‘tiṭṭhatu bhagavā kappa’’nti sakalakappaṃ avaṭṭhānayācanāya yadidaṃ ‘‘yassa kassaci, ānanda, cattāro iddhipādā bhāvitā’’tiādinā aññāpadesena attano caturiddhipādabhāvanānubhāvena kappaṃ avaṭṭhānasamatthatāvibhāvanaṃ. Obhāseti pākaṭavacane. Pākaṭañcetaṃ vacanaṃ pariyāyaṃ muñcitvā ujukameva attano adhippāyavibhāvanaṃ.
б̣ахуж̇анахид̇ааяаад̇и махааж̇анасса хид̇ад̇т̇ааяа. б̣ахуж̇анасукааяаад̇и махааж̇анасса сукад̇т̇ааяа. логаанугамбааяаад̇и сад̇д̇алогасса анугамбам̣ бадижжа. гад̇арасса сад̇д̇алогасса? яо бхаг̇авад̇о д̇хаммад̣̇зсанам̣ суд̇ваа бадивиж̇жхад̇и, амад̇абаанам̣ бивад̇и, д̇асса. бхаг̇авад̇о хи д̇хаммажаггаббавад̇д̇анасуд̇д̇ад̣̇зсанааяа ан̃н̃аад̇агон̣д̣ан̃н̃аббамукаа адтаараса б̣рахмагодияо д̇хаммам̣ бадивиж̇жхим̣су. звам̣ яаава субхад̣̇д̣̇абариб̣б̣ааж̇агавинаяанаа д̇хаммабадивид̣̇д̇хасад̇д̇аанам̣ г̇ан̣анаа над̇т̇и, махаасамаяасуд̇д̇ам̣ ман̇г̇аласуд̇д̇ам̣ жуул̣араахуловаад̣̇асуд̇д̇ам̣ самажид̇д̇асуд̇д̇анд̇и имзсам̣ жад̇уннам̣ суд̇д̇аанам̣ д̣̇зсанаагаалз абхисамаяаббад̇д̇асад̇д̇аанам̣ барижчзд̣̇о над̇т̇и, зд̇асса абаримаан̣асса сад̇д̇алогасса анугамбааяа бхаг̇авад̇о таанам̣ ж̇аад̇ам̣. звам̣ анааг̇ад̇зби бхависсад̇ийд̇и ад̇хиббааязна вад̣̇ад̇и. д̣̇звамануссаананд̇и на гзвалам̣ д̣̇звамануссаанам̣язва, авасзсаанам̣ нааг̇асубан̣н̣аад̣̇ийнамби ад̇т̇ааяа хид̇ааяа сукааяа бхаг̇авад̇о таанам̣ ход̇и. сахзд̇угабадисанд̇хигз бана маг̇г̇апаласажчигирияааяа бхаб̣б̣абуг̇г̇алз д̣̇ассзд̇ум̣ звам̣ вуд̇д̇ам̣, д̇асмаа ан̃н̃зсамби ад̇т̇ад̇т̇ааяа хид̇ад̇т̇ааяа сукад̇т̇ааяа бхаг̇аваа д̇идтад̇ууд̇и ад̇т̇о. д̇ад̇т̇а ад̇т̇ааяаад̇и ид̇халогасамбад̇д̇иад̇т̇ааяа . хид̇ааяаад̇и баралогасамбад̇д̇ихзд̇убхууд̇ахид̇ад̇т̇ааяа. сукааяаад̇и ниб̣б̣аанад̇хаад̇усукад̇т̇ааяа. буримам̣ бана хид̇асукаг̇г̇ахан̣ам̣ саб̣б̣асаад̇хааран̣авасзна взд̣̇ид̇аб̣б̣ам̣.
Bahujanahitāyāti mahājanassa hitatthāya. Bahujanasukhāyāti mahājanassa sukhatthāya. Lokānukampāyāti sattalokassa anukampaṃ paṭicca. Katarassa sattalokassa? Yo bhagavato dhammadesanaṃ sutvā paṭivijjhati, amatapānaṃ pivati, tassa. Bhagavato hi dhammacakkappavattanasuttadesanāya aññātakoṇḍaññappamukhā aṭṭhārasa brahmakoṭiyo dhammaṃ paṭivijjhiṃsu. Evaṃ yāva subhaddaparibbājakavinayanā dhammapaṭividdhasattānaṃ gaṇanā natthi, mahāsamayasuttaṃ maṅgalasuttaṃ cūḷarāhulovādasuttaṃ samacittasuttanti imesaṃ catunnaṃ suttānaṃ desanākāle abhisamayappattasattānaṃ paricchedo natthi, etassa aparimāṇassa sattalokassa anukampāya bhagavato ṭhānaṃ jātaṃ. Evaṃ anāgatepi bhavissatīti adhippāyena vadati. Devamanussānanti na kevalaṃ devamanussānaṃyeva, avasesānaṃ nāgasupaṇṇādīnampi atthāya hitāya sukhāya bhagavato ṭhānaṃ hoti. Sahetukapaṭisandhike pana maggaphalasacchikiriyāya bhabbapuggale dassetuṃ evaṃ vuttaṃ, tasmā aññesampi atthatthāya hitatthāya sukhatthāya bhagavā tiṭṭhatūti attho. Tattha atthāyāti idhalokasampattiatthāya . Hitāyāti paralokasampattihetubhūtahitatthāya. Sukhāyāti nibbānadhātusukhatthāya. Purimaṃ pana hitasukhaggahaṇaṃ sabbasādhāraṇavasena veditabbaṃ.
яат̇аа д̇ам̣ маарзна барияудтид̇ажид̇д̇од̇и зд̇т̇а нд̇и нибаад̇амад̇д̇ам̣, яат̇аа маарзна барияудтид̇ажид̇д̇о аж̇жход̇т̇адажид̇д̇о ан̃н̃оби гожи бут̇уж̇ж̇ано бадивиж̇жхид̇ум̣ на саггун̣зяяа, звамзва наасагки бадивиж̇жхид̇унд̇и ад̇т̇о. мааро хи яасса гзжи вибаллаасаа аббахийнаа, д̇асса жид̇д̇ам̣ барияудтаад̇и. яасса бана саб̣б̣зна саб̣б̣ам̣ д̣̇ваад̣̇аса вибаллаасаа аббахийнаа, д̇асса вад̇д̇аб̣б̣амзва над̇т̇и, т̇зрасса жа жад̇д̇ааро вибаллаасаа аббахийнаа, д̇знасса жид̇д̇ам̣ барияудтааси. со бана жид̇д̇абарияудтаанам̣ гаронд̇о гим̣ гарод̇ийд̇и? бхзравам̣ руубаарамман̣ам̣ ваа д̣̇ассзд̇и, сад̣̇д̣̇аарамман̣ам̣ ваа саавзд̇и, д̇ад̇о сад̇д̇аа д̇ам̣ д̣̇исваа ваа суд̇ваа ваа сад̇им̣ виссаж̇ж̇зд̇ваа вивадамукаа хонд̇и. д̇зсам̣ мукзна хад̇т̇ам̣ бавзсзд̇ваа хад̣̇аяам̣ мад̣̇д̣̇ад̇и, д̇ад̇о висан̃н̃ино худ̇ваа д̇идтанд̇и. т̇зрасса банзса мукзна хад̇т̇ам̣ бавзсзд̇ум̣ гим̣ сагкиссад̇и, бхзраваарамман̣ам̣ бана д̣̇ассзд̇и. д̇ам̣ д̣̇исваа т̇зро нимид̇д̇обхаасам̣ на бадивиж̇жхи. ж̇аананд̇оязва бхаг̇аваа гимад̇т̇ам̣ яаавад̇ад̇ияам̣ ааманд̇зси? барад̇о ‘‘д̇идтад̇у, бханд̇з бхаг̇аваа’’д̇и яаажид̇з ‘‘д̇уяхзвзд̇ам̣ д̣̇уггадам̣, д̇уяхзвзд̇ам̣ абарад̣̇д̇ха’’нд̇и д̣̇осааробанзна согад̇анугаран̣ад̇т̇ам̣. бассад̇и хи бхаг̇аваа ‘‘аяам̣ маяи ад̇ивияа синид̣̇д̇хахад̣̇аяо, со барад̇о бхуумижаалагааран̣ан̃жа ааяусан̇каароссаж̇ж̇анан̃жа суд̇ваа мама жирадтаанам̣ яаажиссад̇и, ат̇аахам̣ ‘гисса д̇вам̣ бурзд̇арам̣ на яаажасий’д̇и д̇ассзва сийсз д̣̇осам̣ баад̇зссаами, сад̇д̇аа жа ад̇д̇ано абараад̇хзна на д̇ат̇аа вихан̃н̃анд̇и, д̇знасса сого д̇ануго бхависсад̇ий’’д̇и.
Yathā taṃ mārena pariyuṭṭhitacittoti ettha nti nipātamattaṃ, yathā mārena pariyuṭṭhitacitto ajjhotthaṭacitto aññopi koci puthujjano paṭivijjhituṃ na sakkuṇeyya, evameva nāsakkhi paṭivijjhitunti attho. Māro hi yassa keci vipallāsā appahīnā, tassa cittaṃ pariyuṭṭhāti. Yassa pana sabbena sabbaṃ dvādasa vipallāsā appahīnā, tassa vattabbameva natthi, therassa ca cattāro vipallāsā appahīnā, tenassa cittaṃ pariyuṭṭhāsi. So pana cittapariyuṭṭhānaṃ karonto kiṃ karotīti? Bheravaṃ rūpārammaṇaṃ vā dasseti, saddārammaṇaṃ vā sāveti, tato sattā taṃ disvā vā sutvā vā satiṃ vissajjetvā vivaṭamukhā honti. Tesaṃ mukhena hatthaṃ pavesetvā hadayaṃ maddati, tato visaññino hutvā tiṭṭhanti. Therassa panesa mukhena hatthaṃ pavesetuṃ kiṃ sakkhissati, bheravārammaṇaṃ pana dasseti. Taṃ disvā thero nimittobhāsaṃ na paṭivijjhi. Jānantoyeva bhagavā kimatthaṃ yāvatatiyaṃ āmantesi? Parato ‘‘tiṭṭhatu, bhante bhagavā’’ti yācite ‘‘tuyhevetaṃ dukkaṭaṃ, tuyhevetaṃ aparaddha’’nti dosāropanena sokatanukaraṇatthaṃ. Passati hi bhagavā ‘‘ayaṃ mayi ativiya siniddhahadayo, so parato bhūmicālakāraṇañca āyusaṅkhārossajjanañca sutvā mama ciraṭṭhānaṃ yācissati, athāhaṃ ‘kissa tvaṃ puretaraṃ na yācasī’ti tasseva sīse dosaṃ pātessāmi, sattā ca attano aparādhena na tathā vihaññanti, tenassa soko tanuko bhavissatī’’ti.
г̇ажча д̇вам̣, аананд̣̇аад̇и яасмаа д̣̇иваавихаарад̇т̇ааяа ид̇хааг̇ад̇о, д̇асмаа, аананд̣̇а, г̇ажча д̇вам̣ яат̇ааружид̇ам̣ таанам̣ д̣̇иваавихаарааяа. д̇знзвааха – ‘‘яасса д̣̇аани гаалам̣ ман̃н̃асий’’д̇и.
Gaccha tvaṃ, ānandāti yasmā divāvihāratthāya idhāgato, tasmā, ānanda, gaccha tvaṃ yathārucitaṃ ṭhānaṃ divāvihārāya. Tenevāha – ‘‘yassa dāni kālaṃ maññasī’’ti.
мааро баабимаад̇и зд̇т̇а сад̇д̇з анад̇т̇з нияож̇знд̇о маарзд̇ийд̇и мааро. баабимаад̇и д̇ассзва взважанам̣. со хи баабад̇хаммзна саманнааг̇ад̇ад̇д̇аа ‘баабимаа’д̇и вужжад̇и. бхаасид̇аа ко банзсаад̇и аяан̃хи бхаг̇авад̇и б̣од̇химан̣д̣з сад̇д̇а сад̇д̇аахз ад̇иггамид̇ваа аж̇абааланиг̇род̇хз вихаранд̇з ад̇д̇ано д̇хийд̇аасу ааг̇анд̇ваа ижчаавигхаад̇ам̣ бад̇ваа г̇ад̇аасу аяам̣ ‘‘ад̇т̇зсо убааяо’’д̇и жинд̇знд̇о ааг̇анд̇ваа ‘‘бхаг̇аваа яад̣̇ад̇т̇ам̣ д̇умхзхи баарамияо буурид̇аа, со во ад̇т̇о ануббад̇д̇о, бадивид̣̇д̇хам̣ саб̣б̣ан̃н̃уд̇ан̃н̃аан̣ам̣, гим̣ д̇з логавижаран̣знаа’’д̇и вад̇ваа яат̇аа аж̇ж̇а звамзва ‘‘бариниб̣б̣аад̇у д̣̇аани, бханд̇з бхаг̇аваа’’д̇и яаажи. бхаг̇аваа жасса ‘‘на д̇аавааха’’нд̇иаад̣̇ийни вад̇ваа бадигкиби. д̇ам̣ санд̇хааяа ид̣̇аани ‘‘бхаасид̇аа ко банзсаа’’д̇иаад̣̇имааха.
Māropāpimāti ettha satte anatthe niyojento māretīti māro. Pāpimāti tasseva vevacanaṃ. So hi pāpadhammena samannāgatattā ‘pāpimā’ti vuccati. Bhāsitā kho panesāti ayañhi bhagavati bodhimaṇḍe satta sattāhe atikkamitvā ajapālanigrodhe viharante attano dhītāsu āgantvā icchāvighātaṃ patvā gatāsu ayaṃ ‘‘attheso upāyo’’ti cintento āgantvā ‘‘bhagavā yadatthaṃ tumhehi pāramiyo pūritā, so vo attho anuppatto, paṭividdhaṃ sabbaññutaññāṇaṃ, kiṃ te lokavicaraṇenā’’ti vatvā yathā ajja evameva ‘‘parinibbātu dāni, bhante bhagavā’’ti yāci. Bhagavā cassa ‘‘na tāvāha’’ntiādīni vatvā paṭikkhipi. Taṃ sandhāya idāni ‘‘bhāsitā kho panesā’’tiādimāha.
д̇ад̇т̇а вияад̇д̇аад̇и арияамаг̇г̇аад̇хиг̇амавасзна б̣яад̇д̇аа. винийд̇аад̇и д̇ат̇зва гилзсавинаяанзна винийд̇аа. висаарад̣̇аад̇и саараж̇ж̇агараанам̣ д̣̇идтивижигижчаад̣̇ийнам̣ бахаанзна висаарад̣̇абхаавам̣ бад̇д̇аа. б̣ахуссуд̇аад̇и д̇збидагавасзна б̣аху суд̇амзд̇зсанд̇и б̣ахуссуд̇аа. д̇амзва д̇хаммам̣ д̇хаарзнд̇ийд̇и д̇хаммад̇хараа. ат̇а ваа б̣ахуссуд̇аад̇и барияад̇д̇иб̣ахуссуд̇аа жзва бадивзд̇хаб̣ахуссуд̇аа жа. д̇хаммад̇хараад̇и барияад̇д̇ид̇хаммаанам̣ жзва бадивзд̇хад̇хаммаанан̃жа д̇хааран̣ад̇о д̇хаммад̇хараад̇и звамбзд̇т̇а ад̇т̇о взд̣̇ид̇аб̣б̣о . д̇хаммаануд̇хаммаббадибаннаад̇и арияад̇хаммасса ануд̇хаммабхууд̇ам̣ вибассанаад̇хаммам̣ бадибаннаа. саамийжиббадибаннаад̇и н̃аан̣ад̣̇ассанависуд̣̇д̇хияаа анужчавигам̣ висуд̣̇д̇хибарамбараабадибад̣̇ам̣ бадибаннаа. ануд̇хаммажааринод̇и саллзкигам̣ д̇ассаа бадибад̣̇ааяа ануруубам̣ аббижчад̇аад̣̇ид̇хаммам̣ жаран̣асийлаа. сагам̣ аажарияаганд̇и ад̇д̇ано аажарияаваад̣̇ам̣. аажигкиссанд̇ийд̇и аад̣̇ид̇о гат̇зссанд̇и, ад̇д̇анаа уг̇г̇ахид̇анияаамзна барз уг̇г̇ан̣хаабзссанд̇ийд̇и ад̇т̇о. д̣̇зсзссанд̇ийд̇и ваажзссанд̇и, баал̣им̣ саммаа ваажзссанд̇ийд̇и ад̇т̇о. бан̃н̃абзссанд̇ийд̇и баж̇аанаабзссанд̇и, багаасзссанд̇ийд̇и ад̇т̇о. бадтабзссанд̇ийд̇и багаарзна табзссанд̇и. вивариссанд̇ийд̇и вивадам̣ гариссанд̇и. вибхаж̇иссанд̇ийд̇и вибхад̇д̇ам̣ гариссанд̇и. уд̇д̇аанийгариссанд̇ийд̇и ануд̇д̇аанам̣ г̇амбхийрам̣ уд̇д̇аанам̣ баагадам̣ гариссанд̇и. сахад̇хаммзнаад̇и сахзд̇угзна сагааран̣зна важанзна. саббаадихаарияанд̇и яааванияяаанигам̣ гад̇ваа. д̇хаммам̣ д̣̇зсзссанд̇ийд̇и нававид̇халогуд̇д̇арад̇хаммам̣ баб̣од̇хзссанд̇и, багаасзссанд̇ийд̇и ад̇т̇о.
Tattha viyattāti ariyamaggādhigamavasena byattā. Vinītāti tatheva kilesavinayanena vinītā. Visāradāti sārajjakarānaṃ diṭṭhivicikicchādīnaṃ pahānena visāradabhāvaṃ pattā. Bahussutāti tepiṭakavasena bahu sutametesanti bahussutā. Tameva dhammaṃ dhārentīti dhammadharā. Atha vā bahussutāti pariyattibahussutā ceva paṭivedhabahussutā ca. Dhammadharāti pariyattidhammānaṃ ceva paṭivedhadhammānañca dhāraṇato dhammadharāti evampettha attho veditabbo . Dhammānudhammappaṭipannāti ariyadhammassa anudhammabhūtaṃ vipassanādhammaṃ paṭipannā. Sāmīcippaṭipannāti ñāṇadassanavisuddhiyā anucchavikaṃ visuddhiparamparāpaṭipadaṃ paṭipannā. Anudhammacārinoti sallekhikaṃ tassā paṭipadāya anurūpaṃ appicchatādidhammaṃ caraṇasīlā. Sakaṃ ācariyakanti attano ācariyavādaṃ. Ācikkhissantīti ādito kathessanti, attanā uggahitaniyāmena pare uggaṇhāpessantīti attho. Desessantīti vācessanti, pāḷiṃ sammā vācessantīti attho. Paññapessantīti pajānāpessanti, pakāsessantīti attho. Paṭṭhapessantīti pakārena ṭhapessanti. Vivarissantīti vivaṭaṃ karissanti. Vibhajissantīti vibhattaṃ karissanti. Uttānīkarissantīti anuttānaṃ gambhīraṃ uttānaṃ pākaṭaṃ karissanti. Sahadhammenāti sahetukena sakāraṇena vacanena. Sappāṭihāriyanti yāvaniyyānikaṃ katvā. Dhammaṃ desessantīti navavidhalokuttaradhammaṃ pabodhessanti, pakāsessantīti attho.
зд̇т̇а жа ‘‘бан̃н̃абзссанд̇ий’’д̇иаад̣̇ийхи чахи бад̣̇зхи ча ад̇т̇абад̣̇аани д̣̇ассид̇аани, аад̣̇ид̇о бана д̣̇вийхи бад̣̇зхи ча б̣яан̃ж̇анабад̣̇аанийд̇и. зд̇д̇аавад̇аа д̇збидагам̣ б̣уд̣̇д̇хаважанам̣ сам̣ван̣н̣анаанаязна сан̇г̇ахзд̇ваа д̣̇ассид̇ам̣ ход̇и. вуд̇д̇ан̃хзд̇ам̣ нзд̇д̇ияам̣ ‘‘д̣̇ваад̣̇асабад̣̇аани суд̇д̇ам̣, д̇ам̣ саб̣б̣ам̣ б̣яан̃ж̇анан̃жа ад̇т̇о жаа’’д̇и (нзд̇д̇и. сан̇г̇ахаваара).
Ettha ca ‘‘paññapessantī’’tiādīhi chahi padehi cha atthapadāni dassitāni, ādito pana dvīhi padehi cha byañjanapadānīti. Ettāvatā tepiṭakaṃ buddhavacanaṃ saṃvaṇṇanānayena saṅgahetvā dassitaṃ hoti. Vuttañhetaṃ nettiyaṃ ‘‘dvādasapadāni suttaṃ, taṃ sabbaṃ byañjanañca attho cā’’ti (netti. saṅgahavāra).
б̣рахмажарияанд̇и сигкад̇д̇аяасан̇г̇ахид̇ам̣ сагалам̣ саасанаб̣рахмажарияам̣. ид̣̇д̇ханд̇и самид̣̇д̇хам̣ жхаануббаад̣̇авасзна. пийд̇анд̇и вуд̣̇д̇хиббад̇д̇ам̣ саб̣б̣апаалипуллам̣ абхин̃н̃аасамбад̇д̇ивасзна. вид̇т̇аариганд̇и вид̇т̇ад̇ам̣ д̇асмим̣ д̇асмим̣ д̣̇исаабхааг̇з бад̇идтаханавасзна. б̣аахуж̇ан̃н̃анд̇и б̣ахуухи н̃аад̇ам̣ бадивид̣̇д̇хам̣ б̣ахуж̇анаабхисамаяавасзна. бут̇убхууд̇анд̇и саб̣б̣аагааравасзна бут̇улабхааваббад̇д̇ам̣. гат̇ам̣? яаава д̣̇звамануссзхи суббагаасид̇анд̇и яад̇д̇агаа вин̃н̃уж̇аад̇игаа д̣̇зваа мануссаа жа ад̇т̇и, д̇зхи саб̣б̣зхи судту багаасид̇анд̇и ад̇т̇о.
Brahmacariyanti sikkhattayasaṅgahitaṃ sakalaṃ sāsanabrahmacariyaṃ. Iddhanti samiddhaṃ jhānuppādavasena. Phītanti vuddhippattaṃ sabbaphāliphullaṃ abhiññāsampattivasena. Vitthārikanti vitthataṃ tasmiṃ tasmiṃ disābhāge patiṭṭhahanavasena. Bāhujaññanti bahūhi ñātaṃ paṭividdhaṃ bahujanābhisamayavasena. Puthubhūtanti sabbākāravasena puthulabhāvappattaṃ. Kathaṃ? Yāva devamanussehi suppakāsitanti yattakā viññujātikā devā manussā ca atthi, tehi sabbehi suṭṭhu pakāsitanti attho.
аббоссуггод̇и нируссугго лийнавийрияо. ‘‘д̇ван̃хи, баабима, сад̇д̇асад̇д̇аахаад̇иггаманад̇о бадтааяа ‘бариниб̣б̣аад̇у д̣̇аани, бханд̇з бхаг̇аваа, бариниб̣б̣аад̇у суг̇ад̇о’д̇и вираванд̇о аахин̣д̣ид̇т̇а, аж̇ж̇а д̣̇аани бадтааяа виг̇ад̇уссаахо хохи, маа маяхам̣ бариниб̣б̣аанад̇т̇ааяа вааяаамам̣ гарохий’’д̇и вад̣̇ад̇и. сад̇о самбаж̇аано ааяусан̇каарам̣ оссаж̇ийд̇и сад̇им̣ суубадтид̇ам̣ гад̇ваа н̃аан̣зна барижчинд̣̇ид̇ваа ааяусан̇каарам̣ виссаж̇и баж̇ахи. д̇ад̇т̇а на бхаг̇аваа хад̇т̇зна лзд̣д̣ум̣ вияа ааяусан̇каарам̣ оссаж̇и, д̇змаасамад̇д̇амзва бана самаабад̇д̇им̣ самаабаж̇ж̇ид̇ваа д̇ад̇о барам̣ на самаабаж̇ж̇иссаамийд̇и жид̇д̇ам̣ уббаад̣̇зси. д̇ам̣ санд̇хааяа вуд̇д̇ам̣ – ‘‘оссаж̇ий’’д̇и, ‘‘воссаж̇ж̇ий’’д̇иби баато.
Appossukkoti nirussukko līnavīriyo. ‘‘Tvañhi, pāpima, sattasattāhātikkamanato paṭṭhāya ‘parinibbātu dāni, bhante bhagavā, parinibbātu sugato’ti viravanto āhiṇḍittha, ajja dāni paṭṭhāya vigatussāho hohi, mā mayhaṃ parinibbānatthāya vāyāmaṃ karohī’’ti vadati. Sato sampajāno āyusaṅkhāraṃ ossajīti satiṃ sūpaṭṭhitaṃ katvā ñāṇena paricchinditvā āyusaṅkhāraṃ vissaji pajahi. Tattha na bhagavā hatthena leḍḍuṃ viya āyusaṅkhāraṃ ossaji, temāsamattameva pana samāpattiṃ samāpajjitvā tato paraṃ na samāpajjissāmīti cittaṃ uppādesi. Taṃ sandhāya vuttaṃ – ‘‘ossajī’’ti, ‘‘vossajjī’’tipi pāṭho.
гасмаа бана бхаг̇аваа габбам̣ ваа габбаавасзсам̣ ваа таад̇ум̣ самад̇т̇о д̇ад̇д̇агам̣ гаалам̣ адтад̇ваа бариниб̣б̣ааяид̇ум̣ маарасса яаажанааяа ааяусан̇каарам̣ оссаж̇и? на бхаг̇аваа маарасса яаажанааяа ааяусан̇каарам̣ оссаж̇и, нааби т̇зрасса ааяаажанааяа на оссаж̇иссад̇и, д̇змаасад̇о бана барам̣ б̣уд̣̇д̇хавзнзяяаанам̣ абхаавад̇о ааяусан̇каарам̣ оссаж̇и . таанан̃хи наама б̣уд̣̇д̇хаанам̣ бхаг̇аванд̇аанам̣ яаавад̣̇зва взнзяяавинаяанад̇т̇ам̣, д̇з асад̇и винзяяаж̇анз гзна наама гааран̣зна тассанд̇и. яад̣̇и жа маарасса яаажанааяа бариниб̣б̣ааязяяа, бурзд̇арам̣язва бариниб̣б̣ааязяяа. б̣од̇химан̣д̣зби хи маарзна яаажид̇ам̣, нимид̇д̇обхаасагаран̣амби т̇зрасса согад̇анугаран̣ад̇т̇анд̇и вуд̇д̇овааяамад̇т̇о. абижа б̣уд̣̇д̇хаб̣алад̣̇ийбанад̇т̇ам̣ нимид̇д̇обхаасагаран̣ам̣. звам̣ махаанубхааваа б̣уд̣̇д̇хаа бхаг̇аванд̇оязва д̇идтанд̇ааби ад̇д̇ано ружияаава д̇идтанд̇и, бариниб̣б̣ааяанд̇ааби ад̇д̇ано ружияаава бариниб̣б̣ааяанд̇ийд̇и.
Kasmā pana bhagavā kappaṃ vā kappāvasesaṃ vā ṭhātuṃ samattho tattakaṃ kālaṃ aṭṭhatvā parinibbāyituṃ mārassa yācanāya āyusaṅkhāraṃ ossaji? Na bhagavā mārassa yācanāya āyusaṅkhāraṃ ossaji, nāpi therassa āyācanāya na ossajissati, temāsato pana paraṃ buddhaveneyyānaṃ abhāvato āyusaṅkhāraṃ ossaji . Ṭhānañhi nāma buddhānaṃ bhagavantānaṃ yāvadeva veneyyavinayanatthaṃ, te asati vineyyajane kena nāma kāraṇena ṭhassanti. Yadi ca mārassa yācanāya parinibbāyeyya, puretaraṃyeva parinibbāyeyya. Bodhimaṇḍepi hi mārena yācitaṃ, nimittobhāsakaraṇampi therassa sokatanukaraṇatthanti vuttovāyamattho. Apica buddhabaladīpanatthaṃ nimittobhāsakaraṇaṃ. Evaṃ mahānubhāvā buddhā bhagavantoyeva tiṭṭhantāpi attano ruciyāva tiṭṭhanti, parinibbāyantāpi attano ruciyāva parinibbāyantīti.
махаабхуумижаалод̇и маханд̇о бат̇авийгамбо. д̇ад̣̇аа гира д̣̇асасахассилогад̇хаад̇у агамбид̇т̇а. бхим̣санагод̇и бхаяаж̇анаго. д̣̇звад̣̇унд̣̇убхияо жа палим̣сууд̇и д̣̇звабхзрияо над̣̇им̣су, д̣̇зво сугкаг̇аж̇ж̇ид̇ам̣ г̇аж̇ж̇и, агаалавиж̇ж̇улад̇аа нижчарим̣су, кан̣игавассам̣ вассийд̇и вуд̇д̇ам̣ ход̇и.
Mahābhūmicāloti mahanto pathavīkampo. Tadā kira dasasahassilokadhātu akampittha. Bhiṃsanakoti bhayajanako. Devadundubhiyo ca phaliṃsūti devabheriyo nadiṃsu, devo sukkhagajjitaṃ gajji, akālavijjulatā nicchariṃsu, khaṇikavassaṃ vassīti vuttaṃ hoti.
зд̇амад̇т̇ам̣ вид̣̇ид̇ваад̇и зд̇ам̣ сан̇каарависан̇каараанам̣ висзсасан̇каад̇ам̣ ад̇т̇ам̣ саб̣б̣аагаарад̇о вид̣̇ид̇ваа. имам̣ уд̣̇аананд̇и анавасзсасан̇каарз виссаж̇ж̇зд̇ваа ад̇д̇ано висан̇каараг̇аманад̣̇ийбагам̣ уд̣̇аанам̣ уд̣̇аанзси. гасмаа уд̣̇аанзси? гожи наама вад̣̇зяяа ‘‘маарзна бажчад̇о бажчад̇о ануб̣анд̇хид̇ваа ‘бариниб̣б̣аад̇у, бханд̇з’д̇и убад̣̇д̣̇уд̇о бхаязна бхаг̇аваа ааяусан̇каарам̣ оссаж̇ий’’д̇и. ‘‘д̇ассогаасо маа ход̇у, бхийд̇асса уд̣̇аанам̣ наама над̇т̇ий’’д̇и зд̇асса д̣̇ийбанад̇т̇ам̣ бийд̇ивзг̇ависсадтам̣ уд̣̇аанам̣ уд̣̇аанзсийд̇и адтагат̇аасу вуд̇д̇ам̣. д̇ад̇о д̇змаасамад̇д̇знзва жа бана б̣уд̣̇д̇хагижжасса нибпаж̇ж̇анад̇о звам̣ д̣̇ийгхарад̇д̇ам̣ маяаа барихадояам̣ д̣̇угкабхааро на жирассзва нигкибияад̇ийд̇и бассад̇о бариниб̣б̣аанаг̇ун̣абажжавзгкан̣з д̇асса ул̣аарам̣ бийд̇исоманассам̣ уббаж̇ж̇и, д̇зна бийд̇ивзг̇зна уд̣̇аанзсийд̇и яуд̇д̇ам̣ вияа. зганд̇зна хи висан̇кааранинно ниб̣б̣аанаж̇жхаасаяо сад̇т̇аа махаагарун̣ааяа б̣алаггаарзна вияа сад̇д̇ахид̇ад̇т̇ам̣ логз сужирам̣ тид̇о. д̇ат̇аа хи д̣̇звасигам̣ жад̇увийсад̇игодисад̇асахассасан̇каа самаабад̇д̇ияо вал̣ан̃ж̇зд̇и, сод̣̇аани махаагарун̣аад̇хигаарасса нибпаннад̇д̇аа ниб̣б̣аанаабхимуко анаббагам̣ бийд̇исоманассам̣ бадисам̣взд̣̇зси. д̇знзва хи бхаг̇авад̇о гилзсабариниб̣б̣аанад̣̇ивасз вияа канд̇хабариниб̣б̣аанад̣̇ивасзби сарийраабхаа висзсад̇о виббасаннаа барисуд̣̇д̇хаа бабхассараа ахосийд̇и.
Etamatthaṃ viditvāti etaṃ saṅkhāravisaṅkhārānaṃ visesasaṅkhātaṃ atthaṃ sabbākārato viditvā. Imaṃudānanti anavasesasaṅkhāre vissajjetvā attano visaṅkhāragamanadīpakaṃ udānaṃ udānesi. Kasmā udānesi? Koci nāma vadeyya ‘‘mārena pacchato pacchato anubandhitvā ‘parinibbātu, bhante’ti upadduto bhayena bhagavā āyusaṅkhāraṃ ossajī’’ti. ‘‘Tassokāso mā hotu, bhītassa udānaṃ nāma natthī’’ti etassa dīpanatthaṃ pītivegavissaṭṭhaṃ udānaṃ udānesīti aṭṭhakathāsu vuttaṃ. Tato temāsamatteneva ca pana buddhakiccassa nipphajjanato evaṃ dīgharattaṃ mayā parihaṭoyaṃ dukkhabhāro na cirasseva nikkhipiyatīti passato parinibbānaguṇapaccavekkhaṇe tassa uḷāraṃ pītisomanassaṃ uppajji, tena pītivegena udānesīti yuttaṃ viya. Ekantena hi visaṅkhāraninno nibbānajjhāsayo satthā mahākaruṇāya balakkārena viya sattahitatthaṃ loke suciraṃ ṭhito. Tathā hi devasikaṃ catuvīsatikoṭisatasahassasaṅkhā samāpattiyo vaḷañjeti, sodāni mahākaruṇādhikārassa nipphannattā nibbānābhimukho anappakaṃ pītisomanassaṃ paṭisaṃvedesi. Teneva hi bhagavato kilesaparinibbānadivase viya khandhaparinibbānadivasepi sarīrābhā visesato vippasannā parisuddhā pabhassarā ahosīti.
г̇аат̇ааяа сон̣асин̇г̇аалаад̣̇ийнамби бажжагкабхаавад̇о д̇улид̇ам̣ барижчиннанд̇и д̇улам̣, гаамааважарагаммам̣. на д̇улам̣ ад̇улам̣, д̇улам̣ ваа сад̣̇исамасса ан̃н̃ам̣ логияагаммам̣ над̇т̇ийд̇и ад̇улам̣, махаг̇г̇ад̇агаммам̣. гаамааважарам̣ руубааважарам̣ ваа д̇улам̣, аруубааважарам̣ ад̇улам̣. аббавибаагам̣ ваа д̇улам̣, б̣ахувибаагам̣ ад̇улам̣. самбхаванд̇и самбхавасса хзд̇убхууд̇ам̣, убабад̇д̇иж̇анаганд̇и ад̇т̇о. бхавасан̇кааранд̇и бунаб̣бхавасан̇кааран̣агам̣. авассаж̇ийд̇и виссаж̇ж̇зси. мунийд̇и б̣уд̣̇д̇хамуни. аж̇жхад̇д̇арад̇од̇и нияагаж̇жхад̇д̇арад̇о. самаахид̇од̇и убажаараббанаасамаад̇хивасзна самаахид̇о. абхинд̣̇и гаважамиваад̇и гаважам̣ вияа абхинд̣̇и. ад̇д̇асамбхаванд̇и ад̇д̇ани сан̃ж̇аад̇ам̣ гилзсам̣. ид̣̇ам̣ вуд̇д̇ам̣ ход̇и ‘‘савибаагадтзна самбхавам̣, бхаваабхаваабхисан̇каран̣адтзна бхавасан̇кааранд̇и жа лад̣̇д̇ханаамам̣ д̇улаад̇уласан̇каад̇ам̣ логияагамман̃жа оссаж̇и, сан̇г̇аамасийсз махааяод̇хо гаважам̣ вияа ад̇д̇асамбхавам̣ гилзсан̃жа аж̇жхад̇д̇арад̇о самаахид̇о худ̇ваа абхинд̣̇ий’’д̇и.
Gāthāya soṇasiṅgālādīnampi paccakkhabhāvato tulitaṃ paricchinnanti tulaṃ, kāmāvacarakammaṃ. Na tulaṃ atulaṃ, tulaṃ vā sadisamassa aññaṃ lokiyakammaṃ natthīti atulaṃ, mahaggatakammaṃ. Kāmāvacaraṃ rūpāvacaraṃ vā tulaṃ, arūpāvacaraṃ atulaṃ. Appavipākaṃ vā tulaṃ, bahuvipākaṃ atulaṃ. Sambhavanti sambhavassa hetubhūtaṃ, upapattijanakanti attho. Bhavasaṅkhāranti punabbhavasaṅkhāraṇakaṃ. Avassajīti vissajjesi. Munīti buddhamuni. Ajjhattaratoti niyakajjhattarato. Samāhitoti upacārappanāsamādhivasena samāhito. Abhindi kavacamivāti kavacaṃ viya abhindi. Attasambhavanti attani sañjātaṃ kilesaṃ. Idaṃ vuttaṃ hoti ‘‘savipākaṭṭhena sambhavaṃ, bhavābhavābhisaṅkharaṇaṭṭhena bhavasaṅkhāranti ca laddhanāmaṃ tulātulasaṅkhātaṃ lokiyakammañca ossaji, saṅgāmasīse mahāyodho kavacaṃ viya attasambhavaṃ kilesañca ajjhattarato samāhito hutvā abhindī’’ti.
ат̇а ваа д̇уланд̇и д̇улзнд̇о д̇ийрзнд̇о. ад̇улан̃жа самбхаванд̇и ниб̣б̣аанан̃жзва бхаван̃жа. бхавасан̇кааранд̇и бхаваг̇аамигам̣ гаммам̣. авассаж̇и мунийд̇и ‘‘бан̃жагканд̇хаа анижжаа, бан̃жаннам̣ канд̇хаанам̣ нирод̇хо ниб̣б̣аанам̣ нижжа’’нд̇иаад̣̇инаа наязна д̇улзнд̇о б̣уд̣̇д̇хамуни бхавз аад̣̇ийнавам̣, ниб̣б̣аанз жа аанисам̣сам̣ д̣̇исваа д̇ам̣ канд̇хаанам̣ муулабхууд̇ам̣ бхавасан̇каарагаммам̣ ‘‘гаммагкаяааяа сам̣вад̇д̇ад̇ий’’д̇и (ма. ни. 2.81; а. ни. 4.233) звам̣ вуд̇д̇зна гаммагкаяагарзна арияамаг̇г̇зна авассаж̇и . гат̇ам̣ аж̇жхад̇д̇арад̇о самаахид̇о, абхинд̣̇и гаважамивад̇д̇асамбхавам̣. со хи вибассанаавасзна аж̇жхад̇д̇арад̇о, самат̇авасзна самаахид̇од̇и звам̣ буб̣б̣абхааг̇ад̇о бадтааяа самат̇авибассанааб̣алзна гаважам̣ вияа ад̇д̇абхаавам̣ барияонанд̇хид̇ваа тид̇ам̣, ад̇д̇ани самбхавад̇д̇аа ‘‘ад̇д̇асамбхава’’нд̇и лад̣̇д̇ханаамам̣ саб̣б̣ам̣ гилзсаж̇аалам̣ абхинд̣̇и, гилзсаабхаавзнзва гаммам̣ аббадисанд̇хигад̇д̇аа авассадтам̣ наама ход̇ийд̇и звам̣ гилзсаббахаанзна гаммам̣ баж̇ахи. ид̇и б̣од̇химуулзязва авассадтабхавасан̇кааро бхаг̇аваа взкамиссагзна вияа ж̇арасагадам̣ самаабад̇д̇ивзкамиссагзна ад̇д̇абхаавам̣ яаабзнд̇оби ‘‘ид̇о д̇змаасад̇о уд̣̇д̇хам̣ самаабад̇д̇ивзкамасса на д̣̇ассаамий’’д̇и жид̇д̇уббаад̣̇анзна ааяусан̇каарам̣ оссаж̇ийд̇и.
Atha vā tulanti tulento tīrento. Atulañca sambhavanti nibbānañceva bhavañca. Bhavasaṅkhāranti bhavagāmikaṃ kammaṃ. Avassaji munīti ‘‘pañcakkhandhā aniccā, pañcannaṃ khandhānaṃ nirodho nibbānaṃ nicca’’ntiādinā nayena tulento buddhamuni bhave ādīnavaṃ, nibbāne ca ānisaṃsaṃ disvā taṃ khandhānaṃ mūlabhūtaṃ bhavasaṅkhārakammaṃ ‘‘kammakkhayāya saṃvattatī’’ti (ma. ni. 2.81; a. ni. 4.233) evaṃ vuttena kammakkhayakarena ariyamaggena avassaji . Kathaṃ ajjhattarato samāhito, abhindi kavacamivattasambhavaṃ. So hi vipassanāvasena ajjhattarato, samathavasena samāhitoti evaṃ pubbabhāgato paṭṭhāya samathavipassanābalena kavacaṃ viya attabhāvaṃ pariyonandhitvā ṭhitaṃ, attani sambhavattā ‘‘attasambhava’’nti laddhanāmaṃ sabbaṃ kilesajālaṃ abhindi, kilesābhāveneva kammaṃ appaṭisandhikattā avassaṭṭhaṃ nāma hotīti evaṃ kilesappahānena kammaṃ pajahi. Iti bodhimūleyeva avassaṭṭhabhavasaṅkhāro bhagavā vekhamissakena viya jarasakaṭaṃ samāpattivekhamissakena attabhāvaṃ yāpentopi ‘‘ito temāsato uddhaṃ samāpattivekhamassa na dassāmī’’ti cittuppādanena āyusaṅkhāraṃ ossajīti.
батамасуд̇д̇аван̣н̣анаа нидтид̇аа.
Paṭhamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 1. ааяусан̇каароссаж̇ж̇анасуд̇д̇ам̣ • 1. Āyusaṅkhārossajjanasuttaṃ
