| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. அய்யிகாஸுத்தங்
2. Ayyikāsuttaṃ
133. ஸாவத்தி²னிதா³னங் . ஏகமந்தங் நிஸின்னங் கோ² ராஜானங் பஸேனதி³ங் கோஸலங் ப⁴க³வா ஏதத³வோச – ‘‘ஹந்த³, குதோ நு த்வங், மஹாராஜ, ஆக³ச்ச²ஸி தி³வாதி³வஸ்ஸா’’தி?
133. Sāvatthinidānaṃ . Ekamantaṃ nisinnaṃ kho rājānaṃ pasenadiṃ kosalaṃ bhagavā etadavoca – ‘‘handa, kuto nu tvaṃ, mahārāja, āgacchasi divādivassā’’ti?
‘‘அய்யிகா மே, ப⁴ந்தே, காலங்கதா ஜிண்ணா வுட்³டா⁴ மஹல்லிகா அத்³த⁴க³தா வயோஅனுப்பத்தா வீஸவஸ்ஸஸதிகா ஜாதியா. அய்யிகா கோ² பன மே, ப⁴ந்தே, பியா ஹோதி மனாபா. ஹத்தி²ரதனேன சேபாஹங், ப⁴ந்தே, லபெ⁴ய்யங் ‘மா மே அய்யிகா காலமகாஸீ’தி, ஹத்தி²ரதனம்பாஹங் த³தெ³ய்யங் – ‘மா மே அய்யிகா காலமகாஸீ’தி. அஸ்ஸரதனேன சேபாஹங், ப⁴ந்தே, லபெ⁴ய்யங் ‘மா மே அய்யிகா காலமகாஸீ’தி, அஸ்ஸரதனம்பாஹங் த³தெ³ய்யங் – ‘மா மே அய்யிகா காலமகாஸீ’தி. கா³மவரேன சேபாஹங் ப⁴ந்தே, லபெ⁴ய்யங் ‘மா மே அய்யிகா காலமகாஸீ’தி, கா³மவரம்பாஹங் த³தெ³ய்யங் – ‘மா மே அய்யிகா காலமகாஸீ’தி. ஜனபத³பதே³ஸேன 1 சேபாஹங், ப⁴ந்தே, லபெ⁴ய்யங் ‘மா மே அய்யிகா காலமகாஸீ’தி, ஜனபத³பதே³ஸம்பாஹங் த³தெ³ய்யங் – ‘மா மே அய்யிகா காலமகாஸீ’தி. ‘ஸப்³பே³ ஸத்தா, மஹாராஜ, மரணத⁴ம்மா மரணபரியோஸானா மரணங் அனதீதா’தி. ‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவஸுபா⁴ஸிதமித³ங், ப⁴ந்தே, ப⁴க³வதா – ஸப்³பே³ ஸத்தா மரணத⁴ம்மா மரணபரியோஸானா மரணங் அனதீதா’’’தி.
‘‘Ayyikā me, bhante, kālaṅkatā jiṇṇā vuḍḍhā mahallikā addhagatā vayoanuppattā vīsavassasatikā jātiyā. Ayyikā kho pana me, bhante, piyā hoti manāpā. Hatthiratanena cepāhaṃ, bhante, labheyyaṃ ‘mā me ayyikā kālamakāsī’ti, hatthiratanampāhaṃ dadeyyaṃ – ‘mā me ayyikā kālamakāsī’ti. Assaratanena cepāhaṃ, bhante, labheyyaṃ ‘mā me ayyikā kālamakāsī’ti, assaratanampāhaṃ dadeyyaṃ – ‘mā me ayyikā kālamakāsī’ti. Gāmavarena cepāhaṃ bhante, labheyyaṃ ‘mā me ayyikā kālamakāsī’ti, gāmavarampāhaṃ dadeyyaṃ – ‘mā me ayyikā kālamakāsī’ti. Janapadapadesena 2 cepāhaṃ, bhante, labheyyaṃ ‘mā me ayyikā kālamakāsī’ti, janapadapadesampāhaṃ dadeyyaṃ – ‘mā me ayyikā kālamakāsī’ti. ‘Sabbe sattā, mahārāja, maraṇadhammā maraṇapariyosānā maraṇaṃ anatītā’ti. ‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – sabbe sattā maraṇadhammā maraṇapariyosānā maraṇaṃ anatītā’’’ti.
‘‘ஏவமேதங், மஹாராஜ, ஏவமேதங், மஹாராஜ! ஸப்³பே³ ஸத்தா மரணத⁴ம்மா மரணபரியோஸானா மரணங் அனதீதா. ஸெய்யதா²பி, மஹாராஜ, யானி கானிசி கும்ப⁴காரபா⁴ஜனானி ஆமகானி சேவ பக்கானி ச ஸப்³பா³னி தானி பே⁴த³னத⁴ம்மானி பே⁴த³னபரியோஸானானி பே⁴த³னங் அனதீதானி; ஏவமேவ கோ², மஹாராஜ, ஸப்³பே³ ஸத்தா மரணத⁴ம்மா மரணபரியோஸானா மரணங் அனதீதா’’தி. இத³மவோச…பே॰…
‘‘Evametaṃ, mahārāja, evametaṃ, mahārāja! Sabbe sattā maraṇadhammā maraṇapariyosānā maraṇaṃ anatītā. Seyyathāpi, mahārāja, yāni kānici kumbhakārabhājanāni āmakāni ceva pakkāni ca sabbāni tāni bhedanadhammāni bhedanapariyosānāni bhedanaṃ anatītāni; evameva kho, mahārāja, sabbe sattā maraṇadhammā maraṇapariyosānā maraṇaṃ anatītā’’ti. Idamavoca…pe…
‘‘ஸப்³பே³ ஸத்தா மரிஸ்ஸந்தி, மரணந்தஞ்ஹி ஜீவிதங்;
‘‘Sabbe sattā marissanti, maraṇantañhi jīvitaṃ;
யதா²கம்மங் க³மிஸ்ஸந்தி, புஞ்ஞபாபப²லூபகா³;
Yathākammaṃ gamissanti, puññapāpaphalūpagā;
நிரயங் பாபகம்மந்தா, புஞ்ஞகம்மா ச ஸுக்³க³திங்.
Nirayaṃ pāpakammantā, puññakammā ca suggatiṃ.
‘‘தஸ்மா கரெய்ய கல்யாணங், நிசயங் ஸம்பராயிகங்;
‘‘Tasmā kareyya kalyāṇaṃ, nicayaṃ samparāyikaṃ;
புஞ்ஞானி பரலோகஸ்மிங், பதிட்டா² ஹொந்தி பாணின’’ந்தி.
Puññāni paralokasmiṃ, patiṭṭhā honti pāṇina’’nti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. அய்யிகாஸுத்தவண்ணனா • 2. Ayyikāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அய்யிகாஸுத்தவண்ணனா • 2. Ayyikāsuttavaṇṇanā
