| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. অয্যিকাসুত্তং
2. Ayyikāsuttaṃ
১৩৩. সাৰত্থিনিদানং । একমন্তং নিসিন্নং খো রাজানং পসেনদিং কোসলং ভগৰা এতদৰোচ – ‘‘হন্দ, কুতো নু ত্ৰং, মহারাজ, আগচ্ছসি দিৰাদিৰস্সা’’তি?
133. Sāvatthinidānaṃ . Ekamantaṃ nisinnaṃ kho rājānaṃ pasenadiṃ kosalaṃ bhagavā etadavoca – ‘‘handa, kuto nu tvaṃ, mahārāja, āgacchasi divādivassā’’ti?
‘‘অয্যিকা মে, ভন্তে, কালঙ্কতা জিণ্ণা ৰুড্ঢা মহল্লিকা অদ্ধগতা ৰযোঅনুপ্পত্তা ৰীসৰস্সসতিকা জাতিযা। অয্যিকা খো পন মে, ভন্তে, পিযা হোতি মনাপা। হত্থিরতনেন চেপাহং, ভন্তে, লভেয্যং ‘মা মে অয্যিকা কালমকাসী’তি, হত্থিরতনম্পাহং দদেয্যং – ‘মা মে অয্যিকা কালমকাসী’তি। অস্সরতনেন চেপাহং, ভন্তে, লভেয্যং ‘মা মে অয্যিকা কালমকাসী’তি, অস্সরতনম্পাহং দদেয্যং – ‘মা মে অয্যিকা কালমকাসী’তি। গামৰরেন চেপাহং ভন্তে, লভেয্যং ‘মা মে অয্যিকা কালমকাসী’তি, গামৰরম্পাহং দদেয্যং – ‘মা মে অয্যিকা কালমকাসী’তি। জনপদপদেসেন 1 চেপাহং, ভন্তে, লভেয্যং ‘মা মে অয্যিকা কালমকাসী’তি, জনপদপদেসম্পাহং দদেয্যং – ‘মা মে অয্যিকা কালমকাসী’তি। ‘সব্বে সত্তা, মহারাজ, মরণধম্মা মরণপরিযোসানা মরণং অনতীতা’তি। ‘অচ্ছরিযং, ভন্তে, অব্ভুতং, ভন্তে! যাৰসুভাসিতমিদং, ভন্তে, ভগৰতা – সব্বে সত্তা মরণধম্মা মরণপরিযোসানা মরণং অনতীতা’’’তি।
‘‘Ayyikā me, bhante, kālaṅkatā jiṇṇā vuḍḍhā mahallikā addhagatā vayoanuppattā vīsavassasatikā jātiyā. Ayyikā kho pana me, bhante, piyā hoti manāpā. Hatthiratanena cepāhaṃ, bhante, labheyyaṃ ‘mā me ayyikā kālamakāsī’ti, hatthiratanampāhaṃ dadeyyaṃ – ‘mā me ayyikā kālamakāsī’ti. Assaratanena cepāhaṃ, bhante, labheyyaṃ ‘mā me ayyikā kālamakāsī’ti, assaratanampāhaṃ dadeyyaṃ – ‘mā me ayyikā kālamakāsī’ti. Gāmavarena cepāhaṃ bhante, labheyyaṃ ‘mā me ayyikā kālamakāsī’ti, gāmavarampāhaṃ dadeyyaṃ – ‘mā me ayyikā kālamakāsī’ti. Janapadapadesena 2 cepāhaṃ, bhante, labheyyaṃ ‘mā me ayyikā kālamakāsī’ti, janapadapadesampāhaṃ dadeyyaṃ – ‘mā me ayyikā kālamakāsī’ti. ‘Sabbe sattā, mahārāja, maraṇadhammā maraṇapariyosānā maraṇaṃ anatītā’ti. ‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – sabbe sattā maraṇadhammā maraṇapariyosānā maraṇaṃ anatītā’’’ti.
‘‘এৰমেতং, মহারাজ, এৰমেতং, মহারাজ! সব্বে সত্তা মরণধম্মা মরণপরিযোসানা মরণং অনতীতা। সেয্যথাপি, মহারাজ, যানি কানিচি কুম্ভকারভাজনানি আমকানি চেৰ পক্কানি চ সব্বানি তানি ভেদনধম্মানি ভেদনপরিযোসানানি ভেদনং অনতীতানি; এৰমেৰ খো, মহারাজ, সব্বে সত্তা মরণধম্মা মরণপরিযোসানা মরণং অনতীতা’’তি। ইদমৰোচ…পে॰…
‘‘Evametaṃ, mahārāja, evametaṃ, mahārāja! Sabbe sattā maraṇadhammā maraṇapariyosānā maraṇaṃ anatītā. Seyyathāpi, mahārāja, yāni kānici kumbhakārabhājanāni āmakāni ceva pakkāni ca sabbāni tāni bhedanadhammāni bhedanapariyosānāni bhedanaṃ anatītāni; evameva kho, mahārāja, sabbe sattā maraṇadhammā maraṇapariyosānā maraṇaṃ anatītā’’ti. Idamavoca…pe…
‘‘সব্বে সত্তা মরিস্সন্তি, মরণন্তঞ্হি জীৰিতং।
‘‘Sabbe sattā marissanti, maraṇantañhi jīvitaṃ;
যথাকম্মং গমিস্সন্তি, পুঞ্ঞপাপফলূপগা।
Yathākammaṃ gamissanti, puññapāpaphalūpagā;
নিরযং পাপকম্মন্তা, পুঞ্ঞকম্মা চ সুগ্গতিং॥
Nirayaṃ pāpakammantā, puññakammā ca suggatiṃ.
‘‘তস্মা করেয্য কল্যাণং, নিচযং সম্পরাযিকং।
‘‘Tasmā kareyya kalyāṇaṃ, nicayaṃ samparāyikaṃ;
পুঞ্ঞানি পরলোকস্মিং, পতিট্ঠা হোন্তি পাণিন’’ন্তি॥
Puññāni paralokasmiṃ, patiṭṭhā honti pāṇina’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. অয্যিকাসুত্তৰণ্ণনা • 2. Ayyikāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. অয্যিকাসুত্তৰণ্ণনা • 2. Ayyikāsuttavaṇṇanā
