| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཨཡྻིཀཱསུཏྟཾ
2. Ayyikāsuttaṃ
༡༣༣. སཱཝཏྠིནིདཱནཾ ། ཨེཀམནྟཾ ནིསིནྣཾ ཁོ རཱཛཱནཾ པསེནདིཾ ཀོསལཾ བྷགཝཱ ཨེཏདཝོཙ – ‘‘ཧནྡ, ཀུཏོ ནུ ཏྭཾ, མཧཱརཱཛ, ཨཱགཙྪསི དིཝཱདིཝསྶཱ’’ཏི?
133. Sāvatthinidānaṃ . Ekamantaṃ nisinnaṃ kho rājānaṃ pasenadiṃ kosalaṃ bhagavā etadavoca – ‘‘handa, kuto nu tvaṃ, mahārāja, āgacchasi divādivassā’’ti?
‘‘ཨཡྻིཀཱ མེ, བྷནྟེ, ཀཱལངྐཏཱ ཛིཎྞཱ ཝུཌྜྷཱ མཧལླིཀཱ ཨདྡྷགཏཱ ཝཡོཨནུཔྤཏྟཱ ཝཱིསཝསྶསཏིཀཱ ཛཱཏིཡཱ། ཨཡྻིཀཱ ཁོ པན མེ, བྷནྟེ, པིཡཱ ཧོཏི མནཱཔཱ། ཧཏྠིརཏནེན ཙེཔཱཧཾ, བྷནྟེ, ལབྷེཡྻཾ ‘མཱ མེ ཨཡྻིཀཱ ཀཱལམཀཱསཱི’ཏི, ཧཏྠིརཏནམྤཱཧཾ དདེཡྻཾ – ‘མཱ མེ ཨཡྻིཀཱ ཀཱལམཀཱསཱི’ཏི། ཨསྶརཏནེན ཙེཔཱཧཾ, བྷནྟེ, ལབྷེཡྻཾ ‘མཱ མེ ཨཡྻིཀཱ ཀཱལམཀཱསཱི’ཏི, ཨསྶརཏནམྤཱཧཾ དདེཡྻཾ – ‘མཱ མེ ཨཡྻིཀཱ ཀཱལམཀཱསཱི’ཏི། གཱམཝརེན ཙེཔཱཧཾ བྷནྟེ, ལབྷེཡྻཾ ‘མཱ མེ ཨཡྻིཀཱ ཀཱལམཀཱསཱི’ཏི, གཱམཝརམྤཱཧཾ དདེཡྻཾ – ‘མཱ མེ ཨཡྻིཀཱ ཀཱལམཀཱསཱི’ཏི། ཛནཔདཔདེསེན 1 ཙེཔཱཧཾ, བྷནྟེ, ལབྷེཡྻཾ ‘མཱ མེ ཨཡྻིཀཱ ཀཱལམཀཱསཱི’ཏི, ཛནཔདཔདེསམྤཱཧཾ དདེཡྻཾ – ‘མཱ མེ ཨཡྻིཀཱ ཀཱལམཀཱསཱི’ཏི། ‘སབྦེ སཏྟཱ, མཧཱརཱཛ, མརཎདྷམྨཱ མརཎཔརིཡོསཱནཱ མརཎཾ ཨནཏཱིཏཱ’ཏི། ‘ཨཙྪརིཡཾ, བྷནྟེ, ཨབྦྷུཏཾ, བྷནྟེ! ཡཱཝསུབྷཱསིཏམིདཾ, བྷནྟེ, བྷགཝཏཱ – སབྦེ སཏྟཱ མརཎདྷམྨཱ མརཎཔརིཡོསཱནཱ མརཎཾ ཨནཏཱིཏཱ’’’ཏི།
‘‘Ayyikā me, bhante, kālaṅkatā jiṇṇā vuḍḍhā mahallikā addhagatā vayoanuppattā vīsavassasatikā jātiyā. Ayyikā kho pana me, bhante, piyā hoti manāpā. Hatthiratanena cepāhaṃ, bhante, labheyyaṃ ‘mā me ayyikā kālamakāsī’ti, hatthiratanampāhaṃ dadeyyaṃ – ‘mā me ayyikā kālamakāsī’ti. Assaratanena cepāhaṃ, bhante, labheyyaṃ ‘mā me ayyikā kālamakāsī’ti, assaratanampāhaṃ dadeyyaṃ – ‘mā me ayyikā kālamakāsī’ti. Gāmavarena cepāhaṃ bhante, labheyyaṃ ‘mā me ayyikā kālamakāsī’ti, gāmavarampāhaṃ dadeyyaṃ – ‘mā me ayyikā kālamakāsī’ti. Janapadapadesena 2 cepāhaṃ, bhante, labheyyaṃ ‘mā me ayyikā kālamakāsī’ti, janapadapadesampāhaṃ dadeyyaṃ – ‘mā me ayyikā kālamakāsī’ti. ‘Sabbe sattā, mahārāja, maraṇadhammā maraṇapariyosānā maraṇaṃ anatītā’ti. ‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – sabbe sattā maraṇadhammā maraṇapariyosānā maraṇaṃ anatītā’’’ti.
‘‘ཨེཝམེཏཾ, མཧཱརཱཛ, ཨེཝམེཏཾ, མཧཱརཱཛ! སབྦེ སཏྟཱ མརཎདྷམྨཱ མརཎཔརིཡོསཱནཱ མརཎཾ ཨནཏཱིཏཱ། སེཡྻཐཱཔི, མཧཱརཱཛ, ཡཱནི ཀཱནིཙི ཀུམྦྷཀཱརབྷཱཛནཱནི ཨཱམཀཱནི ཙེཝ པཀྐཱནི ཙ སབྦཱནི ཏཱནི བྷེདནདྷམྨཱནི བྷེདནཔརིཡོསཱནཱནི བྷེདནཾ ཨནཏཱིཏཱནི; ཨེཝམེཝ ཁོ, མཧཱརཱཛ, སབྦེ སཏྟཱ མརཎདྷམྨཱ མརཎཔརིཡོསཱནཱ མརཎཾ ཨནཏཱིཏཱ’’ཏི། ཨིདམཝོཙ…པེ॰…
‘‘Evametaṃ, mahārāja, evametaṃ, mahārāja! Sabbe sattā maraṇadhammā maraṇapariyosānā maraṇaṃ anatītā. Seyyathāpi, mahārāja, yāni kānici kumbhakārabhājanāni āmakāni ceva pakkāni ca sabbāni tāni bhedanadhammāni bhedanapariyosānāni bhedanaṃ anatītāni; evameva kho, mahārāja, sabbe sattā maraṇadhammā maraṇapariyosānā maraṇaṃ anatītā’’ti. Idamavoca…pe…
‘‘སབྦེ སཏྟཱ མརིསྶནྟི, མརཎནྟཉྷི ཛཱིཝིཏཾ།
‘‘Sabbe sattā marissanti, maraṇantañhi jīvitaṃ;
ཡཐཱཀམྨཾ གམིསྶནྟི, པུཉྙཔཱཔཕལཱུཔགཱ།
Yathākammaṃ gamissanti, puññapāpaphalūpagā;
ནིརཡཾ པཱཔཀམྨནྟཱ, པུཉྙཀམྨཱ ཙ སུགྒཏིཾ༎
Nirayaṃ pāpakammantā, puññakammā ca suggatiṃ.
‘‘ཏསྨཱ ཀརེཡྻ ཀལྱཱཎཾ, ནིཙཡཾ སམྤརཱཡིཀཾ།
‘‘Tasmā kareyya kalyāṇaṃ, nicayaṃ samparāyikaṃ;
པུཉྙཱནི པརལོཀསྨིཾ, པཏིཊྛཱ ཧོནྟི པཱཎིན’’ནྟི༎
Puññāni paralokasmiṃ, patiṭṭhā honti pāṇina’’nti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. ཨཡྻིཀཱསུཏྟཝཎྞནཱ • 2. Ayyikāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. ཨཡྻིཀཱསུཏྟཝཎྞནཱ • 2. Ayyikāsuttavaṇṇanā
