| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๒. อยฺยิกาสุตฺตวณฺณนา
2. Ayyikāsuttavaṇṇanā
๑๓๓. ชราชิณฺณาติ ชราย ชิณฺณาฯ เตน ปากฎชราย มตฺถกปฺปตฺติมาหฯ วโยวุฑฺฒาติ วยสา วุฑฺฒาฯ เตน ปจฺฉิมวยสฺส โอสกฺกสมฺปวตฺติํ วทติฯ ชาติมหลฺลิกาติ ชาติมหตฺตคตาฯ จิรกาลํ อติกฺกนฺตาติ เทฺว ตโย ราชปริวเฎฺฎ วีติวตฺตาฯ วโย-สโทฺท สาธารณวจโนปิ ชิณฺณสทฺทสนฺนิธานโต โอสานวยํ เอว วทตีติ อาห ‘‘ปจฺฉิมวยํ สมฺปตฺตา’’ติฯ อยฺยิกาติ มาตามหิํ สนฺธาย วทติฯ หตฺถี เอว รตนภูโต หตฺถิรตนนฺติ อาห ‘‘สตสหสฺสคฺฆนเกนา’’ติอาทิฯ สพฺพานิ ตานีติ กุมฺภการภาชนานิ, เตหิ สทฺธิํ สตฺตสนฺตานสฺส ปมาณํ ทเสฺสโนฺต ‘‘เตสุ หี’’ติอาทิมาห, ตํ สุวิเญฺญยฺยเมวฯ
133.Jarājiṇṇāti jarāya jiṇṇā. Tena pākaṭajarāya matthakappattimāha. Vayovuḍḍhāti vayasā vuḍḍhā. Tena pacchimavayassa osakkasampavattiṃ vadati. Jātimahallikāti jātimahattagatā. Cirakālaṃ atikkantāti dve tayo rājaparivaṭṭe vītivattā. Vayo-saddo sādhāraṇavacanopi jiṇṇasaddasannidhānato osānavayaṃ eva vadatīti āha ‘‘pacchimavayaṃ sampattā’’ti. Ayyikāti mātāmahiṃ sandhāya vadati. Hatthī eva ratanabhūto hatthiratananti āha ‘‘satasahassagghanakenā’’tiādi. Sabbāni tānīti kumbhakārabhājanāni, tehi saddhiṃ sattasantānassa pamāṇaṃ dassento ‘‘tesu hī’’tiādimāha, taṃ suviññeyyameva.
อยฺยิกาสุตฺตวณฺณนา นิฎฺฐิตาฯ
Ayyikāsuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๒. อยฺยิกาสุตฺตํ • 2. Ayyikāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๒. อยฺยิกาสุตฺตวณฺณนา • 2. Ayyikāsuttavaṇṇanā
