| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
12. බාහිරානත්‌තාතීතානාගතසුත්‌තං
12. Bāhirānattātītānāgatasuttaṃ
12. ‘‘රූපා, භික්‌ඛවෙ, අනත්‌තා අතීතානාගතා; කො පන වාදො පච්‌චුප්‌පන්‌නානං! එවං පස්‌සං, භික්‌ඛවෙ, සුතවා අරියසාවකො අතීතෙසු රූපෙසු අනපෙක්‌ඛො හොති; අනාගතෙ රූපෙ නාභිනන්‌දති; පච්‌චුප්‌පන්‌නානං රූපානං නිබ්‌බිදාය විරාගාය නිරොධාය පටිපන්‌නො හොති. සද්‌දා… ගන්‌ධා… රසා… ඵොට්‌ඨබ්‌බා… ධම්‌මා අනත්‌තා අතීතානාගතා; කො පන වාදො පච්‌චුප්‌පන්‌නානං! එවං පස්‌සං, භික්‌ඛවෙ , සුතවා අරියසාවකො අතීතෙසු ධම්‌මෙසු අනපෙක්‌ඛො හොති; අනාගතෙ ධම්‌මෙ නාභිනන්‌දති; පච්‌චුප්‌පන්‌නානං ධම්‌මානං නිබ්‌බිදාය විරාගාය නිරොධාය පටිපන්‌නො හොතී’’ති. ද්‌වාදසමං.
12. ‘‘Rūpā, bhikkhave, anattā atītānāgatā; ko pana vādo paccuppannānaṃ! Evaṃ passaṃ, bhikkhave, sutavā ariyasāvako atītesu rūpesu anapekkho hoti; anāgate rūpe nābhinandati; paccuppannānaṃ rūpānaṃ nibbidāya virāgāya nirodhāya paṭipanno hoti. Saddā… gandhā… rasā… phoṭṭhabbā… dhammā anattā atītānāgatā; ko pana vādo paccuppannānaṃ! Evaṃ passaṃ, bhikkhave , sutavā ariyasāvako atītesu dhammesu anapekkho hoti; anāgate dhamme nābhinandati; paccuppannānaṃ dhammānaṃ nibbidāya virāgāya nirodhāya paṭipanno hotī’’ti. Dvādasamaṃ.
අනිච්‌චවග්‌ගො පඨමො.
Aniccavaggo paṭhamo.
තස්‌සුද්‌දානං –
Tassuddānaṃ –
අනිච්‌චං දුක්‌ඛං අනත්‌තා ච, තයො අජ්‌ඣත්‌තබාහිරා;
Aniccaṃ dukkhaṃ anattā ca, tayo ajjhattabāhirā;
යදනිච්‌චෙන තයො වුත්‌තා, තෙ තෙ අජ්‌ඣත්‌තබාහිරාති.
Yadaniccena tayo vuttā, te te ajjhattabāhirāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-12. අජ්‌ඣත්‌තානිච්‌චාතීතානාගතසුත්‌තාදිවණ්‌ණනා • 7-12. Ajjhattāniccātītānāgatasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-12. අජ්‌ඣත්‌තානිච්‌චාතීතානාගතසුත්‌තාදිවණ්‌ණනා • 7-12. Ajjhattāniccātītānāgatasuttādivaṇṇanā
