| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பா³ஹிரனிதா³னகதா²
Bāhiranidānakathā
இதா³னி ஸங்வரவினயபஹானவினயாதீ³ஸு ப³ஹூஸு வினயேஸு அத்தனா ‘‘தங் வண்ணயிஸ்ஸங் வினய’’ந்தி ஏவங் ஸங்வண்ணேதப்³ப³பா⁴வேன படிஞ்ஞாதங் வினயங் த³ஸ்ஸெந்தோ ஆஹ தத்தா²திஆதி³. தத்த² தத்தா²தி யதா²வுத்தாஸு கா³தா²ஸு. தாவ-ஸத்³தோ³ பட²மந்தி இமஸ்மிங் அத்தே² த³ட்ட²ப்³போ³, தேன பட²மங் வினயங் வவத்த²பெத்வா பச்சா² தஸ்ஸ வண்ணனங் கரிஸ்ஸாமாதி தீ³பேதி. வவத்த²பேதப்³போ³தி நியமேதப்³போ³. தேனேதங் வுச்சதீதி யஸ்மா வவத்த²பேதப்³போ³, தேன ஹேதுனா ஏதங் வினயோ நாமாதிஆதி³கங் நியாமகவசனங் வுச்சதீதி அத்தோ². அஸ்ஸாதி வினயஸ்ஸ. மாதிகாதி உத்³தே³ஸோ. ஸோ ஹி நித்³தே³ஸபதா³னங் ஜனநீடா²னே டி²தத்தா மாதா வியாதி ‘‘மாதிகா’’தி வுச்சதி.
Idāni saṃvaravinayapahānavinayādīsu bahūsu vinayesu attanā ‘‘taṃ vaṇṇayissaṃ vinaya’’nti evaṃ saṃvaṇṇetabbabhāvena paṭiññātaṃ vinayaṃ dassento āha tatthātiādi. Tattha tatthāti yathāvuttāsu gāthāsu. Tāva-saddo paṭhamanti imasmiṃ atthe daṭṭhabbo, tena paṭhamaṃ vinayaṃ vavatthapetvā pacchā tassa vaṇṇanaṃ karissāmāti dīpeti. Vavatthapetabboti niyametabbo. Tenetaṃ vuccatīti yasmā vavatthapetabbo, tena hetunā etaṃ vinayo nāmātiādikaṃ niyāmakavacanaṃ vuccatīti attho. Assāti vinayassa. Mātikāti uddeso. So hi niddesapadānaṃ jananīṭhāne ṭhitattā mātā viyāti ‘‘mātikā’’ti vuccati.
இதா³னி ஸங்வண்ணேதப்³ப³மத்த²ங் மாதிகங் பட்ட²பெத்வா த³ஸ்ஸெந்தோ ஆஹ வுத்தங் யேனாதிஆதி³. இத³ங் வுத்தங் ஹோதி – ஏதங் தேன ஸமயேன பு³த்³தோ⁴ ப⁴க³வா வேரஞ்ஜாயங் விஹரதீதிஆதி³னிதா³னவசனபடிமண்டி³தங் வினயபிடகங் யேன புக்³க³லேன வுத்தங், யஸ்மிங் காலே வுத்தங், யஸ்மா காரணா வுத்தங், யேன தா⁴ரிதங், யேன ச ஆப⁴தங், யேஸு பதிட்டி²தங், ஏதங் யதா²வுத்தவிதா⁴னங் வத்வா ததோ தேன ஸமயேனாதிஆதி³பாட²ஸ்ஸ அத்த²ங் அனேகப்பகாரதோ த³ஸ்ஸெந்தோ வினயஸ்ஸ அத்த²வண்ணனங் கரிஸ்ஸாமீதி.
Idāni saṃvaṇṇetabbamatthaṃ mātikaṃ paṭṭhapetvā dassento āha vuttaṃ yenātiādi. Idaṃ vuttaṃ hoti – etaṃ tena samayena buddho bhagavā verañjāyaṃ viharatītiādinidānavacanapaṭimaṇḍitaṃ vinayapiṭakaṃ yena puggalena vuttaṃ, yasmiṃ kāle vuttaṃ, yasmā kāraṇā vuttaṃ, yena dhāritaṃ, yena ca ābhataṃ, yesu patiṭṭhitaṃ, etaṃ yathāvuttavidhānaṃ vatvā tato tena samayenātiādipāṭhassa atthaṃ anekappakārato dassento vinayassa atthavaṇṇanaṃ karissāmīti.
எத்த² ச வுத்தங் யேன யதா³ யஸ்மாதி இத³ங் வசனங் தேன ஸமயேன பு³த்³தோ⁴ ப⁴க³வாதிஆதி³னிதா³னவசனமத்தங் அபெக்கி²த்வா வத்துகாமோபி விஸுங் அவத்வா ‘‘நிதா³னேன ஆதி³கல்யாணங், இத³மவோசாதி நிக³மனேன பரியோஸானகல்யாண’’ந்தி வசனதோ நிதா³னநிக³மனானிபி ஸத்து²தே³ஸனாய அனுவிதா⁴னத்தா தத³ந்தோக³தா⁴னேவாதி நிதா³னஸ்ஸாபி வினயபாளியங்யேவ அந்தோக³த⁴த்தா வுத்தங் யேன யதா³ யஸ்மாதி இத³ம்பி வினயபிடகஸம்ப³ந்த⁴ங்யேவ கத்வா மாதிகங் ட²பேதி. மாதிகாய ஹி ஏதந்தி வுத்தங் வினயபிடகங்யேவ ஸாமஞ்ஞதோ ஸப்³ப³த்த² ஸம்ப³ந்த⁴முபக³ச்ச²தி.
Ettha ca vuttaṃ yena yadā yasmāti idaṃ vacanaṃ tena samayena buddho bhagavātiādinidānavacanamattaṃ apekkhitvā vattukāmopi visuṃ avatvā ‘‘nidānena ādikalyāṇaṃ, idamavocāti nigamanena pariyosānakalyāṇa’’nti vacanato nidānanigamanānipi satthudesanāya anuvidhānattā tadantogadhānevāti nidānassāpi vinayapāḷiyaṃyeva antogadhattā vuttaṃ yena yadā yasmāti idampi vinayapiṭakasambandhaṃyeva katvā mātikaṃ ṭhapeti. Mātikāya hi etanti vuttaṃ vinayapiṭakaṃyeva sāmaññato sabbattha sambandhamupagacchati.
இதா³னி பன தங் விஸுங் நீஹரித்வா த³ஸ்ஸெந்தோ தத்த² வுத்தங் யேனாதிஆதி³மாஹ. தத்தா²தி தேஸு மாதிகாபதே³ஸு. இத³ந்தி தேன ஸமயேனாதிஆதி³னிதா³னவசனங். ஹி-ஸத்³தோ³ யஸ்மாதி அத்தோ² த³ட்ட²ப்³போ³, யஸ்மா பு³த்³த⁴ஸ்ஸ ப⁴க³வதோ அத்தபச்சக்க²வசனங் ந ஹோதி, தஸ்மாதி வுத்தங் ஹோதி. அத்தபச்சக்க²வசனங் ந ஹோதீதி அத்தனா பச்சக்க²ங் கத்வா வுத்தவசனங் ந ஹோதி. அத² வா அத்தனோ பச்சக்க²காலே த⁴ரமானகாலே வுத்தவசனங் ந ஹோதி. தது³ப⁴யேனாபி ப⁴க³வதோ வுத்தவசனங் ந ஹோதீதி அத்தோ².
Idāni pana taṃ visuṃ nīharitvā dassento tattha vuttaṃ yenātiādimāha. Tatthāti tesu mātikāpadesu. Idanti tena samayenātiādinidānavacanaṃ. Hi-saddo yasmāti attho daṭṭhabbo, yasmā buddhassa bhagavato attapaccakkhavacanaṃ na hoti, tasmāti vuttaṃ hoti. Attapaccakkhavacanaṃ na hotīti attanā paccakkhaṃ katvā vuttavacanaṃ na hoti. Atha vā attano paccakkhakāle dharamānakāle vuttavacanaṃ na hoti. Tadubhayenāpi bhagavato vuttavacanaṃ na hotīti attho.
