| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. பா³ஹிரப²ஸ்ஸனானத்தஸுத்தாதி³வண்ணனா
9. Bāhiraphassanānattasuttādivaṇṇanā
93-94. நவமே உப்பஜ்ஜதி ரூபஸஞ்ஞாதி வுத்தப்பகாரே ஆரம்மணே உப்பஜ்ஜதி ஸஞ்ஞா. ரூபஸங்கப்போதி தஸ்மிங்யேவ ஆரம்மணே தீஹி சித்தேஹி ஸம்பயுத்தஸங்கப்போ. ரூபஸம்ப²ஸ்ஸோதி ததே³வாரம்மணங் பு²ஸமானோ ப²ஸ்ஸோ. வேத³னாதி ததே³வ ஆரம்மணங் அனுப⁴வமானா வேத³னா. ச²ந்தா³த³யோ வுத்தனயாவ. ரூபலாபோ⁴தி பரியேஸித்வா லத்³த⁴ங் ஸஹ தண்ஹாய ஆரம்மணங் ‘‘ரூபலாபோ⁴’’தி வுத்தங். அயங் தாவ ஸப்³ப³ஸங்கா³ஹிகனயோ ஏகஸ்மிங் யேவாரம்மணே ஸப்³ப³த⁴ம்மானங் உப்பத்திவஸேன வுத்தோ. அபரோ ஆக³ந்துகாரம்மணமிஸ்ஸகோ ஹோதி – ரூபஸஞ்ஞா ரூபஸங்கப்போ ப²ஸ்ஸோ வேத³னாதி இமே தாவ சத்தாரோ த⁴ம்மா து⁴வபரிபோ⁴கே³ நிப³த்³தா⁴ரம்மணே ஹொந்தி. நிப³த்³தா⁴ரம்மணஞ்ஹி இட்ட²ங் கந்தங் மனாபங் பியங் யங்கிஞ்சி விய உபட்டா²தி, ஆக³ந்துகாரம்மணங் பன யங்கிஞ்சி ஸமானம்பி கோ²பெ⁴த்வா திட்ட²தி.
93-94. Navame uppajjati rūpasaññāti vuttappakāre ārammaṇe uppajjati saññā. Rūpasaṅkappoti tasmiṃyeva ārammaṇe tīhi cittehi sampayuttasaṅkappo. Rūpasamphassoti tadevārammaṇaṃ phusamāno phasso. Vedanāti tadeva ārammaṇaṃ anubhavamānā vedanā. Chandādayo vuttanayāva. Rūpalābhoti pariyesitvā laddhaṃ saha taṇhāya ārammaṇaṃ ‘‘rūpalābho’’ti vuttaṃ. Ayaṃ tāva sabbasaṅgāhikanayo ekasmiṃ yevārammaṇe sabbadhammānaṃ uppattivasena vutto. Aparo āgantukārammaṇamissako hoti – rūpasaññā rūpasaṅkappo phasso vedanāti ime tāva cattāro dhammā dhuvaparibhoge nibaddhārammaṇe honti. Nibaddhārammaṇañhi iṭṭhaṃ kantaṃ manāpaṃ piyaṃ yaṃkiñci viya upaṭṭhāti, āgantukārammaṇaṃ pana yaṃkiñci samānampi khobhetvā tiṭṭhati.
தத்ரித³ங் வத்து² – ஏகோ கிர அமச்சபுத்தோ கா³மியேஹி பரிவாரிதோ கா³மமஜ்ஜே² ட²த்வா கம்மங் கரோதி. தஸ்மிஞ்சஸ்ஸ ஸமயே உபாஸிகா நதி³ங் க³ந்த்வா ந்ஹத்வா அலங்கதபடியத்தா தா⁴திக³ணபரிவுதா கே³ஹங் க³ச்ச²தி. ஸோ தூ³ரதோ தி³ஸ்வா ‘‘ஆக³ந்துகமாதுகா³மோ ப⁴விஸ்ஸதீ’’தி ஸஞ்ஞங் உப்பாதெ³த்வா ‘‘க³ச்ச², ப⁴ணே ஜானாஹி, கா ஏஸா’’தி புரிஸங் பேஸேஸி. ஸோ க³ந்த்வா தங் தி³ஸ்வா பச்சாக³தோ, ‘‘கா ஏஸா’’தி புட்டோ² யதா²ஸபா⁴வங் ஆரோசேஸி. ஏவங் ஆக³ந்துகாரம்மணங் கோ²பே⁴தி . தஸ்மிங் உப்பன்னோ ச²ந்தோ³ ரூபச²ந்தோ³ நாம, ததே³வ ஆரம்மணங் கத்வா உப்பன்னோ பரிளாஹோ ரூபபரிளாஹோ நாம, ஸஹாயே க³ண்ஹித்வா தஸ்ஸ பரியேஸனங் ரூபபரியேஸனா நாம, பரியேஸித்வா லத்³த⁴ங் ஸஹ தண்ஹாய ஆரம்மணங் ரூபலாபோ⁴ நாம.
Tatridaṃ vatthu – eko kira amaccaputto gāmiyehi parivārito gāmamajjhe ṭhatvā kammaṃ karoti. Tasmiñcassa samaye upāsikā nadiṃ gantvā nhatvā alaṅkatapaṭiyattā dhātigaṇaparivutā gehaṃ gacchati. So dūrato disvā ‘‘āgantukamātugāmo bhavissatī’’ti saññaṃ uppādetvā ‘‘gaccha, bhaṇe jānāhi, kā esā’’ti purisaṃ pesesi. So gantvā taṃ disvā paccāgato, ‘‘kā esā’’ti puṭṭho yathāsabhāvaṃ ārocesi. Evaṃ āgantukārammaṇaṃ khobheti . Tasmiṃ uppanno chando rūpachando nāma, tadeva ārammaṇaṃ katvā uppanno pariḷāho rūpapariḷāho nāma, sahāye gaṇhitvā tassa pariyesanaṃ rūpapariyesanā nāma, pariyesitvā laddhaṃ saha taṇhāya ārammaṇaṃ rūpalābho nāma.
உருவல்லியவாஸீ சூளதிஸ்ஸத்தே²ரோ பனாஹ – ‘‘கிஞ்சாபி ப⁴க³வதா ப²ஸ்ஸவேத³னா பாளியா மஜ்ஜே² க³ஹிதா, பாளிங் பன பரிவட்டெத்வா வுத்தப்பகாரே ஆரம்மணே உப்பன்னா ஸஞ்ஞா ரூபஸஞ்ஞா, தஸ்மிங்யேவ ஸங்கப்போ ரூபஸங்கப்போ தஸ்மிங் ச²ந்தோ³ ரூபச்ச²ந்தோ³, தஸ்மிங் பரிளாஹோ ரூபபரிளாஹோ, தஸ்மிங் பரியேஸனா ரூபபரியேஸனா, பரியேஸித்வா லத்³த⁴ங் ஸஹ தண்ஹாய ஆரம்மணங் ரூபலாபோ⁴. ஏவங் லத்³தா⁴ரம்மணே பன பு²ஸனங் ப²ஸ்ஸோ, அனுப⁴வனங் வேத³னா. ரூபஸம்ப²ஸ்ஸோ ரூபஸம்ப²ஸ்ஸஜா வேத³னாதி இத³ங் த்³வயங் லப்³ப⁴தீ’’தி. அபரம்பி அவிபூ⁴தவாரங் நாம க³ண்ஹந்தி. ஆரம்மணஞ்ஹி ஸாணிபாகாரேஹி வா பரிக்கி²த்தங் திணபண்ணாதீ³ஹி வா படிச்ச²ன்னங் ஹோதி, தங் ‘‘உபட்³ட⁴ங் தி³ட்ட²ங் மே ஆரம்மணங், ஸுட்டு² நங் பஸ்ஸிஸ்ஸாமீ’’தி ஓலோகயதோ தஸ்மிங் ஆரம்மணே உப்பன்னா ஸஞ்ஞா ரூபஸஞ்ஞா நாம. தஸ்மிங்யேவ உப்பன்னா ஸங்கப்பாத³யோ ரூபஸங்கப்பாத³யோ நாமாதி வேதி³தப்³பா³. எத்தா²பி ச ஸஞ்ஞாஸங்கப்பப²ஸ்ஸவேத³னாச²ந்தா³ ஏகஜவனவாரேபி நானாஜவனவாரேபி லப்³ப⁴ந்தி, பரிளாஹபரியேஸனாலாபா⁴ நானாஜவனவாரேயேவாதி. த³ஸமங் உத்தானமேவாதி. நவமத³ஸமானி.
Uruvalliyavāsī cūḷatissatthero panāha – ‘‘kiñcāpi bhagavatā phassavedanā pāḷiyā majjhe gahitā, pāḷiṃ pana parivaṭṭetvā vuttappakāre ārammaṇe uppannā saññā rūpasaññā, tasmiṃyeva saṅkappo rūpasaṅkappo tasmiṃ chando rūpacchando, tasmiṃ pariḷāho rūpapariḷāho, tasmiṃ pariyesanā rūpapariyesanā, pariyesitvā laddhaṃ saha taṇhāya ārammaṇaṃ rūpalābho. Evaṃ laddhārammaṇe pana phusanaṃ phasso, anubhavanaṃ vedanā. Rūpasamphasso rūpasamphassajā vedanāti idaṃ dvayaṃ labbhatī’’ti. Aparampi avibhūtavāraṃ nāma gaṇhanti. Ārammaṇañhi sāṇipākārehi vā parikkhittaṃ tiṇapaṇṇādīhi vā paṭicchannaṃ hoti, taṃ ‘‘upaḍḍhaṃ diṭṭhaṃ me ārammaṇaṃ, suṭṭhu naṃ passissāmī’’ti olokayato tasmiṃ ārammaṇe uppannā saññā rūpasaññā nāma. Tasmiṃyeva uppannā saṅkappādayo rūpasaṅkappādayo nāmāti veditabbā. Etthāpi ca saññāsaṅkappaphassavedanāchandā ekajavanavārepi nānājavanavārepi labbhanti, pariḷāhapariyesanālābhā nānājavanavāreyevāti. Dasamaṃ uttānamevāti. Navamadasamāni.
நானத்தவக்³கோ³ பட²மோ.
Nānattavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
9. பா³ஹிரப²ஸ்ஸனானத்தஸுத்தங் • 9. Bāhiraphassanānattasuttaṃ
10. து³தியபா³ஹிரப²ஸ்ஸனானத்தஸுத்தங் • 10. Dutiyabāhiraphassanānattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பா³ஹிரப²ஸ்ஸனானத்தஸுத்தாதி³வண்ணனா • 9. Bāhiraphassanānattasuttādivaṇṇanā
