| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
9. б̣аахирапассанаанад̇д̇асуд̇д̇аад̣̇иван̣н̣анаа
9. Bāhiraphassanānattasuttādivaṇṇanā
93-94. навамз уббаж̇ж̇ад̇и руубасан̃н̃аад̇и вуд̇д̇аббагаарз аарамман̣з уббаж̇ж̇ад̇и сан̃н̃аа. руубасан̇габбод̇и д̇асмим̣язва аарамман̣з д̇ийхи жид̇д̇зхи самбаяуд̇д̇асан̇габбо. руубасампассод̇и д̇ад̣̇зваарамман̣ам̣ пусамаано пассо. взд̣̇анаад̇и д̇ад̣̇зва аарамман̣ам̣ анубхавамаанаа взд̣̇анаа. чанд̣̇аад̣̇аяо вуд̇д̇анаяаава. руубалаабход̇и бариязсид̇ваа лад̣̇д̇хам̣ саха д̇ан̣хааяа аарамман̣ам̣ ‘‘руубалаабхо’’д̇и вуд̇д̇ам̣. аяам̣ д̇аава саб̣б̣асан̇г̇аахиганаяо згасмим̣ язваарамман̣з саб̣б̣ад̇хаммаанам̣ уббад̇д̇ивасзна вуд̇д̇о. абаро ааг̇анд̇угаарамман̣амиссаго ход̇и – руубасан̃н̃аа руубасан̇габбо пассо взд̣̇анаад̇и имз д̇аава жад̇д̇ааро д̇хаммаа д̇хувабарибхог̇з ниб̣ад̣̇д̇хаарамман̣з хонд̇и. ниб̣ад̣̇д̇хаарамман̣ан̃хи идтам̣ ганд̇ам̣ манаабам̣ бияам̣ яам̣гин̃жи вияа убадтаад̇и, ааг̇анд̇угаарамман̣ам̣ бана яам̣гин̃жи самаанамби кобхзд̇ваа д̇идтад̇и.
93-94. Navame uppajjati rūpasaññāti vuttappakāre ārammaṇe uppajjati saññā. Rūpasaṅkappoti tasmiṃyeva ārammaṇe tīhi cittehi sampayuttasaṅkappo. Rūpasamphassoti tadevārammaṇaṃ phusamāno phasso. Vedanāti tadeva ārammaṇaṃ anubhavamānā vedanā. Chandādayo vuttanayāva. Rūpalābhoti pariyesitvā laddhaṃ saha taṇhāya ārammaṇaṃ ‘‘rūpalābho’’ti vuttaṃ. Ayaṃ tāva sabbasaṅgāhikanayo ekasmiṃ yevārammaṇe sabbadhammānaṃ uppattivasena vutto. Aparo āgantukārammaṇamissako hoti – rūpasaññā rūpasaṅkappo phasso vedanāti ime tāva cattāro dhammā dhuvaparibhoge nibaddhārammaṇe honti. Nibaddhārammaṇañhi iṭṭhaṃ kantaṃ manāpaṃ piyaṃ yaṃkiñci viya upaṭṭhāti, āgantukārammaṇaṃ pana yaṃkiñci samānampi khobhetvā tiṭṭhati.
д̇ад̇рид̣̇ам̣ вад̇т̇у – зго гира амажжабуд̇д̇о г̇аамиязхи бариваарид̇о г̇аамамаж̇жхз тад̇ваа гаммам̣ гарод̇и. д̇асмин̃жасса самаяз убаасигаа над̣̇им̣ г̇анд̇ваа нхад̇ваа алан̇гад̇абадияад̇д̇аа д̇хаад̇иг̇ан̣абаривуд̇аа г̇зхам̣ г̇ажчад̇и. со д̣̇уурад̇о д̣̇исваа ‘‘ааг̇анд̇угамаад̇уг̇аамо бхависсад̇ий’’д̇и сан̃н̃ам̣ уббаад̣̇зд̇ваа ‘‘г̇ажча, бхан̣з ж̇аанаахи, гаа зсаа’’д̇и бурисам̣ бзсзси. со г̇анд̇ваа д̇ам̣ д̣̇исваа бажжааг̇ад̇о, ‘‘гаа зсаа’’д̇и будто яат̇аасабхаавам̣ аарожзси. звам̣ ааг̇анд̇угаарамман̣ам̣ кобхзд̇и . д̇асмим̣ уббанно чанд̣̇о руубачанд̣̇о наама, д̇ад̣̇зва аарамман̣ам̣ гад̇ваа уббанно барил̣аахо руубабарил̣аахо наама, сахааяз г̇ан̣хид̇ваа д̇асса бариязсанам̣ руубабариязсанаа наама, бариязсид̇ваа лад̣̇д̇хам̣ саха д̇ан̣хааяа аарамман̣ам̣ руубалаабхо наама.
Tatridaṃ vatthu – eko kira amaccaputto gāmiyehi parivārito gāmamajjhe ṭhatvā kammaṃ karoti. Tasmiñcassa samaye upāsikā nadiṃ gantvā nhatvā alaṅkatapaṭiyattā dhātigaṇaparivutā gehaṃ gacchati. So dūrato disvā ‘‘āgantukamātugāmo bhavissatī’’ti saññaṃ uppādetvā ‘‘gaccha, bhaṇe jānāhi, kā esā’’ti purisaṃ pesesi. So gantvā taṃ disvā paccāgato, ‘‘kā esā’’ti puṭṭho yathāsabhāvaṃ ārocesi. Evaṃ āgantukārammaṇaṃ khobheti . Tasmiṃ uppanno chando rūpachando nāma, tadeva ārammaṇaṃ katvā uppanno pariḷāho rūpapariḷāho nāma, sahāye gaṇhitvā tassa pariyesanaṃ rūpapariyesanā nāma, pariyesitvā laddhaṃ saha taṇhāya ārammaṇaṃ rūpalābho nāma.
уруваллияаваасий жуул̣ад̇иссад̇т̇зро банааха – ‘‘гин̃жааби бхаг̇авад̇аа пассавзд̣̇анаа баал̣ияаа маж̇жхз г̇ахид̇аа, баал̣им̣ бана бариваддзд̇ваа вуд̇д̇аббагаарз аарамман̣з уббаннаа сан̃н̃аа руубасан̃н̃аа, д̇асмим̣язва сан̇габбо руубасан̇габбо д̇асмим̣ чанд̣̇о руубажчанд̣̇о, д̇асмим̣ барил̣аахо руубабарил̣аахо, д̇асмим̣ бариязсанаа руубабариязсанаа, бариязсид̇ваа лад̣̇д̇хам̣ саха д̇ан̣хааяа аарамман̣ам̣ руубалаабхо. звам̣ лад̣̇д̇хаарамман̣з бана пусанам̣ пассо, анубхаванам̣ взд̣̇анаа. руубасампассо руубасампассаж̇аа взд̣̇анаад̇и ид̣̇ам̣ д̣̇ваяам̣ лаб̣бхад̇ий’’д̇и. абарамби авибхууд̇аваарам̣ наама г̇ан̣ханд̇и. аарамман̣ан̃хи саан̣ибаагаарзхи ваа баригкид̇д̇ам̣ д̇ин̣абан̣н̣аад̣̇ийхи ваа бадижчаннам̣ ход̇и, д̇ам̣ ‘‘убад̣дхам̣ д̣̇идтам̣ мз аарамман̣ам̣, судту нам̣ бассиссаамий’’д̇и ологаяад̇о д̇асмим̣ аарамман̣з уббаннаа сан̃н̃аа руубасан̃н̃аа наама. д̇асмим̣язва уббаннаа сан̇габбаад̣̇аяо руубасан̇габбаад̣̇аяо наамаад̇и взд̣̇ид̇аб̣б̣аа. зд̇т̇ааби жа сан̃н̃аасан̇габбапассавзд̣̇анаачанд̣̇аа згаж̇аванаваарзби наанааж̇аванаваарзби лаб̣бханд̇и, барил̣аахабариязсанаалаабхаа наанааж̇аванаваарзязваад̇и. д̣̇асамам̣ уд̇д̇аанамзваад̇и. навамад̣̇асамаани.
Uruvalliyavāsī cūḷatissatthero panāha – ‘‘kiñcāpi bhagavatā phassavedanā pāḷiyā majjhe gahitā, pāḷiṃ pana parivaṭṭetvā vuttappakāre ārammaṇe uppannā saññā rūpasaññā, tasmiṃyeva saṅkappo rūpasaṅkappo tasmiṃ chando rūpacchando, tasmiṃ pariḷāho rūpapariḷāho, tasmiṃ pariyesanā rūpapariyesanā, pariyesitvā laddhaṃ saha taṇhāya ārammaṇaṃ rūpalābho. Evaṃ laddhārammaṇe pana phusanaṃ phasso, anubhavanaṃ vedanā. Rūpasamphasso rūpasamphassajā vedanāti idaṃ dvayaṃ labbhatī’’ti. Aparampi avibhūtavāraṃ nāma gaṇhanti. Ārammaṇañhi sāṇipākārehi vā parikkhittaṃ tiṇapaṇṇādīhi vā paṭicchannaṃ hoti, taṃ ‘‘upaḍḍhaṃ diṭṭhaṃ me ārammaṇaṃ, suṭṭhu naṃ passissāmī’’ti olokayato tasmiṃ ārammaṇe uppannā saññā rūpasaññā nāma. Tasmiṃyeva uppannā saṅkappādayo rūpasaṅkappādayo nāmāti veditabbā. Etthāpi ca saññāsaṅkappaphassavedanāchandā ekajavanavārepi nānājavanavārepi labbhanti, pariḷāhapariyesanālābhā nānājavanavāreyevāti. Dasamaṃ uttānamevāti. Navamadasamāni.
наанад̇д̇аваг̇г̇о батамо.
Nānattavaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya
9. б̣аахирапассанаанад̇д̇асуд̇д̇ам̣ • 9. Bāhiraphassanānattasuttaṃ
10. д̣̇уд̇ияаб̣аахирапассанаанад̇д̇асуд̇д̇ам̣ • 10. Dutiyabāhiraphassanānattasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 9. б̣аахирапассанаанад̇д̇асуд̇д̇аад̣̇иван̣н̣анаа • 9. Bāhiraphassanānattasuttādivaṇṇanā
