| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. ពាហិរផស្សនានត្តសុត្តាទិវណ្ណនា
9. Bāhiraphassanānattasuttādivaṇṇanā
៩៣. វុត្តប្បការេ អារម្មណេតិ ‘‘អាបាថេ បតិត’’ន្តិអាទិនា ហេដ្ឋា វុត្តប្បការេ រូបារម្មណេ។ សញ្ញាតិ រូបសញ្ញាវ។ អរូបធម្មោបិ សមានោ យស្មិំ អារម្មណេ បវត្តតិ, តំ ផុសន្តោ វិយ ហោតីតិ វុត្តំ ‘‘អារម្មណំ ផុសមានោ’’តិ។ តណ្ហាយ វត្ថុភូតំយេវ រូបារម្មណំ លព្ភតីតិ កត្វា ‘‘រូបលាភោ’’តិ អធិប្បេតន្តិ អាហ ‘‘សហ តណ្ហាយ អារម្មណំ រូបលាភោ’’តិ។ សព្ពសង្គាហិកនយោតិ ឯកស្មិំយេវ អារម្មណេ សព្ពេសំ សញ្ញាទីនំ ធម្មានំ ឧប្បត្តិយា សព្ពសង្គណ្ហនវសេន ទស្សិតនយោ។ តេនាហ ‘‘ឯកស្មិំយេវា’’តិអាទិ។ សព្ពសង្គាហិកនយោតិ វា ធុវបរិភោគវសេន និពទ្ធារម្មណន្តិ វា អាគន្តុការម្មណន្តិ វា វិភាគំ អកត្វា សព្ពសង្គាហិកនយោ។ អបរោ នយោ។ មិស្សកោតិ អាគន្តុការម្មណេ និពទ្ធារម្មណេ ច វិសយតោ និពទ្ធារម្មណេន មិស្សកោ។ និពទ្ធារម្មណេ សត្តានំ កិលេសោ មន្ទោ ហោតិ។ តថា ហិ សញ្ញាសង្កប្បផស្សវេទនាវ ទស្សិតា។ យំ កិញ្ចិ វិយាតិ យំ កិញ្ចិ អញ្ញមញ្ញំ វិយ។ ខោភេត្វាតិ កុតូហលុប្បាទនវសេន ចិត្តំ ខោភេត្វា។
93.Vuttappakāreārammaṇeti ‘‘āpāthe patita’’ntiādinā heṭṭhā vuttappakāre rūpārammaṇe. Saññāti rūpasaññāva. Arūpadhammopi samāno yasmiṃ ārammaṇe pavattati, taṃ phusanto viya hotīti vuttaṃ ‘‘ārammaṇaṃ phusamāno’’ti. Taṇhāya vatthubhūtaṃyeva rūpārammaṇaṃ labbhatīti katvā ‘‘rūpalābho’’ti adhippetanti āha ‘‘saha taṇhāya ārammaṇaṃ rūpalābho’’ti. Sabbasaṅgāhikanayoti ekasmiṃyeva ārammaṇe sabbesaṃ saññādīnaṃ dhammānaṃ uppattiyā sabbasaṅgaṇhanavasena dassitanayo. Tenāha ‘‘ekasmiṃyevā’’tiādi. Sabbasaṅgāhikanayoti vā dhuvaparibhogavasena nibaddhārammaṇanti vā āgantukārammaṇanti vā vibhāgaṃ akatvā sabbasaṅgāhikanayo. Aparo nayo. Missakoti āgantukārammaṇe nibaddhārammaṇe ca visayato nibaddhārammaṇena missako. Nibaddhārammaṇe sattānaṃ kileso mando hoti. Tathā hi saññāsaṅkappaphassavedanāva dassitā. Yaṃ kiñci viyāti yaṃ kiñci aññamaññaṃ viya. Khobhetvāti kutūhaluppādanavasena cittaṃ khobhetvā.
ឧបាសិកាតិ តស្ស អមច្ចបុត្តស្ស ភរិយំ សន្ធាយាហ។ តស្មិន្តិ អាគន្តុការម្មណេ។ លាភោ នាម ‘‘លព្ភតី’’តិ កត្វា។
Upāsikāti tassa amaccaputtassa bhariyaṃ sandhāyāha. Tasminti āgantukārammaṇe. Lābho nāma ‘‘labbhatī’’ti katvā.
ឧរុវល្លិយវាសីតិ ឧរុវល្លិយលេណវាសី, ឧរុវល្លិយវិហារវាសីតិ វទន្តិ។ បាឡិយាតិ ‘‘ធាតុនានត្តំ, ភិក្ខវេ, បដិច្ច ឧប្បជ្ជតី’’តិអាទិនយបវត្តាយ ឥមិស្សា សុត្តបាឡិយា។ បរិវដ្ដេត្វាតិ មជ្ឈេ គហិតផស្សវេទនាបរិយោសានេ ឋបនវសេន បាឡិំ បរិវដ្ដេត្វា។ វុត្តប្បការេតិអាទិ បរិវត្តេតព្ពាការទស្សនំ។ តត្ថ វុត្តប្បការេតិ អាបាថគតរូបារម្មណេ។ អវិភូតវារន្តិ អវិភូតារម្មណវារំ។ អយមេវ វា បាឋោ។ គណ្ហន្តិ កថេន្តិ។ ឯកជវនវារេបិ លព្ភន្តិ ចិរតរនិវេសាភាវា។ នានាជវនវារេយេវ ទឡ្ហតរនិវេសតាយ។
Uruvalliyavāsīti uruvalliyaleṇavāsī, uruvalliyavihāravāsīti vadanti. Pāḷiyāti ‘‘dhātunānattaṃ, bhikkhave, paṭicca uppajjatī’’tiādinayapavattāya imissā suttapāḷiyā. Parivaṭṭetvāti majjhe gahitaphassavedanāpariyosāne ṭhapanavasena pāḷiṃ parivaṭṭetvā. Vuttappakāretiādi parivattetabbākāradassanaṃ. Tattha vuttappakāreti āpāthagatarūpārammaṇe. Avibhūtavāranti avibhūtārammaṇavāraṃ. Ayameva vā pāṭho. Gaṇhanti kathenti. Ekajavanavārepi labbhanti cirataranivesābhāvā. Nānājavanavāreyeva daḷhataranivesatāya.
៩៤. ទសមំ ឧត្តានមេវ នវមេ វុត្តនយត្តា។ បដិសេធមត្តមេវ ហេត្ថ នានត្តន្តិ។
94.Dasamaṃ uttānameva navame vuttanayattā. Paṭisedhamattameva hettha nānattanti.
ពាហិរផស្សនានត្តសុត្តាទិវណ្ណនា និដ្ឋិតា។
Bāhiraphassanānattasuttādivaṇṇanā niṭṭhitā.
នានត្តវគ្គវណ្ណនា និដ្ឋិតា។
Nānattavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៩. ពាហិរផស្សនានត្តសុត្តំ • 9. Bāhiraphassanānattasuttaṃ
១០. ទុតិយពាហិរផស្សនានត្តសុត្តំ • 10. Dutiyabāhiraphassanānattasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. ពាហិរផស្សនានត្តសុត្តាទិវណ្ណនា • 9. Bāhiraphassanānattasuttādivaṇṇanā
