| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༩. བཱཧིརཕསྶནཱནཏྟསུཏྟཾ
9. Bāhiraphassanānattasuttaṃ
༩༣. སཱཝཏྠིཡཾ ཝིཧརཏི…པེ॰… ‘‘དྷཱཏུནཱནཏྟཾ, བྷིཀྑཝེ, པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟཾ, སངྐཔྤནཱནཏྟཾ པཊིཙྩ ཨུཔྤཛྫཏི ཕསྶནཱནཏྟཾ , ཕསྶནཱནཏྟཾ པཊིཙྩ ཨུཔྤཛྫཏི ཝེདནཱནཱནཏྟཾ, ཝེདནཱནཱནཏྟཾ པཊིཙྩ ཨུཔྤཛྫཏི ཚནྡནཱནཏྟཾ, ཚནྡནཱནཏྟཾ པཊིཙྩ ཨུཔྤཛྫཏི པརིལཱ༹ཧནཱནཏྟཾ, པརིལཱ༹ཧནཱནཏྟཾ པཊིཙྩ ཨུཔྤཛྫཏི པརིཡེསནཱནཱནཏྟཾ , པརིཡེསནཱནཱནཏྟཾ པཊིཙྩ ཨུཔྤཛྫཏི ལཱབྷནཱནཏྟཾ། ཀཏམཉྩ, བྷིཀྑཝེ, དྷཱཏུནཱནཏྟཾ? རཱུཔདྷཱཏུ…པེ॰… དྷམྨདྷཱཏུ – ཨིདཾ ཝུཙྩཏི, བྷིཀྑཝེ, དྷཱཏུནཱནཏྟཾ’’།
93. Sāvatthiyaṃ viharati…pe… ‘‘dhātunānattaṃ, bhikkhave, paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati phassanānattaṃ , phassanānattaṃ paṭicca uppajjati vedanānānattaṃ, vedanānānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ , pariyesanānānattaṃ paṭicca uppajjati lābhanānattaṃ. Katamañca, bhikkhave, dhātunānattaṃ? Rūpadhātu…pe… dhammadhātu – idaṃ vuccati, bhikkhave, dhātunānattaṃ’’.
‘‘ཀཐཉྩ, བྷིཀྑཝེ, དྷཱཏུནཱནཏྟཾ པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི…པེ॰… ལཱབྷནཱནཏྟཾ?
‘‘Kathañca, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati…pe… lābhanānattaṃ?
‘‘རཱུཔདྷཱཏུཾ, བྷིཀྑཝེ, པཊིཙྩ ཨུཔྤཛྫཏི རཱུཔསཉྙཱ, རཱུཔསཉྙཾ པཊིཙྩ ཨུཔྤཛྫཏི རཱུཔསངྐཔྤོ, རཱུཔསངྐཔྤཾ པཊིཙྩ ཨུཔྤཛྫཏི རཱུཔསམྥསྶོ, རཱུཔསམྥསྶཾ པཊིཙྩ ཨུཔྤཛྫཏི རཱུཔསམྥསྶཛཱ ཝེདནཱ, རཱུཔསམྥསྶཛཾ ཝེདནཾ པཊིཙྩ ཨུཔྤཛྫཏི རཱུཔཙྪནྡོ, རཱུཔཙྪནྡཾ པཊིཙྩ ཨུཔྤཛྫཏི རཱུཔཔརིལཱ༹ཧོ, རཱུཔཔརིལཱ༹ཧཾ པཊིཙྩ ཨུཔྤཛྫཏི རཱུཔཔརིཡེསནཱ, རཱུཔཔརིཡེསནཾ པཊིཙྩ ཨུཔྤཛྫཏི རཱུཔལཱབྷོ…པེ॰… དྷམྨདྷཱཏུཾ པཊིཙྩ ཨུཔྤཛྫཏི དྷམྨསཉྙཱ, དྷམྨསཉྙཾ པཊིཙྩ ཨུཔྤཛྫཏི དྷམྨསངྐཔྤོ, དྷམྨསངྐཔྤཾ པཊིཙྩ ཨུཔྤཛྫཏི དྷམྨསམྥསྶོ, དྷམྨསམྥསྶཾ པཊིཙྩ ཨུཔྤཛྫཏི དྷམྨསམྥསྶཛཱ ཝེདནཱ, དྷམྨསམྥསྶཛཾ ཝེདནཾ པཊིཙྩ ཨུཔྤཛྫཏི དྷམྨཙྪནྡོ, དྷམྨཙྪནྡཾ པཊིཙྩ ཨུཔྤཛྫཏི དྷམྨཔརིལཱ༹ཧོ, དྷམྨཔརིལཱ༹ཧཾ པཊིཙྩ ཨུཔྤཛྫཏི དྷམྨཔརིཡེསནཱ, དྷམྨཔརིཡེསནཾ པཊིཙྩ ཨུཔྤཛྫཏི དྷམྨལཱབྷོ །
‘‘Rūpadhātuṃ, bhikkhave, paṭicca uppajjati rūpasaññā, rūpasaññaṃ paṭicca uppajjati rūpasaṅkappo, rūpasaṅkappaṃ paṭicca uppajjati rūpasamphasso, rūpasamphassaṃ paṭicca uppajjati rūpasamphassajā vedanā, rūpasamphassajaṃ vedanaṃ paṭicca uppajjati rūpacchando, rūpacchandaṃ paṭicca uppajjati rūpapariḷāho, rūpapariḷāhaṃ paṭicca uppajjati rūpapariyesanā, rūpapariyesanaṃ paṭicca uppajjati rūpalābho…pe… dhammadhātuṃ paṭicca uppajjati dhammasaññā, dhammasaññaṃ paṭicca uppajjati dhammasaṅkappo, dhammasaṅkappaṃ paṭicca uppajjati dhammasamphasso, dhammasamphassaṃ paṭicca uppajjati dhammasamphassajā vedanā, dhammasamphassajaṃ vedanaṃ paṭicca uppajjati dhammacchando, dhammacchandaṃ paṭicca uppajjati dhammapariḷāho, dhammapariḷāhaṃ paṭicca uppajjati dhammapariyesanā, dhammapariyesanaṃ paṭicca uppajjati dhammalābho .
‘‘ཨེཝཾ ཁོ, བྷིཀྑཝེ, དྷཱཏུནཱནཏྟཾ པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི…པེ॰… པརིཡེསནཱནཱནཏྟཾ, པརིཡེསནཱནཱནཏྟཾ པཊིཙྩ ཨུཔྤཛྫཏི ལཱབྷནཱནཏྟ’’ནྟི། ནཝམཾ།
‘‘Evaṃ kho, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati…pe… pariyesanānānattaṃ, pariyesanānānattaṃ paṭicca uppajjati lābhanānatta’’nti. Navamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༩. བཱཧིརཕསྶནཱནཏྟསུཏྟཱདིཝཎྞནཱ • 9. Bāhiraphassanānattasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༩. བཱཧིརཕསྶནཱནཏྟསུཏྟཱདིཝཎྞནཱ • 9. Bāhiraphassanānattasuttādivaṇṇanā
