| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೮. ಬಾಹಿತಿಕಸುತ್ತವಣ್ಣನಾ
8. Bāhitikasuttavaṇṇanā
೩೫೮. ಏವಂ ಮೇ ಸುತನ್ತಿ ಬಾಹಿತಿಕಸುತ್ತಂ। ತತ್ಥ ಏಕಪುಣ್ಡರೀಕಂ ನಾಗನ್ತಿ ಏವಂನಾಮಕಂ ಹತ್ಥಿಂ। ತಸ್ಸ ಕಿರ ಫಾಸುಕಾನಂ ಉಪರಿ ತಾಲಫಲಮತ್ತಂ ಪಣ್ಡರಟ್ಠಾನಂ ಅತ್ಥಿ , ತೇನಸ್ಸ ಏಕಪುಣ್ಡರೀಕೋತಿ ನಾಮಂ ಅಕಂಸು। ಸಿರಿವಡ್ಢಂ ಮಹಾಮತ್ತನ್ತಿ ಪಚ್ಚೇಕಹತ್ಥಿಂ ಅಭಿರುಹಿತ್ವಾ ಕಥಾಫಾಸುಕತ್ಥಂ ಸದ್ಧಿಂ ಗಚ್ಛನ್ತಂ ಏವಂನಾಮಕಂ ಮಹಾಮತ್ತಂ। ಆಯಸ್ಮಾನೋತಿ ಏತ್ಥ ನೋತಿ ಪುಚ್ಛಾಯ ನಿಪಾತೋ। ಮಹಾಮತ್ತೋ ಥೇರಸ್ಸ ಸಙ್ಘಾಟಿಪತ್ತಧಾರಣಾಕಾರಂ ಸಲ್ಲಕ್ಖೇತ್ವಾ ‘‘ಏವಂ, ಮಹಾರಾಜಾ’’ತಿ ಆಹ।
358.Evaṃme sutanti bāhitikasuttaṃ. Tattha ekapuṇḍarīkaṃ nāganti evaṃnāmakaṃ hatthiṃ. Tassa kira phāsukānaṃ upari tālaphalamattaṃ paṇḍaraṭṭhānaṃ atthi , tenassa ekapuṇḍarīkoti nāmaṃ akaṃsu. Sirivaḍḍhaṃ mahāmattanti paccekahatthiṃ abhiruhitvā kathāphāsukatthaṃ saddhiṃ gacchantaṃ evaṃnāmakaṃ mahāmattaṃ. Āyasmānoti ettha noti pucchāya nipāto. Mahāmatto therassa saṅghāṭipattadhāraṇākāraṃ sallakkhetvā ‘‘evaṃ, mahārājā’’ti āha.
೩೫೯. ಓಪಾರಮ್ಭೋತಿ ಉಪಾರಮ್ಭಂ ದೋಸಂ ಆರೋಪನಾರಹೋ। ಕಿಂ ಪುಚ್ಛಾಮೀತಿ ರಾಜಾ ಪುಚ್ಛತಿ। ಸುನ್ದರಿವತ್ಥುಸ್ಮಿಂ ಉಪ್ಪನ್ನಮಿದಂ ಸುತ್ತಂ, ತಂ ಪುಚ್ಛಾಮೀತಿ ಪುಚ್ಛತಿ। ಯಞ್ಹಿ ಮಯಂ, ಭನ್ತೇತಿ, ಭನ್ತೇ, ಯಂ ಮಯಂ ವಿಞ್ಞೂಹೀತಿ ಇದಂ ಪದಂ ಗಹೇತ್ವಾ ಪಞ್ಹೇನ ಪರಿಪೂರೇತುಂ ನಾಸಕ್ಖಿಮ್ಹಾ, ತಂ ಕಾರಣಂ ಆಯಸ್ಮತಾ ಏವಂ ವದನ್ತೇನ ಪರಿಪೂರಿತಂ।
359.Opārambhoti upārambhaṃ dosaṃ āropanāraho. Kiṃ pucchāmīti rājā pucchati. Sundarivatthusmiṃ uppannamidaṃ suttaṃ, taṃ pucchāmīti pucchati. Yañhi mayaṃ, bhanteti, bhante, yaṃ mayaṃ viññūhīti idaṃ padaṃ gahetvā pañhena paripūretuṃ nāsakkhimhā, taṃ kāraṇaṃ āyasmatā evaṃ vadantena paripūritaṃ.
೩೬೦. ಅಕುಸಲೋತಿ ಅಕೋಸಲ್ಲಸಮ್ಭೂತೋ। ಸಾವಜ್ಜೋತಿ ಸದೋಸೋ। ಸಬ್ಯಾಬಜ್ಝೋತಿ ಸದುಕ್ಖೋ। ದುಕ್ಖವಿಪಾಕೋತಿ ಇಧ ನಿಸ್ಸನ್ದವಿಪಾಕೋ ಕಥಿತೋ। ತಸ್ಸಾತಿ ತಸ್ಸ ಏವಂ ಅತ್ತಬ್ಯಾಬಾಧಾದೀನಂ ಅತ್ಥಾಯ ಪವತ್ತಕಾಯಸಮಾಚಾರಸ್ಸ।
360.Akusaloti akosallasambhūto. Sāvajjoti sadoso. Sabyābajjhoti sadukkho. Dukkhavipākoti idha nissandavipāko kathito. Tassāti tassa evaṃ attabyābādhādīnaṃ atthāya pavattakāyasamācārassa.
ಸಬ್ಬಾಕುಸಲಧಮ್ಮಪಹೀನೋ ಖೋ, ಮಹಾರಾಜ, ತಥಾಗತೋ ಕುಸಲಧಮ್ಮಸಮನ್ನಾಗತೋತಿ ಏತ್ಥ ಸಬ್ಬೇಸಂಯೇವ ಅಕುಸಲಾನಂ ಧಮ್ಮಾನಂ ಪಹಾನಂ ವಣ್ಣೇತೀತಿ। ಆಮ ವಣ್ಣೇತೀತಿ ವುತ್ತೇ ಯಥಾ ಪುಚ್ಛಾ, ತಥಾ ಅತ್ಥೋ ವುತ್ತೋ ಭವೇಯ್ಯ। ಏವಂ ಬ್ಯಾಕರಣಂ ಪನ ನ ಭಾರಿಯಂ। ಅಪ್ಪಹೀನಅಕುಸಲೋಪಿ ಹಿ ಪಹಾನಂ ವಣ್ಣೇಯ್ಯ, ಭಗವಾ ಪನ ಪಹೀನಾಕುಸಲತಾಯ ಯಥಾಕಾರೀ ತಥಾವಾದೀತಿ ದಸ್ಸೇತುಂ ಏವಂ ಬ್ಯಾಕಾಸಿ। ಸುಕ್ಕಪಕ್ಖೇಪಿ ಏಸೇವ ನಯೋ।
Sabbākusaladhammapahīno kho, mahārāja, tathāgato kusaladhammasamannāgatoti ettha sabbesaṃyeva akusalānaṃ dhammānaṃ pahānaṃ vaṇṇetīti. Āma vaṇṇetīti vutte yathā pucchā, tathā attho vutto bhaveyya. Evaṃ byākaraṇaṃ pana na bhāriyaṃ. Appahīnaakusalopi hi pahānaṃ vaṇṇeyya, bhagavā pana pahīnākusalatāya yathākārī tathāvādīti dassetuṃ evaṃ byākāsi. Sukkapakkhepi eseva nayo.
೩೬೨. ಬಾಹಿತಿಕಾತಿ ಬಾಹಿತಿರಟ್ಠೇ ಉಟ್ಠಿತವತ್ಥಸ್ಸೇತಂ ನಾಮಂ। ಸೋಳಸಸಮಾ ಆಯಾಮೇನಾತಿ ಆಯಾಮೇನ ಸಮಸೋಳಸಹತ್ಥಾ। ಅಟ್ಠಸಮಾ ವಿತ್ಥಾರೇನಾತಿ ವಿತ್ಥಾರೇನ ಸಮಅಟ್ಠಹತ್ಥಾ।
362.Bāhitikāti bāhitiraṭṭhe uṭṭhitavatthassetaṃ nāmaṃ. Soḷasasamā āyāmenāti āyāmena samasoḷasahatthā. Aṭṭhasamā vitthārenāti vitthārena samaaṭṭhahatthā.
೩೬೩. ಭಗವತೋ ಪಾದಾಸೀತಿ ಭಗವತೋ ನಿಯ್ಯಾತೇಸಿ। ದತ್ವಾ ಚ ಪನ ಗನ್ಧಕುಟಿಯಂ ವಿತಾನಂ ಕತ್ವಾ ಬನ್ಧಿ। ತತೋ ಪಟ್ಠಾಯ ಗನ್ಧಕುಟಿ ಭಿಯ್ಯೋಸೋಮತ್ತಾಯ ಸೋಭಿ। ಸೇಸಂ ಸಬ್ಬತ್ಥ ಉತ್ತಾನಮೇವ। ನೇಯ್ಯಪುಗ್ಗಲಸ್ಸ ಪನ ವಸೇನ ಅಯಂ ದೇಸನಾ ನಿಟ್ಠಿತಾತಿ।
363.Bhagavatopādāsīti bhagavato niyyātesi. Datvā ca pana gandhakuṭiyaṃ vitānaṃ katvā bandhi. Tato paṭṭhāya gandhakuṭi bhiyyosomattāya sobhi. Sesaṃ sabbattha uttānameva. Neyyapuggalassa pana vasena ayaṃ desanā niṭṭhitāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಬಾಹಿತಿಕಸುತ್ತವಣ್ಣನಾ ನಿಟ್ಠಿತಾ।
Bāhitikasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೮. ಬಾಹಿತಿಕಸುತ್ತಂ • 8. Bāhitikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೮. ಬಾಹಿತಿಕಸುತ್ತವಣ್ಣನಾ • 8. Bāhitikasuttavaṇṇanā
